PA Kategorial GBKP Tgl. 25 Juni - 1 Juli 2017

PA MAMRE GBKP TGL. 25 JUNI - 1 JULI 2017

Nrs. Pdt. L. br. Sinuhadji (Bp. Rey Tarigan)

Lingkungan Hidup (Ngkelengi & Memberdayaken Tinepa Dibata)

Ogen : Kejadin 2:4b-15

Tema : PEKENA-KENA DONI ENDA

Tujun : Gelah Mamre ngergaken doni enda alu njagasa ras ngusahaisa alu mehuli

Penjelasan Bahan Ogen & Renungen

I bas kitab Kejadin lit dua turi-turin si nuriken kerna Dibata si njadiken kerina si nasa lit, si pemena e me Kej. 1:1-2:4a, si peduaken e me Kej. 2:4b-25. Banci ikataken Kej. 1:1-2:4a e me turi-turin penciptaan si sifatna general alu tahap-tahap si ratur i bas wari si pemena nari seh ku wari si pepituken. Kej. 2:4b-25 e me turi-turin kerna penciptaan si sifatna khusus, e me fokus ku manusia ras peranna i tengah-tengah tinepa Dibata si debanna. Sebage perbandingen, i bas Kej. 1:27-28 ituriken kerna manusia si ijadiken Dibata si sentudu ras tempasNa, e me dilaki ras diberu. Janah kenca ipasu-pasu Dibata manusia ndai iberekenNa tugas gelah ertuah jadi nterem, demi ras naluken doni, bage pe ngkuasai kerina nurung, perik, ras rubia-rubia. Sedangken i bas Kej. 2:4b-25 ituriken kerna penciptaan manusia secara detail. Leben ijadiken Dibata jelma (dilaki) i bas sitik abu taneh nari, janah iembuskenNa kesah kegeluhen ku bas igungna, e maka mulai nggeluh. I bas Kej. 2:22 ituriken maka ijadiken Dibata diberu i bas tulan rang-rang dilaki nari, e me teman si cocok nampati dilaki.

Kerna peran entah pe tugas tanggung jawab si ibereken Dibata man manusia i bas Kej. 2:4b-25, khususna i bas ogenta sendah, e me ngusahai ras njagai (bhs. Ind., mengusahakan atau mengerjakan dan memelihara) kerina si lit i Eden, termasuk je lau mbelin si erbelah jadi empat (Pison, Gihon, Tigris, ras Eprat). Lau banci ikataken sumber kegeluhen doni enda si erbahanca kerina tinepa Dibata banci nggeluh alu mehuli, e maka arus sijaga ras siusahaken gelah tetap denga banci mereken kegeluhen si mehuli man manusia ras tinepa Dibata si deban. Eden e me gambaren kerna ingan nggeluh manusia ras tinepa Dibata si deban i doni si dem alu kiniulin (sope lit dosa) bagi surga. Surga (bhs. Arab “firdaus”) si biasa sibelasken “pardis”, e me i bas bhs. Persia nari “pardes”. Keadaan si dem alu kiniulin enda erkawiten ras ekosistem si mehuli i ja kerina tinepa Dibata e saling menghidupi (saling bergantung) sada ras si debanna. Keadaan si dem alu kiniulin bagi surga enda si arus tetap sijaga ras siusahaken manusia.

Mungkin usur sibegi kita istilah maka manusia e me homo faber entah pe manusia yang bekerja ras homo ludens entah pe manusia yang bermain-main. Bermain-main i jenda maksudna seri bagi rekreasi i ja kita menikmati waktu khusus guna pekesahken i bas rutinitas pendahinta nari. Manusia bekerja adi i bas kitab Kejadin, khususna i bas ogenta sendah, seri ertina ras ibadah. Jadi “ngusahai ras njagaisa” i bas bahan ogenta seri ertina ras ibadah, i ja manusia erdahin alu palas ersembah man Dibata. Arah ersembah man Dibata enda maka lit batas i bas erdahin (ngusahai ras njagaisa) enda i ja manusia tuhu-tuhu banci menikmati dahin ras hasilna. I bas sisi si deban iteh manusia maka lit batas i bas ngusahai ras njagai doni enda, e me memastiken maka keberlangsungan ekosistem si dem alu kinilulin bagi i surga ndai tetap erdalan alu mehuli.

PA-nta sendah lit i teruh judul Lingkungan Hidup (Ngkelengi & Memberdayaken Tinepa Dibata), alu tema “Pekena-kena Doni Enda” ras tujun gelah Mamre ngergaken doni enda alu njagasa ras ngusahaisa alu mehuli. Akap kami enda arus tetap sipertahanken lit i bas buku PA Mamrenta gelah tetap lit wawasen lingkungan hidup si mehuli erpalasken Kata Dibata i bas kita Mamre GBKP. Engkai maka bage? Mari radu ras nen sekelewetta, tentuna enggo radu ras siteh maka enggo reh cedana doni enda erkiteken lanai lit pemahamen si mehuli kerna kelestarian lingkungan hidup. Enda tentuna arus jadi keprihatinenta si serius adi nggit denga kita anak ras kempunta nggeluh dem alu kiniulin i doni enda bagi i surga. Prihatin i jenda tentuna labo terjeng “merasa” ngenca tapi lit aksi-aksi si nyata i bas kita nari Mamre, baik secara Sinodal, Klasis ras Runggun, kerna pelestarian lingkungan hidup enda.

Kerna hal-hal si praktis si banci silakoken kita Mamre berkaiten ras pelestarian lingkungan hidup, akap kami enggo radu ras iteh kita janah mungkin enggo rusur ibegiken kita. Saja ngenca perlu sirenungken mulihi kerna tugas tanggung jawabta nandangi tinepa Dibata si deban bagi bahan ogenta sendah. Menjaga ras melestariken lingkungan hidup e me sada bagin si la terpisahken i bas kita ersembah man Dibata si erbahanca tuhu-tuhu isedari kita maka lit batasen-batasen i bas kita mengelola, memberdayaken kerina si lit i doni enda, e me njagai ras ngusahai gelah kelestarian lingkungan hidup e tetap terjamin keberlangsungenna. Mari radu ras sitekadken i bas geluhta guna semakin meningkatken usahanta guna njagai ras ngusahai kelestarian doni enda. Dibata si mpegegehi kita.