PA Kategorial GBKP Tgl. 4 - 11 Juni 2017

PA MAMRE GBKP TGL. 4 - 11 JUNI 2017

Nrs. Pdt. L. br. Sinuhadji (Bp. Rey Tarigan)

Kaderisasi Kepemimpinen

Ogen : 1 Timotius 4:12-16

Tema : ERLAJAR SEBAGE PEMINPIN

Tujun : Gelah Mamre :

1) Mpersiapken dirina jadi peminpin i bas keluarga, gereja, ras masyarakat

2) Meteh prinsip kepemimpinen Kristen

3) Berupaya mperlengkapi diri jadi kader-kader peminpin si mehuli ras ertanggung jawab i bas geluhna (keluarga ras pendahin si ijujurken Dibata)

Penjelasen Bahan Ogen & Relevansi

Bahan ogenta e me pedah-pedah si isehken rasul Paulus man anak rohanina Timotius. Rasul Paulus si enggo metua nggit denga ia ngajari Timotius si nguda denga, janah Timotius pe lit bas ia “hati seorang murid” si nggit iajari. Rasul Paulus e me salah sada peminpin i bas gereja-gereja paksa si e. Janah kepemimpinen si idatkenna labo idatkenna secara instan. Arus lebe ia berjuang guna datken pengakun i bas perpulungen kalak si tek bage pe rasul-rasul si deban nari kerna kepemimpinenna. Enda labo hal si murah, sebab rasul Paulus labo ia langsung iajari Yesus Kristus bagi ajar-ajar Yesus si 12 kalak, janah ia mantan penganiaya kalak si tek man Yesus Kristus si ikut andil i bas kematen Istepanus ras melala kalak si tek si debanna.

I bas pengajaren si iberekenna man Timotius lit piga-piga point penting e me : 1) Jadi usihen (ay. 12) i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur. I bas terj. TB-LAI nina, “Jadilah teladan bagi orang-orang percaya, dalam perkataanmu, dalam tingkah lakumu, dalam kasihmu, dalam kesetiaanmu dan dalam kesucianmu”. Soal kepemimpinen e me soal pengaruh. Pengaruh kai si banci erbahanca sesekalak jadi peminpin? Enda hal si penting si arus ilakoken Timotius, arus ia ngasup mempengaruhi kalak ngelakoken kerina si mehuli sue ras peraten Dibata ibenaken i bas dirina sendiri. Sebab melala peminpin si ngasup ia ngerana kerna kerina si mehuli tapi i bas praktekna nol besar. Tentuna la lit ise pe si tek man bana adi ngerana ngenca ia ngasup tapi la ngasup jadi usihen. 2) La ngadi-ngadi erlajar (ay. 13) subuk kerna Kata Dibata bage pe hal-hal si deban termasuk arah erbage-bage pengalamen geluh. Sada hal si tetap i bas geluh enda e me perubahan amin pe Kata Dibata tetap seh rasa lalap. Ertina melala perkembangen si terjadi i bas geluhta si la seri ras si terjadi nai. Perkembangen enda tentuna perlu isikapi secara positif alu tetap njadiken Kata Dibata sebage pedoman. Sebab melala peminpin si la nai nggit erjalar apaika iajari. E maka sekalak peminpin arus ia nggit erjalar la erngadi-ngadi. 3) Ertanggung jawab makeken pemere Dibata (ay. 14) alu mehuli. I bas bahasa Indonesia ikataken, “Jangan lalai dalam mempergunakan karunia yang ada padamu yang telah diberikan kepadamu”. Iajuk Timotius gelah ertanggung jawab i bas makeken pemere Kesah si lit bas ia guna pembangunen kula ni Kristus. Penekanenna lit i bas kepemimpinen si ertanggung jawab membangun kula ni Kristus. Ertina tujun kepemimpinenna e me guna kemulian gelar Dibata labo kemulian gelar diri sendiri.

Adi siterusken ogenta seh ku ay. 16, ikataken rasul Paulus nina, “Dalankenlah si enda kerina alu tutus, gelah kerina kalak ngidah kemajunndu. Jagalah dirindu ras kai si iajarkenndu. Tetaplah dalanken si enda sabap i bas kam ndahiken dahin e iselamatkenndu me dirindu bage pe kalak si deban si megiken kam”. E maka tambahenna e me, sekalak peminpin arus nggit mengevaluasi dirina (ay. 15 “ngidah kemajunndu ras ay. 16 “Jagalah dirindu ras kai si iajarkenndu”), janah si penting kel, sedarilah maka sekalak peminpin Kristen arus ia mabai kalak si ipinpinna ku keselamaten i bas Yesus Kristus.

PA-nta sendah ngajuk kita Mamre gelah menjadi peminpin si mehuli sue ras prinsip-prinsip kepeminpinen Kristen. Adi ngerana kerna prinsip-prinsip kepemimpinen Kristen ningen berarti si jadi usihen e me Yesus Kristus, ma bage? Kai-kai saja prinsip kepeminpinen Kristen e? Adi rikutken bahan ogenta sendah e me : jadi usihen, la ngadi-ngadi erlajar, ertanggung jawab, nggit mengevaluasi diri, janah ngasup mabai ku keselamaten i bas Yesus Kristus. Melala denga prinsip-prinsip si deban si tersurat i bas Pustaka si Badia. Tapi si lit i bas bahan ogenta sendahlah si jadi fokusta. Mari sisungkun i bas pusuhta sekalak-sekalak, enggo nge kita jadi sekalak peminpin si layak (patut) jadi usihen, ertanggung jawab, nggit mengevaluasi diri, janah ngasup mabai ku keselamaten i bas Yesus Kristus? Adi lenga, mari radu ras siperobahi. Adi enggo, mari radu ras sitingkatken kualitas ras kuantitasna. Ibenaken i bas dirinta masing-masing, jadilah pemimpin yang baik untuk diri sendiri rikutken peraten Dibata. Dibatas si mpegegehi kita.