Pdt. Larena br. Sinuhadji (Nd. ReyRapha Tarigan)
Teks : Lukas 10:1-12
Tema : IUTUS GUNA ERBERITA
Tujun : Gelah Mamre :
- Ngidah uga Yesus nuruh ajar-ajarNa ras cara er-Berita Si Meriah
- Nggejapken maka Mamre idilo ras isuruh guna er-Berita Si Meriah man anggota Mamre si enggo ndekah la reh ku perpulungen
Penaruh
Rikutken Amanat Agung i bas Matius 28:19-20, kerina kalak si tek man Dibata i bas Yesus Kristus iutus guna er-Berita Si Meriah. Kenca enggo enterem kalak si tek pajek me Gereja. Kenca peristiwa Pentakosta (nusurna Kesah Si Badia) berita keselamaten enggo ipembarken ku kerina bangsa. Secara khusus ngataken bujur kita man Dibata erkiteken enggo igerakkenNa lembaga pekabaran Injil Belanda nari guna berkat ku tengah-tengah masyarakat Karo er-Berita Si Meriah 133 tahun si lepas. GBKP secara kelembagaan pe tetap ngelakoken tugas er-Berita Si Meriah i bas Tritugas Gereja, koinonia (bersekutu), marturia (bersaksi), ras diakonia (melayani).
Mpebagesi Kata Dibata
Ogenta sendah lit kaitenna ras bindu 9, khususna i bas perikop Yesus ngutus 12 ajar-ajarNa, Yesus mere man 5 ribu kalak, ras perikop si nuriken kerna syarat ngikutken Yesus. Turi-turin i bas bindu 9 ndai ncidahkenca maka reh enteremna kalak si ngikutken Yesus, sementara jumlah ajar-ajarNa sangat terbatas. Erkiteken si e, i bas bindu 10 si jadi ogenta sendah, iutus Yesus 70 kalak ajar-ajarNa guna nampati pelayanen, e me ngelebei Yesus ku kerina ingan si ate Yesus idahiNa ras meritaken maka kinirajan Dibata enggo ndeher.
70 ajar-ajar i bas ay. 1 e me penambahen 12 ajar-ajar si enggo leben iutus Yesus. Rikutken tafsiren Dr. Martin Harun (2001; hlm. 117) 70 e me simbol entah pe lambang 70 gelar suku bangsa si ituriken i bas Kej. 10. I bas si e banci iertiken maka 70 ajar-ajar e iutus ku kerina bangsa labo terjeng bangsa Israel saja. I bas tafsiren Lembaga Alkitab Indonesia (2005; hlm. 343), 70 mengacu ku 70 tua-tua Israel i bas Kel. 24:1 ras Bil. 11:16. I bas si e banci iertiken Yesus ngutus 70 kalak pemimpin (dilaki ras diberu) guna meritaken ras mereken teladan i bas mewujudnyataken nilai-nilai kinirajan Dibata. Selanjutna 70 ajar-ajar e ndai isuruh dua-dua sendalanen. Isuruh dua-dua e ncidahken praktek misi Gereja Perdana (Perb. Rasul 8:14; 13:1; 15:32,40) i ja dua utusen e banci saling mendukung ras jadi saksi si menguatken bagi si tersurat i bas Ul. 19:15.
Ay. 2 nuriken kerna pentingna penambahen ajar-ajar si iutus Yesus. Si menarik i jenda ikataken Yesus, “Dage ertotolah man si Mada peranin e gelah isuruhNa si erdahin guna mperanisa.” I bas terjemahen BIMK nina, “Sebab itu mintalah kepada Pemilik ladang supaya IA mengirimkan pekerja untuk menuai hasil tanamanNya.” Banci iertiken maka dahin meritaken Berita Si Meriah e me dahin Dibata, janah subjek si jadi sasaren erberita e pe sikerajangen Dibata. Emaka i bas kita erberita harus leben sitotoken. Pindolah man Dibata i bas pertotonta gegeh, kengasupen ras kepentaren i bas er-Berita Si Meriah.
Ay. 3, Yesus mpersingeti ajar-ajarNa maka i bas ndahiken dahin erberita melala bahaya ras ancamen bagi si ialami Yesus i bas Luk. 9:22,44. I bas bahaya ras ancamen e la lit pedah-pedah Yesus man ajar-ajar e gelah cerdik ras lemah lembut bagi si tersurat i bas Mat. 10:16, janah la lit janji ikepkep Dibata bagi si tersurat i bas Yoh. 10:10-28. I bas ogenta sendah si jadi tekanen e me kinipangen (keberanian) ajar-ajar i bas ngadapi bahaya ras ancamen erpalasken gegeh si ibereken Kesah Si Badia (bdk. Perb. Rasul 4:29; Luk. 12:12).
Ay. 4 ncidahkenca skala prioritas si harus ilakoken ajar-ajar. I bas si e, seh ku ingan si ituju janah erberita kerna kinirajan Dibata harus jadi prioritas utama. I bas hal si deban, Yesus ngajarken man ajar-ajarNa gelah tek nandangi pemeliharaan Dibata.
 |
| Versi Audio Silahkan Klik : https://www.youtube.com/watch?v=uyrWejsD4IE |
Ay. 5-7 e me pedah Yesus man ajar-ajarNa gelah leben ngataken salam dame man isi jabu sope bengket ku bas sada rumah. Rumah entah pe jabu jadi tujun pemena i bas nehken berita kerna kinirajan Dibata. Salam dame e me hal si biasa ilakoken i bas paksa e. Tapi maksudna i jenda, kinirajan Dibata ibenaken alu dame. Dame i jenda ertina: tenang, aman, tanpa permusuhan, sehat, makmur, entah pe sejahtera). Man jabu-jabu si nggit ngalo-ngalo kerehen ajar-ajar Yesus janah nggit megiken berita kinirajan Dibata man jabu e tuhu-tuhu ibereken Dibata kedamen. Sebalikna man jabu-jabu si la ia nggit megiken berita kinirajan Dibata maka dame e mulihken ialoken ajar-ajarNa. Selanjutna, adi ialoken jabu si jadi tujun kerehen ajar-ajar e ndai, kesilanglah i je, janah alokenlah kerina si ibereken i bas jabu e. Enda maksudna jelas maka ajar-ajar e patut icukupken kebutuhenna sedekah ndahiken tugasna (bdk. 1 Kor. 9:14; 1 Tim 5:18). Ola sambar-sambar inganndu kesilang maksudna gelah ajar-ajar erlajar ngataken bujur ras mencukupkan diri i bas kai pe si enggo ialokenna i bas jabu ingan ia kesilang.
Ay. 8-12 nuriken kerna peningkaten ingan tujun erberita, jabu-jabu nari ku kuta (kota). Isi pedahna hampir seri ras ay. 5-7, saja i bas kuta enda selain erberita kerna kerehen kinirajan Dibata, ajar-ajar e ibere kuasa guna mpepalem kalak si sakit. Kuasa si ibereken Dibata guna mpepalem kalak si sakit e ncidahkenca maka kinirajan Dibata e tuhu-tuhu enggo ndeher (bdk. Luk. 11:20), di samping tentuna gelah kerina kalak kuta tek maka si reh e me utusen Dibata nari. Adi kerehen ajar-ajar e la ialoken kalak kuta, ipedahken Yesus gelah ngapusi abu kuta si leket i bas nahe alu ngataken persinget terakhir kerna kinirajan Dibata enggo ndeher ku tengah-tengah kuta e, labo guna mereken keselamaten tapi nehken ukumen.
Pengkenaina
Tema ras tujun i bas PA-ta sendah ngingetken kita kerna tugas tanggung jawabta i bas er-Berita Si Meriah. Sue ras ogenta sendah erlajar kita mulihi kerna cara-cara er-Berita Si Meriah. Si pemena lebe kerna urgensitas i bas kita er-Berita Si Meriah. Erberita kerna keselamaten i bas Yesus Kristus e me prioritas utama. Ertina, perlu kita metenget maka geluhta e me surat Kristus si ioge kerina kalak si lit i sekelewetta. Geluhta e me Berita Si Meriah. Pengerananta, perbahanenta, caranta rukur, kepedulianta, caranta memperlakukan kalak, caranta nampati kalak, rsd., kerinana harus ncidahken Berita Si Meriah si banci inanami kerina kalak i japa pe kita ringan. Termasuk i bas jabuta masing-masing, sebab bagi ogenta sendah, erberita ibenaken i bas jabu. Si penting i jenda, erberitalah arah pengkebet geluhta, persoalen kalak i sekelewetta ngalokenca entah nulak e me bagin Dibata.
Si peduaken, ertotolah man Dibata, pindolah gegeh kepentaren gelah ipengasupNa kita er-Berita Si Meriah i bas lingkungenta masing-masing. Gegeh kepentaren i jenda termasuk kengasupen maba dame i bas kita erberita. Ertina i bas kita erberita labo kita menjelek-jelekkan agama-agama si deban tapi fokus kita ku berita keselamaten i bas Yesus Kristus rikutken Pustaka Si Badia. Janah Kesah Si Badia kari si mpebetehken man banta cara entah metode si sue ras kebutuhen i bas kita er-Berita Si Meriah.
Si peteluken, tek kita maka kerina si nibutuhken i bas erberita enggo icukupken Dibata. Enda ertina labo terjeng kebutuhen jasmani si erberita (upah), tapi pe sarana prasarana i bas kita erberita. Tek kita maka kemajun teknologi si gundari e me cara Dibata ncukupken kebutuhen i bas kita erberita jaman gundari enda. Teknologi jaman gudari enda tuhu-tuhu nampati kita i bas kita er-Berita Si Meriah. Arah medsos (Google, YouTube, Instagram, Facebook, Tiktok, rsd.) kerina kalak jaman gundari enda enggo banci erlajar secara mandiri kerna kiniteken Kristen. Emaka manfaatkenlah medsos si lit i bas Hp-ta guna er-Berita Si Meriah. Bahanlah tayangan-tayangan si bermanfaat, si mendidik, si maba pencerahen, si maba dame, rsd. Enggo enterem kalak si memutusken tek man Yesus Kristus erkiteken tayangan-tayangan rohani Kristen i bas medsos. Hal si deban si penting, adi ngerana kerna er-Berita Si Meriah i bas Pustaka Si Badia pasti sifatna holistik labo terjeng kata-kata saja ras labo terjeng rohani saja. Ertina marilah kita erberita alu bekerja sama ras bidang-bidang si deban, umpamana bekerja sama ras si beluh (mampu) i bas bidang kesehaten ras ekonomi, gelah berita keselamaten si isehken menyentuh rohani bage pe jasmani.
Si peempatken, sue ras tujun si peduaken i bas PA-ta senda, iajuk kita gelah erberita (PI) ke dalam, khususna man Mamre-mamre si enggo ndekah lanai aktif i bas kegiaten-kegiaten Gereja. Melala cara si banci ilakoken kita, umpamana, perkunjungan kasih, nggit kita megiken kerina si jadi perbebenna, nggit kita nampati adi umpamana si la aktif ndai kurang ekonomina, melibatken Mamre-mamre si lanai aktif jadi panitia entah jadi si ertanggung jawab i bas kegiaten-kegiaten Gereja, rsd.
Mari radu ras kita er-Berita Si Meriah ibenaken i bas jabuta sekalak-sekalak. Dibata si mpegegehi mpengasup kita er-Berita Si Meriah.
Tidak ada komentar:
Posting Komentar