PA Kategorial GBKP Tgl. 16 - 22 Juli 2017

PA MAMRE GBKP TGL. 16 - 22 JULI 2017

Nrs. Pdt. L. br. Sinuhadji (Bp. Rey Tarigan)

Perencanaan Keuangan (Minggu Merdang)

Ogen : Kejadin 41:39-49

Tema : PERENCANAAN PERBELITEN

Tujun : Gelah Mamre ngasup erbahan perencanaan perbeliten si mehuli i bas jabu

Metode : Diskusi Kelompok

Penjelasan Bahan Ogen & Renungen

Ogenta sendah e me sada bagin i bas turi-turin kerna Yusuf i Mesir si menam seri ras ogen PA Mamre i bas tgl. 26 Maret - 1 April 2017 si lepas. Bedana, sue ras tema-nta, si jadi penekanen i bas PA sendah e me ipengasup Dibata Yusuf erbahan rencana si mehuli guna mengantisipasi ancamen kelihen i Mesir. Sope bengket kita ku bas pembahasen kerna rencana Yusuf si mehuli ndai, perlu leben itekanken maka Yusuf e me sekalak si tutus erkiniteken man Dibata. Erkiteken ketutusenna erkiniteken maka : 1) iarak-arak Dibata Yusuf seh maka sangap ia i bas kerina pendahinna (Kej. 39:2); 2) ipasu-pasu Dibata Yusuf seh makana kalak si deban pe ngena ate man bana (Kej. 39:21); 3) kasa kai si idahiken Yusuf jore kerina (Kej. 39:23); 4) ibereken Dibata kepentaren man Yusuf guna ngertiken nipi raja Firaun, erkiteken si e bengket me Yusuf ku bas puncak karir i bas kegeluhenna, e me jadi wakil raja Firaun (Kej. 41:40-46). 5) ibereken Dibata kepentaren man Yusuf guna erbahan rencana si mehuli i bas mengantisipasi ancamen kelihen i Mesir, labo terjeng je saja, ipengasup Dibata Yusuf guna ndalanken rencana enda alu mehuli. I bas si e kerina labo erbahanca Yusuf meganjang ukur, tetap iandalkenna Dibata si isembahna.

Rencana si mehuli i bas rangka mengantisipasi bencana kelihen i Mesir e me mpepulung seperlima i bas ulih peranin tupung paksa nakan riba-iba si pitu tahun. Kerina pangan si enggo ipepulung ndai itamaken ku bas ingan khusus si enggo isikapken i bas tep-tep kuta guna jadi persediaan i bas paksa kelihen si pitu tahun i Mesir gelah rayat la mate kelihen i bas paksa mesera (Kej. 41:34-36). Rencana enda isetujui raja Firaun ras pegawai-pegawaina, janah i bas ogenta sendah, khususna ay. 47-49, teridah maka Yusuf ngasup ndalanken rencana e alu mehuli. Hasilna banci sioge i bas ay. 56-57 ras Kej. 47:13-25, janah ngasup Yusuf memenuhi kerina kebutuhen keluargana. Sada cataten si penting i jenda e me i bas ay. 33, ikataken Yusuf man raja Firaun nina, “arus ipilihndu sekalak si erpemeteh (berakal budi, cerdas) ras pentar (bijaksana) guna ngaturken negeri enda”. I bas ay. 38 ngaloi raja Firaun nina, “Labo lit dat kita jelma tersikapen asang Yusuf enda, sekalak si lit kesah Dibata (Roh Allah) i bas dirina jine”. Ertina, i bas erbahan rencana si mehuli arus lit i je pemeteh ras kepentaren i bas Dibata nari arah KesahNa. Pemeteh ras kepentaren i bas Dibata nari si erbahanca Yusuf ngasup erbahan rencana si mehuli ras ngasup ia ngelaksanakenca alu hasil si mehuli.

PA-nta sendah lit i teruh judul “Perencanaan Keuangan (Minggu Merdang)”, tema si seh man banta e me “Perencanaan Perbeliten” alu tujun gelah Mamre ngasup erbahan perencanaan perbeliten si mehuli i bas jabu. Kerna perencanaan keuangan entah pe perencanaan perbeliten i bas jabu akap kami ratana enggo nge kita ngasup ngaturkenca. Secara umum kalak Karo enggo biasa ngaturken perbeliten i bas jabuna masing-masing alu mehuli guna mengatisipasi masa depan arah investasi perhiasan (emas), taneh, juma, rsd. Mungkin si banci jadi bahan evaluasi man banta i bas kita erbahan perencanaan perbeliten i bas jabunta sekalak-sekalak e me, enggo kin sipindo pemeteh ras kepentaren i bas Dibata nari?

Kencenderungen negatif si lit i bas kita erbahan rencana perbeliten enda e me siandalken pemeteh ras kepentarenta piah dungna erta kebayaken si ngatur geluhta si erbahanca orientasi geluhta hanya untuk menimbun harta kekayaan sebanyak-banyaknya. I bas si e tentuna banci turah karakter-karakter si la mehuli, umpamana rangap, pelit, la kita nggit berbagi ras kalak si membutuhken, la nari kita ngasup mediate ras erpemere, erbual kita man kalak si deban gelah ula ndarat senta, la lit nari waktu guna kita ersembah ras ngataken bujur man Dibata erkiteken keri waktunta guna ndarami sen, la kita banci menikmati hasil pendahinta erkiteken pusuh perukurenta dem alu kebiaren entah pe kekuatiran kurang denga siakap kebayaken si lit bas kita, anggota jabunta pe turut menderita erkiteken ketatsa kita i bas ngaturken perbeliten, rsd.

Kecenderungen si negatif ndai tentuna arus siantisipasi alu mindo pemeteh ras kepentaren i bas Dibata nari, libatkan Tuhan i bas perencanaan perbeliten jabunta masing-masing. I bas si e kai pe metode si ipake kita guna perencanaan perbeliten enda palasna jelas e me guna kemulian gelar Dibata. Bicara lit pe kebiaren, kekuatiran, keragu-raguan, labo erbahanca la nari ngasup kita ersembah man Dibata, ngataken bujur man baNa, ermediate ras erpemere, erkiteken lit i bas kita kiniteken si paguh maka Dibata si ncukupken kerina kebutuhenta. Erlajar kita arah Yusuf si tuhu-tuhu erkiniteken ras ernalem man Dibata i bas kai pe si irencanaken ras ilakokenna, maka ibereken Dibata kesangapen ras kejoren i bas kegeluhenna. Dibata si mpegegehi kita.