Pdt. Larena Sinuhadji (Nd. ReyRapha Tarigan)
Keseharian
Si Man Ogen : Masmur 34:1-4
Tema : MUJI TUHAN LA ERNGADI-NGADI
Tujun : Gelah Moria :
- Meteh cara Daud muji Tuhan i bas kerina kecibal geluhna
- Nehken persembahen puji-pujin i bas Kebaktin Minggu
Metode : Aksi
Penaruh
Aktivitas muji Dibata biasana silakoken arah media rende. Lit kita si kata wari paksa pe rende muji Dibata. Lit ka si ipegeluhna musik puji-pujian non-stop i bas rumahna. Selain si e, enggo semal kita melasken kata: “puji Tuhan!” “Bujur Tuhan!” “Haleluya,” rsd.-na. I bas PA-nta sendah iajuk kita gelah muji Tuhan alu la erngadi-ngadi. Engkai maka bage, kai alasenna? Kenca enggo radu ras siorati Kata Dibata si jadi ogenta sendah, maka iteh kita kai alasenna maka harus kita muji Tuhan la erngadi-ngadi.
Mpebagesi Si Man Ogen
Si man ogenta sendah lit i teruh judul “Puji-pujin kerna kiniulin TUHAN.” I bas terj. Bahasa Indonesia Masa Kini (BIMK), nina “Pujian bagi kebaikan TUHAN.” I bas terj. TB-LAI nina, “Dalam perlindungan TUHAN.” Lit sitik perbedaan i bas terj. TB-LAI nari si akap kami banci memperkaya pengangkanta kerna ogenta sendah. Raja Daud si erbahanca puji-pujin enda tuhu-tuhu nggejapken kiniulin ras pengkawali Dibata i bas kegeluhenna. Secara khusus puji-pujin enda e me hasil refleksi pribadi Daud i ja enggo ipulahi Dibata ia i bas bahaya nari amin pe alu cara si la semal, e me ipekulah-kulahna la demsa ukurna (pura-pura tidak waras pikirannya). Banci sioge 1 Sam. 21:10-15. Enda sada pengalamen kiniteken si mabai perobahen i bas diri Daud.
Emaka i bas ay. 2 isaksiken Daud, ngataken bujur ia man TUHAN alu la erngadi-ngadi. Antusenna, muji Dibata labo terjeng i bas keadaan si bagi ukur saja, tapi i bas erbage-bage keadaan, si la bagi ukur sekali pe. Emaka muji Dibata e me sikap hidup. La itimai Daud keadaan si bagi ukur lebe maka ipujina Dibata, tapi muji Dibata la erngadi-ngadi.
Ay. 3 e me pengakun kiniteken Daud maka Dibata-lah si erdolat i bas kegeluhenna, labo gegeh beluhna. Ertina i bas muji Dibata e, Dibata si harus jadi fokus, labo dirinta sendiri. Anding-andingenna, adi sekalak rende muji Dibata, si jadi fokus labo sorana si mejile, tapi isi pujianna man Dibata. Rende labo gelah ipujiken sorana si mejile tapi gelah si megisa pe termotivasi guna muji Dibata. I bas puji-pujin si ipenangkih kita Tuhan ngenca si imuliaken.
I bas ay. 4 iajuk Daud kerina si ngogesa gelah muji gelar Dibata ras meritaken kemulianNa. Pengajuk enda encidahkenca maka muji gelar Dibata labo terjeng bersifat personal tapi bersifat komunal, i ja perpulungen kalak si tek tuhu-tuhu nggejapken kiniulin Dibata i bas kegeluhenna. I bas komunitas kalak si tek radu ras kita nggejapken kiniulin Dibata janah radu ras ka kita muji gelar Dibata arah kebaktin-kebaktin si ilakoken kita.
Pengkenaina
Tema bage pe tujun i bas PA-nta sendah, ngajuk kita kerina gelah muji Tuhan la erngadi-ngadi arah erbage-bage cara ras media, baik secara pribadi bage pe secara komunal. Puji-pujin si ipenangkih kita banci ilakoken alu cara rende, melasken kata, baik secara pribadi bage pe ilakoken ras-ras perpulungen kalak si tek. Tapi si paling penting i bas si e kerina, si pemena e me palasta i bas kita muji Dibata e me hubungenta si mbages ras Dibata. Keleng ate Dibata e enggo tuhu-tuhu sigejapken. Ertina muji Dibata e labo bergantung ku bas keadaan. Sangana senang ukurkta, i je kita muji Dibata. Sangana i bas perbeben, la kita muji Dibata. Muji Dibata e me kesaksinta maka Dibata pasti mereken si terbaik, amin pe melala tantangen, perbeben, kiniseran si harus ihadapi. Jadi i bas keadaan si kugana pe, tetap kita muji Dibata.
Si peduaken, puji-pujin si ipenangkih kita e tujunna guna kemulian gelar Dibata. Emaka i bas kita nehken puji-pujin man Dibata, sekaligus ka je kita mengevaluasi diri. Apakah pujian yang aku nyanyikan ini benar-benar untuk memuliakan Tuhan, atau supaya suaraku yang indah ini didengar jemaat? Emaka i bas kita rende muji Tuhan harus tuhu-tuhu leben ipersiapken pusuh perukurenta, hanya untuk memuliakan Tuhan. Gelah alu bage puji-pujin si ipenangkih kita pe tuhu-tuhu memotivasi perpulungen guna muji gelar Dibata.
Si peteluken, i bas PA-nta sendah iajuk kita gelah ngelakoken aksi nehken persembahen puji-pujin i bas Kebaktin Minggu. I bas si e tentu harus lit persiapan si mehuli. Adi lit kebiasaan, umpamana, dadakan, la lit waktu latihan, langsung je latihan sekaligus tampil, kebiasaan si bage akap kami harus enggo sitadingken. Bahanlah jadwal si tetap ras pasti, gelah lit waktunta guna ras-ras latihan. Janah pilihlah lagu pujian sue ras tema kebaktin, gelah Kata Dibata ras tema si isehken i bas kebaktin semakin diperkuat dengan pujian si ipersembahken kita. Adi lit gegehta secara finansial, dilolah pelatih vokal si memang ahli, gelah puji-pujin si ipersembahken kita pe banci isehken alu mehuli, perpulungen si megisa pe terbangun kinitekenna, janah si pentingna, gelar Dibata termulia arah ende-enden pujin si iendeken kita.
Tidak ada komentar:
Posting Komentar