PJJ GBKP Tgl. 23 - 29 Juli 2017

PJJ GBKP TGL. 23 - 29 JULI 2017

Pdt. Larena br. Sinuhadji (Nd. Rey Tarigan)

Tema : LAWANLAH IBLIS (1 Petrus 5:8-11)

Penjelasen Bahan Ogen & Renungen

Lit lagu Rohani anak-anak bagenda nina lirikna, “Iblis itu musuh kita, dia lari s’perti singa. Dia kata itu ini, dia cari sana sini, Iblis itu musuh kita”. Jadi jelas, benaken kitik-kitik nari kita enggo iajari maka Iblis e imbang labo teman si arus ilawan.

I bas Alkitab bahasa Indonesia, lit dua istilah si ipake guna nggelari sosok si jahat, e me Iblis ras Setan (bdk. Ketangkasen 12:9). Istilah “Setan” berakar i bas kata kerja bahasa Ibrani stn si ertina “dia melawan, menghalangi atau bertindak sebagai musuh”. Maka “satan” berarti penghalang, lawan entah pe musuh. Istilah “Iblis” berakar i bas kata kerja bahasa Arab balasa si berarti ia erkadiola entah pe putus asa. Maka, Iblis berarti “dia yang menyebabkan menyesal atau putus asa”. I bas teks asli PB lit dua istilah si mengacu ku bas figur jahat enda, e me diabolos (bhs. Ing. devil) ras satanas (bhs. Ing. satan). Istilah enda situhuna mengacu man roh-roh jahat, kaki tangan Iblis (banci iogenndu “Iblis dalam Alkitab”, Albertus Purnomo, OFM, Kanisius 2012).

Kalak Kristen asum surat enda ilumbaken Petrus lit i bas ngenanami kiniseran erkiteken kinitekenna man Yesus. Janah la banci lang, pasti mbue tawaren-tawaren bas kuasa kegelapen nari (doni) gelah banci pedas pulah i bas kiniseran e nari, alu ngikuti sura-sura Iblis. Tapi Petrus mereken pergegeh arah suratna gelah kalak Kristen paksa si e tetap megegeh kinitekenna. Piga-piga hal si penting si ikataken Petrus i bas perikop enda guna banci kita ngelawan Iblis :

1) “Tenanglah kam tapi metenget!” (TB-LAI “Sadarlah dan berjaga-jagalah”). I bas bahasa Karo, dua kata si saling berlawanan tapi saling melengkapi. Tenang, ula panik, ula mbiar. Siidah, asum Yesus icubai Setan i gurun pasir kenca enggo IA empat puluh wari empat puluh berngi erpuasa (Mat. 4:1-11, Yesus tetap tenang ngalaken serangen bas Iblis nari). Je nari arus tetap metenget, waspada, berjaga-jaga, ula anggap enteng. Sabab Iblis e gawah-gawah ku jah ku je bagi singa si erngaung ndarami si man jergemenna (TB-LAI, “berjalan berkeliling  sama seperti singa yang mengaum-ngaum dan mencari orang yang dapat ditelannya”). Ertina, daramina jelma si banci ijergemna (ditelannya). Si tenang dingen metenget la banci ijergemna. Arus metenget sabab memang Iblis e licik, mbue strateginna guna ngelawan kita. I bas Joh. 8:44, nina, “Nai nari Iblis pemunuh kap. La pernah ikapitina si benar sabab la lit si benar i bas ia. Adi erbual ia biakna nge, sabab ia perguak dingen bapa kerina kalak siperguak.” Janah iblis pe banci naliken rupana gelah teridah ia bali ras malekat terang (2 Kor. 11:14).

2) “Tetap paguh kinitekenndu”. Adi mbewat-mbewat kinitekenta, lemah labo ngasup kita ngelawan kuasa Iblis e, enggo pasti kita italukenna. E maka i bas Ef. 6:10-20 Paulus ngatakenca, “megegehlah erkiteken persadanndu ras Tuhan dingen erkiteken kuasaNa si mbelin. Pakekenlah kerina senjata si ibereken Dibata gelah ngasup kam ngelawan akal Iblis si jahat e”. Kai saja senjata si arus sipakeken kita setiap saat? Nggeluh i bas ketuhu-tuhun, bujur, meriah ukur katawari paksa pe, kiniteken jadi ampang-ampang, Kata Dibata jadi pedang si banci naluken kuasa Iblis, ras tetap megegeh ertoto man Tuhan. Beliden kuasa Dibata asangken kuasa Iblis, sabab enggo italuken Tuhan Yesus kuasa Iblis i bas kekekenNa i bas kematen nari.

Petrus ngatakenca, maka i bas kiniseran si ialami perpulungen paksa si e labo hanya ia sekalak si ngenanami kiniseran erkiteken kinitekenna man Yesus tapi enterem kalak si sada kiniteken e ngenanami kiniseran si seri. E maka la banci lang arus tetap paguh ras nteguh kiniersadana, saling menolong ras menguatken gelah radu megegeh i bas ngalaken kiniseran e terlebih ersada i bas ngelawan kuasa Iblis. Kiniseran e kentisik ngenca ras janji Tuhan la pernah kita itadingkenNa, ipetetapNa ras ipegegehiNa kita. Dibata kap erkuasa seh rasa lalap.

Janah rikutken tema maka kuasa Iblis e arus ilawan, sitaluken i bas gelar Tuhan. Labo maksudna “mengobral” gelar Tuhan bagi film-film Vampire entah pe sijadiken mantra. Tapi kuasa Tuhan si iteki, dingen kuasa e pe enggo ibereken Tuhan man kerina kalak si tek si arus tetap sipakeken. Tetaplah kita i bas persadan ras Tuhan gelah ngasup katawari paksa pe ngelawan kuasa Iblis ras menang kita.