SUPLEMEN PJJ GBKP TGL. 5 - 11 MEI 2024

Pdt. Larena Sinuhadji (Nd. ReyRapha Tarigan)

SERAYAN SI MEHULI, BUJUR DINGEN LA SALAH

(1 Tesalonika 2:8-12)

Penaruh

Serayan i bas konteks GBKP banci ikataken pelayan sekaligus pemimpin, emaka rusur sibegi istilah “servant leadership” entah pe “kepemimpinan yang melayani.” Gundari enggo melala perusahaan-perusahaan ras organisasi-organisasi si nerapken “servant leadership” enda ndai. Pola kepemimpinan enda akap kami ngusih pola kepemimpinen kristiani si iajarken Yesus Kristus. Adi kalak si deban si labo Kristen saja nggit makeken ajaren Yesus, apai ka kita kalak si tek man Yesus. Emaka i bas si e, sebage sekalak pemimpin i bas konteks GBKP, tentu harus ngasup kita memimpin ras melayani alu mehuli, janah sedar kita maka sekalak pemimpin harus ngasup jadi usihen man keluarga, perpulungen, ras ise pe si lit i sekelewetta.

I bas kesempaten enda mulihi kita erlajar kerna pola kepemimpinen kristiani erpalasken ajaren Rasul Paulus man serayan ras perpulungen i Tesalonika 

Mpebagesi Ogen

Perpulungen Tesalonika Rasul Paulus si majekkenca (Perb. Rasul 17:1-9). Amin pe labo ndekah Paulus melayani i Tesalonika, tapi tetap ipantauna perkembangen perpulungen arah iutusna Timotius (1 Tes. 3:1-8). Janah suratna si pemena enda ikirimken guna menanggapi laporen si enggo isehken Timotius kerna keadaan perpulungen i Tesalonika. Secara garis besar surat enda isehken Paulus guna mpegegehi kiniteken perpulungen alu kata-kata motivasi ras pengajaren-pengajaren kerna keselamaten i bas Yesus Kristus.

Adi sioge bindu 1 surat enda, teridah maka amin pe labo ndekah Paulus ras Silas melayani i Tesalonika, tapi kiniteken perpulungen banci ikataken bertumbuh alu mehuli. I bas si e, Paulus ngataken bujur sebab perpulungen e enggo jadi usihen nandangi kerina kalak si tek si ringan i daerah Makedoni ras Akaya (1 Tes. 1:7). Si jadi ogenta sendah lit i teruh judul perikop “Dahin Paulus i Tesalonika” (terj. TB-LAI “Pelayanan Paulus di Tesalonika”). Isina banci ikataken bagi flashback i ja Paulus nuriken kai-kai saja si enggo ilakokenna sanga lit denga ia i tengah-tengah Perp. Tesalonika, gelah arah si e perpulungen pe termotivasi guna semakin megegeh ras paguh kinitekenna. Si menarik i jenda i bas ay. 1 ikataken Paulus nina, “O senina-senina, ietehndu maka kerehen kami ku kam e labo sia-sia,” ertina pelayanen Paulus i bas meritakan Berita Si Meriah i Tesalonika isambut alu mehuli, janah dahin-dahin pelayanen pe banci erdalan alu mehuli erkiteken lit dukungen si mehuli arah perpulungen nari.

Arah ogenta sendah lit piga-piga hal si banci jadi usihen perpulungen Tesalonika bage pe kita i bas jaman gundari enda:

1. I bas pelayanenna, Paulus ras timna, labo terjeng mereken pengajaren-pengajaren kerna keselamaten i bas Yesus Kristus, tapi nggit Paulus berbagi kai pe si lit i bas ia gelah keleng ate Dibata banci tuhu-tuhu igejapken perpulungen. Ertina i bas pelayanen e beluh ngajar kerna pokok-pokok iman saja lenga cukup, harus lit je sentuhan-sentuhan pribadi alu keleng ate ras empati (ay. 8).
2. I bas pelayanenna, Paulus ras timna la nggit bergantung man kalak si deban. Emaka icukupkenna sendiri kai-kai saja si perlu guna mendukung pelayanenna. I bas si e, la lit ise pe si banci ngaturi dahin-dahin pelayanen pembarken Berita Si Meriah, janah i bas dampar si deban, pang Paulus ngajarken si benar sebab labo lit bas ia beban hutang budi man kalak si deban (ay. 9).
3. I bas pelayanenna, Paulus ras timna labo terjeng beluh berteori kerna kegeluhen si mbaru i bas Kristus, tapi pe ngasup ia jadi usihen man perpulungen arah lagu langkah si mehuli, bujur dingen la salah. I bas terj. TB-LAI ras BIMK nina “Kamu adalah saksi, demikian juga Allah, betapa saleh (hidup dengan suci), adil (benar) dan tak bercacatnya (tanpa cela) kami berlaku di antara kamu, yang percaya.” Ertina hidup saleh, berlaku adil, bersikap ras berperilaku benar sue ras Kata Dibata, labo hal si mustahil guna siwujudken (ay. 10).
4. I bas pelayanenna, Paulus ras timna menerapken pola relasi bapa ras anakna, i ja sekalak bapa si mehuli, peduli, ras keleng atena nandangi anak-anakna, enggo pasti labo memanjakan, tapi mendidik alu disiplin erpalasken Kata Dibata. Mendidik alu disiplin i jenda labo seri ras diktator, tapi erpalasken kepedulian ras keleng ate Kristus gelah perpulungen e nggeluh rikutken si ngena ate Dibata (ay. 11-12)

Versi Audio silahkan klik : https://youtu.be/qaxpODnj-jU

Pengkenaina

I bas kesempaten enda, ngataken bujur kita sebab i bas piga-piga Runggun sue ras jadwal si enggo iaturken Moderamen, enggo dung ngelaksanaken pemilihan bakal calon Pertua Diaken i bas PJJ Sektor. Mari radu ras sitotoken gelah proses pemilihen i bas tingkat Runggun banci erdalan alu mehuli i belang-belang GBKP. Periodisasi pelayanen Serayan (Pertua & Diaken) enggo jadi kesemalen i bas GBKP janah i bas si e banci simaknai secara teologis sebage kesempaten si ibereken Dibata guna mengevaluasi motivasi bage pe ketutusen i bas pelayanen. Man banta si baru denga terpilih i bas periode enda, kesempaten enda banci sipergunaken alu mehuli guna maba perobahen si mehuli i tengah-tengah gerejanta sue ras peraten Dibata.

Man banta serayan si mulihi terpilih i bas periode enda, banci siantusi sebage kesempaten si ibereken Dibata guna memperbaiki kerina si kurang i bas periode sebelumna. Lit bakal calon si ngatakenca, “Mbiar aku merawa Dibata adi la sialoken pendiloNa i bas periode enda.” Payo si ikatakenna e. Tapi perlu ka sisedari, lebih merawa Dibata adi enggo pe sibereken kesempaten guna memperbaiki diri tapi tetap denga kita bagi si gel-gel. Semangat di awal, kendor di pertengahan, kenca enggo lit sitik persoalen, lanai reh-reh ku gereja. Tapi tiba-tiba rajin kembali menjelang pemilihan. Si bage-bage akap kami harus jadi tekad man banta guna tuhu-tuhu berobah sebab si ndilo kita e Dibata.

Tema si seh man banta i bas PJJ sendah, ngajuk kita kerina, khususna man kita kerina Serayan GBKP, gelah menyadari keberadaan dirinta sebage Serayan Tuhan bagi si enggo iteladanken Paulus. Lit konsekuensi si harus ialoken ras silakoken kita kenca kita ngaloken pendilo Dibata guna jadi SerayanNa. Poin 1 seh 4 i datas banci jadi renungen man banta janah mudah-mudahan banci menjadi motivasi man banta guna semakin lebih baik lagi ke depanya. Man banta perpulungen, marilah siusih perpulungen Tesalonika, dukunglah dahin-dahin serayanta alu kai pe si banci silakoken kita. Janah si pentingna kel, marilah sitotoken alu la erngadi-ngadi kerina Serayan i bas GBKP si malem enda, gelah ipengasup Dibata jadi serayan-serayan si tutus ras tangguh. Adi rikutken tema PJJ-ta sendah, jadi serayan-serayan si mehuli, bujur, dingen la salah. Dibata si mpengasup kita.