PJJ GBKP Tgl. 11 - 17 Juni 2017

PJJ GBKP TGL. 11 - 17 JUNI 2017

Pdt. Larena br. Sinuhadji (Nd. Rey Tarigan)

Tema : GEGEH-NDU KAP GEGEHKU (Johanes 14:26-27)

Penjelasen Bahan Ogen & Refleksi

Bahan ogen PJJ-nta si dua ayat enda lit i teruh judul “Ipadanken Yesus Kerehen Kesah Si Badia”. Ope Yesus nangkih ku Surga, ipindokenNa man Bapa gelah isuruhNa Penampat si deban e me Kesah si naksiken kebenaren kerna Dibata, gelah itemaniNa ajar-ajarNa rasa lalap. E maka sepuluh wari kenca Yesus nangkih ku Surga, reh me Kesah Si Badia asum ajar-ajarNa pulung i Yerusalem i bas perayaan Pentakosta.

Kesah Si Badia sebage Si Nampati, Penghibur (TB-LAI), Penolong (BIS-BIMK), man kalak si tek man baNa (bdk. Yoh. 16:7, “adi labo Aku lawes, labo reh Penampat e”).

Kesah Si Badia si ngajari kerna kai pe. Kesah Si Badia berfungsi sebage Guru, Si Ngajari kerna erbage hal si perlu ieteh ajar-ajarNa, subuk guna dirina jine bage kelengkapen guna ngajari kalak si deban.

Kesah Si Badia Si Mpersingeti kerna kerina si enggo ikataken man ajar-ajar. Kesah Si Badia Si Erkuasa mpersingeti kita kerna Kata Dibata asum erbage-bage persoalen reh ku tengah-tengah geluhta, subuk tantangen, ujian, godaan, kesusahen, rsd. Kesah Si Badia Si Mpersingeti kita kerna janji-janji Tuhan si erbahanca tetap kita paguh ndalani kegeluhen e.

Kesah Si Badia si tetap mereken kemalemen ate, si la bali ras cara doni enda merekenca. Kemalemen ate si itawarken doni sifatna sementara ras hanya berkaiten ras kesenangen fisik ngenca. I datas ndai enggo ijelasken, maka Kesah Si Badia sebage Si Nampati entah pe Pengapul (Parakletos). Manusia ratana butuh pengapul (hiburan, penghiburan). Kesah Si Badia si berperan guna mereken bimbingen, gegeh ras pengapul man kalak si tek gelah ngasup ndalanken tugasna sebage saksi Kristus. Hal enda penting guna banci sipakeken i bas kegeluhenta, sebab ratana kita butuh pengapul (hiburan & penghiburan). Terlebih konteks kenca itadingken Tuhan Yesus, ajar-ajar merasa kelungunen, bahkan mbiar ras gulut janah arus ka jadi saksi man doni enda. Perbapan rusur ndarami hiburen alu ngkawil, main batu, ku kafe alu alasen “buang suntuk”. Pernanden, si rusur shopping ras gawah-gawah ku Mall, e pe erkiteken alasan, suntuk, cuci mata, cari hiburen, rsd. Penungkunenna, apakah kenca enggo mulih i bas ingan si ndai enggo bene suntukna? Banci jadi ertambahna, sabab enggo pasti ndarat ka uang keluar. Labo berarti la banci ku Mall, kafe, rsd., ertina si e kerina silakoken dalam rangka refreshing, labo e jalan keluar i bas persoalen sialami kita. Contoh si deban, anak-anak muda si ndarami hiburen alu make narkoba, minum-minuman keras, ras gaya hedonis si deban.

Si jadi penungkunen, apakah hiburan-hiburan si bage mabai pengapul si tuhu-tuhu man banta, seh makana tuhu-tuhu kita terapul, megegeh, ngasup tetap ngataken bujur ras ermeriah ukur amin sekali lenga lit solusi i bas perbeben si ialami kita? Entah sebalikna? Hiburan-hiburan e justru erbahanca roh entah pe tendinta lemah, cengeng, la megenggeng i bas ngalaken kiniseran. Je nari terus kita ndarami acara hiburen si deban si banci nambari kesepian entah pe “kegalauan” ukurta. Banci jadi i bas waktu kentisik kita terapul, tapi kenca si e tetap lit kekosongen i bas pusuhta si erbahanca la kita semangat. Tuhan enggo erpadan maka Kesah Si Badia e me si jadi Pengapul, Penampat, Penghibur si tuhu-tuhu man banta, labo si semu. Kesah Si Badia si tetap banci mpelimbarui kegeluhenta, si mpengasup kita ermeriah ukur, semangat amin sekali kurang fasilitas hiburen duniawi. Bahkan tendinta ngasup denga rende muji Tuhan amin sekali berat beban si arus sialaken.

Tema PJJ-nta sendah, “GegehNdu kap gegehku”, mabai kita tetap ergegeh i bas ndalani geluh enda sabab labo siandalken gegehta si terbatas, tapi gegeh Tuhan arah KesahNa Si Badia si sampur katawari pe erkiteken pengendesenta man baNa. Bagi nina Paulus, “gegeh Tuhan serta kap i bas gegehta si kurang” (2 Kor. 12:8c).