SUPLEMEN PA MAMRE GBKP TGL. 27 OKT. - 2 NOV. 2024

Pdt. Larena Sinuhadji (Nd. ReyRapha Trg.)

Teks : Galati 5:13-15

Tema : NGASUP NGALOKEN PERBEDAAN

Tujun : Gelah Mamre :

1) Meteh persadan ras Tuhan mpengasup ngaloken perbedaan

2) Ngasup ngaloken perbedaan si mpepaguhi persadan, labo perubaten

Penaruh

Perbedaan e me Dibata si njadikenca. Manusia itepa Dibata berbeda-beda. Tinepa si deban pe labo kerina seri, melala erbagena. Ijadiken Dibata perbedaan enda tentu lit maksudna, e me gelah kerina tinepa saling melengkapi sada ras si debanna. Tapi i bas kinata geluhta, melala kalak si la nggit ngaloken perbedaan. Emaka lit diskriminasi, persekusi ras peperangen erkiteken perbedaan suku, ras, agama, dan antar golongan (SARA).

I bas kesempaten enda radu ras kita mulihi erlajar kerna ngaloken perbedaan, bage pe mengelola perbedaan alu mehuli guna kiniulin geluhta.

Mpebagesi Ogen

Ogenta sendah e me surat Rasul Paulus man Perp. Galati. Secara umum surat Paulus man Perp. Galati ilumbaken gelah tuhu-tuhu ieteh kalak tek, subuk kalak Yahudi bage pe kalak si labo Yahudi (Yunani, rsd.-na), maka si pentingna kel i bas kiniteken Kristen e me tek man Yesus Kristus, labo tek man Undang-undang Musa (Taurat, bagi umpamana, sunat, ras mantangken piga-piga pangan). Arah kita tek man Yesus maka kita enggo iperdameken ras Dibata, bebas i bas kuasa dosa nari, entah pe kuasa Iblis nari. Ras si e kerina perkuah ate Dibata man banta. Sebab paksa si e enggo terjadi polemik i tengah perpulungen, nina, kalak Kristen si tuhu-tuhu e me kalak si ngkikutken Undang-undang Musa.

Ogenta sendah lit i teruh judup perikop “Jagalah kebebasenndu’ (terj. TB-LAI Ed. II “Kemerdekaan Kristen”). Inti perikop enda e me, kebebasen si enggo ibereken Dibata harus simanfaatken guna kiniulin diri sendiri bage pe kalak si deban. Isingetken Paulus maka perpulungen e enggo bebas (merdeka) sebab enggo ipilih Dibata erkiteken kiniteken man Yesus. Tapi kebebasen e ola sempat ate-ate, je nari jadi alasen si erbahanca geluhta ikuasai dosa entah pe peraten daging. Kebebasen i bas dosa nari mabai kita nggeluh sikelengen-kelengen sada ras si debanna alu la lit nari belat-belat, entah pe ibatasi golongen, suku, tingkat sosial, pendidiken rsd. Emaka si harus idalanken perpulungen e me nggeluh sikeleng-kelengen. Bere maka keleng ate si njemba kam guna nggeluh sisampat-sampaten. Adi la nggit perpulungen sikeleng-kelengen ras sisampat-sampaten, tapi justru sikaraten dingen siatahen, ersikaplah maka i bas sada paksa waktu kernep nge persadan e. Emaka perpulungen pe harus tetap metenget, sebab Iblis senang adi kiniersadan kalak si tek bene i tengah-tengah doni enda.

Arah ogenta sendah teridah tuhu-tuhu usaha Paulus i bas mpersadaken perpulungen kalak si tek si berbeda-beda: suku, gender, usia, tingkat pendidiken, profesi entah pe pendahin, ekonomi, tingkat kiniteken, rsd.-na. Gelah i bas si e, perbedaan si lit banci sikelola alu mehuli guna kiniulin perpulungen. Emaka kerina hal si berpotensi encedaken kiniersadaan e rusur isingetken Paulus man perpulungen gelah itengeti janah sikelola alu mehuli. Ula sempat perbedaan si lit mabai perpulungen ku bas perubaten si encedaken kiniteken bage pe kiniersadaan kalak si tek. Si jadi palas i bas mengelola perbedaan e me keleng ate Kristus. I bas ay. 13-14 ikataken Paulus, “Layanilah seorang akan yang lain dengan kasih. Sebab, seluruh hukum Taurat tercakup dalam satu firman ini, “Kasihilah sesamamu manusia seperti dirimu sendiri!”

Versi Audio silahkan klik : https://youtu.be/AXtNh5nlEG8

Pengkenaina

PA-ta sendah ngajuk kam kerina Mamre gelah ngasup memaknai perbedaan si lit sebage anugerah Dibata si harus sikelola alu mehuli guna kiniulin perpulungen kalak si tek. Sebab konteksta sendah jelas guna kiniersadan kalak si tek. Emaka si harus ilakoken, sue ras tujun si pemena PA-ta senda e me ersada ras Kristus. E me palas kinitekenta i bas ngaloken perbedaan. Uga carana ersada ras Kristus? Nggeluhlah i bas Kristus si secara konkrit ilakoken arah pertotonta si konsisten, ngoge Pustaka, nggit erlajar nggeluh erkiniteken, bage pe ngelakoken kerina si jadi peraten Dibata. Nggeluh ersada ras Kristus mabai kam kerina Mamre ngasup ngaloken perbedaan kai pe si lit i tengah-tengah perpulungen kalak si tek erpalasken keleng ate Dibata. 

Tujun si peduaken PA-ta sendah, ngajuk kam kerina Mamre gelah beluh mengelola perbedaan si lit guna kiniulin perpulungen janah mpepaguhi kiniersadan. I bas si e antusenna labo gelah teridah baik-baik saja arah darat nari. Sebab rusur si terjadi bagenda nina, “Aku labo rubat ras bapa si anu ah, saja ngenca kami la sicakapen.” Konflik erkiteken perbedaan pendapat akap kami hal si biasa. Si harus ilakoken adi lit terjadi konflik mis imediasi, ula sisinik-sinikken. Janah pihak-pihak terkait pe harus nggit imediasi, saling koreksi diri ras saling memaafkan sada ras si debanna. Enda akap kami salah sada cara pengelolaan perbedaan si mehuli. Gelah arah kai pe konflik si terjadi erbahanca reh paguhna kinitekenta bage pe kiniersadanta. Pindolah gegeh i bas Dibata nari gelah ipengasupNa kam kerina Mamre mengelola perbedaan si lit guna kiniulin perpulungen.