SUPLEMEN PA BERSAMA KATEGORIAL GBKP TGL. 5 - 11 MEI 2024

Pdt. Larena br. Sinuhadji (Nd. ReyRapha Tarigan)

Si Man Ogen : Lukas 8:1-3

Tema : NAMPATI ALU KINILITEN

Tujun : Gelah Kerina Kategorial :

- Nuriken penampat diberu-diberu i bas pelayanen Yesus

- Mpepulung perbahanen si banci jadi penampat man sekelewetna

Metode PA : Sharing & Aksi

Penaruh

Adi sioge turi-turin kerna pelayanen Yesus Kristus i tengah-tengah bangsa Israel, teridah maka Yesus melayani alu la erpilihen, bersifat holistik, kerina kalangan ilayaniNa alu mehuli. Benaken danak-danak nari seh ku kalak si enggo metua, dilaki ras diberu, kalak musil ras kalak bayak, kalak sehat ras sakit entah pe berkebutuhan khusus, kalak Yahudi ras kalak si labo Yahudi. Bentuk pelayanen Yesus pe labo terjeng karitatif, tapi reformatif ras transformatif. I bas si e tentu patut kita ngataken bujur sebab arah teladan Yesus, iajuk Dibata kita kerina, la erpilihen, guna ikut muat bagin i bas dahin-dahin pelayanen si sifatna holistik man kalak si deban erpalasken keleng ate Dibata i bas Yesus Kristus.

Janah i bas kesempaten enda pe, ngataken bujur kita man Dibata erkiteken GBKP enggo tuhu-tuhu ngusih pelayanen Yesus alu litna persekutuan kategorial, e me KAKR guna pelayanen man anak ras remaja, PERMATA guna pelayanen man kaum muda, Moria guna pelayanen man pernanden, Mamre guna pelayanen man perbapan, ras Saitun guna pelayanen man orang tuanta si enggo lansis. Arah kerina lembaga kategorial enda kerina kategori usia, dilaki ras diberu, si nguda denga bage pe si enggo metua, iajuk gelah kerina ikut muat bagin i bas dahin-dahin pelayanen si lit i bas Gerejanta GBKP.

Sekali enda ilakoken PA bersama kerina lembaga kategorial alu arapen banci semakin bersinergi i bas ndahiken dahin-dahin pelayanen gelah gelar Dibata i bas Yesus Kristus semakin termulia i tengah-tengah doni enda.

Mpebagesi Ogen

Ogenta sendah telu ayat ngenca alu judul perikop “Diberu-diberu si nampati Yesus” (terj. TB-LAI, “Perempuan-perempuan yang melayani Yesus”). Perikop enda hanya lit i bas Injil Lukas sebab la lit rujuken ku Injil-injil si deban si nuriken turi-turin si seri. Enda akap kami sada keistimewaan kitab Injil Lukas i ja iturikenna secara khusus peran ajar-ajar Yesus si diberu. Diberu i bas tradisi Yahudi termasuk golongan manusia kelas dua si isejajarken ras budak. Memang lit aturen-aturen i bas Undang-undang Musa si melindungi kaum diberu. Tapi enggo semal paksa si e, adi sekalak jelma tubuh sebage diberu, e ianggap sebage kutuken i bas Dibata nari. Emaka lit pertoton kalak Yahudi si isina ngataken bujur perban tubuh sebage sekalak dilaki, labo diberu. Ertina amin pe mungkin lit peran besar diberu-diberu i bas kalangan masyarakat Yahudi, tapi peran-peran e dikesampingkan dalam catatan-catatan sejarah erkiteken diberu si erbahanca. Tapi Lukas labo bage, tetap ituliskenna peran ajar-ajar si diberu i bas mendukung dahin-dahin pelayanen Yesus.

I bas ogenta sendah ituriken maka kenca enggo ialemi Yesus sekalak diberu perdosa i rumah Simon kalak Parisi, ilanjutken Yesus pelayanenNa ku kota-kota ras kuta-kuta. I bas pelayanenNa meritaken Berita Si Mehuli kerna Kinirajan Dibata, ituriken maka ajar-ajar si 12 kalak ikut ras Yesus, bage pe piga-piga ajar-ajarNa si diberu. Rikutken keterangan i bas ay. 2 nari, piga-piga diberu enda enggo ipepalem Yesus i bas setan ras pinakit-pinakit nari. Ertina kenca enggo igejapkenna keleng ate ras pasu-pasu Dibata nari erkelangken Yesus, mis iikut-ikutna ku japa pe Yesus melayani. Piga-piga ajar-ajar si diberu ndai e me:

1. Maria Magdalena. I bas ay. 2 ituriken, “Maria (si igelari Magdalena) si enggo ipelawes pitu setan i bas ia nari.” Adi sioge informasi arah Injil Yoh. 19:25; 20:18 nari, teridah ketutusen ras kesetiaan Maria Magdalena ngikutken Yesus seh ku penyaliben ras kekekenNa. 
2. Johana ndehara Kusa menteri Herodes. Matthew Henry ngatakenca Johana enda enggo sirang ras perbulangenna, tapi kenca enggo mbalu pe, kegeluhenna banci ikataken berkelimpahan secara materi. Alu kiniliten materi si lit i bas ia, idukungna pelayanen Yesus. Lit ka si ngatakenca maka Kusa enda e me sekalak menteri si ipepalem Yesus anakna i bas Yoh. 4:4-53. Kenca ipepalem Yesus anakna ndai, Kusa ras Johana ras ndeharana ikut mendukung pelayanen Yesus alu kinilitenna. I bas Luk. 24:10 gelar Johana isebutken mulihi raduken ras ajar-ajar diberu si deban kenca kematen Yesus. Enda ncidahkenca ketutusen ras kesetiaan Johana i bas mendukung Yesus seh ku akhir pelayanenNa. 
3. Susana. La lit keterangen si deban i bas Pustaka Si Badia nari kerna Susanna enda, hanya ituriken i bas ogenta sendah, ia sebage salah sada diberu si nampati Yesus alu erta-ertana.
4. Lit diberu-diberu si deban si la isingetken gelarna i bas ogenta sendah, tapi alu tutus nggit nampati pelayanen Yesus alu erta-ertana. Amin bage gia, banci ikataken cukup enterem diberu-diberu si jadi ajar-ajar Yesus ras nggit mendukung pelayanen Yesus.

Selain telu gelar ajar-ajar diberu si isebutken i bas ogenta sendah, melala turi-turin si deban i bas Pustaka Si Badia, khususna Padan Si Mbaru, si nuriken peran diberu-diberu i bas mendukung pelayanen Yesus, umpamana, Mami Simon i bas Mar. 1:29-31; Maria Marta turang Lasarus i bas Luk. 10:38-42; Salome i bas Mar. 15:40-41; Maria ndehara Kleopas i bas Yoh. 19:25, ia termasuk diberu-diberu si jadi saksi penyaliben ras kekeken Yesus (Mat. 27:55-56; 28:1).

Versi Audio silahkan klik : https://youtu.be/CyOegKJOBbo

Pengkenaina

Tema si seh man banta i bas PA bersama lembaga kategorial enda ngajuk kita kerina gelah nggit nampati alu kiniliten i bas kita. Nampati i jenda akap kami bersifat holistik, labo terjeng nampati dahin-dahin pelayanen i bas Gereja saja, tapi nampati ise saja si perlu man sampaten, khususna man kalak si la sada kiniteken ras kita, bagi si enggo iteladanken Yesus. Adi rikutken ogenta sendah jelas secara konkrit ikataken “nampati Yesus alu erta-ertana.” Erta-erta i jenda i bas terj. TB-LAI nina, “melayani dengan kekayaan mereka.” I bas terj. BIMK nina, “membantu Yesus dengan biaya sendiri.” Enda sue ras tujun si pemena PA-ta sendah.

Tentu enda menjadi bahan evaluasi man banta khususna i bas tahun pelayanan 2024 enda, “Berkarya dan berguna untuk orang lain.” Si pemena lebe, si akap kami perlu sievaluasi, e me palasta i bas kita nampati. Palas kiniteken i bas kita nehken penampat man kalak si deban, jelas erkiteken enggo leben sialoken penampat i bas Dibata nari. Keselamaten luar biasa si sifatna holistik enggo ialoken kita arah kematen, kekeken, ras kenangkihen Yesus ku surga. Ertina, si terbaik ras si mehulina kel enggo ibereken Dibata man banta sebage tanda keleng ateNa si mbelin man banta (Yoh. 3:16). Jadi jelas maka palasta i bas kita nehken penampat e me keleng ate Dibata ras bentuk konkrit pengataken bujurta man Dibata. Penungkunenna, apakah lit motivasi-motivasi si deban i bas kita nehken penampat?

Si peduaken, adi palas kinitekenna enggo jelas maka seharusna si terbaiklah sibereken penampatta man kalak si deban (bdk. Kol. 3:23). Ula asal-asalan, ula erkiteken ikut-ikuten, ula erkiteken gelah iidah kalak, ula erkiteken gelah ihamati entah pe dat puji-pujin i bas kalak si deban nari. Maria Magdalena, Johana, ras Susanna i bas ogenta sendah banci jadi teladan, erkiteken enggo igejapkenna keleng ate ras pasu-pasu si luar biasa i bas Dibata nari, maka idukungna pelayanen Yesus. Emaka marilah sigejapken tuhu-tuhu keleng ate Dibata si mbelin i bas geluhta, gelah ipengasup Dibata kita nampati alu maksimal. Benekenlah sifat entah pe karakter “pura-pura miskin” i bas dirinta, sebab semal i bas kita budaya “muniken.” Sipemusil-musil banta gelah ula sempat kalak mindo man banta padahal situhuna lit i bas kita.

Si peteluken, secara kelembagaan marilah kita bersinergi secara proaktif semakin meningkatken kualitas ras kuantitas penampatta man kalak si deban si lit i sekelewetta. Umpamana, ndahi kalak si lit i bas penjara, panti-panti jompo, panti-panti asuhan, rumah-rumah singgah, rsd. Mari sisehken penampatta alu kiniliten si lit i bas kita. Dibata si mpengasup kita guna ngelakokenca.