SUPLEMEN PA MORIA GBKP TGL. 26 MEI - 1 JUNI 2024

Pdt. Larena br. Sinuhadji (Nd. ReyRapha Tarigan)

Oikumene: United Action Mentawai

Si Man Ogen : Roma 10:9-13

Tema : PERSADAN SI MELUMBAR

Tujun : Gelah Moria :

- Nuriken tanda-tanda persadan i bas Kristus

- Muat bagin i bas United Action UEM

Penaruh

Adi kita searching i bas Google alu kata-kata kunci “bersama kita” mis ndarat piga-piga slogan umpamana, “bersama kita bisa,” “bersama kita maju,” “bersama kita tangguh,” “bersama kita kuat,” rsd.-na. Kerina slogan e ncidahkenca, alu semangat kebersamaan, kai pe banci siwujudken alu maksimal adi ras-ras sidahiken. Semangat kebersamaan i bas lingkup kalak si tek enggo teridah arah turi-turin kerna perpulungen mula-mula nari (Perb. Rasul 2:43-47), i ja ituriken maka kerinana nggeluh ersada, sikeleng-kelengen, ras sisampat-sampaten. I bas surat-surat Rasul Paulus bage pe i bas surat-surat rasul-rasul si deban nari, melala pengajuk man gereja-gereja paksa si e gelah nggeluh sikeleng-kelengen, saling mperdiateken, sisampat-sampaten, ras saling mendoakan. Ertina semangat nggeluh ersada i bas Kristus enggo lit nai-nai nari. Tapi seiring perkembangen jaman, semangat kiniersadan enda ndai enggo mulai urak. Emaka i bas awal abad si pe-20-ken tubuh geraken oikumenis si tujunna guna mpegeluh mulihi semangat kiniersadan i tengah perpulungen kalak si tek i bas erbage-bage denominasi.

I bas kesempaten enda radu ras kita mulihi erlajar kerna kiniersadan kalak si tek i bas konteks jaman si genduari enda. Khususna kiniersadan si berdampak mehuli guna kemulian gelar Dibata.

Mpebagesi Si Man Ogen

Ogenta sendah lit i teruh judul perikop “Keselamaten e isikapken Dibata man kerina manusia,” i bas terj. Alkitab TB-LAI Edisi II, “Pembenaran berdasarkan iman.” Perikop enda termasuk ku bas penjelasen Paulus kerna keselamaten i bas Yesus Kristus, hubungenna ras bangsa pilihen Dibata e me Israel, benaken bindu 9 seh 11. Si jadi ogenta sendah e me umputen bindu 9 i ja Paulus nuriken maka keselamaten si awalna itujuken man bangsa Israel, isikapken ka man bangsa-bangsa si deban, entah pe man kerina manusia si tek. Emaka i bas perikop enda Rasul Paulus mereken pengajaren kerna pokok iman Kristen si penting, sola fide, ay. 9-11 (terj. TB-LAI Ed. II) nina, “Jika engkau mengaku dengan mulutmu bahwa Yesus adalah Tuhan, dan percaya dengan hatimu bahwa Allah telah membangkitkan Dia dari antara orang mati, maka engkau akan diselamatkan. Sebab, dengan hati orang percaya sehingga dibenarkan, dan dengan mulut orang mengaku sehingga diselamatkan. Sebab, Kitab Suci berkata, “Siapa saja yang percaya kepada Dia, tidak akan dipermalukan.” I bas si e teridah maka keleng ate Dibata e bersifat universal labo terjeng man bangsa Israel saja, tapi man kerina manusia. 

Emaka i bas ay. 12 ras 13 mulihi itegasken Paulus maka Dibata i bas Yesus Kristus e me Dibata kerina manusia kai pe suku bangsana, Yahudi, Yunani, entah pe bangsa-bangsa si deban. Erkiteken Dibata i bas Yesus Kristus e me Dibata kerina manusia, maka Dibata e melumbar mere man kerina kalak si erlebuh man baNa. Ay. 12 i bas terj. BIMK nina, “ … Allah yang satu itu adalah Tuhan untuk semua orang. IA memberikan berkat yang berlimpah-limpah kepada semua orang yang meminta tolong kepadaNya.” I bas ay. 13 ikataken maka kerina kalak si erlebuh mindo penampat man Tuhan ikelini. Enda hal si menarik akap kami, i bas ay. 9-11 ndai syarat guna datken keselamaten e me kiniteken, sola fide entah pe hanya melalui iman percaya. Sedangken i bas ay. 12-13 enda syarat guna datken pasu-pasu (berkat yang berlimpah-limpah), bage pe keterkelinen, i bas Dibata nari e me erlebuh alu meteruk ukur mindo penampat man Dibata.

Versi Audio silahkan klik : https://youtu.be/Xdx0G2JA7tA

Pengkenaina

PA-ta sendah i bas rangka dukungenta man program “United Action” si ilakoken UEM. UEM singkaten United Evangelical Mission entah pe lembaga misi penginjilan internasional si maba semangat oikumenis, berkantor pusat i Wuppertal Jerman. Anggotana lit 39 gereja si tersebar i Afrika, Asia, ras Jerman. Lit 17 gereja i Asia si jadi anggota, janah 14 gereja i bas Indonesia nari, termasuk gerejanta GBKP. Kantor Regional UEM i Indonesia lit i Pematangsiantar. Emaka enggo semal i bas gerejanta lit bahan khotbah arah UEM nari, lit Minggu UEM, janah melala informasi i bas media sosial si ncidahken partisipasi GBKP i bas program-program UEM i Indonesia.

Program “United Action” (“upaya bersama” - terj. Moderamen: “satu dalam aksi” - terj. Buku PA: “radu ras erbahan aksi”) enda e me salah sada upaya penggalangan dana guna mendukung misi UEM i Asia termasuk Indonesia, janah “United Action” enda enggo icanangken i bas Sidang Raya tahun 2012 i Taneh Karo. Ertina enggo 12 tahun program enda erdalan janah akap kami enggo melala si tersampati arah litna program enda. Sekali enda radu ras kita mendukung “United Action” man senina turangta i Mentawai, Gereja Kristen Protestan Mentawai (GKPM) bage pe masyarakat Mentawai si membutuhken penampat. Rikutken informasi i bas Buku PA Moria-nta enggo lit piga-piga aksi si ilakoken, janah i bas kesempaten enda mulihi isingetken kerna aksi bersama enda gelah terus silakoken arah kai pe si banci silakoken gelah terpepulung dana guna mendukung misi UEM i Mentawai.

Ogenta sendah enggo ngingetken kita kerina Moria kerna Dibata si melumbar mere man kalak si erlebuh mindo penampat man baNa. Emaka i bas kesempaten enda mulihi kita isingetken maka kita kerina Moria e me saluran tan Dibata guna nehken pasu-pasuNa (berkat yang melimpah-limpah) man kerina kalak si membutuhken penampat. Ikataken saluran tan Dibata ertina, kerina kita kalak si tek, khususna kita Moria, labo terjeng ngaloken keselamaten arah kinitekenta man Dibata i bas Yesus Kristus saja, tapi kita pe iutus guna nehken keleng ate Dibata man kalak si deban. Ertina adi enggo tuhu-tuhu sigejapken keleng ate Dibata si mbelin i bas geluhta, tentu labo mesera guna memahami maka kita enda saluran tan Dibata guna nehken pasu-pasuNa man kalak si deban.

Adi sikaitken ras semangat kiniersadan sapih-sapih kita, bagi si enggo ijelasken i bas bagin penaruh i datas, maka semangat e harus tetap igeluhken bagi si ikataken Rasul Paulus i bas Gal. 6:10, “Emaka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken.” Enda me akap kami salah sada tanda persadan i bas Kristus. Emaka mari radu ras kita tetap erbahan si mehuli sebage tanda pengataken bujurta man Dibata i bas Yesus Kristus. Marilah alu meteruk ukur erlebuh mindo penampat man Dibata gelah ipengasupNa kita ngelakokenca.