SUPLEMEN PA MORIA GBKP TGL. 19 - 25 MEI 2024

Jadi Pasu-Pasu Man Diri Sendiri (Me Time)

Si Man Ogen : Pengerana 5:18-20 (Pengkhotbah 5:17-19)

Tema : NGERGAKEN DIRI

Tujun : Gelah Moria :

- Nggargari ulih latih si ibereken Dibata

- Mbandingken kinata geluh tupung ngenanami ras la ngenanami ulih pendahin

Bena Kata

Istilah “me time” entah ngergaken diri (apresiasi terhadap diri sendiri) e me kesempaten si khusus guna banci sibereken man dirinta. Melala pemahamen si ngatakenca maka “me time” e me terkesan seperti “anti sosial,” lit ka deba ngatakenca “individualis.” Padahal situhuna “me time” penting guna banci kita undur diri sejenak i bas kerina rutinitas ras kesibuken si enggo silakoken ras mereken apresiasi (ngergaken) dirinta rikutken erbage-bage hal si enggo silakoken. Tujunna enggo jelas gelah reh ngasupna ka kita ndahiken dahinta (aktivitasta) alu mehuli alu kondisi fisik, mental ras spiritual si enggo sikap ka.

Maka i bas bahan PA-ta sekali enda ras-ras kita ipersingeti, gelah tutus i bas ndahiken dahin si enggo ibereken Dibata subuk formal entah pe non-formal ras menikmati si enggo ibereken Dibata man banta. Gelah ula kita terjatuh ku bas mencari dan mencari terus tapi lupa bahkan la pernah sinikmati kai si enggo ibereken Dibata banta rikutken ulih latihta.

Mpebagesi Si Man Ogen

Manusia sebage makhluk si mulia si iberken Dibata tanggung jawab guna ngusahai doni ras kerina isina, ndahiken tugas enda alu mehuli. Inti arah kai si ilumbaken Kitab Pengerana man pembacana e me gelah ngasup kita ngataken bujur ras ncibalken geluhta alu mehuli, gelah ula sempat turah penyesalen. I bas ay. 15 sope si jadi renungenta, Pengerana ngatakenca, “Tupung kita tubuh, manjang-anjang kap kita; bage me pagi tupung kita nadingken doni enda; kai pe labo sibaba i bas bekasta latih nari. la bujur! Perlawesta bali ras pertubuhta ndube. Sigegehi erdahin guna nangkap angin, kai kin sidat?” Pengerana seolah-olah merasa kecewa (sia-sia) adi enggo sigegehi erdahin, tapi kai pe la banci silakoken, bahkan kebalikenna kai pe la sidat kita. Sebage contoh Pengerana ngatakenca, “Kidekah kita nggeluh kita lit i bas kegelapen, kesusahen, aru ate, nembeh ate dingen penakit.” Seolah-olah la lit si ntebuna, si mehulina kerina si bentukna kesusahen ras aru ate ngenca sialamina. Padahal jelas, Tuhan mereken gegeh, kepentaren guna banci kita erdahin, bahkan erdahin pe merupaken ibadah. Sebab banci kita ncukupi kebutuhenta sekaligus jadi berkat (pasu-pasu) man kalak si deban. Walaupe gendek umur geluhta, bahkan la ise kita si metehsa ndigan kita mate, tapi si paling penting asum ibereken Tuhan kesah kegeluhen man banta, maka ola sisia-siaken. Erdahinlah kita alu tutus ras bertanggung jawab subuk man “kepala” entah pe “bos” i ja kita erdahin terlebih man Tuhan si enggo mereken nafas kegeluhen man banta.

Kenca enggo kita latih erdahin maka wajar kel, sinikmati bekasta latih. Sebab lit ka deba kalak, rugi kel ipedaratna sen guna dirina jine. Ula lebe man kalak si perlu man sampaten, man dirina pe rugi kel akapna bana. Jelas Pengerana ngatakenca, “La lit si terulin man banta, seakatan minem dingen manken ulih perndahita.” Bahkan arah pendahinta, ibereken Tuhan kinibayaken, erta materi si melimpah. I bas si e patut kita ngataken bujur ras ermeriah ukur ngenanami ulihna latih. Ndahiken dahin si enggo ibereken Tuhan merupaken pengataken bujurta man Tuhan. Termasuk menikmati kai si enggo ibereken Dibata man banta, ras arah kinibayakenta banci ka kita jadi saluren pasu-pasu Tuhan Dibata. Ndatken erta materi entah menjadi bayak labo salah. Si salah adi kebayaken e enggo jadi tujun i bas pendahinta, piah dungna si terjadi kita menghalalkan segala cara guna banci jadi kalak bayak.

Menikmati berkat (pasu-pasu) si enggo ibereken Tuhan man banta e pe merupakan pengataken bujurta man Tuhan. Hal enda menyeimbangken kegeluhenta gelah ula lalap encari (erdahin) tanpa pernah kita menikmati kai si enggo ibereken Dibata.
Ras perikop enda iujungi alu janji Tuhan, maka Dibata ndemi pusuhta alu keriahen, gelah ola aru ateta ngukurkenca uga gendekna geluh enda. Ertina, soal gedang gendek geluhta Dibata si metehsa, tapi si paling penting banci tetap kita ermeriah ukur, bersukacita subuk senang entah pe susah. Palas keriah ukurta erkiteken persadanta ras Tuhan dingen Tuhan si merekenca. Adi meriah ukurta katawari paksa pe, e merupaken tambar ras gegeh guna banci kita ndalani kegeluhenta enda.

Versi Audio silahkan klik : https://youtu.be/j5w2cDKz8ok

Pengkenaina

Adi sisungkun dirinta, 24 jam sada wari pemere Tuhan kadang kurang. Mulai pepagi nari seh berngi enggo lit lalap dahin si man dahinken. Walaupe lit ka kalak si sibuk la erturi-turin (tidak jelas). Tapi umumna adi kita Moria si erkemalangen man Tuhan, enggo tertata kerina waktu-waktu si ibereken Tuhan banta. Medak erpagi-pagi, kenca dung saat teduh, erbahan sarapan keluarga, naruhken anak sekolah, seh rumah beres-beres rumah, nyuci, rsd. Jemput anak sekolah, nemani anak istirahat ras ban PR-na, erdakan guna makan malam, lenga ka kegiaten Moria, rsd. Lenga ka kita Moria si erdahin sebage perempuan karier. Maka penting kita ngergai dirinta (“me time”). Labo perlu mbue biaya ras rekreasi ku ingan si ndauh (“healing” nina), tapi sejenak ngelakoken kai si jadi kesenangenta: nonton, ku salon, dalan-dalan bas Mall, olah raga, man bakso, bercocok tanam, baca buku, bahkan kesempaten guna bersaat teduh ras Dibata arah kita teneng i lebe-lebe Dibata.

Yesus pe ibahanNa “me time”-Na. Adi siidah i bas catatan Pustaka Si Badia, ibahan Yesus waktuna si sada guna banci ia ertoto. Me time Yesus iisi alu ertoto. Mrk. 1:35, “Pepagina erpagi-pagi si lampas ope denga terang wari keke Yesus lawes IA ku ingan si melenget. I je ertoto IA.” Luk. 5:15-16, “Berita kerna Yesus reh mbarna, janah enterem kalak reh megiken IA dingen mindo gelah ipepalemNa ia i bas penakitna nari. Tapi ulin iakapNa IA lawes ku ingan si melenget, janah i je IA ertoto.

“Me time” (ngergaken dirinta) perlu, tapi ula sempat la terkuasai kita banta. “Me time” ateta lalap, piah dungna terbengkalai dahin i tengah jabu, kurang siperdiateken keluarganta, bahkan la lit nari waktu guna kita melayani Tuhan i tengah Rumah PertotonNa, sebab enggo dekahen kita “me time.” Mari sinikmati waktu-waktu si enggo ibereken Tuhan man banta. Tutus kita erdahin, sinikmati kai si enggo ibereken Dibata man banta ras pebue ngataken bujur arah kai si lit bas kita.