SUPLEMEN PA MORIA GBKP TGL. 27 OKT. - 2 NOV. 2024

Pdt. Larena Sinuhadji (Nd. ReyRapha Tarigan)

Notoken Sidang Sinode GBKP

Si Man Ogen : Heber 13:17-19

Tema : MUAT BAGIN GUNA KINIULIN GEREJA

Tujun : Gelah Moria :

- Nuratken tanggung jawab perpulungen nandangi pemimpin Gereja

- Ertoto ras mpepulung dana guna kiniulin perdalinen Sidang Sinode

Metode PA : Diskusi & Aksi

Penaruh

Adi sioge Konfesi GBKP Bab IX si ngerana kerna Gereja, poin si peteluken, ikataken bagenda nina, “Gereja dipanggil untuk melakukan tri-tugas demi mewujudkan jemaat yang misioner untuk memproklamasikan nilai-nilai Kerajaan Allah yang tampak dalam kehidupan Yesus.” Jemaat yang misioner ertina kerina jemaat proaktif ngelakoken kerina si jadi peraten Dibata, i japa pe, khususna i Gereja. Emaka ikut muat bagin i bas dahin pelayanan i Gereja e me sada keharusen man kerina anggota jemaat, lanai man suruh-suruhen.

I bas kesempaten enda radu ras kita erlajar kerna keterlibatenta muat bagin i bas dahin-dahin pelayanen guna kemulian gelar Dibata bage guna kiniulin Gerejanta.

Mpebagesi Si Man Ogen 

Surat man kalak Heber isuratken man terpuk-terpuk kalak Kristen si sangana ngenanami kiniseran si mesangat kel. Si nuratken surat enda encubaken mpegegehi kiniteken perpulungen alu encidahken maka Yesus Kristus me ketangkasen Dibata si tuhu-tuhu. Iajuk penulis surat enda gelah perpulungen tetap megegeh i tengah-tengah kiniseran janah setia seh ku kedungenna alu natap ku Yesus. Si rusur ikutip i bas Surat Heber enda e me definisi kerna erkiniteken man Dibata i bas bindu 11. 

Secara khusus si man ogenta sendah termasuk ku bas bagin pendungi surat si isina pedah-pedah etis praktis. Salah sada pedah-pedah etis praktis enda e me pengajuk man perpulungen gelah proaktif mendukung dahin-dahin pelayanen i tengah-tengah perpulungen kalak si tek. Kai saja si harus ilakoken perpulungen?

Si pemena, ay. 17, patuh ras ngikutken kata pemimpin. Pemimpin-pemimpin i tengah-tengah Gereja e me pelayan si ngelai perpulungen, labo seri ras pemimpin-pemimpin doni enda. Tapi amin bage gia, harus lit kepatuhen man bana janah kerina katana si ibuat i bas Pustaka Si Badia nari harus siikutken. Engkai maka bage? I bas ay. 17 jelas je ikataken maka lit piga-piga fungsi penting pemimpin, e me: ngepkep pertendin perpulungen alu la erlatih-latih janah ertanggung jawab man Dibata. I bas terj. Ind. nina, “Sebab mereka berjaga-jaga atas jiwamu, sebagai orang-orang yang bertanggung jawab atasnya.” Gelah alu bage ula nai lit beban perukuren pemimpin i bas ia ngelakoken tugas tanggung jawab pelayanenna, janah kerina pelayanen banci ilakoken alu meriah ukur.

Si peduaken, ay. 18 - 19, tutus notoken pemimpin. La lit gegeh si deban i bas pelayanen i tengah-tengah Gereja Tuhan selain gegeh kuasa i bas Dibata nari erkelangken Kesah Si Badia. Emaka perpulungen iajuk gelah jadi tiang doa nandangi pemimpin-pemimpin Gereja. Gegeh kuasa Kesah Si Badia mpengasup para pemimpin ndahiken dahin-dahin pelayanen alu tutus, bersih pusuh peratenna, janah ipengasup Dibata ngelakoken kerina si mehuli guna kemulian gelar Dibata. Emaka iajuk perpulungen gelah ula sempat ngadi notoken pemimpin-pemimpin Gereja.

Versi Audio silahkan klik : https://youtu.be/OloXOS1dizE

Pengkenaina

Arah ogenta sendah, iajuk kita kerina Moria gelah proaktif ikut muat bagin i bas dahin-dahin pelayanen Gerejanta. Rikutken ogenta sendah, lit dua hal si harus ilakoken kita selaku perpulungen e me: si pemena, patuh ras ngikutken kata pemimpin. Si peduaken, tutus notoken pemimpin. Dua hal enda akap kami enggo radu ras silakoken, tading semakin itingkatken kuantitas ras kualitasna, khususna menjelang Sidang Sinode GBKP si bakal ilakoken i bas bulan April tahun si reh, 2025. Radu ras sitotoken gelah kerina persiapen banci ilakoken alu mehuli, seh paksana pagi pelaksanaan sidang banci erdalan alu mehuli, tercukupi kerina dana si nibutuhken. I bas si e pe mari radu ras kita muat bagin mendukung kecukupen dana guna pelaksanaan Sidang Sinode GBKP enda.

I bas PA-ta sendah, iajuk kita kerina Moria gelah menjadi jemaat yang misioner, nggit ipake Dibata kita guna jadi saluren pasu-pasuNa ku tengah-tengah doni enda, khususna man Gerejanta GBKP. Amin pe enggo berusia 134 tahun sehna Berita Si Meriah ku tengah-tengah masyarakat Karo, tapi melala denga si man pekenan. Emaka mari radu ras kita muat bagin i bas mpekena-kena Gereja Tuhan guna kemulian gelar Dibata arah kai pe si banci silakoken kita. Dibata si mpegegehi kita.