SUPLEMEN PJJ GBKP TGL. 16 - 22 AGT. 2026

Pdt. Larena Sinuhadji (Nd. ReyRapha Tarigan)

DIBATA KAP PEMBEBAS - Keluaren 6:2-13

(HUT RI 81 Tahun)

Penaruh

Bujur ninta man Tuhan Dibata i bas Yesus Kristus, erkiteken la tergejap enggo ka seh kita ku peringeten HUT RI si pe-81-ken. Janah enggo iatanken Tuhan kita mentasi setengah tahun i bas 2026 enda. Adi siperdiateken realita kegeluhen rakyat Indonesia seh ku pelosok-pelosok, enggo nge kita merdeka? Presiden Soekarno pernah ngatakenca bagenda nina, “Perjuanganku lebih mudah karena mengusir penjajah, tapi perjuanganmu akan lebih sulit karena melawan bangsamu sendiri.” Realitana memang payo, genduari enda melala pejabat pemerintahan si hanya ngukurken dirina sendiri saja. La ia mediate nandangi kesejahteraan rakyatna. Padahal pejabat-pejabat e nggeluh i bas sen rakyat nari. Oge saja berita-berita koruptor ras sen hasil korupsi si nilaina enggo di luar nalar, ratusen triliun. E pejabat si terdat ngelakoken korupsi, lenga ka si lenga terdat.

I bas kesempaten enda radu ras kita merenungkan makna kemerdekaan erpalasken si man ogenta sendah.

Mpebagesi Ogen

Ogenta sendah lit i teruh judul perikop “Dibata nuruh Musa.” Latar belakang turi-turin i bas ogenta sendah e me bangsa Israel lit i bas kiniseran si mesangat i taneh Mesir erkiteken. Rikutken informasi i bas Kel. 1 nari, lit dua hal si erbahanca bangsa e ngenanami kinseran. Si pemena, kenca enggo mate Yusuf, kesusuren bangsa Israel i Mesir enggo reh enteremna. Mungkin banci ikataken enggo reh enteremna kalak Israel si berpengaruh baik i bas hal ekonomi bage pe i bas hal politik. Si peduaken, Raja Mesir si mbaru enggo lanai itandaina Yusuf. I bas kondisi si bage rupana, inen Raja Mesir e maka keberadaan bangsa Israel i tengah-tengah taneh Mesir banci jadi ancamen keamanan man bangsa Mesir. Emaka ibahanna kebijaken-kebijaken si tujunna gelah bangsa Israel reh kitikna baik i bas hal jumlah bage pe i bas hal pengaruhna secara ekonomi bage pe politik. Salah sada kebijaken si erbahanca bangsa Israel menderita e me sistem perbudakan si kejam.

Kenca enggo ibegiken Dibata pemindon bangsa Israel gelah ipulahi i bas perbudaken nari, maka isuruh Dibata Musa ras Harun guna ngadap Raja Mesir, alu tujun gelah ipelepas Raja Mesir bangsa Israel lawes i bas Mesir nari. Tapi la ibegiken Raja Mesir kai si ipindoken Musa ras Harun. La ipelepas raja bangsa Israel nadingken Mesir, malah itambahi raja beban pendahin si harus idahiken bangsa e. Erbahanca reh kelekna kiniseran si inanami bangsa Israel paksa si e. Emaka isuruh Dibata Musa guna mpegegehi bangsa Israel bage pe guna ngadap Raja Mesir mulihken alu ngatakenca la banci la iberena bangsa Israel nadingken negeri Mesir.

Si jadi fokus i bas PJJ-nta sendah e me padan Dibata man bangsa Israel si sangana ngenanami kiniseran i bas perbudaken kalak Mesir nari. I bas ay. 6-8 erpadan Dibata maka ibebaskenNa ras iselamatkeNa bangsa Israel i bas perbudaken kalak Mesir nari. Ijadiken Dibata bangsa Israel jadi bangsaNa. Itaruhken Dibata bangsa e ku taneh Kanaan bagi si enggo pernah ipadankenNa man Abraham, Isak, ras Yakub, janah ibereken Dibata taneh e jadi sikerajangen bangsa Israel. Si e kerina ipadanken Dibata man bangsa Israel erkiteken IA kap TUHAN Dibata.

Arah ogenta sendah teridah maka lit peran telu pihak. Si pemena e me Dibata si mpelimbarui padanNa man bangsa Israel erkelangken Musa suruh-suruhenNa. Tujunna gelah tuhu-tuhu ipeteguhi kiniteken bangsa Israel, megegeh ras megenggeng i bas ngalaken kiniseran. Lit empat kali Dibata ngatakenca, “Aku kap TUHAN” i bas ay. 2, 6, 7, ras 8. Ertina kai si ipadanken Dibata pasti terjadi amin pe bangsa Israel lit denga i bas perbudaken denga. Si peduaken, bangsa Israel si sangana bene ukurna erkiteken perbudaken si kejam (ay. 9). Amin pe la ibegiken bangsa e kai si ipadanken Dibata erkelangken Musa, tapi inget denga bangsa e man Dibata, maka nderkuh bangsa e mindo man Dibata gelah ipulahi i bas perbudaken nari (ay. 5). Si peteluken, Musa sebage suruh-suruhen Dibata, amin pe dipenuhi dengan keraguan ras jungut-jungut (Kel. 5:22-23), janah la ibegiken Raja Mesir bage pe bangsa Israel kai si ikatakenna, tapi Musa tetap tutus ngelakoken kai si isuruh Dibata man bana.

Pengkenaina

PJJ-nta sendah ngajuk kita kerina gelah tetap paguh erkiniteken amin pe lit i bas kondisi si la bagi ukur: ekonomi sulit, terpuruk i bas usaha, anak-anak la patuh, sulit dat dahin, kondisi sosial si intoleran, rsd.-na. Tek kita maka Dibata si enggo mbebasken bangsa Israel i bas perbudaken Mesir nari, pasti mbebasken kita i bas kondisi si la bagi ukur. Khususna i bas keadaan bangsa ras negaranta genduari enda, i ja kesejahteraan ras keadilan lenga banci tuhu-tuhu inanami masyarakat secara merata. Teruslah megegeh ertoto, bagi bangsa Israel si nderkuh man Dibata gelah ipulahi i bas perbudaken nari, kita pe harus terus ertoto la erngadi-ngadi guna kemerdekaan ras kesejahteraan bangsa ras negaranta.

Usihlah Musa, i ja amin pe idemi alu kebiaren, keraguan, penolakan-penolakan, tapi tetap tutus ia i bas ngelakoken perentah Dibata. Adi sioge seh dung turi-turin kerna Musa, amin pe la iatanken Dibata ia bengket ku taneh Kanaan, tapi kuasa Dibata tuhu-tuhu erdahin i bas dirina, ipegegehi Dibata ia i bas ngalaken erbage-bage tantangen baik i bas dirina sendiri bage pe si nihadapina secara langsung sebage pemimpin bangsa Israel. Emaka mari radu ras kita ertekad guna terus erbahan si terbaik guna kiniulin bangsa ras negaranta. Kai si banci ilakoken kita guna menanggulangi krisis si sangana terjadi genduari enda, lakokenlah. Pindolah gegeh i bas Dibata nari gelah ipengasupNa kita ngelakoken si mehuli guna kiniulin bangsa ras negaranta. Dirgahayu NKRI si pe-81 tahun-ken. Dibata si mbebasken bangsa ras negaranta i bas krisis nari, baik krisis ekonomi, bage pe krisis mentalitas pemimpin-pemimpin bangsa si hanya ngukurken dirina sendiri.