SUPLEMEN PA MORIA GBKP TGL. 16 - 22 AGT. 2026

Pdt. Larena Sinuhadji, M.Th.

HUT Mamre: Mamre Tangguh

Si Man Ogen : Kuan-kuanen 12:4-8

Tema : KEMULIAN RAS KERIAHEN PERBULANGEN

Tujun : Gelah Moria :

- Meteh kerna ndehara si mehuli dingen bujur

- Nuriken atena ngena man perbulangenna

Metode : Aksi

Penaruh

Perbulangen e me anugerah Dibata man banta si harus terus-menerus, la lit kata ngadi (ending), guna banci kita nandaisa. Entah pe si lebih tepat, menjiwaisa. Bage sebalikna, saling menjiwai i bas jabu maka e si erbahanca jabu e sempabu. Secara khusus i bas rangka mperingeti HUT Mamre GBKP i bas tahun enda, radu ras kita mulihi erlajar kerna nandai perbulangenta erpalasken si man ogenta sendah, gelah ipengasup Dibata kita ngkuhi keriahenna.

Mpebagesi Si Man Ogen

Kitab Kuan-kuanen termasuk ku bas kitab hikmat (wisdom literature) raduken ras Kitab Jop ras Pengerana. Tujun utamana e me ngajarkenca kerna keterampilen nggeluh erpalasken mehamat dingen erkemalangen man Dibata. Emaka hal si utamana i bas kitab enda e me “Takut akan TUHAN adalah permulaan pengetahuan.” I bas terj. Bhs. Karo nina, “Guna datken pemeteh, si pemenana si la banci la lit i bas kalak e me mehamat dingen erkemalangen man TUHAN” (bindu 1:7). Alu bage kepentaren i bas kitab enda labo terjeng erkaiten ras kecerdasen intelektual, tapi cara nggeluh si sue ras peraten Dibata.

Si man ogenta sendah lit i teruh judul perikop “Pertenget Salomo” si ibenaken i bas bindu 10 nari seh ku bindu 22:16. I bas terj. Bhs. Ind., nina “Kumpulan amsal-amsal Salomo.” Banci ikataken pertenget Salomo enda cukup gedang, i ja tema utamana e me kepentaren i bas Dibata nari erbahanca ise pe si ngelakokenca datken kemalemen ate, sedangken kepentaren doni si dem alu kebodohen ras kefasiken mabai ku kehancuren.

Adi sioge kerina bindu 12, melala je perbandingen si saling berlawanen, umpamana, kalak pentar ras kalak lenge, kinibujuren ras kejahaten, kinijingkaten ras kemalasen, kalak bodoh ras kalak si lit ukurna, kalak si erbintuas ras kalak si motu, rsd.-na. I bas kerina perbandingen e tentu si niarapken pilihlah si sue ras peraten Dibata, e me: kepentarern, kinibujuren, kinijingkaten, erpemeteh, erbintuas, rsd.-na. Tapi i bas kita milih e harus leben enggo siukurken manfaatna bagepe resikona.

Secara khusus si jadi fokus i bas PA-nta sendah e me ay. 4-8. Ay. 5-7 e me perbandingen antara kalak si bujur as kalak si jahat. Kalak bujur lit i bas ia kinibujuren, perukuren si mehuli, engkelini entah pe mabai ku keselamaten, kesusurenna ipasu-pasu Dibata. Sebalikna, kalak si jahat, lit i bas ia kerina sura-sura si jahat: dem tipu muslihat, manipulatif, ersura-sura munuh, rsd.-na. Tapi kedungenna tombang, janah masap kesusurenna erkiteken perbahanenna. Ay. 8 e me perbandingen kalak si erpemeteh ras kalak si motu. Kalak si motu iisakken sedangken kalak si erpemeteh ipujiken. Pemeteh i jenda e me kepentaren i bas Dibata nari. Si apai sipilih? Tentu sipilih jadi kalak si bujur.

Ay. 4 e me pedah-pedah khusus man diberu, khususna ndehara. Nina, “Ndehara si mehuli, ia kap kemulian ras keriahen perbulangenna, tapi ndehara si njuruken bali kam ia ras penakit kangker.” I bas terj. LAI Ed. 2 bagenda nina, “Istri yang cakap adalah mahkota suaminya, tetapi yang membuat malu adalah seperti penyakit yang membusukkan tulang suaminya.” Kai enda antusenna? Ndehara si mehuli ertina diberu si dem alu kepentaren, setia, mbiar man Dibata, janah mulia karakterna. “Mahkota” antusenna lambang kehamaten, kemulian, ras kemegahen. Sebalikna, ndehara si erbahanca keluarga dat kemelan bali ras pinakit kronis si menggerogoti arah bas nari. Pesan teologisna, utamakenlah erbahan “inner beauty” entah pe kecantikan dari dalam asangken kinijilen secara fisik. Ndehara si erkemalangen man Dibata itehna milih si mehuli guna kemulian ras keriahen perbulangenna, bage pe keluargana.

Pengkenaina

PA-nta sendah ngajuk kita kerina Moria gelah jadi ndehara si mehuli dingen bujur, secara khusus i bas peranna selaku nande nandangi anak-anakna bage pe ndehara nandangi perbulangenna. I bas si e kuncina harus nggeluh erkemalangen man Dibata, gelah alu bage ipengasup Dibata milih kebujuren ras kepentaren i bas Dibata nari asangken kerina si itawarken doni enda. Janah harus nggit terus-menerus erlajar arah erbage-bage pengalamen i bas geluh jabunta.

Tapi situhuna kunci kebahagian i bas jabu e me kap saling, radu engkelengi, radu menjiwai, radu nampati, radu mperdiateken, rsd. Labo hanya sembelah saja, entah pe egois kita ateta lalap iperdiateken ras ilayani. Pasti akan terjadi ketimpangen. I bas HUT Mamre sekali enda, mulihi kita ipersingeti gelah tetap silakoken tanggung jawabta guna nehken kekelengen man perbulangenta. Guna keharmonisen jabunta, keutuhan jabunta terus-menerus kita erbahan si mehuli guna perbulangen ras anak-anakta. Tetap sipebelin biak mengalah guna kiniulin jabu, rukur guna kiniulin jabu, ngasup memaafkan, tidak menutut pasangenta berubah tapi kita lebih berubah rikutken si niarapken. Memang enda labo gampang, tapi guna kiniulin jabu sipindo tetap gegeh man banta selaku ndehara si erkemalangen man Dibata. Dibata si mpengasup kita kerina Moria GBKP.