SUPLEMEN PA MAMRE GBKP TGL. 20 - 26 OKT. 2024

Pdt. Larena Sinuhadji (Nd. ReyRapha Tarigan)

Ogen : Nehemia 5:14-19

Tema : BAPA SI MBIAR MAN DIBATA

Tujun : Gelah Mamre :

1) Meteh kuga karakter ras kebujuren Nehemia i bas mpekena-kena bangsana

2) Ngasup jadi bapa si mbiar man Dibata i bas minpin jabu, gereja ras masyarakat

Penaruh

I bas jaman teknologi canggih genduari enda, melala kalak si mbiar man kamera pengintai, entah pe CCTV (Closed-Circuit Television), asangken man Dibata. Padahal Dibata ngidah kai pe si ilakoken kita setiap saat, sedangken CCTV labo setiap saat banci ngidah kai pe si ilakoken kita. Mungkin erkiteken konsekuensi CCTV banci mis inanami asangken hukumen i bas Dibata nari. Pelaku-pelaku kejahaten, adi tertangkap kamera, banci mis itangkap polisi. I bas kesempaten enda radu ras kita erlajar kerna mbiar man Dibata erpalasken ogenta sendah.  

Mpebagesi Ogen

Judul perikop si jadi ogenta sendah e me “Kebujuren Nehemia”, i bas terj. BIMK nina, “Nehemia murah hati,” janah judul i bas Alkitab TB-LAI nina, “Sikap Nehamia yang tidak mencari keuntungan.” Judul-judul enda akap kami saling melengkapi kerna karakter Nehemia.

I bas ay. 14-15, ituriken maka enggo 12 tahun Nehemia jadi pemimpin daerah Yehuda si paksa si e jadi daerah jajahan kerajan Babilon. Ertina sope Nehemia enggo lit pemimpin-pemimpin daerah Yehuda tapi la mperdiateken keamanan, kenyamanan, kesejahteraan bage pe kemakmuran daerah Yehuda, bahkan justru jadi baban ras nindih jelma si enterem. Arah pasal-pasal sebelumna i bas Kitab Nehemia enda radu ras siteh maka Nehemia e me sekalak pemimpin si erkemalangen (mbiar) man Dibata janah mediate nandangi keamanan, kenyamanan, kesejahteraan bage pe kemakmuran kutana. Kamus Alkitab Browning mereken gelar man Nehemia e me sekalak patriot, pahlawan Israel.

I bas perikop sebelumna alu judul “Kalak musil itindih” (terj. TB-LAI, “Nehemia memperhatikan keluhan-keluhan sesama orang Yahudi.” Terj. BIMK, “Nehemia menolong orang miskin”), teridah maka Nehemia enda labo terjeng sekalak pemimpin si malang man Dibata ras mediate nandangi rakyat Yehuda, ia pe sekalak pemimpin si murah hati entah pe melumbar mere, ay. 10, “Aku ras teman-temanku bage pe kalak si erdahin ras aku enggo minjamken duit ras gandum man bangsata. Genduari lanai pada sipindo galarna,” alias gratis. Arah ayat 10 enda pe banci siidah maka sebage sekalak pemimpin (bupati entah pe gubernur), Nehemia tuhu-tuhu jadi usihen man tim-na i bas erkemalangen man Dibata, ermediate ras erpemere.

I bas ay. 16 - 18 isaksiken Nehemia maka kerina gegeh si lit i bas ia iberekenna guna pekena tembok Yerusalem. Labo terjeng je saja, setiap wari isikapkenna pangan ras inemen si mejile kualitasna guna menjamu kerina temue si reh ndahi ia. I bas kerina dahin pemimpin si idahikenna, la ibuat Nehemia si jadi hakna selaku pemimpin daerah paksa si e. Banci sibayangken asa kai buena kinibayaken si lit i bas Nehemia si ipakekenna guna mereken pelayanen si terbaik guna rakyat Yehuda. I bas si e, ay. 19 jadi jawabenna. Ertoto Nehemia nina, “O Dibatangku, erkiteken kasa kai si enggo kubahan man bangsa enda, ingetlah min aku, gelah tambah kesangapenku” (terj. TB-LAI, “Ya Allahku, demi kesejahteraanku, ingatlah segala yang kubuat untuk bangsa ini.” Terj. BIMK, “Aku mohon ya Allah, ingatlah segala yang telah kubuat untuk bangsa ini dan berkatilah aku”). Ertina, la mungkin Nehemia ngasup ngelakoken kerina si mehuli si ilakokenna arah kinibayakenna adi la lit kiniteken i bas ia maka Dibata pasti ncukupken kerina si jadi kebutuhenna.

Pengkenaina

Arah ogenta sendah, melala pembelajaren si idatken kita arah Nehemia nari. Ia sekalak si erkemalangen man Dibata, sekalak si bujur, mediate nandangi kiniseran bangsana, erpemere man kalak si membutuhken penampat, janah Nehemia sekalak pemimpin si berintegritas, nggit berkorban guna kesejahteraan rakyatna. Banci ikataken Nehemia e me sekalak pemimpin si ideal. I bas si e iajuk kam kerina Mamre gelah ngusih Nehemia. La pe kam bagi Nehemia, paling tidak, kam kerina e me pemimpin i bas jabundu masing-masing, janah kita kerina e me pemimpin diri sendiri. Adi la ngasup kita mabai dirinta nggeluh erkemalangen man Dibata maka enggo pasti geluhta ikuasai kerincuhen daging si mabai kita ku bas kebinasaan. Emaka sope kita jadi pemimpin si mehuli, leben kita harus ngasup mimpin dirinta sendiri ku si mehuli. I bas si e harus lit relasinta si mehuli ras Dibata. Tutus ras konsisten kita ertoto bage pe erlajar Kata Dibata. Adi ndeher kita ras Dibata, maka ipengasup Dibata kita ngelawan kerincuhen daging si lalap menggoda kita setiap saat.

Tema bage pe tujun si peduaken i bas PA-ta sendah ngajuk kam kerina Mamre gelah mbiar man Dibata. Adi sikaitken ras ogenta sendah, enggo pasti Nehemia sekalak si mbiar man Dibata, emaka ibahanna kerina si mehuli sue ras peraten Dibata. La nggit Nehemia ngelakoken si la ngena ate Dibata. Tek kita maka Nehemia sekalak pemimpin si berintegritas, lit si ngidah entah la lit ise pe si ngidah, tetap ibahanna si mehuli. Mbiar man Dibata enda banci lit i bas diri Nehemia erkiteken kinitekenna si tuhu-tuhu man Dibata. Adi ngerana kerna mbiar man Dibata, Kitab Kuan-kuanen nari entah pe Kitab Amsal, melala ngerana kerna “takut akan Tuhan.” Mehuli akap kami adi sioge piga-piga ayat i bas Kitab Amsal nari e me: 1:7,29; 2:5; 3:7; 8:13; 9:10; 10:27; 14:2,26-27; 15:16,33; 16:6; 22:4; 23:17; ras 28:14. Kerina ayat-ayat enda banci nambahi pemetehta adi ateta nggeluh mbiar man Dibata.

Nggeluh mbiar man Dibata memang labo hal si murah erkiteken mbelin resikona. Emaka pindolah gegeh i bas Dibata nari gelah ipengasup Dibata kam nggeluh mbiar man Dibata. Janah ipengasup Dibata kam kerina jadi pemimpin si erkemalangen man Dibata janah beritegritas, i tengah jabu, gereja, bage pe i tengah masyarakat si lit i sekelewetndu.