PA Kategorial GBKP Tgl. 18 - 24 Juni 2017

PA MORIA, MAMRE & PERMATA GBKP TGL. 18 - 24 JUNI 2017

Pdt. Larena br. Sinuhadji (Nd. Rey Tarigan)

Ogen : Keluaren 20:12; Kuan-kuanen 22:6

Tema : KELUARGAKU

Tujun : Gelah Moria, Mamre & PERMATA :

1) Mereken pendidiken ras usihen kiniteken man isi jabu

2) Mabai jabu erbahan Kebaktin Keluarga alu bage banci makeken ras ngergaken waktu alu mehuli

Metode : Kebaktin Keluarga & Permainan

Penjelasan Bahan Ogen & Renungen

Ogen si pemena i bas PA-nta sendah e me perentah si pelimaken i bas 10 Pedah Dibata, nina, “Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi”. Sebage perbandingen, si tertulis i bas Ul. 5:16 nina, “Hamati nandendu ras bapandu; enda me perentahKu, TUHAN Dibatandu, gelah mejuah-juah, janah cawir metua kam i bas negeri si Kubereken man bandu e”. Mehamat man orangtua labo erpalasken uga perbahanen orangtuanta man banta, tapi erpalasken perentah Dibata. Ertina, si jadi ukuren i bas kita ngehamati orangtuanta e me Dibata, labo orangtuanta. E maka i bas perentah e labo lit je ikataken “orangtuandu si mehuli ... rsd.” Sifat entah pe karakteristik mehamat man orangtua mengandung konsekuensi janji pasu-pasu (berkat) i bas Dibata nari e me : panjang umur (ndekah nggeluh), mejuah-juah, ras cawir metua.

Perentah si pelimaken enda termasuk i bas rencana Dibata erbahan sada bangsa si orientasi geluhna berobah total, baik i bas relasina ras Dibata (perentah I - IV) bage pe i bas relasina ras sesama manusia (perentah V - X). Rantai kesalahan-kesalahan yang terjadi pada masa lalu harus diputuskan untuk memulai suatu generasi yang baru. Ertina adi i bas bangsa e enggo pernah terjadi mehamat man orangtua erpalasken uga perbahanen orangtuana man bana arus sirobah palasna gelah tuhu-tuhu terjadi mehamat man orangtua erpalasken peraten Dibata. I bas sada sisi enda merupaken pengajaren man generasi muda. Tapi i bas sisi si deban, enda merupaken pengajaren man orangtua gelah tuhu-tuhu menyadari posisina si penting i bas mendidik anak-anakna entah pe generasi muda, e me mereken contoh entah pe teladan si mehuli, janah tuhu-tuhu jadi orangtua si erkemalangen man Dibata.

Ogenta si peduaken e me pengajaren man orangtua kerna mendidik entah pe ngajari kalak si nguda denga (anak-anak), nina “Ajarkenlah man anak uga kearusen nggeluh, maka ikutkenna asa umurna nggeluh”. I bas Alkitab Terjemahan Baru (TB-LAI) nina, “Didiklah orang muda menurut jalan yang patut baginya, maka pada masa tuanya pun ia tidak akan menyimpang dari pada jalan itu”. I bas Alkitab Bahasa Indonesia Sehari-hari (BIS) nina, “Ajarlah seorang anak cara hidup yang patut baginya, maka sampai masa tuanya ia akan hidup demikian”. I bas Alkitab BIS ras Pustaka si Badia nina “ajarlah” ras “ajarkenlah”, i bas Alkitab TB-LAI nina “didiklah”, janah adi sioge i bas Alkitab King James Version nina “train up a child”. Perbedaan terjemahen enda banci saling melengkapi maka pengajaren man anak entah pe kalak si nguda denga labo saja mengandung unsur mendidik alu kata-kata tapi pe melatih alu tindaken-tindaken nyata, entah i bas bahasa si deban, labo terjeng teori ngenca tapi pe arus lit teladan ngelakoken hal-hal si mehuli sue ras Kata Dibata.

Kata-kata “uga kearusen nggeluh” si i bas bahasa Indonesia iterjemahken “menurut jalan (cara hidup) yang patut baginya” banci iertiken sebage ngajari anak sue ras tahapen-tahapen usiana, banci ka iertiken sebage pengajaren kerna kai pe si benar sue ras Kata Dibata. Duana erti enda penting siperdiateken, sebab lit tahapen-tahapen perkembangen i bas anak baik secara fisik, psikologis, moral ras spiritual. Pengajaren man anak usia balita tentu saja la banci ipeseri ras anak usia remaja. Bage pe pengajaren kerna kai pe si benar sue ras Kata Dibata seh kel pentingna man anak-anak. Si pentingna kel i bas metode pengajaren man anak arus lit keseimbangen antara teori ras teladan sebab lit peribahasa nina, “Satu tindakan lebih berarti daripada seribu kata-kata”.

Tema bage pe tujun PA-nta sendah ngajuk kita orangtua gelah tuhu-tuhu nehken pengajaren erkiniteken si mehuli man anak-anakta. Rikutken bahan ogenta sendah iajuk kita gelah : 1) Menyadari posisinta si penting sebage orangtua si tuhu-tuhu erkemalangen man Dibata ras tuhu-tuhu banci mereken teladan entah pe usihen si mehuli man anak-anakta i bas kai pe, khusuna i bas erkiteken man Dibata. 2) La erlatih-latih ras la erngadi-ngadi i bas ngajarken kerina si mehuli sue ras peraten Dibata man anak-anakta alu mperdiateken tahapan-tahapan perkembangen usia anak bage pe keseimbangen i bas mendidik (cerdas intelektual, emosional ras spiritual).

Tujun si peduaken i bas PA-nta sendah e me “Mabai jabu erbahan Kebaktin Keluarga”, akap kami i bas piga-piga bimbingen Moria, Mamre, entah pe PJJ si lepas si enggo iposting i bas blog enda enggo rusur itekanken kerna pentingna erbahan Family Altar entah pe Kebaktin Keluarga. Janah secara khusus i bas Klasista enggo ibahan buku pembinaan “Ertima” (Erlajar ras 30 menit) si enggo ilaksanaken i bas Runggun-runggun se-Klasis Riau Sumbar kenca dung Kebaktin wari Minggu. Salah sada materi pembinaan enda e me ngerana secara khusus kerna pembinaan keluarga. Enggo ibahan brosur khusus kerna pentingna erbahan doa ras saat teduh bersama i bas keluarganta masing-masing (banci inen i teruh). Pengarapen kami tentuna arah bahan-bahan pembinaan kerna keluarga Kristen enda erbahanca reh tutusna kita i bas membina keluarga si erkemalangen man Dibata. E maka man banta Mamre ras Moria si lenga ibenaken kebaktin keluarga i bas jabunta masing-masing mari radu ras sibenaken. Man bandu PERMATA si ndauh i bas orangtua nari erkiteken kuliah entah pe erdahin, mari radu ras sibenaken kebiasaan si mbaru i bas ertoto bage pe ber-saat teduh (ngoge Pustaka si Badia) pribadi secara teratur.

Arah penelitian si pernah ilakoken se-Klasis Riau Sumbar piga-piga waktu si lepas idatken data : si enggo ngelaksanaken doa bersama i bas jabuna e me 8,2%, si kadang-kadang 11,5%, si lenga ngelaksanaken 80,3%. Si enggo ngelaksanaken saat teduh (ngoge Pustaka si Badia) bersama keluarga setiap wari e me 9,43%, si kadang-kadang 33,96%, si lenga ngelakoken 56,6%. Data-data enda tentuna arus menjadi concern (perhatian) kita bersama. Kira-kira generasi si uga si ihasilken kita adi hasil penelitian e tetap denga sipertahanken? Mari radu ras memutus rantai kesalahan di masa lalu! Sendah e me waktu si tepat guna menciptakan generasi baru si tutus erkemalangen man Dibata. Pindolah gegeh i bas Dibata nari gelah ipengasupna kita ngelaksanaken kerina si jadi peratenNa.