PJJ GBKP Tgl. 9 - 15 Juli 2017

PJJ GBKP TGL. 9 - 15 JULI 2017

Pdt. Larena br. Sinuhadji (Nd. Rey Tarigan)

Tema : BENAKEN I BAS GELAR TUHAN (Jakup 4:13-17)

Penjelasen Bahan Ogen & Renungen

Judul i bas bahan ogenta sendah e me “Pertenget gelah ula meganjang ngerana” (terj. TB-LAI “Jangan melupakan Tuhan dalam perencanaan”). Adi rikutken isi maka lebih pas judul si iangkatken TB-LAI. Isi surat Jakup enda e me ajar si erguna si ibereken man kerina anak-anak Dibata si merap marpar kesilang i babo doni enda. Mbue tema-tema khusus si iangkatken i bas kitab enda gelah alu bage tangkas uga kin arusna perlagu langkah kalak Kristen.

Secara khusus i jenda Jakup mpersingeti kalak Kristen gelah tetap mengandalken Tuhan entah pe melibatken Tuhan i bas kerina kegeluhenna. Kai pe si bakal ilakokenna, irencanakenna tetap melibatken Tuhan. Alu kata si deban, erkai pe ateta ku Tuhan lebe erpengendes. Sabab i jenda lit kalak si berencana i bas geluhna, tanpa melibatken Tuhan. Lit i je kiniganjangen ukur, kai pe banci ilakokenna arah gegeh ras kebeluhenna. La isedarina maka manusia terbatas sedangken Tuhan la terbatas kuasa ras kepentarenNa. “Sendah entah pagi berkat kami ku kuta si deban; i je kami ringan sada tahun dekahna, erbinaga ndatken untung si mbelin”. Arah kai si ibelaskenna, seolah-olah kegeluhenna lit bas tanna. Yakin kel ia kerna kai si bakal ilakokenna. Padahal kerna warinta subuk si genduari bage pe si pepagi si bakal sidalani la ise pe metehsa seyakatan Tuhan. Banci jadi enggo mbue rencanana, pagi kedun enda idilo Dibata kita. Entah tumpur usahanta erkiteken itokohi kalak, rsd. Kata bijak i bas Jakup nari nina, “Kai jadi i bas geluhndu pagi pe la ietehndu! Kam bali ras remang si kentisik ngenca lit, je nari bene” (bdk. Luk. 12:20).

Labo berarti la kita banci berencana. Manusia i bas nggeluh arus lit rencanana, kai si arus idalankenna subuk i bas jangka pendek ras jangka panjang. Tapi si ipersingeti Jakub e me gelah tetap kita melibatken Tuhan i bas kerina kegiatenta, gelah alu bage tetap Tuhan si imuliaken i bas geluhta. Berhasil pe kita, erkiteken Tuhan, seh makana la kita meganjang rukur. Entah gagal pe kita sekali, la bagi sura-suranta si jadi, labo kel kita kecewa, sabab enggo siedesken man Tuhan. Ieteh Dibata si terbaik i bas kegeluhenta. Gagal kita gundari sabab sangana ipersiapken Dibata gelah banci sialami sukses si luar biasa, erkiteken tetap kita megenggeng ras berjuang. Si arus sibelasken kita, “Adi ibere Tuhan, nggeluh denga kami janah ilakoken kami me si ah entah si enda.” Lit lagu rohani bagenda nina :

Tak 'ku tahu 'kan hari esok, namun langkahku tegap.

Bukan surya kuharapkan, kar'na surya 'kan lenyap.

O tiada 'ku gelisah, akan masa menjelang;

'Ku berjalan serta Yesus. Maka hatiku tenang.

Refr. :

Banyak hal tak kupahami dalam masa menjelang.

Tapi t'rang bagiku ini : Tangan Tuhan yang pegang.

Geluhta lit i bas tan Dibata si erkuasa, e maka man baNa sajalah kita erpengendes, ernalem. Mari sibiasaken ras enggo me jadi sada kebutuhen (kearusen) guna erkai pe kita tetap siandalken Tuhan. Muat lawes kita erdahin, sekolah, jumpa ras kalak, membangun usaha si mbaru, merdang, i bas erkai pe, tetap ku Tuhan lebe kita erpengendes. Gelah i bas kerina dampar geluhta terpuji tetap gelar Tuhan. Sukses kita, sigejapken erkiteken Tuhan erdahin la meganjang ukurta. Gagal kita, labo minter kita putus asa, tapi tetap semangat, erpengarapen, sabab Dibata la pernah tertunduh mataNa. Kegagalan e me kap sukses si tertunda.