SUPLEMEN PA MAMRE GBKP TGL. 7 - 13 MEI 2023

Pdt. Larena br. Sinuhadji (Nd. ReyRapha Tarigan)

 

Teks : Kejadin 18:1-14

Tema : JUMPA RAS DIBATA

Tujun : Gelah Mamre :

- Meteh maka Mamre e me ingan Abraham jumpa ras ngelai Dibata

- Mamre Center jadi pusat pembinaan spiritualitas ras pemberdayaan

 

Penaruh
 
Sekalak pimpinen perusahaan ngatakenca man kerina staf-na, “Berikanlah pelayanan terbaik kepada setiap orang, karena kita tidak mengetahui siapa yang kita layani”, ertina banci saja si reh e me kalak penting amin pe mungkin penampilenna biasa-biasa saja, banci saja si reh sekalak pejabat penting, amin pe mungkin la ipakena paken jabatenna. Kira-kira bage lah si icidahken Abraham i bas teksta sendah, ialo-alona kalak si la itandaina alu mehuli.
 
Mpebagesi Kata Dibata
 
Ogenta sendah lit i teruh judul “Sekalak anak dilaki ipadanken man Abraham”. Sope perikop enda enggo dua kali Dibata erpadan man Abraham kerna anak dilaki kesusurenna arah Sara nari, e me i bas Kej. 15 ras 17. I bas bindu 21 maka je ituriken kerna ketubuhen Isak, anak dilaki si ipadanken Dibata man Abraham. Tapi i bas kesempaten enda labo padan Dibata man Abraham si jadi fokus. Si jadi fokus i bas PA-ta sendah akap kami lit dua.
 
Si pemena e me kata “Mamre”. Kerna erti ras makna kata “Mamre” banci sioge i bas Buku Bimbingen PA-ta. Lit piga-piga ayat i bas Kitab Kejadin si nuriken kerna Mamre enda. I bas Kej. 13:18 ituriken ipindahken Abraham kemah inganna tading dingen ringan ndeher kayu keramat Mamre i Hebron. I bas Kej. 14:13 ituriken maka Abraham ringan ndeher batang kayu sikerajangen Mamre kalak Amori. Mamre i jenda e me sekalak teman Abraham (bdk. Kej. 14:24). I bas Kej. 35:27, ituriken kerna Jakup si ndahi Isak bapana i Mamre ndeher Hebron, i ja Isak pernah tading ras Abraham i je. Rikutken ogenta sendah jelas maka Mamre e me ingan Abraham tading ras keluargana. Ituriken i bas ay. 1 nina, “ndeher batang-batang kayu ingan ersembah i Mamre”. I bas Alkitab BIS-BIMK nina “dekat pohon-pohon keramat tempat ibadat di Mamre”, seri ras si ituriken i bas Kej. 13:18 ndai i bas terj. Bhs. Karo. 

Versi Audio Klik https://www.youtube.com/watch?v=Nvy4HSoSSQI

Engkai maka isebut “kayu keramat Mamre i Hebron?” Banci jadi erkiteken ibahan Abraham i je ingan ersembah man Dibata. Jadi labo terjeng i bas ogenta saja Abraham jumpa ras Dibata tapi tep-tep wari pe Abraham jumpa ras Dibata erkitken ibangunna je ingan ersembah. Tapi i bas erti si deban, kayu keramat e, entah pe pohon-pohon terbantin, enggo leben lit ratusen tahun sope Abraham ringan i je. Pohon-pohon terbantin e ianggap keramat erkiteken enggo mereken kesejukken ras sumber air i tengah-tengah padang gurun si kering ras panas. Melala kalak si lit i bas perdalanen ngadi lebe i je. Jadi sekali nari ikataken keramat erkiteken pohon-pohon terbantin ndai tuhu-tuhu mereken kesegaren bahkan kegeluhen man ise pe si singgah entah pe si ringan i je. Ertina Mamre i ja Abraham ringan ras keluargana enggo mereken pelayanen si mehuli.

Pohon Oak/Ek/Tarbantin.
Sumber : http://www.sarapanpagi.org/tanaman-indah-dalam-alkitab-vt6580-40.html

 

Si peduaken, rikutken Kej. 13:2 ituriken maka Abraham enda sekalak si bayak namura. Tapi amin pe ia bayak namura, ituriken i bas ogenta sendah, Abraham meteruk ukurna, janah mehuli i bas ia ngalo-ngalo kalak asing i kemahna. Ituriken, kenca enggo iidahna telu kalak si la itandaina tedis i lebena, minter ia kiam ngalo-ngalosa, erjimpuh ayona seh ku taneh, iburihina nahe kalak ndai, isikapkenna pangan ras inemen si ntabehna, rsd. Lit si ngatakenca kai si ilakoken Abraham merupaken budaya si semal paksa si e. Tapi secara logis, situhuna banci nge isuruhna juak-juakna guna ngalo-ngalo telu kalak asing ndai sebab Abraham kalak bayak. Tading ngata saja, idahiken juak-juakna kerina si ipindoken Abraham. Apai ka si ialo-alona ndai kalak si lenga itandaina. Amin pe i bas ogenta ikataken Tuhan ncidahken diriNa man Abraham arah telu kalak si reh ndai, tapi tentu awalna lenga isedari Abraham maka telu kalak ndai kepeken suruh-suruhen Dibata. Abraham tetap mehuli nandangi kalak si lenga itandaina alu tetap nehken pelayanen si terbaik.
 
Pengkenaina
 
Tema ras tujun PA-ta sendah mabai kita gelah ikut muat bagin i bas proses pembangunen Mamre Center. Tapi sope kita ngerana kerna Mamre Center, arah ogenta sendah, iajuk kita gelah membangun relasi si mehuli ras Dibata. Abraham mereken teladan man banta kerna sekalak perbapan si njadiken rumahna ingan ersembah man Dibata. Tentu menjadi penungkunen man banta, apakah sedekah enda enggo ibangun relasi si mehuli ras Dibata arah pertotonta secara pribadi bage pe megiken entah pe ngoge Kata Dibata? Arah PA-ta sendah mulihi isingetken kerna sumber vitalitas rohanita e me ersembah man Dibata. Kenca enggo mehuli relasinta secara pribadi ras Dibata e maka sibabailah keluarganta ersembah man Dibata.
 
Tujun si peduaken ngatakenca, Mamre Center jadi pusat pembinaan spiritualitas ras pemberdayaan. Ertina Mamre Center si gundari sangana i bas proses pembangunen, iarapken labo terjeng bangunen saja, tapi tuhu-tuhu mereken pelayanen si terbaik i bas pembinaan spiritualitas bage pe pemberdayaan. Ogenta sendah mereken teladan man banta kerna nehken pelayanen si terbaik. Mamre sebage ingan tading Abraham enggo mereken kesejukan ras sumber air man ise pe si ngadi i je guna pekesahken. Sementara Abraham mereken teladan man banta, amin pe bayak namura ia tapi meteruk ukurna, nggit ia ngelakoken hal-hal si kitik guna mereken pelayanen si terbaik. Mamre Center iarapkan ngasup mereken pelayanen si terbaik man ise pe si ngadi kentisik i je guna pekesahken, menarik diri sejenak dari kesibukan dunia guna ndatken semangat si mbaru. Mari terus sidukung pembangunen Mamre Center arah totonta bage pe dukungen dana gelah kerina si iarapken terjadi i bas litna Mamre Center enda banci terwujud.