SUPLEMEN PA MAMRE GBKP TGL. 26 MEI - 1 JUNI 2024

Pdt. Larena Sinuhadji (Nd. ReyRapha Tarigan)

Teks : Matius 20:20-28

Tema : MILIH SERAYAN SI NGGIT NGELAI

Tujun : Gelah Mamre :

1) Ngangkai maka serayan si idilo Tuhan e me si nggit ngelai

2) Nggit ipilih ras milih Pertua Diaken si nggit ngelai

Penaruh

Lit sada istilah si akap kami enggo rusur sibegi, e me: Soli Deo Gloria. Istilah enda iadopsi arah Pustaka Si Badia nari, e me i bas Roma 11:36 (doksologi Paulus) ras Mas. 115 nari. Johanes Calvin si mpetandaken istilah enda janah jadi salah sada semboyan Gerakan Reformasi Gereja abad 16-17. Tujun Calvin mpetandaken istilah enda guna melengkapi semboyan Sola Gratia ras Sola Fide si iajarken Martin Luther. Arah semboyan Soli Deo Gloria enda iarapken gelah kerina kalak Kristen labo terjeng kem saja kenca enggo ialokenna keselamaten (Sola Gratia & Sola Fide), tapi secara proaktif mpermuliaken gelar Dibata arah kerina pengkebet geluhna. Ertina, orientasi geluh kalak Kristen enggo lanai guna dirina jine (egoisme) tapi guna kemulian gelar Dibata.

Soli Deo Gloria akap kami mempengaruhi model kepemimpinen Kristen janah membedakenca ras model kepemimpinen doni enda. Ratana model pemimpin doni enda orientasina e me guna dirina sendiri, guna popularitas ras kebayaken dirina entah pe guna kepentingen dirina sendiri saja. Kebalikenna, orientasi kepemimpinen Kristen e me guna kepentingen ras kemulian gelar Dibata. Yesus Kristus jadi usihen kepemimpinen Kristen, e me model kepemimpinen si ipalasi alu keleng ate, alu rendah hati nggit melayani, janah rela berkorban guna kepentingen kalak si deban. I bas kesempaten enda radu ras kita mulihi erlajar kerna pemimpin si nggit melayani erpalasken ogenta.

Mpebagesi Teks

Teks-ta sendah nuriken kerna pemindon ndehara Sebedeus man Yesus nandangi anak-anakna si jadi ajar-ajar Yesus e me Yakobus ras Yohanes. Ise gelar ndehara Sebedeus i jenda memang labo ikataken. Sekalak penafsir (JJ. De Heer) ngatakenca maka kemungkinen gelarna e me Salome, senina Maria nande Yesus, (erpalasken Mat. 27:56; Mrk.15:40; Joh. 19:25). Kai pemindon ndehara Sebedeus? Ipindokenna gelah Yakobus ras Yohanes kundul i kawes ras kemuhen Yesus kenca Yesus jadi Raja pagi. I jenda lit hal si menarik, si pemena, adi sibandingken ras Mrk. 10:35-45, ituriken maka si mindo e labo nandena tapi Yakobus ras Yohanes sendiri si mindo langsung man Yesus. Enda tentu jadi penungkunen, engkai maka pernanden ka si mindo jabaten guna anak-anakna? Padahal anak-anakna ndai banci ikataken enggo berusia dewasa. Lit kesan seakan-akan pernanden enda ndai terlalu ikut campur urusen anak-anakna. Adi rikutken hubungen perkade-kaden bagi nina sekalak penafsir i datas, tentu jadi tangkas kai alasenna, sebab nepotisme enggo semal i bas budaya Yahudi paksa si e. Mbera adi bibina si mindo, ialoken Yesus kai si jadi sura-sura bibina ndai. Si peduaken, kerna isi pemindon nande Yakobus ras Yohanes enda ndai. I bas terj. TB-LAI Ed. II, nina, “Nyatakanlah supaya kedua anakku ini duduk di dalam KerajaanMu, seorang di sebelah kananMu dan seorang lagi di sebalah kiriMu.” Pemindon enda sifatna mendesak, bagi si meseksek kel pernanden enda ndai mindo man Yesus. Kata “nyatakanlah,” ncidahkenca urgensi pemindon e, adi banci mis simomoken man kerina ajar-ajarNa. Adi umpamana motivasi ras orientasina benar bagi si iajarken Yesus labo dalih, tapi lenga iangkai ajar-ajar kai si imaksudken Yesus.

Adi siperdiateken jawaben Yesus i bas menanggapi pemindon Nande Yakobus ras Yohanes ndai, teridah maka lit perbedaan pemahamen (mis-persepsi) i bas hal kepemimpinen. Si iajarken Yesus benaken bindu 16 nari man ajar-ajarNa e me, si pemena, patuh (taat) nandangi sura-sura Dibata. Sura-sura Dibata man Yesus e me ngenanami kiniseran, mate i kayu persilang ras i bas peteluwariken keke i bas si mate nari. Ertina, harus lebe sipahami maka i bas model kepemimpinen kristiani, Dibata si jadi pemimpin tertinggi. Lit pe pemimpin-pemimpin i bas gereja, tapi kerinana patuh man Dibata sebab Dibata e nge kepala gereja. I bas si e jadi tangkas jawaben Yesus man Nande Yakobus ras Yohanes, maka labo Yesus si berhak nentuken ise si pantas menduduki jabaten tertentu, tapi si lebih berhak nentukenca e me Dibata (ay. 23). Janah situhuna labo e si pentingna kel, si pentingna e me patuh entah pe taat nandangi sura-sura Dibata.

Si peduaken, kepemimpinen si iajarken Yesus e me servant leadership, pemimpin si nggit berkorban. Piga-piga kali enggo ikataken Yesus maka IA harus ngenanami kiniseran, mate i kayu persilang, janah keke i bas wari si peteluken. Enda antusenna pemimpin si nggit berkorban, tapi kerna si e lenga iangkai ajar-ajar Yesus. Ikataken Yesus, “Minem tare calung kiniseran” i bas ay. 22, e me tandana sekalak pemimpin si nggit berkorban demi nuhi sura-sura Dibata, bage pe nggit berkorban demi kiniulin kalak si deban. Syarat e situhuna enggo isanggupi Yakobus ras Yohanes alu ngatakenca “Ngasup,” tapi lenga itehna uga nge situhuna ngenanami kiniseran bagi si inanami Yesus e? Sebab sanga Yesus ngenanami kiniseran seh ku kematenNa, labo ituriken lit je Yakobus ras Yohanes ikut mendampingi. Mungkin enggo kiam cebuni erkiteken mbiarna. Tapi rikutken informasi i bas Perb. Rasul 4:3; 5:18; 12:2, pada akhirna Yakobus ras Yohanes ngangkai kai si imaksudken Yesus jadi sekalak pemimpin si nggit berkorban.

Si peteluken, penjelasen Yesus i bas ay. 25-28 semakin menegasken maka motivasi ras orientasi i bas diri ajar-ajarNa la benar. Motivasi ras orientasi pemimpin-pemimpin doni enda e me guna erkuasa (memerintah dengan tangan besi), rate-ate nandangi rayatna (sewenang-wenang menggunakan kekerasan). Sementara motivasi ras orientasi pemimpin-pemimpin kristiani e me guna ngelai sebage hamba ras jadi suruh-suruhen (pelayan) sue bagi si enggo iteladanken Yesus, bahkan nggit Yesus ngendesken kesahNa guna enterem jelma.

Versi Audio silahkan klik : https://youtu.be/vTqanKKihxI

Pengkenaina

PA-ta sendah i bas rangka persiapenta memilih calon-calon serayan si enggo terpilih i bas Pemilihen Tingkat Sektor. Sue ras jadwal arah Moderamen nari, minggu pemena bulan Juni bakal ilaksanaken Pemilihen Tingkat Runggun. Kesempaten enda harus sipergunaken alu mehuli gelah terpilih pagi pemimpin-pemimpin si motivasi ras orientasina benar bagi i iajarken Yesus rikutken ogenta sendah.

Kai saja si iajarken Yesus? Si pemena lebe, serayan si patuh nandangi sura-sura Dibata. Ersukuten man Dibata. Njadiken Dibata si utamana i bas kegeluhenna. Si peduaken, serayan si nggit berkorban guna ngelakoken sura-sura Dibata bage pe nggit berkorban guna kiniulin kalak si deban. Si peteluken, serayan si rela jadi sekalak suruh-suruhen janah nggit ras tutus ngelai. Tambahenna, si peempatken, bagi si enggo isingetken i bas bagin penaruh i datas, serayan si secara proaktif mpermuliaken gelar Dibata arah kerina pengkebet geluhna.

Memang labo murah jadi pemimpin si mehuli sue ras ogenta sendah, tapi sada hal si harus siinget, lit kuasa Kesah Si Badia si mpengasup kita kerina ngelakoken kerina si jadi peraten Dibata. Tading kuncina i bas kita, adi nggit kita iajari Kesah Si Badia, enggo pasti ipengasupNa kita jadi pemimpin si mehuli sue ras peraten Dibata. Emaka gundari nari mari radu ras sitotoken, gelah terpilih pagi serayan-serayan GBKP si meteruk ukur, ersukuten man Dibata, janah nggit ngelai alu tutus. Janah ertoto kita gelah ipengasup Dibata kita jadi pemilih-pemilih si cerdas. Guna si e, marilah kita ciptakan sistem pemilihan si menjamin prinsip-prinsip demokratis, e me bebas dan rahasia. Adi sipilih calon-calon i bas ingan kundulta sekalak-sekalak, akap kami prinsip bebas dan rahasia ndai enggo berkurang nilaina. Dibata si mpengasup kita.