SUPLEMEN PA MORIA GBKP TGL. 28 MEI - 3 JUNI 2023

Pdt. Larena br. Sinuhadji (Nd. ReyRapha Tarigan)

Oikumene

Si Man Ogen : Yohanes 17:20-26 

Tema : KINIERSADAN KALAK SI TEK

Tujun : Gelah Moria :

- Meteh kerna pertoton Yesus kerna kiniersadan kalak si tek

- Nehken penampat tanda kiniersadn kalak si tek i doni enda

Penaruh

Penting kel kiniersadan i bas kegeluhenta, subuk i tengah-tengah keluarga, i tengah-tengah Gerejanta, i tengah-tengah Gereja i Indonesia si beda denominasi, bage pe kiniersadan i tengah-tengah masyarakatta si enggo jelas lebih beragam subuk agama ras suku.
Emaka melala kel kata-kata bijak dalam rangka memotivasi kita guna nggeluh i bas kiniersadan, “Bersatu kita teguh bercerai kita runtuh”; “Sendiri kita bisa melakukan sedikit, bersama-sama kita bisa melakukan banyak” (Helen Keller); “Bahkan yang lemah menjadi kuat ketika mereka bersatu”(Friedrich von Schiller); “Di mana ada persatuan dan kesatuan, selalu ada kemenangan (Publilius Sirus); “Ketika laba-laba bersatu mereka dapat mengikat seekor singa.” E maka rikutken bahan PA Moria-ta sekali enda, ipersingeti kita mulihi gelah kita banci nggeluh ersada sada ras si debanna.

Mpebagesi Pengangkan Kerna Ogen

Judul pengogenta “Yesus ertoto kerna ajar-ajarNa” (TB-LAI: “Doa Yesus untuk murid-muridNya). Pertoton enda ipenangkih Yesus sope IA ngenanami via dolorosa (jalan salib). Janah enggo ietehNa maka lit biak-biak si banci erbanca turah perpecahen i bas ajar-ajar. I ja pernah lit turah persoalen i bas perukuren ajar-ajar, e me kerna ise kin si mbelinna i bas ajar-ajar e (Luk. 9:46). I bas pertoton syafaat Yesus enda, banci ibagi menjadi telu bagin. Si pemena ay. 1-8, Yesus ertoto guna diriNa jine, si peduaken ay. 9-19, Yesus ertoto guna ajar-ajarNa ras si peteluken ay. 20-26, Yesus ertoto guna kalak si tek man baNa erkiteken berita si ipeseh ajar-ajarNa. Yesus ertoto gelah ersada min kerina kalak si tek (“O Bapa ertoto Aku man baNdu gelah ersada min ia kerina”). Adi siperdiateken i bas ay. 20-26 maka lit kurang lebih 4 kali (ay. 21 dua kali, ay. 22 “gelah ia ersada”, ay. 23 “gelah ia pe min tuhu-tuhu ersada”). Tujunna enggo jelas gelah tek doni enda maka Yesus e me Anak Dibata si iutus ku doni enda guna nelamatken manusia. Alu kata si deban, adi kalak si tek banci nggeluh ersada maka kehadiren kalak si tek banci jadi kesaksin man doni enda.

Kiniersadan si itotoken Tuhan Yesus labo kiniersadan si seri bas sada organisasi tapi kiniersadan rohani (pertendin) e me si erpalasken bas piga-piga hal: geluh i bas Kristus (ay. 23, “nggeluh ersada ras Kristus”); nandai ras nggejapken keleng ate Bapa i bas Yesus Kristus (ay. 26); walaupe tading bas doni denga tapi la nari nggeluh biak-biak doni (ay.14-16), iserapken arah kebenaren (ay. 17); ketaatan man Kata Dibata (Yoh. 17:6); ersura-sura guna maba keselamaten man si bene (terhilang, ay.21, 23).

Yesus labo ertoto maka kerina pengikutNa ersada (terj. Bhs. Ind.: “menjadi satu”), ertina, sada Gereja, sada suku, rsd. Sebab labo mungkin. Erkiteken Tuhan pe nepa kita pelain-lain (beragam). Emaka kiniersadan si nimaksudken i jenda e me sada visi ras misi guna memuliaken Tuhan, membangun tubuh Kristus, menjadikan kehendak Tuhan di bumi seperti di sorga. Walaupe pelain-lain kita tapi sada penggejapenta, sada perukurenta, sada tujunta, sada perayakenta guna memuliaken Tuhan, guna melayani Tuhan, guna membangun tubuh Kristus. Emaka nina Yohanes, “IA me arus lebih ipehaga janah aku lebih ipekitik”. Kiniersadan e banci tercapai adi sibeneken virus kesombongen, keakuan, egois, kita siakap si benarna, la banci kita ngergai ras ngaloken kalak si deban subuk kelebihen ras kekurangenna.

Pengkenaina

Tema si seh man banta, “Kiniersadan kalak si tek.” Alu tujun, si pemena, gelah Moria meteh kerna pertoton Yesus kerna kiniersadan kalak si tek. Si peduaken, gelah Moria nehken Penampat tanda kiniersadan kalak si tek man doni enda. Tujun si pemena enggo jelas arah penjelasen i datas. Janah tujun si peduaken enda merupaken aksi konkrit tandana kerina kita kalak si tek enggo ipersada ras Kristus khususna nampati senina turang i bas Gereja Kristen Protestan Mentawai. Kerna Gereja enda enggo tangkas bas buku bimbingen PA-ta.

Pembahasen PA-ta sekali enda ngerana kerna Oikumene. Secara khusus nginget lahirna Persekutuan Gereja-gereja Indonesia si awalna Dewan Gereja-gereja Indonesia i bas Tgl. 25 Mei 1950. I ja piga-piga Gereja i Indonesia secara sedar ras sengaja memutusken guna membentuk wadah kiniersan Gereja-gereja. Pengertian “Oikumene” (bhs. Yun. oikos = rumah ras menein = tinggal, berdiam). Awalna kata "oikumene" enda bersifat politis, e me menunjuk seluruh wilayah i teruh kekuasaan Romawi (Luk. 2:1). Tapi kedungenna berubah rikutken pertoton syafaat Yesus. Ras piga-piga ciri oikumene si benar e me kap :

1. Oikumene bukan sekedar persekutuan kultus atau persekutuan agamiah belaka. Si intina la identik ras persekutuan Gereja si memiliki kesaamaan struktur organisasi, ritus liturgi ras kesamaan dogma. Adi perseketuan oikumene e me persekutuan kultus berarti si mpersadaken Gereja e me kesamaan cara ras usaha manusia. Padahal jelas si mpersadaken kita sebagai Gereja e me pendilo Kristus.
2. Memiliki Solidaritas yang tinggi dan nyata. Gereja-gereja si oikumenis lit kepekaan, sada penggejapen. Emaka persoalen si lit i bas sada Gereja terpanggil Gereja si deban ikut nampatisa.
3. Usaha-usaha oikumenis lebih mengutamakan keberagaman bukan perpecahan. Sebab perpecahan melahirkan permusuhan, sikap saling curiga dan tidak memungkinkan kerja sama.
4. Hidup saling menghormati kedaulatan dan pengaturan kehidupan bergereja, serta tidak menarik anggota Gereja ke dalam Gerejanya.
5. Persekutuan gereja-gereja yang oikumenis tidak boleh bersikap rasis. Ertina, i bas kegeluhen Gereja-gereja, masalah warna kulit, suku, asal daerah labo ijadiken patoken i bas muat sada keputusen. Sebab kehadiren Yesus enggo menghancurken perbedaan-perbedaan si e (bdk. Gal. 3:28).

Versi Audio Silahkan Klik : https://www.youtube.com/watch?v=65xhYuSKdg0

Enggo pe lit aturen ras kesepakaten, lit denga anggota-anggota PGI si la benar motivasina. I ja Gereja-gereja e masuk anggota PGI labo dalam rangka mendukung usaha-usaha oikumenis, tapi sura-surana ndatken legalisasi (pengesahen) i bas PGI gelah banci keberadaanna ialoken masyarakat. Adi si e terjadi maka gelarna ngenca ia anggota PGI tapi visi ras misi kebersamaan rikut tugas oikumenis la idalankenna. Keanggotaanna i PGI guna kepentingen identitas Gerejana saja.

Emaka rikutken bahan ras tujun PA-ta sekali enda, mari siwujudken pertoton Yesus, tetap kita nggeluh ersada ras banci bergandengan tangan ras Gereja-gereja si deban. Secara khusus bergandengan tangan kita nampati GKPM subuk secara toto, mengirimken tenaga ahli (pelatih) si niperluken pernanden GKPM bage pe dana. Tuhan masu masu kita. Salam ut omnes unum sint (supaya mereka menjadi satu).