PA Kategorial GBKP Tgl. 16 - 22 Pebruari 2020

PA MORIA GBKP TGL. 16 - 22 PEBRUARI 2020

(PA HDS 1)

Pdt. Larena br. Sinuhadji (Nd. Rey Rapha Tarigan)

Ogen : 2 Raja-raja 5:1-16

Tema : BEGIKEN RAS IKUTKENLAH

Tujun : Gelah Moria :

1) Meteh maka Naaman ngikutken perkatan nabi seh maka malem pinakitna.

2) Muat bagin nuduhken dalan pulah man kalak si sakit.

Metode : Drama

Naaman e me panglima tentera Siria (bangsa Aram)[1] si tuhu-tuhu ipehaga ras ikelengi raja Siria sabab arah Naaman me Tuhan enggo mereken kemenangen man tentera Siria, sabab ia tentera si mbisa. Tapi lit pinakit kulitna e me kusta. Sada paksa waktu, sekalak suruh-suruhen ndeharana, e me diberu kalak Israel si kitik denga (asum iserang Siria negara Israel, itawan tentera Siria sekalak diberu bangsa Israel si kitik denga) ngatakenca man bana maka lit sekalak nabi si mbisa i Samaria si banci mpepalem pinakit bulangenna. Berita enda ipeseh ndeharana man Naaman. Kedungenna, idahi Naaman me raja Siria ras iturikenna bagi si enggo ikataken suruh-suruhen ndeharana ndai. Kedungenna, isuruh raja me Naaman berkat ku Israel  jumpai raja Israel ras mereken surat raja Siria man bana.

Berkat Naaman ras ibabana erbage-bage barang si meherga: 30.000 ribu duit pirak, 6.000 duit emas, 10 pasang uis mejile dingen surat arah Raja Siria si isina, “Arah surat enda kupetandaken man bandu sekalak tenteraku, Naaman gelarna. Ngarap aku maka ipepalemndu pinakitna”.

Kenca ioge raja Israel surat arah Raja Siria kepeken lain responna, iakapna Raja Siria ndarami perubaten, janah situhuna memang kebiaren man Raja Israel, i ja sedekah enda kemenangen tetap bas pihak Raja Siria. Icaingkenna bajuna perban biarna, janah nina, “Uga banci Raja Siria ngarapken aku pepalem kalak enda? Iakapna kin aku Tuhan si erkuasa kerna kegeluhen ras kematen? Enggo tangkas ndarami perubaten saja ngenca atena ras aku”. Kepeken berita enda seh man man Nabi  Elisa. Emaka ipetetapna ukur Raja Israel ula aru atena, ras suruhna gelah Raja nuruh Naaman guna ndahi Nabi Elisa, gelah alu bage ietehna lit nabi i Israel.

La ndekahsa, lawes Naaman ras kudana rikut kereta perangna, je nari ngadi i dalan bengket ku rumah Elisa. Langsung isuruh Elisa suruh-suruhen ngatakenca gelah Naaman ridi pitu kali i Lau Jordan gelah malem pinakitna. Tapi kepeken Naaman menganggap sepele kai si enggo ibelasken Elisa. Merawa-rawa ia. Iarapekenna reh Elisa ndahi Naaman, ertoto man Dibata je nari iiapkenna tan i babo dagingna si sakit gelah malem pinakitna. Tambah si e, ndauh ulin Lau Abana ras Parpar i Damaskus[2]  (ibu kota Siria), asangken lau mbelin apai pe i Israel enda. Bage nina Naaman i bas rawana. Tapi reh suruh-suruhenna ndeheri Naaman alu ngatakenca adi si mesera pe nggit nge Naaman ngelakokenca, ras genduari si murah nge kataken nabi e, engkai maka bagi si mberat Naaman ngelakokenca? Emaka mulihi ipertegas suruh-suruhenna gelah Naaman ridi saja i sungai Jordan gelah malem pinakitna. Emaka nusur Naaman ku sungai Jordan ras igedapkenna bana pitu kali i bas lau e, bagi si iperentahken Elisa. Emaka enggo malem tuhu-tuhu pinakitna. Jukutna jadi bersih ras sehat, desken jukut sekalak anak-anak.

Kenca si e, mulihken Naaman ras anak buahna ndahi Elisa. I je ipujina Dibata Israel, “Genduari enggo kueteh maka la lit Dibata i bas kerina doni enda seakatan Dibata Israel”. Emaka iberekenna pemerena man Nabi Elisa. Tapi Elisa la nggit ngalokenca.

Situhuna, labo sungai Jordan si mpepalem pinakit Naaman tapi kuasa Dibata bagi si enggo ikataken Naaman sendiri. Kuasa Dibata si la ersibar si ngasup mpepalem pinakit kai pe termasuk kalak kai pe, labo hanya kalak Israel. Situhuna, kalak Israel sendiri kurang nggejapken ras ernalem man kuasa Tuhan tapi berpaling ersembah man dibata-dibata si deban (bdk. 1 Raja-raja 18). Enda pe banci siidah asum reh surat arah Raja Siria, i ja minter mbiar Raja Israel, lupa ia maka kepeken lit suruh-suruhen Tuhan i daerahna sendiri e me Elisa. Si iperluken i jenda kiniteruken ukur, ras taat megiken ras ngikutken kata Tuhan. Awalna, Naaman tinggi hati, sabab sepele kel ia nandangi kai si ikataken Elisa. Tapi kenca enggo ipersingeti anak buahna, robah ia, je nari patuh ngikutken kai si ikataken nabi.

Tema-ta “Begiken ras ikutkenlah”, e me ngerana soal ketaatan. Ketaatanta man Tuhan Dibata si mada geluhta. Sabab mekatep si terjadi la kita taat. Sibegiken tapi la siikutken entah pe la sibegiken apai ka siikutken kata Tuhan. Lit kekerasan ukur bas kita, la kita nggit taat, mesera ras latih siakap ngikutken peraten Tuhan, rsd.

Secara khusus tujun si peduaken, e me muat bagin nuduhken dalan pulah man kalak si sakit. Adi rikutken teks, suruh-surehen ndehara Naaman, suruh-suruhen Naaman e me alat Dibata si ipake guna nuduhken dalan man Naaman si sangana sakit. Bahkan Nabi Elisa sendiri. Sebab ‘di kenca enggo sakit, terlebih mekelek pinakitta, pasti latih kel ukurta. Sada hal si pasti kuasa kesembuhen lit i bas Tuhan. Beliden kuasa Tuhan asangken kuasa kai pe termasuk sakit pinakit si ialami kita. Erbage-bage cara Dibata pepalem pinakitta, melalui tambar medis, dokter, tambar kuta si la bertentangen ras kinitekennta (kuasa perdukunen). Otoritas menyembuhkan lit bas Dibata, kita hanya mindo perkuah ateNa gelah banci iberekenNa kesembuhen. Emaka adi kita sakit, si penting, tetap semangat ertambar ras tetap pindo gegeh ras kuasa kesembuhen i bas Dibata nari. Adi lit temanta si sakit, sidahi, sisemangati, sidukung dalam doa, adi lit sieteh tambar entah dokter si beluh nambarisa, banci sibereken saran. Si paling penting ula baba temanta reh kotena ras ndabuh ia ku bas dosa erkiteken situduhken dalan si la ngena ate Dibata.

PA MAMRE GBKP TGL. 16 - 22 PEBRUARI 2020

Pdt. Larena br. Sinuhadji (Nd. Rey Rapha Tarigan)

Ogen : Jeremia 29:12-13

Tema : NDARAMI DIBATA ALU BULAT UKUR

Tujun : Gelah Mamre :

1) Nggejapken ketedehen atena e me ndarami Dibata

2) Ikut muat bagin i bas Mamre Centre

Metode : Diskusi

Jeremia 29 ibere judul “Surat Jeremia man kalak Jahudi i Babilon” (TB-LAI: “Surat kiriman kepada orang-orang buangan di Babel”), isina e me mpetetap ukur kalak Jahudi si i Babel ras kegiaten-kegiaten si arus ilakoken bangsa enda sedekah tading i pembuangen. Sabab ope bindu 29 Nabi Hanani melasken kata palsu (guak) maka tading dua tahun nari bangsa Jahudi i Babilon. I bas bindu 28:2,3, “Kuasa raja Babilon enggo kuperperken. I bas dua tahun enda kubaba mulihken ku ingan enda kerna uga-ugas…”. Tentu saja nubuaten si la tuhu enda pe banci mpengaruhi kegeluhen kalak Jahudi si ipembuangen. Emaka ibahan Jeremia surat man kalak Jahudi i pembuangen maka situhuna, adi enggo genep pitu puluh tahun bangsa enda i Babilon maka enggo banci mulih ku Israel (kanaan) (ay. 10). Emaka guna mengisi waktu tetap bangsa enda arus berkarya, ndahiken dahinna tep-tep wari alu mehuli e me majeken rumah, suani peken ras pan ulihna, erjabu dingen mupus kam, je nari pejabu ka anak-anakndu maka ia pe mupus ka. Arus tambah beligan bangsa Jahudi ula erurakna. Erdahinlah guna kiniulin kuta-kuta ku ja bangsa Israel e enggo iambekken Tuhan jadi tabanen rikut ertoto guna keperlun kuta e. Sabab adi sikap kuta Babel rikut rayatna, bangsa Jahudi si itaban i je pe ikut sikap. E me latar belakang makana ikirimken Jeremia suratna man kalak Jahudi si itaban i Babilon.

Janah teks si jadi bahan PA-ta merupaken gegeh spiritualitas si tetap arus lit dingen ilakoken kalak Jahudi i bas ngalaken erbage-bage kesuliten i Babel je nari la terpengaruh ku bas ajaren-ajaren nabi palsu si banci meneken bangsa enda. Sabab cukup mbue perbeben si ialami bangsa enda subuk i bas masalah ekonomi, sosial, politik lenga ka i bas nabi-nabi palsu si mereken informasi hoax. Sikap si arus nggeluh i bas bangsa enda sope nimai kerehen Tuhan nelamatken ras maba mulih bangsa enda ku Israel :

1. Erlebuh kempak Tuhan, reh ndahi Tuhan dingen ertoto (berseru dan datang berdoa kepadaKu) : jenari ialoi Tuhan. Bangsa enda ibabai guna tetap erlebuh ras ertoto man Dibata ula man dibata-dibata si deban. Sabab Tuhan ngenca si ngasup nampati, mpegegehi ras mereken serpang pulah i bas masa-masa pemurnian mulihken i Babil. Memang pitu puluh tahun labo masa si singkat, cukup ndekah tapi iakap Tuhan masa e cukup guna menggembleng, menempa, kiniteken bangsa Jahudi mulihken si mekatep murah terbawa arus jaman. Arah ia erlebuh, reh ndahi Tuhan dingen ertoto Dibata reh guna mpegegehi, nampati, mereken semangat, kinigenggengen, erpengarapen ras berkarya alu mehuli sekalipe i pembuangen.

2. Ndarami Tuhan ras njumpai Tuhan erkiteken alu bulat ukur idaramina Tuhan (apabila kamu mencari Aku, kamu akan menemukan Aku, apabila kamu menanyakan Aku dengan segenap hati) : maka jumpa banga enda ras Tuhan ras ibaba Tuhan mulih i bas pembuangen nari. Banci jadi sedekah enda la bulat ukur bangsa enda ndarami Tuhan, njumpai Tuhan. Asal-asalen, menggo, la nutus, la fokus. I jenda ipindoken Jeremia gelah bangsa enda bulat ukur ndarami Tuhan.

Tema “Ndarami Tuhan alu bulat ukur”. I bas konteks Padan Si Ndekah, labo hanya kitab Jeremia si jadi bahan PA-ta tapi mbue bagin Pustaka Si Badia si njemba bangsa Israel guna ndarami Tuhan (Amos 5:6; Zefanya 2:3; Hosea 3:5; Yesaya 55:6; rsd.). Sedangken kenca kerehen Yesus Kristus ku doni enda, maka situhuna IA me si ndarami kita, si mereken diriNa gelah banci kita terkelin. Jadi IA leben si berinisiatif ndarami kita manusia si perdosa (bdk. Roma 5:9-11). Maka kekelengenNa si mbelin e si i bas paksa genduari arus sirespon alu kita tetap ertoto man baNa, erlebuh man baNa, dingen jumpai IA alu bulat ukur.

Erbage-bage cara ilakoken kalak jumpa ras Tuhan subuk secara pribadi entah pe kolektif, iantarana :

- Saat teduh pribadi.

- Ibadah Minggu, PA, PJJ, Retreat, kegiaten peribadahan formal.

- Ku ingan-ingan si banci membangun kinitekenta : Taman Iman, Puncak Salib,  Retreat Centre, termasuk Mamre Centre si bakal ibangun i daerah Tongging.

Si penting, arah kita jumpa ras Tuhan, sioge KataNa, megegeh kinitekenta, ras ngasup kita ncibalken geluhta sentudu bagi si ngena ate Tuhan.

PA PERMATA GBKP TGL. 9 - 15 PEBRUARI 2020

Pdt. Larena br. Sinuhadji (Nd. Rey Rapha Tarigan)

Valentine’s Day

Nats : Matius 11:28-30

Tujun : Gelah PERMATA :

1) Meteh maka putus cinta labo sada kegagalan nggeluh.

2) Ngasup mpenahangi (mpegegehi) ras nampati temanna si ngenanami putus cinta

Rikutken perikop sebelumna Mat. 11:20-24 maka melala kuta-kuta i ja Tuhan Yesus enggo nehken pelayanen, melala ibahanNa tanda-tanda sengget tapi anak kuta e la nggit jera i bas dosa-dosana nari. Tetap denga la tek man Yesus Kristus.

Ajakan Tuhan Yesus agar semua yang letih lesu dan berbeban berat datang kepada Yesus, percaya, dan Tuhan akan memberi kelegaan (serpang pulah atau jalan keluar).

Murid-murid diajarkan untuk memikul kuk yang dipasang Tuhan. (Kuk adalah palang kayu dengan jepitan vertikal yang memisahkan kedua binatang sehingga bersama dapat menarik beban berat. Dapat dikatakan sebagai alat untuk meringankan beban).

Je nari erlajar i bas Tuhan. I bas ngalaken kiniseran Tuhan Yesus erpengendes (taat) man BapaNa, megenggeng ngalaken perbeben, la putus asa, setia seh ngayak dung. La IA kiam i bas persoalen. Karena Tuhan lemah lembut ras rendah hati sehingga umatNya akan mendapat ketenangan.

Prinsip dasar Konselor:

• Menjadi pendengar. Mendengar dengan hati (listening by heart) termasuk harus kita memperhatikan bahasa non-verbal : mimik, gesture tubuh, rsd.
• Empaty : mampu merasakan apa yang dirasakan oleh klien.
• Jangan menghakimi, bagaimanapun persoalannya.
• Menjaga rahasia teman/klien.
• Harus dihindari ketergantungan klien kepada konselor sehingga keputusan akhirpun diserahkan kepada konselor. Kita hanya memberikan pandangan-pandangan yang lebih positif dan luas. Konselor juga jangan memaksakan ide/gagasannya kepada klien.

Tahapan Konseling:

• Membina hubungan baik (menyapa, menanyakan kabar)
• Mengidentifikasi masalah (memberikan pertayaan terbuka, contoh bisa diceritakan awal masalah ini muncul, bagaimana perasaanndu, rsd.).
• Memberikan kesimpulan : yang harus dilakukan klien berdasarkan keputusannya. Menutup dalam doa. Janji kalau ada perjumpaan berikutnya.

---

[1] Menurut Kej 10:22 Aram e me anak Set, kempu Nuah. I bas Kej. 22:21 I je Aram e me kempu Nahor.

[2] Damsyik ibu kota Aram merupaken pusat utama perdagangen ras transportasi. Dua sungai e me Abana si mengalir i bas pengunungen Libanon menuju Damsyik ras sungai Parpar si mengalir i bas sisi timur deleng Hermon menuju selatan Damsyik. Duana sungai enda memang ndauh bersihen ras jernih asangken sungai Jordan si erlumpur.