SUPLEMEN RENUNGEN PEKAN DOA GBKP TGL. 18 - 27 MEI 2023

KEBAKTIN PEKAN DOA GBKP TGL. 18 - 27 MEI 2023

Pdt. Larena br. Sinuhadji (Nd. ReyRapha Tarigan)

Tema Umum : ERTOTO KERNA RARASEN DIBATA (Masmur 122:1-9)

Liturgi Pekan Doa 2023 silahkan klik : https://drive.google.com/file/d/1Kmd7BOOYiaQ9qTTQN7WAC070wiqtsqF9/view?usp=share_link

WARI I MINGGU 21 MEI 2023

Khotbah : Masmur 122:1-9

Invocatio : Perb. Rasul 1:14

Tema : “Ertoto Kerna Rarasen Dibata” (Masmur 122:1-9)

Penaruh

Lit lagu Sekolah Minggu syairna ngatakenca “Berdoa t’rus sampai Tuhan datang, berdoa t’rus sampai Tuhan datang, berdoa, berdoa, berdoa haleluya, berdoa t’rus sampai Tuhan datang”. Lagu enda seri ras si itulisken Paulus man perpulungen i Tesalonika, “ertotolah katawari pe” (1 Tes. 5:17, TB - LAI, “Tetaplah berdoa”). Lagu ras kai si itulisken Paulus labo mabai kita terus-menerus ertoto 24 jam setiap wari piah dungna la lit nari waktu guna erdahin, erdakan, bersosialisasi, rsd. Tapi ras Dibata arus tetap terhubung ras si banci menghubungken manusia ras Dibata e me arah pertoton. Emaka Bapa Reformator Johanes Calvin ngatakenca “Doa adalah suatu penghubung antara manusia dengan Tuhan.” Arah ertoto pe nuduhkenca maka manusia tetap butuh Tuhan, sabab ia terbatas, la megegeh i bas ngalaken perbeben geluh enda, emaka arus terus-menerus mindo perkuah ateNa arah pertoton. Alu bage, hal utama ras pertama si arus tetap ilakoken kalak si tek e me ertoto. Emaka la lit istilah, “la sempat aku ertoto”, entah pe “la aku beluh ertoto.”

Mpebagesi Kata Dibata

Asum kita ipindo guna menyebutkan gelar sada ingan, i ja pasti kita ngatakenca “ue lit waktuku, meriah ukurku ku je”, ingan kai nge kira-kira jawabenndu? Banci jadi jawabenta beragam. Lit deba, bioskop, restauran, lapangan olah raga, kolam renang, Mall, entah ingan wisata i daerahta si menarik inganna, rsd. Apakah tempat ibadah masuk i bas kriteria i datas “meriah ukurta ku je” entah kebalikenna, kurang siakap riahna ku Gereja, ku ingan ibadahta, makana 40% denga ratana kalak ku Gereja. Tapi i bas perikop enda, ibenaken Pemasmur alu “Meriah kel ukurku tupung aku iiyahken kalak nina, “Ota kita lawes ku Rumah Tuhan” (terj. TB-LAI, “Aku bersukacita, ketika dikatakan orang kepadaku: "Mari kita pergi ke rumah TUHAN”).

Masmur enda termasuk Masmur Ziarah asum bangsa Israel lawes ku Jerusalem guna beribadah i bas telu perayaan mbelin si enggo iaturken man bangsa enda (Paskah, Pentakosta - roti la tama ragi, ras Wari Raya Sapo-sapo). Tentu saja i bas masa si nai, jiarah ku Jerusalem labo bagi si genduari si terkenal dengan istilah wisata rohani ku Holy Land. Undang-undang Tuhan jelas merentahkan bangsa Israel guna beribadah ku Rumah Tuhan si kelak itetapken i Jerusalem (Kel. 23:14-17; Ul. 16:1-17). Perentah enda ipalasi maka Tuhan si enggo mbebasken bangsa Israel ras terus mperdiateken kegeluhen bangsaNa. Emaka meriah kel ukur Pemasmur asum iiahken ku Rumah Tuhan, aminna pe nangkeng-nangkeng dalanna, sabab mbelin kel ulihna asum enggo jumpa ras Tuhan.

Penungkunenna engkai maka meriah kel ukur Pemasmur asum iiahken kalak ku Rumah Tuhan? Sabab i je me secara khusus bangsa Tuhan banci ngataken bujur man Tuhan (ay. 4, “ku je me kerina suku-suku Tuhan ngataken bujur man Tuhan, sue ras si iperentahkenNa”). Ada otoritas yang diberikan kepada keluarga Daud gelah banci ngerunggui bangsana alu bujur (ay. 5, “Sebab di sanalah ditaruh kursi-kursi pengadilan, kursi-kursi milik keluarga Daud”, bhs. Karo, “I jenda nari me raja-raja Israel, ngerunggui kerina rayatna”). Iarapken raja si enggo itetapken Tuhan ngasup memimpin alu adil ras bujur.

Keriahen ukur e iumputi alu notoken kota Jerusalem (ay. 6-9). Intina gelah Jerusalem dame (sejahtera). Sabab kesejahteraan kota Jerusalem menjadi tolok ukur kesejahteraan bangsa Israel. Dame i bas tembok Jerusalem, si banci iertiken kesejahteraan para imam si melayani Rumah Pertoton bage pe kesejahteraan raja ras keluargana. Janah Pemasmur pe ertoto gelah rayat pe ngenanami kedamen ras kesenangen. 

I bas invocationta, isuratken maka ajar-ajar Tuhan Yesus ras diberu-diberu si tetap setia melayani Yesus mulai Galilea nari bage pe kalak si enggo tek man Yesus patuh ndalanken perentah Yesus. Tetap kalak enda i Jerusalem nimai kerehen Kesah Si Badia. Tutus kalak enda kerina ertoto. 10 wari ertoto mulai Yesus keke i bas si mate nari (wari ke-40), seh nusurna Kesah Si Badia (wari ke-50).

Pengkenaina

Kai pesan firman Tuhan i bas wari pemena Pekan Doanta? Si pemena, lit keriahen ukur (sukacita) asum kita ku Rumah Pertoton, jumpa Dibata ras teman-temanta sada kiniteken guna muji ras menyembah Tuhan ras bersekutu. Adi lit denga i bas kita, bagi si mberat reh ku Rumah Pertoton, la menahang ukurna, berarti lit si perlu man pekenan i bas pertendinna. Sabab mulih kita bas Rumah Pertoton nari, tambah gegehta, tambah keriahen ukurta, ras reh teguhna persadanta sapih-sapih kita umat Tuhan.

Si peduaken, rikutken tema “Ertoto kerna rarasen Dibata” (tema umum dan tema hari ini), tanggung jawabta selaku rarasen Dibata (umat Tuhan) guna setia ras ertutus ate ertoto. Ertoto guna rarasen Dibata seri ertina ras doa syafaat, e me notoken kalak si deban, labo hanya dirinta. I bas Pustaka Si Badia mbue contoh-contoh tokoh si tetap setia ertoto. Musa, Raja Daud, Nehemia, Ester ertoto guna bangsa Israel. Job ertoto guna anak-anakna. Tuhan Yesus ertoto guna ajar-ajarNa, Perpulungen Tuhan notoken Paulus ras Silas asum kalak enda i bas penjara. Jakup mindo kerina pertua guna notoken perpulungenna si sakit. Intina, ada kuasa dalam doa subuk bagi si notokenca ras si itotoken. Jadi la lit nari istilah “la aku beluh ertoto”, entah pe “kita lalap man totoken sekali pe la pernah kita notoken teman”, “aku sekali nari”, tupung ipindoken ertoto i bas PJJ entah PA i Sektorta. Aturna alu semangat kita ngatakenca, “sekali enda aku si ertoto!”

Si peteluken, toto si ipenangkih kita toto si mehuli, bagi si ipenangkih Pemasmur. Ertoto guna bangsata, pemimpin-pemimpin bangsata, teman-temanta, kade-kadenta gelah geluh i bas dame sejahtera ras senang. Jadi labo toto si la mehuli (ban seret rejekina Tuhan, mate rempetlah anak ah ndai Tuhan sakit kel ukurku bana”, rsd). Toto si bage la perlu ipenangkih. Tuhan-lah si nampati kita setia ras ertutus ate guna ertoto. Dibata si masu-masu ras mpegegehi kita kerina.

WARI II SENIN 22 MEI 2023

Khotbah : 1 Samuel 14:47-52

Invocatio : 1 Tesalonika 1:3

Tema : “Jabu Si Tutus Ngelai”

Penaruh

Lit dua kata penting i bas tema wari peduaken Pekan Doanta, e me “jabu” ras “tutus”. Jabu e me unit terkecil i bas Gereja (perpulungen). E maka lit kata bijak ngatakenca, “keberhasilan satu masyarakat (society), harus diawali dari kesatuan dan keberhasilan di dalam keluarga-keluarga”. Dengan kata lain, keluarga merupakan modal dasar dan faktor dominan dalam pembangunan suatu bangsa. Segala sesuatunya dimulai dari keluarga. E maka adi ateta perpulungen e maju ras berkembang, ibenaken i bas jabu-jabu.

Kata si peduaken e me “tutus” (sungguh-sungguh). Ertina, la setengah hati tapi segenap hati, sungguh-sungguh. E maka rikutken bahan si peduaken Pekan Doanta iarapken keluarganta menjadi keluarga si tutus muat bagin i bas ngelai.

Mpebagesi Kata Dibata

Perikopta ibere judul “Kerajaan Saul ras keluargana” (TB-LAI: “Catatan tentang musuh-mush dan keluarga Saul”). Situhuna sope perikop si jadi bahan renungenta, enggo ibenaken alu pasal-pasal i ja Saul selaku raja Israel si pemena la nari patuh man Tuhan. Ps. 13:9-14 Saul nehken persembahen tutungen man Tuhan erkiteken ndekahsa akapna Imam Samuel la reh paksa si e. E maka nina Samuel, “la kam patuh man perentah Tuhan Dibatandu …”, erkiteken si e me maka Saul kedungenna ipengadi jadi raja. Iperangina atena bangsa Pilisti tanpa lebe atena nungkun Dibata. Sampai kedungenna ipersingeti imam, “Marilah sisungkun lebe Dibata” (1 Sam. 14:36).

Tetapi Pustaka Si Badia juga jujur mengungkapken sisi positif i bas kepemimpinen Saul e me naluken Raja-raja Moab, Amon, Edom, Pilistin ras Amalek (ay. 47-48). I japa pe ia erperang ia tetap menang. Memang teks labo tersurat ncidahken  kemenangen e erkiteken kiniersadan arih keluarga Saul, e me dukugeng penuh i bas ndehara ras anak-anakna si dilaki bage pe diberu. Tapi secara tersirat, maka kemenangen e la terlepas i bas dukungen arah keluargana. Anak-anak Saul jadi pendukung ndalanken pemerentahenna. Anak-anakna dilaki, anak-anakna diberu, ndeharana, puanglimana e me Abner si merupaken seninana sembuyak bapa. Duana kalak enda e me Saul ras Abner kempu Abiel. Bahkan taktik si ibahan Saul seh kel pentarna i bas mabai kemenangen man bangsa Israel. I ja adi ijumpaina kalak si mbisa entah merawa, minter ijadikenna jadi tenterana. Teptep kalak si mbisa labo ijadikenna lawan tapi irangkulna gelah jadi pasukenna. I jenda erlajar kita arah Saul si beluh merekrut jelma guna jadi pendukungna.

I bas invocationta, Paulus tuhu-tuhu mujiken perpulungen Tesalonika si tuhu-tuhu mendukung pelayanen Paulus. Jemaat merespon pelayanen si isehken Paulus alu respon si luar biasa, i ja icidahken perpulungen e kinitekenna arah perbahanen, latih erdahin guna nampati pelayanen Paulus erkiteken keleng atena, janah kuga tetapna ukurna erpengarapen man Tuhanta Yesus Kristus. E maka tetap Paulus ngataken bujur man Dibata ras tetap iingetna perpulungen e arah pertotonna. Banci siidah, maka labo lit iketen darah antara Paulus ras perpulungen tapi iketen persadan i bas Yesus Kristus si mpersadakenca.

Pengkenaina

Lit kata-kata bijak si ngatakenca, “Tidak ada keluarga yang sempurna. Terkadang kami berdebat, berkelahi, bahkan suatu waktu berhenti berbicara satu sama lain. Namun pada akhirnya, keluarga tetaplah keluarga di mana cinta akan selalu ada. Sehingga ketika persoalan datang menimpa, hanya keluarga yang dapat menerima kita apa adanya”.  Kata-kata bijak enda, mpersingeti kita gelah tetap memelihara keluarga si enggo ibereken Tuhan man banta. Kiniersadan keluarga la banci jadi bage-bage saja, tapi arus terus-menerus “ipupuki” alu saling mengasihi, saling mperdiateken, ngergai, bekerja sama, saling memuji (apresiasi), saling memaafkan, ras keluarga e arus nggeluh i bas kerembakken ras Tuhan. Sabab Tuhan si enggo mpersadaken keluarga e. Janah rikutken tema wari peduaken, “Jabu si tutus ngelai” bage pe Sasaren Pelayanen Tahun 2023 maka anggota keluarga asa bancina terlibat i bas pelayanen i tengah-tengah Gereja rikutken talenta masing-masing. Nande ikut Tim Padus, bapa sebage Pengurus Mamre, anak-anak ikut muat bagin i bas Kelas Baca Alkitab, rsd. Arah kiniersadan keluarga ras ketutusen ngelai i tengah-tengah Gereja maka keluarga e enggo menjadi berkat (pasu-pasu), dengan sendirina keberhasilen erkiteken dukungan keluarga, bahkan pergumulen si ialami anggota jabu pe ngasup ihadapi erkiteken kiniersadan ras dukungen keluarga.

Lit istilah peradatan bas kalak Karo, “Merga si lima, tutur si waluh, rakut si telu, perkaden-kaden si sepuluh dua tambah sada”. I bas peradaten kalak Karo, banci terjadi pengesahen sesekalak entah sekolompok si labo masuk bas perkade-kaden (hubungan keluarga) tapi enggo bagi keluarga. Teman meriah enggo lebihen bagi kelurganta erkiteken kiniulin ras kekelengen si isehkenna banta bage pe sebalikna. Ertina, i jenda kalak Karo sangat inklusif (terbuka). Maka selaku kalak si tek termasuk jabu arus kita terbuka membangun pertemanan, alu ngergaken kalak si deban. La pe lit hubungen dareh tapi banci jadi keluarganta. Arah si e, reh teremna kalak si banci menopang (mendukung) kegeluhen jabu subuk i bas suka ras duka. 

Sitotoken maka reh teremna perpulungen si terpanggil guna melayani i tengah-tengah GerejaNa. Bagi sicidahken Paulus man perpulungen Tesalonika, sangat luar biasa perhatian ras dukugen dingen kiniteken perpulungen Tesalonika. Arah pelayanen si maksimal, prima, siarapken perpulungen pe termotivasi guna reh semangatna melayani.

WARI III SELASA 23 MEI 2023

Khotbah : 1 Petrus 2:1-5

Invocatio : Kejadin 49:28

Tema : “Reh Dingen Mereken Diri Majekken Rumah Pertoton Kesah”

Penaruh

Tema tahun pelayanan GBKP 2023 ngajuk gelah kerina perpulungen, tanpa terkecuali, nggit ikut muat bagin i bas pelayanen i GBKP. Si sedekah enda hanya tercatat saja jadi anggota iarapken nggit ia reh ku bas kegiaten-kegiaten Gerejanta. Si sedekah enda hanya reh saja ku bas Kebaktin Minggu harus nggit ia muat bagin i bas salah sada bentuk pelayanen. Si sedekah enda hanya nggit ilayani nggit ia ikut aktif melayani si debanna. Tapi ugapa pe pengkondisian si ibahan guna kerina perpulungen nggit ikut muat bagin i bas pelayanen akap kami hanya berdampak sementara saja adi kin lenga tuhu-tuhu sigejapken keleng ate Tuhan Yesus i bas kegeluhen pribadi lepas pribadi.

Mpebagesi Kata Dibata

Firman Tuhan si jadi renungen i bas Pekan Doa wari si peteluken enda ibuat i bas 1 Petrus 2:1-5. Perpulungen kalak si tek (umumna labo kalak Yahudi) si merap marpar i wilayah Pontus, Galatia, Kapadokia, Asia, ras Bitinia, paksa si e sanga ngenanami kiniseran erkiteken pilihenna guna tek man Yesus Kristus. Kiniteken si mayoritas ras dominan paksa si e igelari “agama misteri”. Agama misteri enda melegalken perzinahan ras hedonisme. Melala jemaat i bas agama mayoritas nari pindah keyakinen ku Kristen sebab i bas kekristenan dem alu sikeleng-kelengen, lit i bas agama enda gaya hidup si mbaru, selain tentuna secara tegas menolak perzinahan ras hedonisme. I bas si e para pemimpin “agama misteri” ndai merasa terusik alu kehadiren agama Kristen enda sebab enggo semakin urak pengikutna, adi enggo semakin urak pengikutna, enggo pasti pengaruh ras finansial (sen masuk) pe semakin berkurang. Erkiteken si e makana ilakoken persekusi secara masif man kalak Kristen (bdk. 1 Pet. 2:11-12; 3:13-17; 4:3-4). 

Rasul Petrus mpegegehi perpulungen arah suratna. Secara khusus i bas ogenta sendah Rasul Petrus ngajuk gelah nadingken kerina si jahat (ay. 1), sebab rikutken perikop sebelumna ikataken Petrus maka perpulungen kalak si tek e me manusia si mbaru si tubuh arah Dibata nari (1 Pet. 1:23). Pedah enda isehken sebab mungkin paksa si e melala perpulungen si mbaru denga bengket ku bas agama Kristen janah kebiasaan i bas kiniteken si ndekah lenga banci itadingken. I bas si e Petrus ngajuk perpulungen gelah tutus erkiniteken man Yesus. I bas ay. 2 ipake Petrus gambaren anak-anak si mbaru tubuh si hanya susu saja si ikonsumsina, la lit si deban. Ertina jadikenlah Yesus Kristus satu-satunya sumber keselamatan, sebab situhuna enggo inanami perpulungen uga belinna keleng ate ras kiniulin Dibata (ay. 3).

I bas ay. 4 - 5, ipake Petrus gambaren batu khusus si enggo isikapken guna majekken sada bangunen. Batu khusus enda e me Yesus Kristus si itulak, la iergaken, seh makana inanamiNa kiniseran ras kematen i kayu persilang, tapi ipilih ras iergaken Dibata guna keselamaten manusia perdosa. Perpulungen kalak si tek pe bage, itulak ras la iergaken sekelewtna erkiteken kinitekenna man Yesus, tapi ipilih ras ipake Dibata guna majekken Rumah Pertoton Kesah (rumah rohani). Ay. 4 ras 5 imulai alu kata “dahilah” ras “rehlah”, ertina iajuk Petrus perpulungen gelah ngusih pengorbanen Kristus guna mewujudken keselamaten i tengah doni enda. Bage pe i bas perpulungen kalak si tek (Gereja), perpulugen iajuk proaktif mereke dirina sebage persembahen si ngena ate Dibata alu ketaaten ras ketutusen ngelakoken kerina peraten Dibata.

Invocatiota sendah nuriken kerna pedah Jakup man kerina anak-anakna si 12 suku Israel sope ia mate. Jakup nuriken kelebihen-kelebihen kerina anak-anakna janah ipasu-pasuna 12 suku Israel. I bas paksa gundari pasu-pasu Dibata labo terjeng man kalak Israel saja, tapi man kerina kalak si tek i belang-belang doni enda. Janah kerina kalak si tek man Dibata i bas Yesus Kristus enggo ibereken pemere-pemere Kesah guna membangun GerejaNa bage pe jadi pasu-pasu man sekelewetna.   

Pengkenaina

Tema i bas Pekan Doa wari si peteluken enda e me “Reh dingen mereken diri majekken Rumah Pertoton Kesah”. Si iarapken arah temata sendah, si pemena lebe e me kesadaren i bas dirinta selaku kalak Kristen si enggo ngaloken keselamaten i bas Yesus Kristus. Melala motivasi entah pe niat i bas kita nggit jadi anggota GBKP. Mungkin erkiteken lit je budaya Karo. Mungkin erkiteken enterem je kade-kade. Mungkin erkiteken tubuh nari orang tuata enggo jadi serayan GBKP. Mungkin perban i bas GBKP lit diakoniana, rsd. Adi e si terjadi maka labo heran adi melala kita si lenga nandai Yesus Kristus ras itehna iman Kristen. Seri bagi teks khotbahta sendah, enterem denga perpulungen kalak si tek i bas jaman Rasul Petrus si lenga itandaina Yesus Kristus secara pribadi. I bas kesempaten enda mulihi kita isingetken, marilah kita siajar-ajaren, saling mengingatkan, khususna man teman-temanta anggota si deban si sedekah enda hanya menjadi anggota non-aktif, hanya tercatat saja i bas database tapi la pernah idah i bas kegiaten kai pe i bas Gerejanta. Lit tanggung jawabta selaku anggota GBKP, lit tanggung jawabta selaku kalak si enggo ngaloken keselamaten i bas Yesus Kristus.

Si peduaken, iajuk kita gelah semakin proaktif i bas pelayanen. Militansi i bas pelayanen palasna e me kesadaren kerna identitasta selaku kalak si enggo ngaloken keselamaten i bas Yesus Kristus. Sekalak si militan i bas pelayanen labo nari man iahenken ras man endiken, sebab enggo lit inisiatif i bas ia guna mereken si terbaik man Dibata i bas pelayanen i GBKP. Lit vitalitas i bas ia melayani amin pe melala je masalah entah pe perbeben, kerinana banci sikelola alu mehuli. Vitalitas (energy, booster) e idatken arah hubungen si ndeher ras Dibata. Relasi si ndeher ras Dibata terjalin i bas ketutusen (konsistensi) ertoto ras erlajar Kata Dibata.

Si peteluken, i bas kesempaten enda mulihi kita isingetken kerna ketutusen (konsistensi) i bas kita ertoto, menjalin relasi si mehuli ras Dibata. Ertoto man Dibata e me tandana maka kita mengakui kelemahenta sebage manusia. I bas si e, arah pertotonta sipindo rusur gegeh i bas Dibata nari gelah ipengasupNa kita ngelakoken si mehuli sue ras peraten Dibata. I bas pertotonta si kontinyu ras konsisten, secara tanpa isedari, enggo terbangun i bas dirinta Rumah Pertoton Kesah si jadi palas i bas kita membangun Gerejanta. Dibata si masu-masu ras mpegegehi kita kerina.

WARI IV RABU 24 MEI 2023

Khotbah : Keluaren 2:1-10

Invocatio : Roma 12:16

Tema : “Ersada Guna Nehi Sura-sura Dibata”

Penaruh

Masyarakat Indonesia dikenal alu budaya gotong-royong saling tolong-menolong. E maka ratana i bas suku-suku si lit i negaranta enda lit kearifan lokal si berkaiten ras gotong-royong saling tolong-menolong enda. Tapi si unik i bas budayanta enda, gotong-royong saling tolong-menolong labo terjeng i bas hal-hal si mehuli saja, i bas si la mehuli pe ilakoken alu gotong-royong saling tolong-menolong. E maka lit istilah “korupsi berjamaah” (termasuk je TPPU, gratifikasi, suap-menyuap, rsd.), “pesta narkoba”, “tawuran antar desa”, rsd., ersada arihna guna ngelakoken si la mehuli. I bas si e tentuna la man usihen.

I bas Pekan Doanta wari si peempatken enda, radu ras kita merenungken kerna kiniersadaan arih i bas kita mewujudkan sura-sura Dibata i tengah-tengah doni, khususna i bas Gerejanta.

Mpebagesi Kata Dibata

Teks khotbahta nuriken kerna ketubuhen Musa. Judul perikop i bas Alkitab TB-LAI nari akap kami lebih cocok e me “Musa lahir dan diselamatkan”. Penyelamaten Musa e me sura-sura Dibata guna nehi maksudNa nyelamatken Bangsa Israel i bas perbudaken Mesir nari. Tapi i bas prosesna, ipake Dibata piga-piga kalak si nggit sisampat-sampaten (bekerja sama) guna nehi sura-sura Dibata.

Konteks perikop enda e me situasi si genting (menakutkan dan mencemaskan) si ialami kerina kalak Israel erkiteken kebijakan-kebijakan Raja Mesir si menindas bangsa Israel, salah sadana e me perintah guna munuh kerina anak dilaki kalak Israel (bdk. Kel. 1:20). I bas suasana si bagenda rupana, tubuh sekalak anak dilaki i bas keluarga kalak Lewi nari si tergelar Amram ras Johebet (bdk. Kel. 6:20) si igelari Musa. Kenca enggo 3 bulan lanai terbuniken orang tuana Musa ndai, emaka ibahan sada cara gelah bayi Musa enda selamat. Ibahan Johebet sada keranjang i bas batang rengo nari, jenari ilapisina alu damar gelah ula tembus lau. Itamakenna bayi Musa ndai ku bas keranjang e janah icibalkenna i tengah-tengah dukut si mbages i tepi Lau Nil. I jenda teridah maka Amram ras Johebet nggit ipake Dibata guna nyelamatken Musa calon pembebas bangsa Israel.

Selanjutna, kalak si nggit ipake Dibata guna nyelamatken Musa e me Miriam turang Musa si paksa si e usia remaja denga. Si ilakoken Miriam e me njagai bayi Musa dauh-dauh nari. I bas ay. 7 beluh ka Miriam ngerana man puteri raja si erbahanca Musa la nari ibuniken janah banci ipepinem ras ipekena-kena nandena seh cukup umurna. Labo terjeng je saja, ibereken puteri raja upah man Johebet nande Musa. Ertina i bas kininggiten Miriam, iperlengkapi Dibata ia seh makana tutus ia njagai turangna bahkan beluh ia ngerana man puteri raja.

Tokoh si deban i bas turi-turin enda e me Puteri Raja Mesir si la tersinget gelarna. Nggit ia ngaloken kalak Jahudi si paksa si e sanga itindas Raja Mesir. Mekuah ate puteri raja kenca enggo iidahna bayi Musa tangis. Dibata si mpeturah belas kasihan i bas diri puteri raja, janah nggit ia ngaloken kalak Jahudi jadi anak angkatna. Erkiteken peran kalak enda kerina, seh sura-sura Dibata i bas nyelamatken bangsa Israel ndarat i Mesir nari ipimpin Musa.

I bas invocatiota pe Rasul Paulus ngajuk perpulungen i Roma gelah ngambekken biak-biak egois, meganjang ukur, ia si hebatna akapna bana, menganggap rendah kalak si musil ras kedudukenna lit i teruhna. Emaka i bas si e, ngajuk Rasul Paulus gelah perpulungen mperdiateken keperlun kalak si deban, meteruk ukur, ras nggit erteman ras kerina kalangan. Gelah i bas si e kerina seh sura-sura Dibata i bas erkeleng ate man Dibata bage pe erkeleng ate man sapih-sapih perpulungen bage pe man kerina kalak.

Pengkenaina

Tema i bas Pekan Doa wari si peempatken enda “Ersada guna nehi sura-sura Dibata”. Rikutken amanat agung Mat. 28:19-20, kerina kalak si tek dat tugas guna erBerita Si Meriah. Tugas enda banci siertiken ibereken secara pribadi bage pe secara komunal entah pe bersama-sama. Bage pe i bas tritugas Gereja, bersekutu, bersaksi ras melayani lit dimensi personal bage pe komunal. I bas aspek komunal enda tentuna harus lit kiniersadaan. Tapi sope si e tentuna kerina sura-sura Dibata enda harus leben ipahami ras ihayati secara personal. Adi enggo tuhu-tuhu sigejapken keleng ate Dibata i bas geluhta secara pribadi biasana turah inisiatif guna nggit ersada ras si deban guna nehi sura-sura Dibata.

I bas teks khotbahta sendah, yakin kami maka enggo leben igejapken Amram, Johebet ras Miriam keleng ate Dibata i bas kegeluhenna amin pe paksa si e keluarga enda lit i bas kinseran. Emaka nggit keluarga enda ipake Dibta guna nyelamatken Musa. Nggit keluarga enda ersada, saling bekerja sama, i bas nehi sura-sura Dibata. Bage pe i bas invocatiota isingetken mulihi harus lit i bas kalak si tek karakter mediate, meteruk ukur, ras nggit erteman ras kerina kalangen. Gelah i bas si e kerina perpulungen banci ipake Dibata guna nehi sura-suraNa i tengah-tengah doni enda.

Emaka i bas kesempaten enda mari radu ras kita ertekad, nggit kita ersada saling bekerja sama i bas perpulungen gelah sura-sura Dibata banci terwujud i tengah doni enda. Gelar Tuhan imuliaken arah kerehen kita secara pribadi bage pe secara komunal i bas Gerejanta masing-masing.

WARI V KAMIS 25 MEI 2023

Khotbah : 2 Korinti 1:8-11

Invocatio : Kolose 3:23

Tema : “Nampati Alu Pertoton”

Penaruh

I bas Alkitab TB-LAI lit 307 kata “doa”, ertina berdoa entah pe ertoto e me salah sada kata si penting i bas Pustaka Si Badia. I bas Pustaka Si Badia, ertoto labo terjeng itujuken guna keperlunta pribadi tapi ertoto pe itujuken guna kiniulin kalak si deban. Ertina i bas kita nampati kalak salah sada carana banci melalui pertotonta.

Mpebagesi Kata Dibata

Bahan renungenta i bas Pekan Doa wari si pelimaken enda ibuat i bas surat Rasul Paulus man Perp. Korinti si peduaken i teruh judul perikop “Paulus ngataken bujur kenca kiniseran”. Erbage-bage kiniseran si mberat inanami umumna kalak Kristen paksa Rasul Paulus nulisken suratna enda erkiteken kinitekenna man Yesus Kristus. Paulus pe nuriken pengalamen kiniseran si ialamina raduken ras Timotius bage pe kerina kalak si tek si lit i Propinsi Asia. Kiniseran si ialamina tuhu-tuhu luar biasa, i bas ay. 10 ikataken Paulus maka enggo inanamina erbage-bage ancamen kematen si ngeri nari. Ertina enggo piga-piga kali inanami Paulus pengalamen kinseran si mberatna kel, antara hidup dan mati. Kenca enggo ibentasi pengalamen si mberat e, ngataken bujur Paulus man Dibata i bas telu hal.

Si pemena, ngataken bujur Paulus man Dibata erkiteken ibereken kesempaten guna ngenanami kiniseran Kristus. I bas ay. 5 ikataken Paulus, “Bali ras kiniseran Kristus sampur man kami”. I bas terj. BIMK lebih jelas nina, “Penderitaan-penderitaan yang dialami oleh Kristus sudah banyak kami alami juga”. Sada kemegahen man Paulus banci ngenanami kiniseran si ialami Kristus. Si peduaken, ngataken bujur Paulus man Dibata erkiteken kiniseran e labo erbahanca Paulus kote ras menyerah, justru sebalikna, nina, “bage me pe sampur ka pengapul Dibata ialoken kami arah Kristus”. I bas terj. BIMK nina, “Dan melalui Kristus pula, batin kami sangat dikuatkan”. I bas gegeh si ialoken arah Dibata nari, ngasup Paulus mentasi kerina kiniseran si mberat. Janah ibereken Dibata kesempaten denga ka guna mpegegehi ras ngapuli perpulungen kalak si tek i Korinti (ay. 6-7). Si peteluken, ngataken bujur Paulus man Dibata erkiteken lit kepedulian ras dukungen arah perpulungen-perpulungen kalak si tek paksa si e. Khususna i bas ogenta sendah, ngataken bujur Paulus man perpulungen kalak si tek i Korinti erkiteken enggo isampatina Paulus alu pertoton. Tek Paulus lit kuasa i bas ertoto (ay. 11).

Invocationta e me pengajuk Rasul Paulus man perpulungen kalak si tek i Kolose gelah kai pe si ibahan, dahikenlah alu tutus, tempa-tempa kam erdahin guna Tuhan, labo guna manusia. Ertina i bas kita sisampat-sampaten, termasuk i bas kita ertoto ras notoken si deban pe, dahikenlah alu tutus, tempa-tempa guna Tuhan, gelah hasilna pe banci maksimal guna kemulian gelar Tuhan.

Pengkenaina

Tema si seh man banta i bas wari si pelimaken enda e me “Nampati alu pertoton”. Ngingetken kita mulihi maka ertoto e labo terjeng guna keperlunta secara pribadi, tapi lit pe i je tanggung jawabta guna notoken hal-hal si deban selain dirinta entah pe keluarganta. Salah sadana e me kepedulianta nandangi ngenanami erbage-bage perbeben ras kinseran. I bas kita sisampat-sampaten alu hal-hal si sifatna materi, isingetken ka kita maka sisampat-sampaten e banci ilakoken alu pertotonta. Bahkan banci ikataken maka nampati alu pertoton em si utamana.

E maka mari radu ras sitingkatken kepedulianta nandangi kalak si deban, khusuna, man teman-temanta si sada kiniteken, bagi ogenta sendah i ja Paulus ras perpulungen kalak si tek saling mendoakan. Proaktif kita nungkun man teman-temanta sada perpulungen, pergumulen kai saja si banci isampati alu pertoton, gelah banci masuk ku bas topik doa syafaatta. Janah i bas si e kerina, ertotolah kita alu tutus, labo terjeng guna kiniulin dirinta tapi pe guna kiniulin kalak si deban. Dibata si mpegegehi kita guna nampati kalak si deban alu pertotonta.

WARI VI JUMAT 26 MEI 2023

Khotbah : Perb. Rasul 28:1-10

Invocatio : Kejadin 20:17b

Tema : “Pertoton Si Jadi Pasu-pasu Man Kalak Si Deban”

Penaruh

“Kita diberkati Tuhan supaya hidup kita juga menjadi berkat bagi banyak orang.” Bage rusur sibegi pernyataan guna memotivasi kita jadi pasu-pasu man kalak si deban. Ertina bas kegeluhenta sekecil apapun dampaknya banci jadi pasu-pasu (berkat) man kalak si deban. Entah kita pemimpin, kalak erpangkat, entah kalak si sederhana sekali pe, situhuna banci kita jadi berkat. Banci kita jadi berkat alu pengerananta si memotivasi, mpegegehi kalak si deban. Banci ka kita jadi berkat arah tenaga entah perukurenta, i ja lit ide-ide si mehuli ras membangun si banci nampati kalak si deban. Banci ka kita jadi berkat arah perbahanenta si mehuli, arah materi si lit bas kita guna mpenahangi beban kalak. Dingen banci ka kita jadi berkat arah pertotonta. Ertina kerina kita situhuna banci jadi berkat man kalak si deban. Labo lit alasen guna kita la jadi berkat man kalak si deban. Sebab rusur sibegi, “aku la lit pemereku guna nampati kade-kadengku si susah.” Siakap jadi pasu-pasu e hanya melalui materi ngenca.

I bas Pekan Doa wari peenamken enda siusih Paulus ras Abraham si ipake Tuhan jadi pasu-pasu man kalak si deban arah pertotonna.

Mpebagesi Kata Dibata

Judul perikop enda “Paulus i Pulau Malta.” I bas dungna Pekabaren Injil si peteluken, berkat Paulus ku Jerusalem. Kerehen Paulus e ipake pemimpin agama Jahudi guna nangkap ras munuh Paulus. Alu proses ras tahap si cukup ndekah (dua tahun i Kesarea) kendungenna Paulus mindo naik banding ku Roma, gelah perkarana iputusken i Roma. E maka ibaba me Paulus rikut tahanen si deban ku Roma alu naik kapal dingen ikawal Pasuken Kaisar. Kepeken kapal si itumpangi kalak enda gedap erkiteken cuaca buruk dingen rembus angin Timur Laut. Kedungenna kalak enda terdampar i sada pulau si tergelar Malta. Banci ikataken arah pengalamen si ialami Paulus, kondisi entah situasi si buruk banci ipake guna naksiken kuasa ras keleng ate Tuhan. Ituriken Paulus maka kerina anak dusun si ngiani pulau e mehuli kerina man Paulus ras kerina rombongen si bas kapal nari. Janah selama telu bulan kalak enda i Pulau Malta, lit dua peristiwa si mbelin i ja Paulus banci naksiken kuasa Tuhan.

Si pemena, asum Paulus pegara api erkiteken mbergeh paksa si e. Asum ipepulung Paulus ranting sada mberkis janah asum itamakenna ku bas api, ndarat sada nipe upar i bas ranting e nari sabab melas iakapna ras itagutna tan Paulus. Ngidah kejadin e, nina si ngiani pulau e sapih-sapih ia, “Kalak si itagut nipe uga pe kalak pemunuh. Sabab enggo pe ia selamat i bas lawit nari la ka bo ipelepas Dewi Keadilen nggeluh.” Kupisken Paulus nipe e ku bas api. Janah rikutken pengakap kalak e ugapa pe besar nge kerina daging Paulus entah pe minter mate. Tapi kenca ndekah itimaina maka la kaden pe Paulus. E maka dungna erkusur ukurna, nina, “Ia sekalak dewa kap.”

Si peduaken, la ndauhsa i bas ingan e nari lit sada juma, pengulu pulau e empuna, gelarna Publius. Ialo-alona Paulus ras rombongen alu mehuli janah telu wari dekahna iberena man i bas rumahna e. Paksa si e bapa Publius ampar i bas ingan medem, sebab panas dingen mesui beltekna. E maka idahi Paulus ia ku bas kamarna. Ertoto Paulus man Dibata janah itamakanena tanna ku babo si sakit, e maka malem iakapna. Kenca si e rehen kerina kalak si sakit i bas pulau e ndahi Paulus. Kerina ipepalem Paulus. Banci siidah i jenda Dibata make Paulus lako mpepalem kerina kalak si sakit e. Erkiteken si e, melala pemere ras penampat iberken kalak Pulau Malta man Paulus ras rombongen tupung ia tading i je bage pe muatna lawes nerusken erlayar.

I bas invocationta siidah Abaraham ertoto guna Abimelek ras kerina diberu si lit i Istana Abimelek. Kenca miser Abraham i Mamre nari, maka ringan ia i Gerar bagi kalak tandang. Ikatakenna maka Sara e turangna, e maka Raja Gerar si tergelar Abimelek nuruh kalak ngelegi Sara man bana. Kepeken i bas berngina Dibata ncidahken dirina man Abimelek i bas nipi, nina, “Mate me kam erkiteken ibuatndu diberu enda, sabab i enggo erjabu.” Situhuna labo salah Abimelek, sabab memang Abraham sendiri ngatakenca maka Sara e me turangna. Lampas pepagina ilebuh Abimelek Abraham guna mindo penjelasen ras ngulihken ndeharana Sara man bana. Ikataken Abraham maka mbiar ia ibunuh adi ikatakenna Sara ndeharana. La pe memang Sara e turangna, sada bapa lain nande. Rikutken kejadin si jadi i bas Sarea, kerina diberu si lit bas istana Abimelek lanai banci mupus ibahan Tuhan. Emaka ertoto Abraham kerna Abimelek emaka ipepalem Dibata ia. Bage pe ndehara Abimelek ras budakna si diberu ipepalemna kerina janah enggo ka banci mupus.

Pengkenaina

Kai pesan firman Tuhan i bas Pekan Doanta wari si peenamken enda? Si pemena, ise pe alu la erdobahen banci ipake Tuhan jadi pasu-pasu man kalak si deban arah pertoton. Syaratna nggit. Rikutken bahan i bas wari enda, siidah maka Paulus ras Abraham enggo jadi pasu-pasu man kalak si deban. I bas kesuliten, perbeben ibereken Tuhan kesempaten man Paulus jadi pasu-pasu man kalak i Pulau Malta si lenga tandaina Dibata i bas Yesus Kristus. Adi i bas susahta e pe ipengasup Dibata kita jadi pasu-pasu man kalak si deban, tentu terlebih pe i bas situasi si senang. Bage pe Abraham arah pertotonna jadi pasu-pasu man keluarga Abimelek raja i Gerar ras kerina diberu si bas istanana. Arah Kata Dibata i bas wari enda, lanai lit alasen maka la kita ngasup jadi pasu-pasu man kalak si deban. Erbage usur sibelasken, “la lit senku, la lit pemetehku, aku enggo metua la nari banci aku jadi pasu-pasu”, rsd. Kalak si enggo metua pe umpamana Nini Karo/Tigan, entah bulang banci ia ertoto rumah nari man anak-anakta, kela/permainna, kempuna, man perpulungen, man Serayan Tuhan. La pe lit pemetehta, entah kinibayakenta, banci kita jadi berkat arah pertotonta. Lit temanta sakit, entah si lit pergumulenna, ikut kita mendukung i bas toto.

Si peduaken, bagi Paulus la ia ertoto man Bapa Publius ngenca pengulu Pulau Malta, tapi pe man kerina kalak si sakit i je. Abraham pe labo ertoto man Raja Abimelek ngenca tapi pe man kerina si erdahin bas istanana. Kita pe bage. La man kalak hebat, bayak, pejabat ras erpangkat, entah kade-kadenta ngenca kita ertoto. Tapi man ise pe, termasuk kalak si susah, si kurang ekonomina.

Si peteluken, arus ilitken Tim Doa i bas Runggun, ras adi kita terpanggil masuklah kita jadi Tim Doa. Syaratna konsisten ras setia. Labo soal beluh entah lang kita ertoto. Sebab palas totonta e me kinitekenta man Tuhan, labo rangkaian kata-kata si mejile. Dibata si masu-masu kita kerina.

WARI VII SABTU 27 MEI 2023

Khotbah : Roma 12:4-8

Invocatio : Masmur 25:3-4

Tema : “Sada Kula I Bas Persadan Ras Kristus”

Penaruh

I bas wari si terakhir Pekan Doanta ngerana kerna persadan, ras enda seh kel pentingna. Sabab adi enteguh persadanta subuk i tengah keluarga, i tengah-tengah perpulungen, ngasup kita ngalaken erbage tantangen. Maka lit pepatah si ngatakenca “Bersatu kita teguh, bercerai kita runtuh”. 

I bas ncidahken kerna kiniersadan i bas perpulungen Paulus memakai gambaren “kula” (badan, tubuh), “sada kula”. Enda gambaren si seh kel tepatna. Sebab i bas kulanta enda, mbue anggota tubuh si pelain-lain bentuk ras fungsina, tapi kerina saling terkait, tidak bisa berdiri sendiri. Umpamana, man ateta, labo hanya mulut ras gigi si berfungsi, tapi tan, mata, nahe erdalan muat alat-alat si ibutuhken. Bage me pe kerna kula ni Kristus (Gereja). I bas kula ni Kristus e, enterem jelma, karakter si berbeda, talenta, gegeh ekonomi, tingkat pendidikan, hobi, rsd. Gereja akan maju ras terus berkembang asum banci saling bekerja sama, bersinergi, saling melengkapi ras lit kerendahan hati untuk saling memberi kelebihan ras saling menerima kekurangan entah pe kelebihen kalak si deban.

Mpebagesi Kata Dibata

Secara umum surat Roma e me surat perkenalen Paulus man perpulungen i Roma erkiteken perpulungen enda labo Paulus si mantekisa. Melala ka si ngatakenca maka surat Roma enda merupakan ringkasen teologis Rasul Paulus kerna Injil Kristus. Bindu 12 banci ikataken merupaken uraian aplikatif kenca Paulus enggo nerangken dasar-dasar teologis kerna keselamaten i bas Kristus i bas pasal-pasal sebelumna. I jenda Paulus ngerana kerna kengasupen si pelain-lain si enggo ibereken Dibata man perpulungen rikutken lias ateNa si fungsina guna membangun kula ni Kristus.

I bas ogenta ituriken Rasul Paulus, melala kharisma (karunia) si enggo ibereken Dibata man perpulungen, e me ernubuat, nampati kalak, ngajar, mpetetap ukur kalak, mere man kalak si deban, mimpin, ras ncidahken perkuah ate man kalak si deban. Kerina kengasupen si pelain-lain e arus ipergunaken guna membangun kula ni Kristus (ay. 4, “janah kerina ring-ring e lit gunana”; ay. 6, “sipergunakenlah kengasupen si pelain-lain e si enggo ibereken Dibata man banta rikutken lias atena”). Ertina, karunia si enggo ibereken Dibata arus ipergunaken, la banci ipendam, la banci isiniken, la banci iabaiken. Ras kerina karunia e ipergunaken alu palas sikeleng-kelengen, mehuli dingen maksimal - tutus (adi man banta ibereken Dibata kengasupen ernubuat, silakokenlah sue ras ajaren kinitekenta, kalak si ngasup mere man kalak si deban arus iberekenna alu ukur menahang, kalak si lit kengasupenna jadi pemimpin arus ia tutus erdahin, kalak si ngasup ncidahken perkuah ate man kalak arus ibahanna alu ukur meriah, rsd.). Ertina, la banci makeken talentanta alu setengah hati terlebih berat hati tapi alu ukur si menahang ras maksimal mpegunakenca.

Gelah tetap banci ersada, ring-ring entah karunia si pelain ndai labo banci ibanding-bandingken (ojo dibanding-bandingke) sabab masing-masing berbeda ras memiliki fungsi si berbeda. Tapi si menarik tep-tep ring saling terkait, saling membutuhkan ras labo lit kesirangen ras ring-ring si deban. Kerina saling melengkapi ras banci bersinergi.

I bas teks enda lit pitu pemere (karunia) si ituriken Paulus si ibereken Dibata man perpulungen. Tentu labo si pitu enda saja, melala denga kengasupen si deban si ibereken Dibata man perpulungen gelah ipake guna membangun perpulungen i bas konteks jamanna.

Ogen i bas invocatio nuriken kerna “Perpulungen si tutus ertoto” (“Orang saleh berdoa”). I bas ayat enda Pemasmur ngelumbakenca man perpulungen gelah tetap tutus ertoto tupung lit kiniseran nderpa kegeluhenna. Arah ketutusenna ertoto ngasup ia ngalaken perbeben, bahkan banci jadi isilahken Tuhan adi reh pe galumbang kesusahen, la seh man bana. E maka penting kel i jenda kerna ketutusen ertoto, kesungguhan. La hanya biberta si kemuit, ngerana man Tuhan, tapi arah pertotonta ipalasi alu kiniteken, pusuh ukurta siangkatken man Tuhan ras tek kita, la banci monce-once ukurna. Kalak si bage ertupang ukurna; la ngasup ia muat keputusen i bas kerina si ibahanna. E maka la pada iarapkenna ndatken kai pe i bas Tuhan nari (bdk. Jakub 1:6-7).

Pengkenaina

Kai pesan firman Tuhan man banta i bas Pekan Doanta berngi si terakhir enda? Si pemena lebe, i bas Gereja enda la banci one (wo)man show tapi unity show. La banci sada kalak ia kerina si ndahiken dahin pelayanen. Selain labo mejile erkiteken la melibatken enterem kalak, man bana sendiri pe tentu sangat melelahkan, bahkan enggo siakap Gereja e ia si mpunasa. E maka penting kel i jenda lebe kesadaren maka enggo ibereken Tuhan man banta karunia (talenta) pribadi lepas pribadi ras arus sipakeken guna membangun kula ni Kristus.

Si peduaken, arus banci kita bekerja sama rikutken karunia si pelain si enggo ibereken Tuhan banta. Kembangken biak meteruk ukur, saling melengkapi, ula pertewas, nggit kita ngaloken kelebihen ras kekurangen teman (teamna). I ja kekurangen teman banci ikuhina ras kelebihen teman banci iergaina. E maka Tim-tim si enggo lit bas Gerejanta: Tim Multimedia, Tim Singers, Tim Musik, Tim Doa, Tim PRT, Tim Ibadah, Tim Pembacaan Alkitab, rsd, melayanilah alu tutus guna kemulian Tuhan ras membangun perpulungenta.

Si peteluken, sibangun kebiasaan ertoto nandangi kerina perpulungen, sitotoken alu tutus, janah kita pe erusaha gelah nggeluh alu tutus, bujur gelah pertotonta megegeh, ibegiken Dibata, janah ibereken Dibata si mehuli arah pertotonta. Khususna adi lit temanta sanga i bas kiniseran entah galumbang kesusahen ula lupa kita notokenca gelah kiniseranna iangkatken Dibata.

Kristus enggo mpersadaken kita arah kematenNa i kayu persilang. Ula sisia-siaken pengorbanen Kristus. E maka tetap sijaga persadanta arah tetap kita nggeluh sikeleng-kelengen dingen makeken kengasupenta guna ngelai teman-temanta si deban.