SUPLEMEN PJJ GBKP TGL. 19 - 25 MEI 2024

Pdt. Larena br. Sinuhadji (Nd. ReyRapha Tarigan)

SERAYAN SI NGASUP NGATURKEN DAHIN DIBATA

(Titus 1:5-9)

Penaruh

Tema PJJ-ta sendah akap kami umputen tema PJJ dua minggu si lepas alu tema “Serayan si mehuli, bujur dingen la salah.” Salah sada konsekuensi jadi sekalak pemimpin e me ngasup ngaloken melala tuntuten si isehken man bana. Yesus pe ngatakenca man ajar-ajarNa i bas Lukas 12:48 (terj. TB Edisi 2) nina, “Setiap orang yang kepadanya banyak diberi, akan banyak dituntut dari dirinya, dan kepada siapa yang banyak dipercayakan, akan lebih banyak lagi dituntut dari dirinya.” Ertina, periodesasi i bas konteks GBKP banci simaknai sebage kesempaten guna mbuktikenca maka kepercayaan si enggo ibereken Dibata man banta labo isia-siaken, tapi enggo tuhu-tuhu silaksanaken alu mehuli, janah menjadi sada evaluasi ras tekad i bas periode berikutna gelah semakin meningkat kualitas ras kuantitas pelayanen guna kemulian gelar Dibata. 

Mpebagesi Ogen

Titus e me sekalak Yunani anak rohani Rasul Paulus (Titus 1:4). Titus rusur iutus Paulus guna er-Berita Si Meriah, janah peranna i bas perkembangen Perp. Korinti banci ikataken mbelin (bdk. 2 Kor. 2:13; Gal. 2:1-3). Surat Titus enda Rasul Paulus si nuliskenca alu tujun memotivasi gelah reh semangatna Titus pembarken Berita Si Meriah, janah tetap setia ngajari ras membimbing perpulungen gelah nggeluh sue ras peraten Dibata. I bas ay. 5 ogenta ituriken maka Titus melayani perpulungen kalak si tek i Pulau Kreta. Perpulungen Kreta banci ikataken perpulungen si lenga tuhu-tuhu dewasa i bas erkiniteken. Enda banci sioge i bas ay. 12 ras 13 bindu 1. Tapi amin bage gia, Titus tetap setia melayani.

Ogenta lit i teruh judul perikop “Dahin Titus i Pulau Kreta.” I bas ay. 5, iperentahken Paulus gelah iangkat Titus pertua-pertua i bas tep-tep kuta. Ertina lit piga-piga perpulungen kalak si tek i Pulau Kreta si harus terus ikep-kep, datken pelayanen ras pengajaren si mehuli gelah reh dewasana i bas erkiniteken. I bas si e tentu ibutuhken pelayan-pelayan alu kriteria khusus. Emaka i bas ay. 6-9 Rasul Paulus mereken piga-piga kriteria si harus lit i bas calon-calon pertua ndai.
 
Si pemena i bas ay. 6 ras 7, lit dua kali ikataken “ola min lit si man pandangen” i bas terj. TB LAI nina “tak bercacat” entah pe “tanpa cela.” Antusenna, sekalak serayan harus ngasup njagai dirina. Sope ia mimpin kalak si deban, leben harus ngasup ia mimpin dirina sendiri alu mehuli.

Si peduaken, kenca enggo ia ngasup mimpin dirina sendiri, selanjutna, ngasup ia mimpin jabuna alu mehuli. Mimpin jabu alu mehuli enda teridah arah geluh perjabun si monogami, sekalak ngenca ndeharana. Ngasup ia mendidik anak-anakna nggeluh erkiniteken man Kristus.

Si peteluken, adi enggo sekalak serayan ngasup mimpin dirina sendiri ras jabuna alu mehuli, maka enggo banci sipastikan ngasup ia ngaturken dahin Dibata alu mehuli (ay. 7). “Ngaturken dahin Dibata i bas terj. TB-LAI nina, “pengatur rumah Allah seorang penilik.” Penilik ertina pengawas, entah pe orang yang diberi kemampuan oleh Allah untuk mengetahui kehendakNya, yang matanya dibuka untuk melihat atau memahami hal-hal yang umumnya tidak diketahui manusia. Ertina ngaturken dahin Dibata termasuk je ngarak-ngarak perpulungen, mendampingi janah membimbing.

Si peempatken, rikutken ay. 7 ras 8, harus lit i bas ia karakter-karakter si mehuli, meteruk ukur, sabar entah pe labo pedas emosi, nggeluh alu sehat secara fisik ras psikis entah pe labo peminem-minem ras labo perlua-lua, juru dame entah pe labo pengamuk, melumbar entah pe labo merangap nandangi duit, pertemue, ngena ate si mehuli, pentar, dingen terkuasaina dirina.

Si pelimaken, rikutken ay. 9, sekalak serayan harus nggit ia njemak alu nteguh prinsip-prinsip kebenaren erpalasken Kata Dibata kai pe resikona. I bas si e tentu harus pang ia ngatakenca si benar amin pe mungkin melala resikona, salah sadana itadingken teman. Selain si e, ngasup ia ngajari kalak si deban kerna kebenaren Kata Dibata. Artina,  sekalak serayan harus nggit ia erlajar, entah pe, sekalak pembelajar simehuli. I bas karakter sekalak pembelajar simehuli, lit i bas ia kerelaan ngaloken kritik, janah nggit ia menerima hal-hal si mbaru sue ras peraten Dibata.

Versi Audio silahkan klik : https://youtu.be/2QslzsBag0k

Pengkenaina

Jadi sekalak pemimpin memang labo murah, erkiteken melala hal harus lit i bas diri sekalak pemimpin. Tapi guna jadi sekalak pemimpin Kristen si mehuli sue ras ogenta sendah labo hal si mustahil. Ertina sangat realistis guna iwujudken erkiteken Kesah Si Badia si mpengasup kita jadi sekalak pemimpin si mehuli sue ras peraten Dibata. Tema si seh man banta gundari akap kami memotivasi kerina serayan, baik pendeta, pertua ras diaken. I bas konteks gerejanta sendah, motivasi enda itujuken man kam kerina pertua diaken si enggo ndekah melayani bage pe calon-calon pertua diaken si mbaru.

Rikutken ogenta sendah, serayan si ngasup ngaturken dahin Dibata ibenaken alu kengasupen mimpin dirina sendiri, kenca si e, ngasup ia ngaturken jabuna. Kenca ngasup ia ngaturken dirina bage pa jabuna, tentu ngasup ia ngaturken dahin Dibata. Ngasup ia jadi pemimpin si mendampingi ras membimbing perpulungen gelah semakin dewasa i bas erkiniteken. Emaka i bas si e harus lit tekad i bas dirinta ipalasi alu toto si la erngadi-ngadi man Dibata gelah ipengasupNa kita jadi serayan-serayan si mehuli.

Ngataken bujur kita man Dibata erkiteken ratana kerina Runggun i belang-belang GBKP enda enggo ngelakoken pemilihen calon-calon Pertua-Diaken i bas sektorna masing-masing, janah enggo terpilih calon-calon serayan si iakap perpulungen lit i bas ia ketutusen i bas melayani. Iakap perpulungen i jenda tentuna enggo melalui proses notoken ise-ise saja si tutus melayani, baik si ndekah bage pe si mbaru. Kenca si e bengket kita ku proses pemilihen tingkat Runggun. Mari radu ras sitotoken ras sidukung dahin panitia pemilihan gelah proses enda pe banci erdalan alu mehuli. Terpilih pagi serayan-serayan GBKP si tutus alu karakter si mehuli bagi poin si pelimaken i datas. Dibata si mpengasup kam kerina Serayan Tuhan i bas GBKP si malem enda.