SUPLEMEN PJJ GBKP TGL. 27 OKT. - 2 NOV. 2024

Pdt. Larena Sinuhadji (Nd. ReyRapha Trg.)

NGGELUH SISAMPAT-SAMPATEN (Pengerana 4:9-12)

Penaruh

Nggeluh sisampat-sampaten akap kami enggo rusur sibegi janah mungkin enggo semal ilakoken i bas kegeluhenta si tep-tep wari. Labo saja ras keluarganta tapi pe ras perpulungen i Gereja bage pe ras masyarakat i sekelewetta. Nggeluh sisampat-sampaten labo saja iajarken i bas kiniteken Kristen, tapi i bas budayanta pe rusur iajarken kerna geluh sisampat-sampaten. Bedana, adi i bas kinitekenta si jadi palas kita sisampat-sampaten e me keleng ate Kristus si enggo ialoken kita. Kenca enggo sigejapken uga belinna keleng ate Dibata si nampati kita bebas i bas kuasa dosa nari, emaka sebage pengataken bujurta sisampati kalak si lit i sekelewetta. I bas kesempaten enda mulihi kita erlajar kerna nggeluh sisampat-sampaten rikutken ogenta sendah.

Mpebagesi Ogen

Adi sioge bagin penaruh Kitab Pengerana i bas Pustaka Si Badianta, ikataken je maka secara umum Kitab Pengerana enda isina e me perukuren-perukuren sekalak pengerana entah pe sekalak filsuf, si enggo rukur alu mbages uga gendekna ras gulutna kegeluhen manusia, si dem alu kinilabujuren ras kecedan ate. I bas ujung perukurenna ikatakenna maka “sia-sia geluh enda.” Rusur la iangkana perbahanen Dibata si la terantusi perukuren janah engkuasai nasib manusia. Amin bage gia, iajarken Pengerana enda gelah igegehi dingen tutuslah ate manusia erdahin, janah nggeluh alu meriah ngaloken pemere-pemere Dibata. Si jadi pedah si pentingna kel i bas kitab enda e me, “Erkemalangenlah man Dibata dingen patuh man peratenNa, sebab guna si e saja me manusia itepa” (Peng. 12:13). I bas piga-piga penafsir nari ikataken maka Salomo si nulisken kitab enda.

Secara khusus si jadi ogenta sendah lit i teruh judul perikop “Kinilabujuren i babo pertibi enda.” Adi i bas Alkitab TB-LAI Ed. II, ogenta sendah lit i teruh judul perikop “Pentingnya dukungan dalam hidup” benaken ay. 7-16. Judul enda e me revisi edisi sebelumna, janah judul perikop i bas TB-LAI Ed. II nari enda akap kami sue ras kai si imaksudken i bas perikop enda.

Adi sibenaken sioge i bas ay. 7-9, ituriken maka adi sekalak jelma la ia nggit erteman ras kalak si deban, entah pe egois, maka kualitas geluhna pe la banci maksimal. Sebab manusia itepa Dibata sebage makhluk sosial si harus nggit erteman ras kalak si deban. Bayak sekali pe ia, kinibayakenna e la maba keriahen man bana. Prestasi kai pe si idatkenna la maba keriahen sebab la lit ise pe si ikut nggejapkenca janah la lit ise pe si mujiken kerina prestasi si idatkenna ndai. Emaka i bas ay. 9 ipedahken man kalak si bage rupana gelah nggit ia erteman ras kalak si deban. Ikataken, “adi dua kalak erdahin mbelang me bekasna,” antusenna labo terjeng soal hasil pendahin adi ilakoken dua kalak, tapi si pentingna kel manusia itepa Dibata guna saling melengkapi. Enggo jadi kodratna maka manusia e la banci nggeluh sisada-sisada, harus lit temanna guna saling melengkapi sada ras si debanna.

Ay. 10-12 e me penegasen maka manusia harus nggit bersosialisasi sada ras si debanna gelah banci nggeluh sisampat-sampaten. Sisampat-sampaten i jenda labo terjeng nampati i bas paksa kesusahen, tapi i bas dampar si deban banci saling menguatkan, saling mendoakan, saling mengevaluasi, saling mengampuni, saling mengingatkan, saling memotivasi, saling menopang, saling mengasihi, rsd.-na.

Versi Audio silahkan klik : https://youtu.be/Ix4o-KRDt0A

Pengkenaina

Inti i bas ogenta sendah akap kami enggo tangkas, geluh sisampat-sampaten e me sada karakter geluh si Alkitabiah, si memang ipedahken Dibata man banta guna silakoken sapih-sapih kita si sada kiniteken (Gal. 6:2), bage pe ras kerina kalak si deban si lit i sekelewetta. Emaka i bas kesempaten enda iajuk kita gelah semakin meningkatkan kuantitas ras kualitas geluh sisampat-sampaten. Uga carana? Si pemena lebe akap kami e me melatih kepekaan, mediate, kepedulian, nandangi kalak si deban. Ibenaken i bas jabuta masing-masing, perbapan ras pernanden saling memperhatikan kai si jadi keperlunna, orang tua ras anak-anak saling mperdiateken kai si jadi keperluna, bage pe ras kade-kadenta si deban. Kenca bage siterusken ku teman-temanta, tetangga entah pe jiranta. Si peduaken, pindolah gegeh i bas Dibata nari gelah ipengasupNa kita nampati kalak si deban alu tutus ras maksimal. Sebab kecenderungenta i bas nampati e me menuntut balasan i bas kiniulin si enggo silakoken kita, janah rusur kita erpilihen i bas kita nampati. Dibata si mpengasup kita nggeluh sisampat-sampaten.