SUPLEMEN PA MORIA GBKP TGL. 14 - 20 MEI 2023

Pdt. Larena br. Sinuhadji (Nd. ReyRapha Tarigan)

PA Aksi Bersama Kategorial

Si Man Ogen : Heber 10:23-24

Tema : SISAMPAT-SAMPATEN I BAS NDALANKEN SI MEHULI

Tujun : Gelah Moria :

- Meteh orat nggeluh kalak si erkiniteken man Yesus

- Alu semangat kiniersadan mbangun Mamre Center

Penaruh 

Lit 5 kata penting (magic words) i bas nggeluh bersosialisasi e me, “terima kasih”, “maaf”, “permisi”, “bolehkah saya”, ras “tolong”. Terima kasih e me ekspresi bersyukur i bas penampat entah kai pe si ialoken kita arah kalak si deban nari. Saling memberi dan menerima e me hal si la banci ihindari i bas kita kegeluhen sosialta. Maaf e me tandana kita labo kalak si sempurna, e maka mindo maaf entah pe ngaloken maaf harus ilakoken i bas kita berinteraksi ras kalak si deban. Permisi ras bolehkah saya, e me tandana kita manusia si beretika, meteh sopan santun alu mindo izin. I bas nggeluh bersosialisasi la kita banci ate-ateta, sebab labo kerina si lit i sekelewetta e sikerajangenta. Sedangken kata tolong e me tandana manusia la banci nggeluh sisada, kerina kita membutuhken penampat i bas kalak si deban nari.

I bas kesempaten enda fokus kita ku bas kata tolong, tolong-menolong, entah pe sisampat-sampaten.

Mpebagesi Kata Dibata

Surat Heber, entah pe Surat Ibrani, itulis sekalak pengikut Kristus si la nari siteh ise ia, tapi si pasti ia sekalak Yahudi Kristen si tuhu-tuhu itehna agama Yahudi, e maka i bas surat enda melala rujukken ku Padan Si Ndekah. Surat enda itujuken secara khusus man kalak Kristen Yahudi entah pe perpulungen-perpulungen kalak Kristen si enterem je kalak Yahudi-na. Melala nasihat-nasihat praktis i bas surat enda si tujunna gelah kerina kalak Yahudi Kristen si ngogesa entah pe si megiken isi surat enda tetap megegeh ras paguh i bas erkiniteken man Dibata i bas Yesus Kristus amin pe harus ngenanami erbage-bage kiniseran erkiteken kinitekenna termasuk i bas menghadapi kalangan Yahudi si la tek nandangi Yesus Kristus. I bas dampar si deban, penulis surat Heber ngajuk perpulungen gelah reh dewasana i bas erkiniteken man Dibata i bas Yesus Kristus.

Secara khusus i bas ogenta sendah, ay. 23, e me pengajuk man perpulungen gelah tetap erpengarapen man Dibata i bas Yesus Kristus. Sebab padan keselamaten Dibata i bas Yesus Kristus ya dan amin, pasti iwujudnyataken man kerina kalak si tutus erkiniteken ras erpengarapen man Dibata i bas Yesus Kristus, i bas kegeluhen si gundari seh ku kedungen jaman. Tapi i bas erpengarapen man Dibata perpulungen labo kem saja nimai kerehen Tuhan Yesus si peduakaliken. Nggeluh erpengarapen ertina tetap ncidahken buah-buah kiniteken amin pe melala tantangen ras kiniseran si harus ihadapi. E maka i bas ay. 24 iajuk perpulungen gelah sisampat-sampaten, nehken keleng ate ras ndalanken si mehuli. I bas tafsiren Lembaga Alkitab Indonesia (LAI) ayat enda iterjemahken bagenda nina, “Baiklah kita memperhatikan satu sama lain supaya kita dapat menyemangati (atau mengajak) sesama kita untuk saling mengasihi dan mengerjakan yang baik (atau berbuat baik)”.

Versi Audio Klik : https://www.youtube.com/watch?v=QT3RX_ItnS4

Amin pe la termasuk i bas ogenta, ay. 25 akap kami sangat relevan ras tema PA-ta sendah. I bas tafsiren LAI ayat enda iterjemahken bagenda nina, “Janganlah kita malas berkumpul untuk beribadah bersama, seperti kebiasaan beberapa orang. Sebaliknya kita harus saling memberi semangat, apalagi sekarang ketika sudah dekat harinya Tuhan datang”. Perpulungen paksa si e iajuk gelah ergiah-giah reh ku bas ibadah-ibadah gereja, sebab i je nge inganna perpulungen banci sisampat-sampaten, nehken kekelengen, saling memberi semangat, ras ndalanken si mehuli sue ras peraten Dibata.

Pengkenaina

I bas ogenta sendah mulihi kita isingetken maka orat nggeluh kalak si erkiniteken man Dibata i bas Yesus Kristus e me, si pemena, nggeluh erpengarapen man Dibata i bas Yesus Kristus. Nggeluh erpengarapen ertina tetap ncidahken buah-buah kiniteken man sekelewetta. Si peduaken, sisampat-sampaten, nehken keleng ate ras ndalanken si mehuli e me wujud nyata nggeluh erpengarapen man Dibata, buah-buah kiniteken si banci inanami sekelewetta, khususna i tengah-tengah perpulungen kalak si tek. Si peteluken, iajuk kita gelah ergiah-giah reh ku bas kegiaten-kegiaten Gereja, sebab Gereja e me media i bas kita banci saling mperdiateken, sisampat-sampaten, nehken keleng ate, memberi semangat, ras ndalanken si mehuli sue ras peraten Dibata.

PA-ta sendah i bas rangka mendukung pembangunen Mamre Center i kawasen Danau Toba (Tongging) si irencanaken ibenaken i bas tahun enda. I bas kita mendukung pembangunen Mamre Center enda palasta tentuna keleng ate Kristus i bas dirinta si erbahanca keleng pe kita nandangi Mamre Center enda. Mamre Center irencanaken jadi pusat pembinaan spiritualitas ras pemberdayaan, khususna man Mamre-Mamre GBKP, secara umum banci igunaken guna pembinaan spiritualitas ras pemberdayaan kerina kategorial i bas GBKP. Bagi ogenta sendah, Mamre Center iarapken banci jadi ingan sisampat-sampaten, nehken kekelengen, saling memberi semangat, ras ndalanken si mehuli sue ras peraten Dibata. E maka mari sidukung rencana pembangunen enda alu ikut muat bagin i bas geraken 10 ribu, bage pe alu pertotonta. Sitotoken panitia pembangunen si ngelaksanaken pembangunan enda gelah banci erdahin alu mehuli. Dibata si masu-masu kita kerina.