PJJ GBKP Tgl. 25 Juni - 1 Juli 2017

PJJ GBKP TGL. 25 JUNI - 1 JULI 2017

Pdt. Larena br. Sinuhadji (Nd. Rey Tarigan)

Tema : SEHKENLAH KEHAMATEN MAN TUHAN (Imamat 22:1-2, 31-33)

“Ola ipeterukndu gelarKu si badia; e maka mehamat lah perbahanndu nandangi persembahen si badia si ipersembahken bangsa Israel man bangKu. Aku kap TUHAN.”

Penjelasen Bahan Ogen & Renungen

Umumna melala Gereja-gereja arus utama (bagi GKI, HKBP, GBKP, GPIB, GKJ, rsd.) jarang ngerana soal persembahen entah pe katakenlah perduiten, berbeda ras Gereja-gereja aliran Kharismatik. Alasen si rusur ipake : sungkan, kurang sopan adi Gereja ngerana soal perduiten, entah pe, “pasti ada apa-apa di balik khotbah”, rsd. Tapi situhuna, Pustaka si Badia mbue ngerana soal persembahen, soal perduiten.

Ibenaken i bas Padan si Ndekah, asum Habil ras Kain nehken persembahen man Tuhan (Kej. 4), asum Jakub erpadan nehken persembahen persepuluhenna i bas kasa kai si ibereken Tuhan man bana (Kej. 28:22). Benaken si e, persembahen labo hanya sada kerelaan, tapi pe enggo sada kearusen (kewajiben) man Israel. I bas Kel. 25:2 jelas Tuhan sendiri merentakennca man Musa gelah kerina kalak Israel erbahan sada persembahen man Tuhan. Ertina, bangsa Israel nehken persembahen man Tuhan sebage sada kearusen si idalankenna alu kerelaan. Sabab tuhu-tuhu igejapina uga Dibata si tetap masu-masu kegeluhen bangsa enda, janah persembahen e iendesken sebage pengataken bujur man Tuhan. Allah memberkati dan umat berterima kasih. Ras i bas pengataken bujurna si iendesken man Tuhan rikutken pasu-pasu si enggo ibereken Tuhan bas geluhta sekalak-sekalak (Ul. 16:16-17). Labo hanya arah keriahen ukurta, tapi rikutken pasu-pasu si ibereken Dibata man banta. Sabab lit deba kalak mbue kel pemere Dibata man bana tapi meriah ukurna nehken persembahen (kolekte) 5.000 rupiah. Padahal situhuna ngasup ia nehken kolekte (persembahen) 50.000 rikutken pasu-pasu Dibata si seh man bana. Ertina, i je lit sikap menggo, erkiteken kebiasaan ras labo sigejapken maka Dibata nge situhuna ulu kerina sialoken kita, termasuk kesehaten, gegeh, kiniliten, dame sejahtera, rsd.

I bas bahan PJJ sekali enda ngerana kita kerna nehken kehamaten man Tuhan. Tuhan merentahken man Musa gelah Harun ras anak-anakna sebage imam banci tetap nehken kehamaten man Tuhan i bas kerina dampar kegeluhenna, secara khusus nandangi persembahen si badia si ipersembahken bangsa Israel man Tuhan. Adi la mehamat entah menggo i bas nehken persembahen berarti seri ras mpeteruk ras njuruken gelar Tuhan si badia. Arus iakui bangsa enda, maka Dibata nge Tuhan si badia, si enggo encidahken kuasa ras keleng ateNa arah mpedarat bangsa Israel i bas Mesir nari kenca 430 tahun itaban i Mesir (Kel. 12:40). Adi rikutken teksta (judulna “Kebadian Persembahen”) maka kebadian persembahen ibenai arah totalitas kegeluhen imam ras keluargana (bdk. Im. 21-22) si arus nggeluh bagi si ngena ate Tuhan. Imam sebage perantara umat ras Dibata subuk i bas nehken persembahen, mindo pengalemi dosa rsd., maka imam selaku si berhubungen langsung ras Dibata arus “badia” gelah ula sempat ncurnaken gelar Tuhan si badia.

Janah i bas konteksta si gundari, kita, perpulungen langsung (la nari kita erkelang-kelang ras Dibata), termasuk kemahen Tuhan sendiri ipersingeti gelah ula sipeteruk Dibatanta arah persembahenta subuk cara nehkenca, arah kualitas persembahenta, pusuh ukurta i bas kita nehken persembahen e.

Palasta nehken persembahen man Tuhan si pemena lebe, sabab enggo lebeh Dibata masu-masu kegeluhenta, labo gelah kita ibere ka (menyogok). Geluhta lebeh ipasu-pasu Dibata. Janah labo kita “mere” man Tuhan tapi ersembah, nehken pengataken bujurta. Uga pe bayakna kita, labo ngasup kita mere man Tuhan, sabab Dibata nge si mere kerina i bas kegeluhenta.

Si peduaken, ersembah kita subuk arah kolekte setiap Kebaktin, persepuluhen, persembahen kerja rani, pembangunen gereja, rsd., merupaken sada latihan man banta gelah ula kita terikat man erta, tapi terikat kita man Dibata si masu-masu kegeluhenta. Terkadang enggo kita lupa man si mere rejeki ndai ras terlalu sibuk ngurusi rejeki pemere Dibata ndai. Penting kel kita “melatih dirinta” guna mereken si tebaik (mehamat) man Tuhan, labo erkiteken kebiasaan. Sabab melala denga kita erkiteken kebiasaan ras menggo. Asum rejekinta 1 juta persembahenta 5.000 rupiah. Kenca enggo enggo 10 juta pe gajinta, persembahenta tetap nge 5.000 rupiah. Si e nge si perlu ilatih gelah ula kebiasaan tapi sipersembahken man Tuhan rikutken pasu-pasu si enggo ibereken Dibata man banta.

Janah si enggo ipersembahen kita e, ipakeken guna dahin-dahin pebelangken Berita si Meriah rikutken kai si enggo iaturken bas Gerejanta (Tata Laksana Ps. 188) guna nehken Pelayanen Persekutuan, Kesaksian, Pelayanen, mbiayai kerina Program-program Gerejanta ras gaji personalia GBKP. Adi labo kita anggota perpulungen e, ise nari?

Banci jadi melala denga perpulungen si jungut-jungut bahkan la nari ku Gereja erkiteken persoalen buena persembahen-persembahen (kutipen) i bas Gereja enda, nina. Adi memang la ka lit bas kita, la perlu sipelit-lit (2 Kor. 8:12, “adi litlah ukur ersuruh guna mere, maka ialoken Dibata me pemere e erpalasken kai si it bas kita, labo erpalasken kai si la lit i bas kita”). Si parahna, mbue pemere Dibata i bas ia, jungut-jungut ka janah pengeranan e banci mpengaruhi perpulungenta si merampek denga kinitekenna. Adi memang la ateta nehken persembahen si mehulina madin kita sinik saja. Ertina, kalak si bage lenga bo gejapina peran Dibata si erkuasa i bas kerina dampar geluhna.

Mari tetaplah kita mehamat i bas nehken persembahen man Tuhan, meriah ukurta, siang ayonta, dingen asa gegeh rikut pasu-pasu si enggo ibereken Dibata. Teklah kita, Dibata tetap ncukupi kerina keperlun geluhta, labo pediat Dibata kita i bas kekurangen i bas kita nehken kehamaten man baNa.