PJJ GBKP Tgl. 23 - 29 Pebruari 2020

PJJ GBKP TGL. 23 - 29 PEBRUARI 2020

Pdt. Larena br. Sinuhadji (Nd. Rey Rapha Tarigan)

Tema : IDILO NGGEJAPKEN KINISERAN JESUS
(1 Petrus 2:21-25)

Ngalo-Ngalo Minggu Passion

Adi ngerana kita kerna kiniseran, e me ayam-ayam geluhta, kiniseran mekatep silih  berganti nderpa kegeluhenta. Bencana akibat tanah longsor, tsunami, deleng meletus, kebakaran, rsd. Bage pe kiniseran si nderpa i bas tiap jabu erkiteken sakit pinakit, i-PHK i bas ingan erdahin, gagal usaha, kematen salah sada anggota keluarga, anak la bagi ukur, rsd.

Erbage-bage sikap kalak i bas ngalaken kiniseran. Lit si melariken diri i bas kiniseran, i ja kiniseran ianggap sebage musuh besar. Maka asum lit persoalen la ia peduli. Emaka mbue kalak si kedungena lari ku obat-obatan terlarang, minum-minuman berakohol guna lepas i bas persoalen.

Lit ka deba putus asa entah menyerah i bas kiniseran si ialamina. Maka daramina jalan pintas alu minum obat entah gantung diri guna mengakhiri geluhna.

Lit ka deba, sada kelompok si ndarami kiniseran si rusur igelari perilaku masokhistis e me ndatken kesenangen i bas kiniseran. Maka kelompok enda biasana menyakiti diri alu piga-piga wari la man, menyakiti diri, entah sengaja la ndalanken tugas gelah ndatken ukumen i sekolah ras ingan si deban.

Uga kin situhuna i bas kita ngalaken kiniseran? Mari erlajar kita arah kiniseran si ialami Jesus Kristus. Jesus labo melariken diri i bas kiniseran, labo ka putus asa (menyerah) i bas kiniseran si ialamiNa. Entah pe Ia ndaram-ndarami kiniseran. Tapi Jesus ngalaken kiniseran alu tetap taat ras megenggeng. Judul perikop i bas 1 Pet. 2:21-25 e me “Kiniseran Kristus jadi usihen”. Ibenai alu sada pernyataan, maka adi megenggeng kita i bas ngalaken kiniseran aminna pe mehuli perbahanenta maka tetap ipasu-pasu Dibata kita i bas kegeluhenta.

Kristus sendiri pe enggo ngenanami kiniseran guna kita manusia, jadi labo erkiteken kesalahenna ras enggo itadingkenNa sada usihen gelah banci siikutken dalanNa. La IA erdosa. Ise pe la enggo megi kata si la tuhu i bas biberNa nari (bahkan ndarat kata “o Bapa, alemi min salah kalak enda sabab la ietehna kai si ilakokenna”). Asum IA igombang-gombangi kalak, la ibalasNa alu kata megombang. Janah asum IA ngenanami kiniseran, la ilawanNa kalak tapi erpengendes IA man Dibata.

Kai si ilakoken Kristus e me guna keterkelinenta, gelah kita mate nandangi dosa je nari nggeluh nandangi si ngena ate Dibata. Marenda kita papak tapi genduari arah kai si ilakoken Kristus man banta maka enggo ibabaNa mulihken guna banci ngikutken permakan si ngkawali tendinta.

Alu bage jelas, i bas kita ngenanami kiniseran, marilah siusih Kristus. Kiniseran erkiteken silakoken si ngena ate Dibata labo ukumen banta tapi pendilo (panggilenta) (Mat. 5:10, “Ketuahen kalak si ngenanami kiniseran erkite-kiteken nehken peraten Dibata”). Megenggeng kita ras tetap ndalanken si mehuli si ngena ate Dibata. Ula tergoda kita gelah pedas pulah i bas kiniseran emaka sitempuh cara pintas, cara-cara si la mehuli si la ngena ate Dibata. Jesus tabah i bas ngalaken kiniseranNa. Ula ndele ateta asum reh kiniseran sabab Kristus sendiri pe enggo leben ngenanami kiniseran ras e jadi usihen kinitekenta. Ula jungut-jungut asum kiniseran reh nderpa (bdk. Job 2:10, “Si sea-sea kuakap cakapndu e pe. Adi ibereken Dibata si mehuli, meriah siakap. Uga banci kita jungut-jungut adi iberekenNa kiniseran banta?”).

Sipindo gegeh i bas Dibata nari i bas kita ngalaken kiniseran, tek kita maka la enggo pernah itadingken Dibata kalak si mindo penampat bas IA nari. Perbeben si ialami kita la ngelebihi gegehta. Asum kita ngenanami kiniseran iberekenNa gegeh si mbaru guna nggengkenca janah iberekenNa ka serpang pulah man banta.