PJJ GBKP Tgl. 16 - 22 Juli 2017

PJJ GBKP TGL. 16 - 22 JULI 2017

Pdt. Larena br. Sinuhadji (Nd. Rey Tarigan)

Tema : ULIH JUDI E ME KEMUSILEN (1 Timotius 6:7-10)

Penjelasen Bahan Ogen & Renungen

Apakah salah ‘di kenca lit sura-suranta bayak? Lang! Sabab pengertin bayak situhuna e me nggejapken si lit bas kita e rehna i bas Dibata nari, janah sipakeken guna kebutuhen geluhta ras banci ka kita jadi saluren pasu-pasu (berkat) man kalak si deban si membutuhken. Jadi adi mbue pe erta si lit bas kita tapi labo ernanam man kalak si deban, situhu labo kita bayak. Enda me salah sada poin si itulisken Paulus man Timotius, anak rohanina, guna banci iajarkenna ka man perpulungen Epesus i ja ia melayani. Menjadi bayak labo salah tapi ula e jadi tujun geluh si erbahanca erbage-bage cara nggit kita ngelakokenca termasuk si haram sekali pe. Enggo isingetken Paulus i jenda kerna kalak si ersura-sura bayak piah dungna ndabuh ku bas percuban janah bene me ibahan erbage-bage sura-sura si bodoh dingen jahat. Mbue contoh i sekelewetta si awalna kalak si bujur tapi erkiteken godaan gelah tambah kiniliten ndai maka korupsi, ndayaken barang si la man dayanken (narkoba), menjual diri, senang erperkara i pengadilen ras keluarga erkiteken erta warisen, bahkan bas pelayanen pe turah motivasi guna mpebayak diri (bdk. iakapna agama dalan ncari kebayaken) rsd.

Menjadi bayak labo salah tapi ula sempat lebih kita ernalem man ertanta asangken man Dibata si mereken kerina kebutuhen geluhta. Adi enggo ernalem kita man ertanta, maka enggo erta si mengatur kita, janah tunduk kita man bana. Si erbahanca turah kerangapen, ras la nari mediate man kalak si deban si membutuhken penampatta. Sabab kalak merangap kerna duit la nari ukurina kalak tapi dirina saja ukurina uga makana tambah kebayakenna. Kalak si merangap nandangi duit e me sumbul kerina kejahaten. Mpeturah menghalalkan segala cara, menjadi kalak si egois, pelit, megajang ukur, la nari ingetna ersembah ngataken bujur man Tuhan, rsd.

Kinitekenta man Tuhan erbahanca ngasup kita ngataken bujur kerna kai si lit bas kita. Sebab Tuhan arah KesahNa si Badia ngajari kita guna menatalayanken si lit e alu mehuli seh makana sitik pe banci bias (sada pe bias, dua banci kurang adi la beluh kita ncibalkenca). E maka erlajar kita ncukupken diri alu si lit bas kita. Cukup berarti labo nuruti sura-sura (keinginan) daging si la erbias-bias. Adi bas konteks Paulus nulisken suratna, memang i jenda isuratken cukup min siakap adi lit nakan ras uis. Tentu i bas jaman genduari kebutuhen pokokta labo hanya pangan ras uis, termasuk perumahan, pendidiken, ras kesehaten. Kai pe labo sibaba ku doni enda, janah lawes pe kita nadingken doni enda kai pe la lit sibaba, seyakaten kinitekenta man Dibata.

Tema-nta i bas PJJ-nta sendah “Ulih judi e me kemusilen”. Kamus Besar Bahasa Indonesia (KBBI) ngatakenca, judi adalah mempertaruhkan sejumlah uang (harta) dalam permainan tebakan berdasarkan kebetulan dengan tujuan mendapatkan sejumlah uang atau harta yang lebih besar dari uang (harta) semula. Bermacam-macam judi : togel, sabung ayam, judi kartu, judi mesin koin, judi on line, rsd. Janah lit pengakap, maka salah sada cara tercepat ndatken erta kebayaken e me kap melalui erjudi. Payo nge pengakap enda entah sebalikna, ulih judi e me kemusilen? Walaupe Pustaka si Badia la lit nuratken kata “judi”, tapi Dibata enggo ngatakenca, “terpaksa igegehindu erdahin” (bdk. Kuan-kuanen 10:4; 13:11; 15:6; 16:8; Pengerana 9:10; rsd.).

Piga-piga alasen ras enggo mbue terjadi engkai la banci kita erjudi :

1. Judi erbahanca kita nagih, adi sekali talu, ulihi ka ngadi-ngadi menang, seh sen enggo keri bahkan dayaken kerina si lit. Enggo pe menang, lit denga keinginan guna erjudi denga ka, guna melipatgandaken ertata ndai, tapi banci ka talu.

2. Judi erbahanca kalak kisat erdahin si enggo ibereken Tuhan, sebab Firman Tuhan sendiri ngatakenca erbintuas kam i bas ndahiken dahinndu.

3. Judi erbahanca kalak jadi jahat, ndayakenna ertana piah dungna kebutuhen keluargana pe enggo terbengkalai bahkan lit deba, ndehara ras anakna pe idayaken.

4. Judi erbahanca melala keluarga berantakan, sabab enggo dekahen ia bas arena judi asangken mperdiateken jabuna ras ndabuh ku kemusilen.

5. Kalak erjudi ndatken keuntungen i bas kerugian kalak si deban. Kehadirenna la nari jadi pasu-pasu (berkat), malah erbahanca kalak si deban menderita.

E maka mari tetap siendesken geluhta man Dibata si enggo nelamatken kita, mereken kesehaten ras gegeh guna banci kita ndahiken dahinta alu mehuli. Teklah kita maka si ernalem man Tuhan tetap ipeliharaken Tuhan geluhna. Adi erjudi kita, maka siendesken geluhta man nasib entah pe untung-untungan, padahal geluh kalak si erkiniteken man Dibata enggo pasti guna kemulian gelar Dibata.