PA Kategorial GBKP Tgl. 23 - 29 Pebruari 2020

PA MORIA GBKP TGL. 23 - 29 PEBRUARI 2020

(PA HDS II)

Pdt. Larena br. Sinuhadji (Nd. Rey Rapha Tarigan)

Ogen : Johanes 5:2-9

Tema : KEKEKENLAH, ANGKAT AMAKNDU JE NARI DALANKENLAH

Tujun : Gelah Moria :

1) Ngidah ras mediate nandangi perbeben kalak si pinakiten

2) Ngumban perbahanen Jesus mulahi kalak si pinakiten

Metode PA : Brainstorming

Judul i bas perikop ogenta e me “Ipepalem Jesus kalak si penakiten i kolam Betesda”. Ituriken maka mulihken Jesus ku Jerusalem guna ngerayaken wari raya kalak Jahudi. Banci jadi paksa si e wari raya si irayaken e me Pondok Daun entah pe Wari Raya Sapo-sapo. Si ngingetken kalak Jahudi asum i perdalanen i gurun pasir majekken sapo (tenda) guna inganna tading. Arah peringaten enda mpersingeti bangsa Jahudi uga Dibata tetap memelihara kegeluhen bangsaNa subuk kenca ndarat i Mesir nari seh ku tanah Kanaan. I deherken Pintu Gerbang Biri-biri, i Jerusalem lit sada kolam si igelari Betesda (lima serambina). I bas serambi e enteren kalak penakiten medem, lit kalak pentang, cempang bage pe mate serapen. Kalak enda kerina nimai lau e erburak sabab lit paksana lau e erburak ibahan Malekat Tuhan si nusur ku bas lau kolam e. Ise si tangtangna bengket ku bas kolam e asum launa erburak malem minter penakitna, amin sakit kai pe ia. Janah i je pe lit sekalak si enggo 38 tahun dekahna penakiten. Ieteh Jesus ia ampar i je janah ietehNa maka enggo ndekah ia sakit. Informasi si enggo ieteh Jesus mabai IA ngelakoken tindaken si mulahi perbeben kalak si sakit enda ndai. Sabab lit ka deba kita, sieteh sakit temanta, kade-kadenta, bahkan enggo ndekah sakitna, mekelek ka, sama sekali labo lit kepedulianta. Tapi Jesus berempati. Lit percakapen si ibangun Jesus ras kalak si sakit enda ndai :

- Isungkun Jesus, “atendu kin gelah malem pinakitndu?” Enggo pastilah sura-surana gelah malem pinakitna, sabab enggo 38 tahun ia sakit, dingen tetap sabar nimai rehna mujijat, menjadi orang pertama si ku kolam Betesda asum launa erburak. Penungkunen Jesus mpekeke mulihi semangat ras pengarapen kalak si enggo ndekah sakit.

- Kepeken ialoi kalak si sakit alu erbage pergumulen sialamina i bas paksa si lepas, labo langsung ijababna, “uelah gelah malem pinakitku”. Tapi, “O Tuan, la kap lit kalak si namaken aku ku bas kolam e asum erburak launa; asum ku pala-palai ku bas enggo lit kalak si deban leben asa aku”. Ertina, keluargana pe la nari mendampingi ia seh makana asum lau erburak la lit nari si nampati ia. Tapi semangat guna sehat lit denga, sabab enggo pe 38 tahun tetap denga itimaina mujijat kesembuhen.

- Minter ibahan Jesus sada tindaken penyembuhen, “Kekekenlah, angkat amakndu je nari dalankenlah!” Paksa si e minter malem pinakitna, iangkatna amakna ras erdalan ia. Kepeken kegiaten enda terjadi asum wari Sabat kalak Jahudi si kedungenna menjadi persoalen man kalak Jahudi i ja daramina dalan guna munuh Jesus.

Tema : “Kekenlah, angkat amakndu ras erdalanlah” merupaken tema si mabai kita ndarat i bas situasi si membelenggu, mengikat kita erkitaken erbage hal, subuk sakit pinakit, perbeben si mesangat. Keke merupaken simbol bangkit i bas perbeben, persoalen. Lit i je semangat, pengarapen. Angkat amak simbol kenyamanan. Arus iagui kerina si erbahanca terlena entah pasrah, bene pengarapen i bas situasi si menghimpit kita. Ras erdalan berarti bergerak, nerusken kegeluhen enda.

Bahan PA HDS si peduaken tole menginspirasi kita subuk man banta asum lit kiniseran, sakit pinakit ngkenai kita bage pe termasuk kita keluarga, teman si lit i sekelewetna :

- Man si sakit : asum sakit pinakit, kiniseran nderpa kita arus tetap berpikir positif, semangat, tetap erpengarapen man Tuhan i bas ngalaken sakit pinakitta. Walaupe secara fisik sakit ula sempat sakit ka pertedinta.

- Man banta keluarga, teman si mendampingi kalak si sakit : kehadirenta tuhu-tuhu mpegegehi, arah toto, pendampingen, penampat materi. Tetap si banci mpepalem pinakit kuasa Tuhan Jesus ngenca, tapi kehadiren mereken semangat, empati man senina turangta si sakit maka ia pe tetap megegeh ngalaken pinakit.

- Pengobatan paliatif e me pendekaten si ilakoken guna meningkatken kualitas nggeluh pasien ras keluarga i bas ngalaken pinakit si mekelek. Nampati si sakit menerima kenyataan sabab lit pinakit si la banci ipepalem gelah alu bage mentalna siap, megegeh ia ngalaken pinakit e bahkan mbue denga si positif si banci ilakokenna.

PA MAMRE GBKP TGL. 23 - 29 PEBRUARI 2020

Pdt. Larena br. Sinuhadji (Nd. Rey Rapha Tarigan)

Dasar Teologi Teknologi Informasi (TI)

Ogen : Masmur 19:1-7

Tema : DIBATA ERBERITA ALU ERBAGE-BAGE CARA

Tujun : Gelah Mamre :

1) Meteh maka Dibata erberita arah si nasa lit i doni enda

2) Makeken kerina media si lit guna meritaken berita si mehuli

Metode : Diskusi

Judul i bas perikop si jadi ogenta “Dibata ermulia i bas tinepaNa” (terj. TB-LAI nina “Kemulian Tuhan dalam pekerjaan tanganNya dan dalam TauratNya - Masmur 19:1-15. I bas TB-LAI dilanjutkan sampai ke ay. 15 berbicara tentang Taurat Tuhan). Masmur 19:1-7 enda ipake i bas ibadah guna mpermuliaken gelar Dibata. Dibata si ermulia arah bekas tinepaNa.

Ay. 1-3 ituriken maka langit ras awang-awang (carkrawala) ncidahken kemulian Dibata, erberita kerna perbahanen Dibata. Ijadiken Dibata langit ras cakrawala jadi ingan man matawari, seh makana matawari banci ersinalsal i bas waktuna. Arah pengaturen Dibata maka lit pergantian waktu, pagi, ciger, berngi je nari pagi ka bage seterusna. Tep-tep wari erberita kempak wari si pepagina. Tep-tep berngi nuri-nuri man berngi si pagina ka. Bage seterusna mekanisme pergantian wari enggo iaturken Dibata alu mehuli.

Ay. 4-5, aminna pe tinepa Dibata la banci ngerana secara lisan (verbal) (ay. 4), tapi sorana erdengung i belang-belang doni enda. Subuk arah gemuruh, petir, ncidahken maka la pe banci ngerana tinepa Dibata ndai tapi banci ncidahken kemulian Dibata si luar biasa.

Ay. 6-7, secara khusus icidahken kerna matawari si erpungsi mereken sinalsalna. Erpagi-pagi putlak matawari si igambarken desken dilaki mbaru empo keluar i bas bilikna nari, desken pahlawan si ersikap guna nehken perdalanen peperangen alu dem keriahen. Ertina, salah sada tinepa Dibata e me matawari alu dem sukacita ndalanken tanggung jawabna mereken sinalsalna guna nerangi doni enda. Benaken timur seh ku barat, terbit sehku terbenamna matawari. Arah kai silakokenna pe sigejapken kuasa Dibata masu-masu kegeluhenta.

Dibata tetap ermulia arah kai si enggo itepaNa, ula sempat tinepa si kedungena mengambil posisi Dibata guna imuliaken. Si metunggung datken pujian ras kemulian e me Dibata si enggo nepa doni enda ras kerina isina.

Tema : “Dibata erberita alu erbage-bage cara”. Dibata mpetandaken diriNa arah kai si enggo itepaNa, manusia, sungai, deleng, sinuan-sinuan, rubia-rubia, rsd. Siidah ras simuliaken Dibata arah kai si enggo itepaNa. Lit lagu KAKR “Kukasih kau dengan kasih Tuhan, kukasihi Kau dengan kasih Tuhan. Kulihat di wajahmu, kemulian raja, ku kasihi kau dengan kasih Tuhan”. Lagu enda ngajuk kita gelah ngkelengi manusia si deban, sabab asum siidah ia, siidah kemulian Dibata si enggo nepa ia. Dingen arah si e makin ka simuliaken Dibata.

Rikutken tujun, maka lit dua tujun i bas PA sekali enda. Si pemena, gelah Mamre meteh maka Dibata erberita arah sinasa lit i doni enda. Tujun si pemena, enggo banci siidah arah bahanta sekali enda, maka Dibata erberita arah langit, cakrawala, matawari, bage pe pergantian waktu. Siidah kerina tinepa Dibata e, sipuji Dibata.

Tujun si peduaken, makeken kerina media si lit guna meritaken berita si mehuli. Tujun si peduaken enda berkaiten ras Teknologi Informasi (TI) si genduari enggo masif menjadi kebutuhen i bas kegeluhenta. TI lit erkiteken kepentaren, ilmu, pemeteh si lit i bas manusia ras ipakekenna guna menciptakan teknologi si berkembang ras maju termasuk i bas TI. Arah si e jelas maka Dibata kap ulu pemeteh e ras iberekenNa man manusia ras ipakeken manusia guna tujun si mehuli. Tujunna e me kap mempermudah kinerjanta, mempermudah komunikasi, la lit nari jarak ras batas (kerina enggo banci cepat ras dekat aminna situhuna jarak memisahken), mempermudah ndatken erbage-bage informasi si ibutuhken, rsd. Ertina TI hadir nampati kita manusia.

Jadiken TI alat guna erberita si mehuli, nehken berita si meriah, si menginspirasi, si membangun. Alu bage perlu kita kritis ras bijak i bas mpergunakenca. Mulihi ku bas pengogenta Masmur 19 ndai e me guna kemulian Dibata. Ula sempat TI menggantiken posisi Dibata, enggo mbuen waktuna iisi alu TI ndai seh maka la nari sempat kita ersembah man Dibata. Hindari postingen si berbau SARA, melemahkan, membenci, sampah si erbahanca ndele ate kalak si ngogesa. Tapi siposting hal-hal si membangun, menginspirasi, membangitken semangat, rsd. Pakeken erbage peluang i bas penggunaan TI guna nampati usahanta ras mempermudah aktivitas geluhta. Emaka teruslah kita erlajar meng-up-grade dirinta gelah ngasup kita mpergunaken TI alu mehuli ras berdaya guna.