SUPLEMEN PJJ GBKP TGL. 20 - 26 OKTOBER 2024

Pdt. Larena Sinuhadji (Nd. ReyRapha Tarigan)

KETUAHEN KALAK SI ERBAHAN PERDAMEN

(Matius 5:9 & Galati 5:15)

Penaruh

Lit sada lagu i bas jiranta nari kerna perdamen, bagenda nina, “Perdamaian, perdamaian, perdamaian, perdamaian. Banyak yang cinta damai, tapi perang makin ramai. Bingung, bingung, ku memikirnya.” Lagu enda situhuna sangat teologis erkiteken memang payo, seh asa gundari perdamen e lenga banci siwujudken i tengah-tengah geluhta. Engkai maka mesera guna ngelakoken perdamen? Adi sekalak ngenca si nggit erdame maka perdamen e lenga banci terwujud, kerina pihak harus nggit erdame maka perdamen e banci iwujudken. I bas kesempaten enda radu ras mulihi kita erlajar kerna perdamen rikutken ogenta sendah.

Mpebagesi Ogen

Matius bindu 5 si jadi bahan ogenta e me sada bagin i bas khotbah Tuhan Yesus i datas uruk, janah bagin enda terkenal alu ucapan entah pe sabda berbahagia (kemalemem ate si tuhu-tuhu). Adi sukat-sukat doni, umumna kemalemen ate si ialami erkiteken kesenangen doni, bage pe kiniliten si lit i bas kita (kebayaken, kekuasaan), la kai pe kurang si niperluken kita. Tapi i bas pengajaren Yesus, kemalemen ate erkiteken kerembakenta ras Tuhan bage pe ndalanken si ngena ate Dibata.

Si jadi ogenta sendah e me ay. 9, “Malem ate tuhu-tuhu iakap kalak si erbahan perdamen; sabab iakui Dibata me ia anakNa.” I bas terj. TB-LAI Ed. II nina, “Berbahagialah orang yang membawa damai, karena mereka akan disebut anak-anak Allah.” I bas terj. BIMK nina, “Berbahagialah orang yang membawa damai di antara manusia; Allah akan mengaku mereka sebagai anak-anakNya.” Syalom, damai sejahtera, perdamen si enggo ibereken Dibata man banta harus tetap sijaga ras silumbaken i bas kegeluhenta. Leben si harus ilakoken e me erdame ras diri sendiri. Sebab rusur la kita ngasup erdame ras dirinta sendiri, erkiteken bertolak belakang antara sura-sura kedagingen ras sura-sura Kesah Si Badia. Tapi adi enggo ngasup kita mpersilahang banta (menyangkal diri) em tandana enggo ngasup kita berdamai dengan diri sendiri. I bas si e iajuk Yesus kita gelah erdame ras Dibata, erdame ras sesama manusia, erdame ras tinepa Dibata si deban, bage pe erdame ras diri sendiri. I bas kita ngasup erbahan perdamen, iakui Dibata kita jadi anak-anakna.

Ogenta si peduaken ibuat i bas surat Rasul Paulus man Perp. Galati. Secara umum surat Paulus man Perp. Galati ilumbaken gelah tuhu-tuhu ieteh kalak tek, subuk kalak Yahudi bage pe Non-Yahudi (Yunani), maka si pentingna kel i bas kiniteken Kristen e me tek man Yesus Kristus, labo tek man Undang-undang Musa (Taurat), bagi umpamana, sunat, ras mantangken piga-piga pangan). Arah kita tek man Yesus maka kita enggo iperdameken ras Dibata, bebas i bas kuasa dosa, entah pe kuasa Iblis nari. Ras e kerina perkuah ate Dibata man banta. Sebab paksa si e enggo terjadi polemik i tengah perpulungen, nina, kalak Kristen si tuhu-tuhu e me kalak si ngkikutken Undang-undang Musa.

Ogenta sendah e me ayat terakhir i bas perikop alu judul “Jagalah kebebasenndu’ (terj. TB-LAI “Kemerdekaan Kristen”). Inti perikop enda e me, kebebasen si enggo ibereken Dibata harus simanfaatken guna kiniulin diri sendiri bage pe kalak si deban. Isingetken Paulus maka perpulungen e enggo bebas (merdeka) sebab enggo ipilih Dibata erkiteken kiniteken man Yesus. Tapi kebebasen e ola sempat kebablasen (ate-ate) je nari jadi alasen si erbahanca geluhta ikuasai dosa entah pe peraten dagingta. Kebebasen i bas dosa nari mabai kita nggeluh sikelengen-kelengen sada ras si debanna alu la lit nari belat-belat, entah pe ibatasi golongen, suku, tingkat sosial, pendidiken rsd. Emaka si harus idalanken perpulungen e me nggeluh sikeleng-kelengen. Bere maka keleng ate si njemba kam guna nggeluh sisampat-sampaten. Adi la nggit perpulungen sikeleng-kelengen ras sisampat-sampaten, tapi justru sikaraten dingen siatahen, ersikaplah maka i bas sada paksa waktu kernep nge persadan e. Emaka perpulungen pe harus tetap metenget.

Versi Audio silahkan klik : https://youtu.be/qT2uzWiqvOo

Pengkenaina

Adi sitelusuri kata “damai” i bas Alkitab TB-LAI nari, lit 301 kali. Ertina dame, perdamen, entah pe damai sejahtera e me salah sada topik si penting i bas Pustaka Si Badia. I bas ogenta sendah, Tuhan Yesus ngajarkenca man banta gelah nggit kita erdame (bdk. Mat. 5:24-25; Mrk. 9:50; Luk. 12:58; rsd.). Nggeluh i bas perdamen em tandana kita anak-anak Dibata. Rasul Paulus pe i bas ogenta sendah secara tersirat ngajuk kita gelah nggit erdame, adi la kita nggit erdame maka kiniteken bage pe persadan kalak si tek pe banci kernep. Adi sioge terdauhen bindu 5 Surat Galatia enda, iajarken Paulus kerna ulih Kesah Si Badia, e me kemalemen ate entah pe damai sejahtera. Iterusken Rasul Paulus ajaren Yesus kerna perdamen.

Tema kerna perdamen akap kami enggo rusur sibahas ras sirenungken. Si jadi penungkunen, enggo nge kita nggeluh i bas dame? Bagi lagu i bas bagin penaruh i datas, perdamen e kepeken labo murah guna siwujudken i tengah-tengah kegeluhenta sebab erkaiten ras pihak-pihak si deban. Nggit kita erdame, tapi kalak si deban la atena nggit erdame ras kita. Bage pe sebalikna, nggit kalak si deban erdame, tapi justru kita si la nggit erdame. Ertina perdamen si tuhu-tuhu banci sigejapken adi kerina pihak sepakat guna nggeluh i bas dame.

Tapi amin pe perdamen e mesera guna siwujudken, sibenaken saja perdamen e i bas dirinta. Leben harus sigejapken keleng ate Dibata i bas geluhta. Pindolah pengalemi dosa i bas Dibata nari, janah katakenlah bujur, sebab e ngenca dalanna maka kita banci erdame ras Dibata. Kenca si e, benakenlah erdame ras dirinta. Teklah kita maka kai pe si terjadi i bas geluhta, kerinana lit i bas perkuah ate Dibata guna kiniulinta. Kenca bage maka lit gegeh i bas dirinta guna erdame ras kalak si deban, bage pe erdame ras tinepa Dibata si deban.

Teruslah kita ertoto guna perdamen doni enda, gelah kuasa Dibata si luar biasa ngasup mengubah kekerasan hati kerina pihak si seh paksa gundari enda terus erperang hanya demi keuntungen ekonomi, kepentingan politik, erta kebayaken, harga diri, kekuasaan, rsd.-na. Dibata si mpegegehi kita i bas kita maba perdamen i bas kegeluhenta si tep-tep wari.