SUPLEMEN PA MORIA GBKP TGL. 11 - 17 OKT. 2026

Pdt. Larena Sinuhadji (Nd. ReyRapha Tarigan)

Si Man Ogen : Kejadin 41:25-36

Tema : PENTAR NGATURKEN KINILITEN

Tujun : Gelah Moria :

- Nuriken tantangen ras serpang pulah si ibahan Yusuf

- Nulisken pemasuken pengeluaren sada bulan alu pentar

Penaruh

Lit istilah ngatakenca, “Seberapapun uang itu bisa cukup, juga bisa kurang tergantung kepada kita untuk dapat mengaturnya dengan baik.” Maka lit lagu si menggambarkan kondisi si e, “Sada pe bias, dua pe kurang adi la beluh kita ncibalkenca.” Alu bage kunci i bas kita ngasup makeken kiniliten si ibereken Tuhan banta e me kepentaren (hikmat Tuhan). Tema i bas bahan PA Moria-nta “Pentar ngaturken kiniliten,” seh pentingna selaku kita nande (Moria), terlebih i bas paksa genduari, i ja kondisi ekonomi sangana sulit. Emaka alu bahan PA-nta sekali enda, mulihi kita erlajar ras ipersingeti gelah tetap beluh ngaturken kiniliten gelah ula sempat lebih besar pasak daripada tiang.

Mpebagesi Si Man Ogen

Perikopta ilatarbelakangi nipi Raja Firaun kerna pitu lembu si mbur ras pitu lembu kertang-kertang. Bage pe ernipi ka ia kerna pitu ruhi page perngis ras pitu ruhi page si lambang ras melus iembusken angis si melas. La lit sekalak pe guru-guru si baso ras kalak si erpemeteh i Mesir si ngasup nuriken antusen nipi Firaun ndai. Kedungenna idilo me si Yusuf i bas tutupen nari arah pemindon Pegawai Inemen Raja, si enggo isampati Yusuf i bas tutupen (penjara), sanga pernah ia masuk ku penjara.

Yusuf ngatakenca man raja, maka duana nipi raja seri antusenna. Pitu lembu si mbur ras pitu ruhi page si perngis nuduhkenca reh me masana pitu tahun masa kelimpahen (riba-iba) ibelang-belang Mesir. Kenca bage jadi me pitu tahun dekahna kelihen si banci erbahanca ncedaken negeri. Erkiteken nipi Raja Firaun dua kali, ngatakenca maka kerina kejadin e enggo itetapken Dibata. Pasti ilakokenNa i bas paksa si lanai ndekahsa.

Kehadiren Yusuf labo hanya nuriken antusen nipi Raja Firaun, tapi pe ia mereken solusi, stategi si terbaik i bas mengatasi masa pitu tahun riba-iba ras masa pitu tahun kelihen. E me alu kuasana raja memilih ras mengangkat kalak si erpemeteh ras pentar guna ngaturken negeri enda. Janah harus ka iangkat Raja Firaun pegawai-pegawai si deban guna pepulung seperlima i bas ulih peranin tupung paksa nakan riba-iba. Kalak enda ibereken kuasa guna mpepulungsa kerina pangan sangana masa riba-iba janah kuasa guna muniken pangan e i bas tep-tep kuta ras lit ka si njagaisa. Pangan si enggo isimpan menjadi persedian man negeri enda gelah rayat la kelihen i bas paksa mesera.

Adi siterusken perikopta, kepeken kalak si beluh guna ngaturken bagi si enggo isingetken Yusuf e me Yusuf sendiri. Yusuf terpilih sebage wakil Raja Mesir guna ngaturken kai si enggo ijelaskenna man raja. Nina raja, “Labo lit dat kita jelma tersikapen asang Yusuf enda, sekalak si lit Kesah Dibata i bas dirina jine.” Selain si e, Yusuf kalak si berintegritas, terpercaya i bas dahin si enggo iendesken bana.

Kai si ikataken Yusuf merupakan prinsip penting i bas mengelola keuangan maka “Berkat yang Tuhan berikan hari ini perlu dikelola dengan bijaksana untuk  memenuhi kebutuhan hari ini dan mempersiapkan masa depan.”

Prinsip enda sangat relevan man banta sebage nande si biasa mengatur kiniliten jabu. Emaka penting kel kepentaren i bas ngaturken perbeliten jabu, gelah kai si lit la ipergunaken alu sembarangn, tapi ikelola rikutken prioritas ras banci ipertanggungjawabken.

Versi Audio silahkan klik : https://youtu.be/xciSQEFDnB8

Pengkenaina

Bahan PA-nta paksa enda mulihi mpersingeti ras nampati kita sebage nande i tengah-tengah keluarga, guna terbeluh mengelola kiniliten jabu, seh maka tercukupi kita kebutuhenta. Bahkan labo saja kita ncukupi kebutuhan jabunta, lit ka si isisihken guna tabungen masa depan ras tetap mampu kita bersyukur arah nehken tanggung jawabta man Gereja ras nehken kekelengen arah kegiaten diakoni entah pe sosial.

Piga-piga pesan penting si banci sidatken kita arah bahan perikopta:

1. Geluh enda erpaksa-paksa, ras i bas kerina paksa tetap lit i je kendali entah pe kedaulatan Tuhan. Alu bage mabai kita tetap ngendesken geluhta man Tuhan dingen ersikap katawari paksa pe. Ula hanya mampu kita ngaloken paksa sikap ekonomi e, tapi pe paksa la mejile ekonominta. Seh makana, i bas paksa sulit sekali pe, tetap kita mampu bersyukur ras tetap ndalaken si mehuli si banci silakoken guna tetap survive jabunta.
2. Beluh (pentar) kita mengelola si lit si enggo ibereken Tuhan. Terlebih i bas masa riba-iba. Hal enda banci idalanken alu litna anggaren jabunta, terbeluh kita menentuken prioritas pengeluarenta (si la banci lang - hal penting: uang sekolah, listrik, beras, lauk pauk, sisisihken guna tabungenta, si banci denga situnda, entah pe si la perlu man tukuren).
3. Terbedaken kita apai kebutuhen ras sura-sura (keinginan). Sebage nande, prinsip enda penting man banta janah harus ka beluh kita ngatakenca (ngajarkenca) man anak-anakta: tidak hidup konsumtif, tidak memaksakan diri mengikuti tren yang berkembang, belajar menabung, pebue bersyukur arah kai si enggo ibereken Tuhan.
4. Hikmat (kepentaren) si enggo ibereken Tuhan harus melahirkan sada tindaken. Adi siidah bas perikopta, Yusuf labo hanya lit pemeteh guna menafsirken kai si bakal terjadi, berena ka strategi si harus ilakoken rikut Yusuf sendiri kepeken jelmana langsung si ngasup ngaturken kondisi masa 7 tahun riba-iba ras 7 tahun masa kekurangen. 

Terkadang si terjadi melala pemetehta kerna mengelola keuangan tapi la seh ku tindaken konkrit. Hal enda penting man banta, meteh prinsip si benar saja la bias. Kepentaren harus iwujudnyataken alu tindakan. Umpamana, saya tahu pentingnya menabung, maka mulailah menyisihkan 20% pendapatan dengan menabung baik i bas tabungen i Bank entah pe ikut arisen. Si deban, kueteh uga harus mpelebeken kebutuhen asangken sura-sura. Maka mulai mengurangi pengeluaren si la penting umpamana tiap bulan la nari perlu cuci mata ku pasar loak nukur baju, sebab si lit e pe mbue denga.

Janah si la kalah pentingna, pentar ngaturken kiniliten selaku kita nande, Moria GBKP erlajar guna setia nehken perpuluhen ras ikut muat bagin i bas hal-hal si berkaiten ras dana-dana diakoni entah pe persembahen syukur man Tuhan arah Gereja. Pedauh sikap pelit (perhitungen) man Tuhan, sebab Tuhan pe tetap setia masu-masu geluhta.