PA Kategorial GBKP Tgl. 30 Juli - 5 Agustus 2017

PA MORIA GBKP TGL. 30 JULI - 5 AGT. 2017

Nrs. Pdt. L. br. Sinuhadji (Bp. Rey Tarigan)

Terpenalem I Bas Masyarakat : Tantangan Dari Dirinya

Si Man Ogen : Lukas 10:38-42

Tema : SI MEHULI PE JADI LASAM

Tujun : Gelah Moria

1) Ngidah pendahin Marta jadi lasam erkiteken jungut-jungut

2) Ngasup radu ras i bas ndahiken dahin

Metode : Permainan

Penjelasan Bahan Ogen & Renungen

Ogenta sendah e me turi-turin kerna Yesus si ndahi Marta ras Maria. Maria i jenda labo Maria Magdalena entah pe Maria nande Yakobus, tapi Maria senina Marta ras turang Lasarus i Betania nari (Joh. 11). Maria senina Marta enda si murihi nahe Yesus alu minak i bas Joh. 12:3. I bas ogenta ituriken sanga ngalo-alo Yesus ras ajar-ajarNa bas rumahna, Marta kuskas nikapken pangan ras mungkin kerina keperlun Yesus ras ajar-ajarNa, sementara Maria kundul saja i deher nahe Tuhan Yesus megiken pengajarenNa. E maka murkas Marta ideherina Yesus janah nina, “O Tuhan, la iperdiatekenNdu ipeturut seninangku aku sisada ndahiken kerina dahin e? Suruh min ia nampati aku!” Erjabap Yesus nina, “O Marta, Marta! Suhsah dingen gulut ukurndu sabap melala atendu ibahanndu, tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari”.

Situhuna la lit si salah si ilakoken Marta, enggo mehuli kai si ibahanna. Sementara kai si ilakoken Maria rikutken kebiasaan entah pe adat kalak Yahudi labo semal. Tapi bagi isalahken Yesus kai si ilakoken Marta sementara ipediat Yesus kai si ilakoken Maria. Persoalenna lit i bas ay. 41, i bas bhs. Ind. bagenda nina, “Engkau khawatir dan sibuk memikirkan ini dan itu”, i bas bahasa Karo nina, “Suhsah dingen gulut ukurndu sabap melala atendu ibahanndu”. Situhuna kai si enggo isikapken Marta enggo bias, adi enggo bias ma situhuna enggo la nai lit persoalen. Tapi Marta suhsah dingen gulut ukur sabab kai si enggo isikapkenna kurang denga iakapna. Nina Yesus “tapi sada ngenca si la banci lang”, i bas bhs. Ind., “padahal yang penting hanya satu”, kai e? Megiken pengajaren alu tutus janah ngelakoken kai si jadi peraten Dibata (bdk. Luk. 6:47; 8:21; 11:28). Kai si ikataken Yesus e me soal prioritas i bas pelayanen. Si utamana i bas pelayanen e me megiken Kata Dibata dingen ngelakoken kerina si jadi peraten Dibata.

Sekali nari mungkin lit si nungkun, apakah si ilakoken Marta salah? Labo salah, saja ngenca enggo bene bas Marta orientasi entah pe tujun i bas pelayanenna si erbahanca suhsah ras gulut ukurna bahkan cenderung ndarami kesalahen Maria. Adi bas tujun PA-nta sendah nina jadi lasam erkiteken jungut-jungut. Melala pe ate Marta si ibahanna situhuna labo masalah saja ngenca ula sempat bene palas si tuhu-tuhu i bas pelayanen e me megiken alu tutus pengajaren Kata Dibata janah Kata Dibata e tuhu-tuhu nggeluh i bas pusuh perukuren ras teridah i bas perbahanen. Ertina dahin-dahin pelayanen labo merupaken beban entah pe kebiasaan si la lit maknana si erbahanca kita terbeban ngelakokenca piah dungna turah cian, jungut-jungut, cikurak, rsd. Padahal labo e nge si niarapken Dibata i bas pelayanenta. Latih pe kita, tapi tetap lit meriah ukur (sukacita) ras dame i bas pusuh perukurenta sebab palasna Kata Dibata labo sura-sura ukur manusia.

I bas PA-nta sendah iajuk kita gelah ngukurken mulihi kai si jadi palas pelayanenta. Apakah hanya sekedar gelah teridah kalak maka bagi si tutus kita melayani tapi si tuhuna la lit sukacita ras dame i bas pusuh perukurenta? Apakah lit bas pusuh perukurenta niat guna keuntungen diri sendiri i bas pelayanenta? Rsd. Adi lit denga kita si bage tentuna perlu siperobahi motivasinta i bas pelayanenta gelah metunggung i adep-adepen Tuhan, janah kai pe si terjadi i bas pelayanenta tetap denga lit kekelengen, dame, ras sukacita i bas pusuh perukurenta. Dibata si mpegegehi kita.