PA Kategorial GBKP Tgl. 9 - 15 Juli 2017

PA MAMRE GBKP TGL. 9 - 15 JULI 2017

Nrs. Pdt. L. br. Sinuhadji (Bp. Rey Tarigan)

Ngoge Jadi Budaya (Belajar Mandiri)

Ogen : Ulangen 6:7-9

Tema : NGOGELAH! MAKA KAM PENTAR

Tujun : Gelah Mamre nggejap maka arah ngoge tambah wawasen ras kepentaren

Metode : Diskusi

Penjelasan Bahan Ogen & Renungen

Ogenta sendah adi sibenaken i bas ay. 4 nari, biasa isebut syema i bas bahasa Heber nari e me pengakun kiniteken kalak Israel kerna TUHAN Dibata si sada (esa). Kata “syema” i bas Alkitab TB-LAI iterjemahken “dengarlah”, i bas Alkitab BIS-BIMK iterjemahken “ingatlah”, i bas Pustaka si Badia iterjemahken “ingetlah”, maknana pengakun kiniteken e labo terjeng iteh, sibegiken ras siinget, tapi tuhu-tuhu sitamaken ku bas pusuh perukuren janah arus lit buktina alu perbahanen (kerja entah pe karya) si nyata i bas kegeluhen si tep-tep wari. E maka i bas ay. 5-6 ikataken Musa nina, “Kelengilah (kata kerja aktif) TUHAN Dibatandu asa ukurndu, asa tendindu, asa gegehndu lit. Ola ndigan pe lupaken (seri ertina ras “ingetlah” e pe kata kerja aktif) kerina perentah-perentah si kubereken sendah man bandu”.

Pengakun kiniteken kerna TUHAN Dibata si sada enda arus siwarisken orangtua man anak-anakna alu ngajarkenca ras ngingetkenca rusur (berulang-ulang) setiap wari (ay. 7). Secara praktis pengakun kiniteken enda arus isuratken (dituliskan) i bas kertas kitik si itamaken ku bas kotak kitik (bhs. Ibr. tefilim) si iiketken bas tan si kawes ras perdempaken (phylactery : tali sembahyang), janah arus ka isuratken i bas binangun pintun rumah ras i babo pintu gerbang gelah tuhu-tuhu jadi persinget (ay. 8-9). I bas perkembangen selanjutna terjadi degradasi makna i bas pesan awal si isehken Dibata nari arah Musa man bangsa Israel, piah dungna pengakun kiniteken enda terjeng kebiasaan menghapal ngenca si la lit pengaruhna ku bas pusuh ras perbahanen bangsa Israel. Yesus Kristus i bas Mat. 22:34-40; Mrk. 12:29-30; Luk. 10:25-37 mpelimbarui makna pengakun kiniteken enda alu penekanen si utamana e me i bas ngkelengi (kata kerja aktif) Dibata (Ul. 6:5) ras ngkelengi manusia (Im. 19:18), “kerina Undang-undang agama si ibereken Musa ras nabi-nabi erpalasken duana perentah enda ndai kap”, nina Yesus.

PA-nta sendah lit i teruh judul “Ngoge Jadi Budaya (Belajar Mandiri)”, tema-nta sendah e me “Ngogelah! Maka kam pentar”, tujun PA-nta sendah e me gelah Mamre nggejap maka arah ngoge tambah wawasen ras kepentaren. Adi rikutken ogenta sendah, maka salah sada fungsi ngoge e me guna ngingetken bangsa Israel kerna pengakun kinitekenna man Dibata si sada (esa). Tujunna tentuna labo terjeng iogeken alu sora si megang, tapi tuhu-tuhu iangkai kai maknana ras tuhu-tuhu banci mabai perobahen si nyata i bas kegeluhen si tep-tep wari. Tujun enda nge si ate Tuhan Yesus iulihken paksa IA nggeluh denga i tengah-tengah kalak Israel erkiteken pengakun kiniteken si iogeken e enggo lanai nggeluh i bas kegeluhen si tep-tep wari.

Adi sicubaken ndarami kata “baca” i bas kolom penelusuran kata bas Alkitab Elektronik entah pe bas aplikasi Alkitab si lit bas smartphone-ta nari, idatken lit 78 ayat i bas Padan si Ndekah rikutken Padan si Mbaru nari si memuat kata dasar “baca”. Ertina kerna ngoge enda termasuk hal si penting i bas Pustaka si Badia-nta. Janah Tuhan Yesus i bas pelayanenNa rusur IA ngatakenca “Langa kin pernah iogendu ...” (Mat. 12:3,5; 19:4; 21:16,42; 22:31; 24:15; rsd.). Ertina i bas pengajaren-pengajaren Yesus ngoge secara pribadi (mandiri) termasuk sada bagin si penting i bas erlajar Kata Dibata selain megiken secara langsung pengajaren-pengajarenNa. Janah adi sipelajari sada per sada ayat-ayat si 78 ndai secara umum ngoge lit kaitenna ras merenungkan (ngangkai) bage pe ngelakoken (taat). Ertina ngoge bas Pustaka si Badia umumna iumputi alu proses internalisasi nilai-nilai kepentaren Dibata arah merenungkan ras ngelakoken.

Informasi si idatken kami arah internet nari kerna minat baca di Indonesia bagenda nina, “Menurut data UNESCO, minat baca masyarakat Indonesia sangat memprihatinkan, hanya 0,001%. Artinya, dari 1.000 orang Indonesia, hanya 1 orang yang rajin membaca. Riset berbeda bertajuk Most Littered Nation In the World yang dilakukan oleh Central Connecticut State Univesity pada Maret 2016 lalu, Indonesia dinyatakan menduduki peringkat ke-60 dari 61 negara soal minat membaca. Ini artinya, Indonesia persis berada di bawah Thailand (59) dan di atas Bostwana (61). Padahal, dari segi penilaian infrastuktur untuk mendukung membaca peringkat Indonesia berada di atas negara-negara Eropa”. Enda gambaren konteks bas negaranta kerna minat ngoge. Penungkunenna, uga minat baca i bas konteks GBKP khususna Mamre?

Rikutken judul, tema, ras tujun i bas PA Mamre sendah, mungkin banci ikataken ngoge ras belajar mandiri lenga jadi budaya i bas kita GBKP khususna Mamre. Mungkin mehuli adi sibahan angket (questioner) khusus gelah idatken data si lebih akurat kerna prosentasi jemaat si tuhu-tuhu ngoge kerina buku si iterbitken GBKP, umpamana : Tata Gereja, GBP (Garis Besar Pelayanan), Buku Katekisasi, Pokok-pokok Peraturan (i bas kerina kategorial), Buku PJJ, Buku PA-PA Kategorial, Buku Pedoman KAKR, rsd. Tuhu-tuhu ngoge i jenda maksudna lit waktu khusus guna ngoge janah metode ngogena pe close reading (membaca dengan teliti). Enda penting sebab tentuna lit bedana proses ras hasil si idatken adi sibandingken ras ngoge secara kilat.

Memang adi soal pemeteh banci idatken kita arah erbage-bage bentuk, umpamana arah pendidikan formal, non-formal arah nonton TV, megi-megi i kede kopi, megiken khotbah i bas kebaktin, megiken ceramah i bas pelatihan entah pe training, rsd. Tapi sue ras prinsip belajar seumur hidup (long life education) maka belajar mandiri arah kita ngoge secara pribadi penting guna ibudayaken i tengah-tengah Gerejanta khusuna i tengah-tengah Mamre. Ngataken bujur kita man Dibata erkiteken benaken Reformasi Gereja abad 16 nari, Alkitab enggo iterjemahken ku bas melala bahasa termasuk bahasa daerah. Enda tentuna sada keuntungen man banta erkiteken kerina kita banci ngoge Kata Dibata alu bahasa si murah iangkai. Ngoge Kata Dibata seh kel pentingna erkiteken kepentaren i bas Dibata nari sumber utamana lit i bas Pustaka si Badia.

Piga-piga hal si banci radu ras sievaluasi i bas PA-nta sendah, si pemena kerna minat baca i bas kita Mamre, mungkin melala kita si lenga lit waktu khusus guna close reading, enda perlu siupayaken gelah lit waktu khusus guna ngoge sada buku si bermanfaat janah banci sibagiken ilmuna i tengah-tengah persekutuan Mamre. Secara praktis enda banci siaplikasiken alu erbahan roster Mamre si ngoge sada buku si bermanfaat si banci sibagiken ilmuna sanga PA Mamre entah pe ibahan waktu khusus guna si e, umpamana buku kerna teknologi pertanian, teknologi informasi, rsd. Hal si deban mungkin enggo banci sibahan Perpustakaan Mamre i bas Runggunta masing-masing.
Si peduaken kerna peningkaten wawasan ras kepentaren i bas erkiniteken man Dibata. Sue ras bahan ogenta sendah rikutken penjelasenna i datas, ngoge i bas Pustaka si Badia labo terjeng ngoge ngenca, tapi enggo termasuk je proses internalisasi nilai-nilai rohani arah kita merenungkan ras ngelakoken Kata Dibata. Iajuk kita gelah erlajar Kata Dibata secara mandiri alu ngoge Pustaka si Badia secara teliti, merenungkan ras ngelakoken. Janah mari radu ras siupayaken gelah lit waktunta guna ngoge buku-buku rohani khususna buku-buku si enggo iterbitken Gerejanta. Tapi perlu ka kita metenget (kritis) i bas kita ngoge buku-buku rohani Kristen, sebab melala buku rohani Kristen si isina la sue ras pengajaren si payo erpalasken Pustaka si Badia. Paling tidak sinenlah penerbitna entah pe si nuliskenca, bagi terbiten BPK Gunung Mulia umpamana. Adi la jelas penerbitna ras penulisna akap kami la palah ioge kita. Mari radu ras kita ertoto mindo gegeh i bas Dibata nari gelah ipengasupNa kita erlajar secara mandiri.

PA MORIA GBKP TGL. 9 - 15 JULI 2017

Nrs. Pdt. L. br. Sinuhadji (Bp. Rey Tarigan)

Terpenalem i bas masyarakat : mediate kerna isu sosial

Si Man Ogen : Matius 25:31-46

Tema : MEDIATE RAS KEPATE

Tujun : Gelah Moria

1) Nuriken perbahanen kalak si tek man Dibata

2) Megermet ngenen kecibal teman dingen nggit muat bagin mpekenasa

Metode : Aksi Bersama Kategorial

Penjelasan Bahan Ogen & Renungen

Ogenta sendah e me sada bagin i bas rangkaian pengajaren Yesus kerna Kinirajan Dibata si nandangi reh entah pe biasa isebut khotbah kerna pendungi jaman, benaken bindu 24 seh 25. I bas si e melala tema-tema pengajaren si erkaiten ras kejadin-kejadin si nandangi reh, pedah-pedah gelah ersikap ras erjaga-jaga, makeken kerina talenta si ibereken Dibata alu maksimal, janah ogenta sendah lit i teruh judul “Penghakiman terakhir” (terj. TB-LAI) entah pe “Ukumen i bas wari pendungi”. I bas bahan ogenta sendah lit teridah gambaren kerna kai si terjadi i bas wari pendungi, pulung kerina manusia i lebe-lebe Dibata, ibagiNa manusia jadi dua terpuk. Terpuk si lit arah kemuhen datken pasu-pasu Dibata bengket ku bas Kinirajan si enggo isikapken e me kegeluhen si tuhu-tuhu si la erkeri-kerin. Terpuk si arah kawes bengket ku bas api si la ernimpet-nimpet si enggo isikapken man Iblis ras malekat-malekatna e me ukumen si rasa lalap.

Terpuk si arah kemuhen e me manusia si tuhu-tuhu tek ras erkemalangen man Dibata. Kiniteken si tuhu-tuhu man Dibata i jenda igambarken alu perbahanen si nyata si ncidahken kiniteken e : mereken man ras minem man kalak musil si melihe ras muas, nikapken ingan tading man kalak si tandang, mereken uis man kalak musil, mereken perhatin khusus man kalak musil si sakit, ndahi kalak si lit i bas penjara. Terpuk si arah kawes e me manusia si tek man Dibata tapi kinitekenna labo nyata i bas perbahanenna. I bas gambaren kerna kai si bakal terjadi i bas wari pendungi enda teridah maka si jadi peraten Dibata man kerina kalak si tek man baNa e me kiniteken si erbuah i bas perbahanen si nyata i bas kegeluhen si tep-tep wari nandangi sekelewetta si membutuhken.

PA Moria-nta sendah lit i teruh judul “Terpenalem i bas masyarakat : mediate kerna isu sosial, tema-na e me “Mediate ras kepate”, tujun gelah Moria nuriken perbahanen kalak si tek man Dibata ras megermet ngenen kecibal teman dingen nggit muat bagin mpekenasa, alu metode aksi bersama kategorial. Arah PA-nta sendah isingetken kita mulihi kerna tanggung jawabta selaku kalak si enggo ngaloken keselamaten i bas Dibata nari guna er-Berita si Meriah arah perbahanenta nehken penampat man kerina kalak si membutuhken si lit i sekelewetta. Ogenta sendah njemba kita gelah erkiniteken alu perbahanen si nyata sue ras peraten Dibata. Akap kami kerna topik enda enggo nge iangkai kita kerina kalak si tek man Yesus Kristus, sebab arah teladan si enggo icidahken Yesus Kristus i bas pelayanenNa melala karya nyata si enggo ilakokenNa i tengah-tengah bangsa Israel khususna man kalak si musil ras tertindas secara ekonomi ras sosial. Teladan Yesus enda si arus siupayaken terus ilakoken kerina kalak si tek pribadi lepas pribadi bage pe secara berkelompok i bas Gerejanta.

Ngelakoken kerina si jadi peraten Dibata i bas geluhta akap kami metode er-Berita si Meriah si paling efektif, erkiteken kalak si lenga itandaina Dibata si isembah kita banci nggejapken perbahanen Dibata si mbelin arah perbahanenta. E maka i bas piga-piga gereja, bidang kesaksian ras pelayanan ipersada i bas sada bidang si igelari Kespel entah pe kesaksian dan pelayanan, sebab labo hanya babah kita saja si ersaksi kerna keselamaten i bas Kristus, tapi secara holistik dirinta sendiri e me kesaksin si nggeluh kerna keselamaten i bas Yesus Kristus. Kalak si tuhu-tuhu erkiniteken man Yesus Kristus enggo pasti lit karakter mediate ras kepate i bas dirina janah lit karakter proaktif i bas nehken kekelengen man ise pe tanpa harus isuruh-suruh entah pe ikoordinir kalak si deban. E maka mari radu ras sitingkatken kualitas ras kuantitas i bas kita ersaksi ras melayani bage pe jangkauan i bas kita ersaksi ras melayani semakin iperluas alu bekerja sama ras gereja-gereja si deban entah pe lembaga-lembaga sosial lintas agama si lit i sekelewetta gelah dampakna tuhu-tuhu mbelin man masyarakat i sekelewetta janah gelar Dibata semakin termulia. Secara lembaga kategorial pe akap kami mehuli adi setiap tahun ibahan paling tidak sekali program bersama guna erbahan aksi sosial, labo saja itujuken man panti-panti asuhan, panti-panti jompo, bagi si biasa ilakoken kita, tapi pe man masyarakat si tading i sekelewet Gerejanta si membutuhken penampatta, e nge si ndeherna ras kita. Dibata si mpegegehi kita kerina.