PA Kategorial GBKP Tgl. 23 - 29 Juli 2017

PA MAMRE GBKP TGL. 23 - 29 JULI 2017

Nrs. Pdt. L. br. Sinuhadji (Bp. Rey Tarigan)

Narkoba, HIV/AIDS

Ogen : Efesus 5:3-5; Matius 9:12-13

Tema : NARKOBA, HIV/AIDS

Tujun : Gelah Mamre :

1) Ngasup muat bagin i bas merangi penyebaren ras penularen Narkoba ras HIV/AIDS

2) Tetap ngkelengi kalak si jadi korban Narkoba ras HIV/AIDS

Metode : Seminar & Aksi

Penjelasan Bahan Ogen & Aplikasi

Ogenta si pemena e me kelanjuten i bas bindu 4:17-32 nari si isina pedah-pedah rasul Paulus man perpulungen gelah nggeluh i bas kegeluhen si mbaru i bas Kristus. Judul perikop bindu 5:1-20 “Nggeluh i bas terang” si intina kegeluhen si mbaru i bas Kristus harus lit bedana bagi anding-andingen terang si beda ras gelap e me kegeluhen si ndekah (ay. 8). Pedah-pedah rasul Paulus man perpulungen Efesus enda secara khusus itujuken man perpulungen alu latar belakang kegeluhen si ndekah sebage kalak Yunani entah pe bangsa-bangsa si deban si labo Yahudi. Bangsa Yunani pada umumna menganut budaya bebas (libertarian) ras la patuh nandangi aturen (antinomian). Budaya si bagenda rupana idukung alu ajaren filsafat si populer paksa si e si igelari gnostik (pengetahuan), arah gegeh pemeteh ras kepentaren si lit i bas manusia, manusia banci datken keselamaten, janah pemeteh ras kepentaren e la lit kaitenna ras perbahanen. Bagem kurang lebih konteks kegeluhen kalak Yunani ras bangsa-bangsa si deban paksa si e. E maka banci sibayangken uga bebasna kegeluhen si lit i sekelewet perpulungen kalak si tek paksa si e.

Kegeluhen si bebas i jenda termasuk kebiasaan si menyimpang i bas seksualitas. I bas ay. 3, kata “erlua-lua” (bhs. Ind. “percabulan”) iterjemahken i bas bhs. Yunani nari porneia si ertina kerina aktivitas seksual si menyimpang bagi perzinahan (bdk. Mat. 5:32; 19:9), amoralitas seksual (bdk. Mrk. 7:21; Perb. Rsl. 15:20,29), perzinahan antar saudara (bdk. 1 Kor. 5:1), kemesuman (Roma 1:29), hubungan seks pra-nikah, homoseksual, rsd. Kata-kata “erlagu la mehuli” (bhs. Ind. “rupa-rupa kecemaran”) e me perbahanen si biasa ilakoken guru-guru palsu erkaiten ras seksualitas si menyimpang ndai (bdk. 2 Tim. 3:6). Kata “merangap” (bhs. Ind. “keserakahan) e me eksploitasi seksualitas besar-besaran alu erbage-bage cara termasuk i je aktivitas seksual si biasa ilakoken i bas rumah-rumah pertoton budaya Yunani. Si debanna, ay. 4, cakap caram, cakap si lang-lang entah pe cakap si kemali, lit denga kitenna ras penjelasen ay. 3 i datas. Kerina hal si la mehuli si biasa ilakoken masyarakat si lit i sekelewet perpulungen kalak si tek enda itegasken rasul Paulus, nina “ibelasken pe ola ... la patut ibelaskenndu”. Sebab memang selain la lit gunana man perpulungen, kalak si tetap denga ilakokenna perbahanen si bage la dat bagin i bas Kinirajan Kristus ras Dibata (ay. 5).

Ogen si peduaken lit i teruh judul “Idilo Yesus si Matius” (bhs. Ind. “Matius pemungut cukai mengikut Yesus”). Kenca enggo idilo Yesus si Matius sekalak pengalo cuke, mis Yesus ras ajar-ajarNa man i rumah Matius raduken ras kalak perdosa bage pe pengalo cuke si debanna. Pengalo cuke ikategoriken kalak perdosa erkiteken ianggap sebage pengkhianat bangsa Yahudi janah rusur ngerugiken rayat Yahudi alu cuke si la wajar jumlahna guna isetorken ku pemerentah Romawi si paksa si e menjajah bangsa Yahudi. Kai si ilakoken Yesus ras ajar-ajarNa erbahanca kalak Parisi protes alu tujun ndarami kesalahen Yesus, nina, “Engkai maka Gurundu e man ras pengalo cuke bage pe ras kalak perdosa?” Ialoi Yesus, nina, “Kalak si sehat labo ia perlu dokter, tapi kalak si sakit nge. Laweslah, jenari pelajari kata si tersurat i bas Pustaka si Badia enda, “Keleng atendu nge si kuperluken, labo asuh-asuhen si ipersembahkenndu” (Hos. 6:6). Aku reh labo guna ndilo kalak si bujur akapna bana, tapi guna ndilo kalak perdosa”. Enggo tangkas arah jawaben Yesus maka reh IA ku doni enda tujun utamana e me guna nelamatken kalak perdosa, konsekuensina tentuna arus IA ergaul ras kerina kalak perdosa gelah ndatken keselamaten si tuhu-tuhu.

PA-nta sendah lit i teruh judul ras tema “Narkoba, HIV/AIDS”, tujun gelah Mamre ngasup muat bagin i bas merangi penyebaren ras penularen Narkoba ras HIV/AIDS bage pe tetap ngkelengi kalak si jadi korban Narkoba ras HIV/AIDS, alu metode seminar ras aksi. Arah metode si enggo iaturken maka si mejilena i bas PA-nta sendah lit narasumber khusus si memang ahli i bas bidang Narkoba bage pe HIV/AIDS gelah tuhu-tuhu banci idatken kita informasi si akurat kerna Narkoba bage pe HIV/AIDS, khususna kerna perkembangen terakhir, jumlah korban, jumlah pengedar, erga narkoba, aturen entah pe hukum si berlaku i bas negaranta kerna Narkoba ras HIV/AIDS, rsd. Umpamana, gundari enggo melala jenis ras bentuk Narkoba janah enggo mulai iedarken kubas lingkungen Sekolah Dasar. Si debanna, umpamana, enggo lit himbauan arah WHO nari kerna penggunaan tambar HIV si payo si igelari anti-retrovirus, rsd. Kerina informasi si akurat enda penting sebab erkaiten ras tujunta sendah, uga caranta merangi penyebaren Narkoba adi la iteh kita jenis-jenis Narkoba si mbaru ndai? Uga caranta ngkelengi penderita HIV/AIDS adi kerna pertambarna pe lenga iteh kita? Informasi kerna narasumber Narkoba banci sidarami i bas kepolisian entah pe BNN nari, informasi kerna HIV/AIDS banci sidarami arah Komisi Pelayanan HIV-AIDS dan NAPZA si lit i bas GBKP, rsd.-na.

Kerna dasar teologis erkaiten ras Narkoba ras HIV/AIDS enda enggo jelas i bas ogenta sendah amin pe istilah “Narkoba” ras “HIV/AIDS” lenga lit i bas Pustaka si Badia. Tapi istilah-istilah e merupaken perkembangen i bas penyimpangan-penyimpangan si lit i bas masyarakat paksa gundari enda. Erkiteken lit penyimpangan i bas seksualitas maka turah erbage pinakit salah sadana e me HIV/AIDS. Erkiteken lit penyimpangan i bas penggunaan tambar maka lit istilah “Narkoba” si seri efek canduna ras “mabuk anggur” bagi si lit i bas Ef. 5:18. Alu tegas rasul Paulus ngatakenca, kalak si bage la dat bagin i bas Kinirajan Kristus ras Dibata. Si e kerina tentuna mengancam kegeluhen generasi muda paksa enda termasuk i je generasi penerus Gereja, e maka penting guna radu ras siantisipasi. Erpalasken keleng ate Kristus maka salah sada caranta mengatisipasi e me ermediate nandangi korban Narkoba ras HIV/AIDS. Ngataken bujur kita erkiteken enggo lit komisi khusus i bas GBKP si melayani korban HIV/AIDS ras NAPZA. Komisi e perlu radu ras sidukung ras sicukupken kebutuhenna guna menanggulangi peredaran Narkoba ras penyebaran pinakit HIV/AIDS.

E maka mari radu ras sijaga dirinta ras keluarganta i bas ancamen Narkoba ras HIV/AIDS, bage pe megermet kita kerna kai pe si terjadi i bas lingkungen masyarakat i sekelewetta gelah peredaran Narkoba ras penyebaren pinakit HIV/AIDS banci sitekan perkembangenna. Janah mari radu ras sibaba i bas pertotonta secara khusus kerna Narkoba ras HIV/AIDS enda. Dibata si mpegegehi kita.     

Daftar singkatan :

NARKOBA : Narkotika dan Obat Berbahaya

NAPZA : Narkotika, Psikotropika dan Zat Adiktif

BNN : Badan Narkotika Nasional

HIV : Human Immunodeficiency Virus

AIDS : Acquired Immune Deficiency Syndrome