PJJ GBKP Tgl. 18 - 24 Juni 2017

PJJ GBKP TGL. 18 - 24 JUNI 2017

Nrs. Pdt. L. br. Sinuhadji (Bp. Rey Tarigan)

Tema : PERSADAN SI MPETURAH KEMALEMEN ATE
(Perb. Rasul 2:43-47)

Penjelasen Bahan Ogen & Renungen

Kiniersadaan banci terjadi erkiteken erbage-bage hal, umpamana, persadan erkiteken seri sukuna, seri mergana, seri partaina entah pe kepentingen politikna, seri hobina, seri profesina entah pe pendahinna, seri jenis kelaminna, rsd. Arah contoh persadan ndai maka enggo jelas kai si jadi palas ilitkenna persadan ndai. Palas enda penting erkiteken menentuken manfaat kai si idatken adi bergabung kita ku bas sada-sada persadan. Adi tuhu-tuhu igejapken mbelin manfaat si idatken i bas sada-sada persadan e tentuna semakin melala anggotana, sebalikna adi enggo lanai lit igejapken manfaatna itadingken anggotana. Tapi si pentingna i bas persadan persadan e me lit perasaan ersada sada ras si debanna terlepas kai pe si jadi palas persadaan ndai.

I bas ogenta sendah teridah maka perpulungen kalak si tek si pemenana (gereja mula-mula) reh tambahna anggota-anggotana. Adi sioge i bas bindu 2:41 jumlah anggota perpulungen kalak si tek e me kira-kira 3.000 kalak. Iumputi i bas bindu 4:4 meningkat jadi 5.000 kalak (dilaki saja). I bas Perb. Rasul 5:14; 6:7; 9:31; 16:1, tercatat pertambahen jumlah perpulungen si semakin meningkat. Jumlah anggota enda tentuna reh ertambahna. Kai palas persadan kalak si tek paksa si e? Palasna tentuna seri ras kita paksa sendah, kiniteken man Yesus Kristus si enggo keke i bas si mate nari guna nyelamatken doni si dem alu dosa. Kai si menyebabken jumlah perpulungen kalak si tek semakin bertambah?

Si pemena lebe tentuna erkiteken pendahin Kesah si Badia si nuanken kiniteken man Yesus Kristus ku bas pusuh perukuren kalak si tek. Pengakun kerna pendahin Kesah si Badia enda seh kel penting erkiteken bas kita kalak si tek masih denga lit potensi kiniganjangen ukur si erbahanca kita “merasa sangat berjasa” i bas mantekken sada perpulungen entah pe gereja, padahal situhuna la lit gegeh beluhta selain erkiteken kuasa Kesah si Badia. Kita hanya alatNa ngenca guna ngelakoken kerina si mehuli sue ras peratenNa. Si peduaken, lit kiniteruken ukur, kininggiten ras ketutusen i bas erlajar kerna Kata Dibata. I bas ay. 42 ikataken nina, “Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata”. Karakter meteruk ukur, ketutusen ras nggit iajari enda si erbahanca perpulungen e geluh sikeleng-kelengen sada ras si debanna.

Nggeluh ersada sikeleng-kelengen sada ras si debanna, bage pe nggeluh erkemalangen man Dibata mpeturah erbage-bage tanda sengget i bas perpulungen kalak si tek (ay. 43). Tanda-tanda sengget (tanda-tanda ajaib, mujizat) akap kami labo saja berkaiten ras hal-hal si spektakuler (si lumpuh erdalan, si pentang erpengidah, rsd.) tapi banci terjadi i bas hal-hal si i bas pengakapta sederhana, sepele, entah pe remeh. I bas ay. 44-45, tanda sengget si banci siidah e me, lit kininggiten erpalasken keleng ate, tutus ate ras meriah ukur guna saling berbagi kai si lit, termasuk je berbagi erta-ertana guna keperlun sekalak-sekalak. I bas ay. 46-47, tanda sengget si banci siidah e me lit kiniersadaan ukur i bas erbakti man Dibata, janah kerina kalak erngena ate man perpulungen e. Karakter meteruk ukur, ketutusen ras nggit iajari pe situhuna tanda sengget si banci siidah i bas perpulungen paksa si e, sebab labo murah ngerobah kiniganjangen ukur jadi meteruk ukur, labo hal si murah ngerobah karakter kisat jadi tutus ras nggit erlajar kerna Kata Dibata.

Tema i bas PJJ-nta sendah e me “Persadan si mpeturah kemalemen ate”. Enggo kin lit kemalemen ate i bas persadanta? Adi enggo lanai lit kemalemen ate tentuna lit si salah i bas persadanta i bas gereja. Penungkunen reflektif ras evaluatif man banta, apakah kiniersadaan si enggo terjalin sedekah enda i bas gerejanta tuhu-tuhu erpalasken kiniteken si tuhu-tuhu man Yesus Kristus? Hal enda penting sebab kinitekenta si tuhu-tuhu man Yesus Kristus menentuken karakteristik sekalak jemaat jadi jemaat si nggit meteruk ukur, lit ketutusen ras nggit erlajar kerna Kata Dibata, nggit sikeleng-kelengen, nggit berbagi, nggit ersada ukur, rsd. I bas kita erkiniteken si tuhu-tuhu man Yesus Kristus erbahanca Kesah si Badia tuhu-tuhu erdahin i bas persadanta (persekutuan). Ertina lit pengakun si tuhu-tuhu i bas dirinta maka Kesah si Badia si erkuasa i bas gerejaNa, sebab kuasa Kesah si Badia ngenca si ngasup erbahan perobahen si nyata i bas geluh kinitekenta.

I bas persadanta si tuhu-tuhu ras Kristus erbahanca persadanta ras sapih-sapih perpulungen pe tuhu-tuhu terjalin secara otentik, labo perkulah-kulah, jaga image, entah pe persadan si semu, teridah mejile arah darat tapi situhuna lang. Persadanta si tuhu-tuhu i bas Kristus mpeturah erbage-bage hal si mehuli, hal-hal si iukurken kita la mungkin banci iwujudken, tapi i bas persadanta si tuhu-tuhu i bas Kristus banci terwujud (tanda-tanda sengget). Tentuna la lit ise pe kita si la nggit ngaloken kemalemen ate i bas Dibata nari bage pe erbage-bage hal si mehuli i bas Dibata nari. E maka i bas PJJ-nta sendah iajuk kita guna mengevaluasi kualitas persadanta, baik persadanta secara pribadi ras Yesus Kristus, bage pe persadanta i bas perpulungen kalak si tek. Adi enggo mehuli persadanta ras Kristus bage pe persadanta i bas perpulungen, tingkatken kualitasna, sebab i bas kita erkiniteken man Dibata la lit kata selesai seh kita nadingken doni enda. Adi lenga mehuli persadanta ras Kristus, mari radu ras sipehuli, pindolah gegeh i bas Kesah si Badia nari gelah ipengasupNa kita erkiniteken man baNa alu tutus.