PJJ GBKP Tgl. 4 - 11 Juni 2017

PJJ GBKP TGL. 4 - 11 JUNI 2017

Nrs. Pdt. L. br. Sinuhadji (Bp. Rey Tarigan)

Tema : KELENG ATE TUHAN LA ERKERI-KERIN (Perngandungen 3:22-24)

Penjelasen Bahan Ogen & Renungen

Kitab Perngandungen (Ind. Ratapan) e me refleksi teologis bangsa Israel kerna perbeben ras kiniseran si nialamina. I bas bahasa Ibrani nina “Eikhah” ertina i bas bahasa Indonesia “kenapa”, e me sada kata penungkunen si wajar ikataken sekalak si sangana lit i bas perbeben entah pe kiniseran si mberat. Adi i bas pengantar Alkitab Edisi Studi nina ikatakenna, “Puisi-puisi (dalam kitab Ratapan) ditulis untuk mengantar umat Allah menemukan makna berharga dari tragedi yang memilukan. Tragedi kadang kala mengungkapkan kehendak Allah yang sesungguhnya. Allah memang menghukum bangsa Israel karena dosa-dosa mereka, tetapi Dia sama sekali tidak pernah meninggalkan mereka”. Latar belakang kitab Perngandungen enda e me penakluken ras penghancuren Yerusalem i bas tahun 586 SM si ilakoken kerajan Babel (bdk. 2 Raj. 25), janah melala kalak Israel si itaban i Babel. Radu ras iteh kita maka kota Yerusalem bage pe Rumah Pertoton e me lambang kegeluhen bangsa Israel, emaka kehancuren Yerusalem ras Rumah Pertoton e me peristiwa si tragis (tragedi yang memilukan).

Tapi Dibata la pernah nadingken bangsaNa, keleng ateNa la erkeri-kerin bagi bahan ogenta sendah nina, “Langa bo keri keleng ate TUHAN perkuah ateNa tetap nge lit. Keleng ateNa mbincar tep-tep erpagi-pagi, bali tetapna ras matawari si pultak arah kenjulu. TUHAN kap baginku e maka man baNa ngenca aku erpengarapen”. I bas Alkitab TB-LAI nina, “Tak berkesudahan kasih setia TUHAN, tak habis-habisnya rahmat-Nya, selalu baru tiap pagi; besar kesetiaan-Mu! “TUHAN adalah bagianku,” kata jiwaku, oleh sebab itu aku berharap kepada-Nya”. I bas ogenta enda jelas lit je pengakun kiniteken man Dibata kerna : perkuah ateNa (rahmatNya), keleng ateNa (kasih setiaNya) si la erkeri-kerin. Pengakun kiniteken e mabai ku sada tindaken nyata e me tuhu-tuhu njadiken Tuhan ulu pengarapen. Pengarapen man Dibata enda nge si mpegegehi bangsa Israel megenggeng ndalani kerina perbeben ras kiniseran i bas kegeluhenna. Puisi-puisi si lit i bas kitab Perngandungen, termasuk bahan ogenta sendah, biasa iogeken bangsa Israel i bas kebaktinna i bas tahun liturgi tertentu. Ertina lit pengakun kiniteken secara kolektif maka perkuah ate Tuhan ras keleng ateNa la erkeri-kerin. Pengakun kiniteken secara kolektif enda erbahanca kalak Israel saling mpegegehi sada ras si debanna i bas tetap erpengarapen man Dibata, amin pe kiniseran ras perbeben e lenga berakhir.

Tema si seh man banta i bas PJJ-nta sendah e me “Keleng ate Tuhan la erkeri-kerin”, akap kami tema enda pe jadi pengakun kinitekenta, perkuah ate Tuhan ras keleng ateNa tuhu-tuhu la erkeri-kerin i bas kegeluhenta. Adi enggo tek kita maka perkuah ate Tuhan ras keleng ateNa tuhu-tuhu la erkeri-kerin maka kai pe perbeben entah pe uga pe beratna kiniseran si nialami kita, mengeggeng kita ndalanisa erkiteken tuhu-tuhu lit pengarapen man Dibata. Rasul Paulus i bas 1 Kor. 13:13 ikatakenna (terj. TB-LAI), “Demikianlah tinggal ketiga hal ini, yaitu iman, pengharapan dan kasih, dan yang paling besar di antaranya ialah kasih”, sebab memang hanya melalui erkiniteken ras erpengarapen man Dibata, janah ngikuti teladan Yesus i bas erkeleng ate, si mpengasup kita naluken kerina perbeben ras kiniseran si mberat i bas geluhta. Penungkunen evaluatif man banta pribadi lepas pribadi, apakah kita enggo tuhu-tuhu erkiniteken ras erpengarapen man Dibata, janah ngikuti teladan Yesus i bas erkeleng ate?

Hal si deban, bangsa Israel secara kolektif erpengarapen man Dibata, e si erbahanca bangsa e saling mpegegehi sada ras si debanna. Tentuna kita pe ngakuken i bas kinitekenta maka Dibata tuhu-tuhu ulu pengarapenta, ertina kita pe arus saling mpegegehi, saling ngapuli, sisampaten, saling notoken sada ras si debanna i bas ngalaken kerina perbeben ras kiniseran si lit i bas perpulungenta kalak si tek man Yesus Kristus. Adi kerna saling mpegegehi, saling nehken pengapul, sisampat-sampaten ras saling notoken sada ras si debanna mungkin enggo semal ilakoken kita, tapi mungkin arus lebih sitingkatken kualitas ras kuantitasna, gelah tuhu-tuhu tergejap nanam geluh i bas perpulungen kalak si tek man Yesus Kristus. Hal si deban si banci idatken kita arah PJJ-nta sendah, memang perkuah ate Tuhan ras keleng ateNa la erkeri-kerin, tapi perkuah ate Tuhan ras keleng ateNa e labo sada kesempaten ngelakoken dosa. Rasul Paulus ngatakenca i bas Gal. 6:7 (terj. TB-LAI), “Jangan sesat! Allah tidak membiarkan diri-Nya dipermainkan. Karena apa yang ditabur orang, itu juga yang akan dituainya”.