SUPLEMEN PA MAMRE GBKP TGL. 14 - 20 MEI 2023

Pdt. Larena br. Sinuhadji (Nd. ReyRapha Tarigan)

Teks : Galatia 6:2-10

Tema : SISAMPAT-SAMPATEN I BAS NDALANKEN SI MEHULI

Tujun : Gelah Mamre :

- Meteh maka nggeluh arus sisampat-sampaten

- Alu semangat kiniersadan mbangun Mamre Center

Penaruh

Masyarakat Indonesia enggo biasa i bas budaya gotong-royong ras tolong-menolong. Setiap daerah lit istilahna kerna gotong-royong ras tolong-menolong enda rikut bahasa daerahna masing-masing. Tapi si unik, labo terjeng i bas si mehuli saja sebagian masyarakat Indonesia gotong-royong ras tolong-menolong, i bas si la mehuli pe lit si ngelakokenca alu gotong-royong ras tolong-menolong. E makana lit istilah “korupsi berjamaah”, “pesta narkoba”, tawuran antar kelompok, rsd. Si e kerina tentuna labo man usihen.

I bas kesempaten enda radu ras kita membahas kerna sisampat-sampaten i bas ndalanken si mehuli khususna man kalak si sada kiniteken.

Mpebagesi Kata Dibata

Ogenta sendah lit i teruh judul “Sisampat-sampatenlah i bas maba baban nggeluh”. I bas terj. Bhs. Ind. nina, “Saling membantulah kamu”. Perikopta sendah merupaken bagian akhir surat Rasul Paulus man piga-piga perpulungen si lit i wilayah Galatia si sangana lit i bas perbeben. Perbeben si sangana ihadapi perpulungen paksa si e, lit ajaren-ajaren papak si isebut Paulus sebage “berita mehuli si deban” (Gal. 1:6). Ajaren-ajaren si papak e ndai mewajibken kalak Kristen guna ngelakoken undang-undang agama Yahudi khususna sunat, sebab nina ajaren enda guna banci rembak ras Dibata tek saja man Yesus Kristus lenga cukup. I bas si e Rasul Paulus ngajuk perpulungen gelah mulihken ku ajaren si benar nina, “Manusia rembak ras Dibata arah erkiniteken man Yesus Kristus ngenca, la arah ndalanken Undang-undang” (Gal. 2:16).

Ajaren-ajaren si papak enda tentuna mengganggu kiniersadaan i bas perpulungen. Arah pedah-pedah Rasul Paulus i bas ogenta sendah teridah secara tersirat situasi si terjadi i bas perpulungen-perpulungen i wilayah Galatia paksa si e. Ay. 1, ncidahkenca situasi i ja perpulungen enggo lanai mediate sada ras si debanna. Lit anggota perpulungen si ngelakoken kesalahen ipediatna saja, entah pe sebalikna, itegur alu cara-cara si kasar si erbahanca turah perubaten. E maka Rasul Paulus mereken pedah gelah perpulungen saling mperdiateken sada ras si debanna. Adi lit perpulungen si ersalah, tegu-tegulah ia alu manjar-manjar.

Ay. 2 - 5, ncidahkenca maka suasana saling peduli alu sisampat-sampaten i bas perpulungen-perpulungen i wilayah Galatia enggo reh urakna. Adina rikutken ay. 3, teridah maka lit sifat-sifat merasa diri paling benar ras paling penting si erbahanca ia ngenca si harus isampati ras iperdiateken. Entah pe sebalikna, la ia nggit (gengsi) ngaloken penampat i bas si deban nari. I bas si e Rasul Paulus mereken pedah man perpulungen gelah ipegeluh mulihi suasana saling peduli alu sisampat-sampaten sada ras si debanna i bas maba baban geluh. Baban geluh i jenda maksudna kerina bentuk kiniseran si ialami perpulungen. Alu bage enggo isehken perpulungen Undang-undang Kristus. Tafsiran Lembaga Alkitab Indonesia (LAI) menterjemahken ayat enda bagenda nina, “Kalau ada orang yang mengalami penderitaan hendaklah kalian menolongnya. Dengan berbuat begitu kalian akan mentaati hukum kasih yang diberikan Allah seperti diajarkan oleh Kristus”. Janah i bas ay. 4 pe Rasul Paulus mereken pedah gelah perpulungen introspeksi diri (menilai ras mengevaluasi diri sendiri) gelah kai pe si ilakoken sue ras ajaren Kristus. Bage pe ula membanding-bandingken kai si ialami diri sendiri ras si ialami kalak si deban, sebab setiap kalak lit baban geluhna masing-masing (ay. 5), i bas tafsiren LAI ay. 5 enda nina, “Setiap orang harus bertanggung jawab kepada Allah tentang tindakannya sendiri”.

Ay. 6, ncidahkenca keadaan i ja perpulungen enggo lanai mperdiateken guru-guru entah pe si ngajar kerna erkiniteken man Yesus Kristus. I bas si e, Paulus mereken pedah gelah mperdiateken guru-guruna. I bas tafsiren LAI nina, “Hendaklah kalian yang menerima pengajaran Kristus memberikan sebagian dari semua yang baik kepada gurumu”.

Ay. 7 - 8, e me persinget man perpulungen maka Dibata la banci itokohi, kerinana iteh Dibata. E maka kerina si ilakoken perpulungen e lit konsekuensina.

Versi Audio Klik https://www.youtube.com/watch?v=FSp81gy1qGg

Ay. 9 - 10, e me pengajuk man perpulungen gelah ula erleja-leja erbahan si mehuli, janah i bas tep-tep kesempaten teruslah erbahan si mehuli man kerina manusia, khususna man teman-teman si sada kiniteken.

Pengkenaina

Tema ras tujun PA-ta sendah masih i bas rangka sosialisasi pembangunen Mamre Center si irencanaken mulai ibangun i bas tahun enda. Arah PA-ta sendah iajuk kita gelah sisampat-sampaten i bas perpulungenta masing-masing, khususna i bas proses pembangunen Mamre Center enda. I bas kita sisampat-sampaten e palasna sue ras motto Mamre GBKP, erdiate ras erpemere. La kita banci erdiate ras erpemere adi lenga tuhu-tuhu sigejapken uga belinna keleng ate Dibata man banta si enggo mediate janah mereken pasu-pasuNa man banta. Adi rikutken ogenta sendah, mari sipedauh i bas kita nari biak-biak egois, menuntut diperhatikan daripada memperhatikan, menuntut balasan i bas perhatian si enggo siberken man si deban, terlalu sibuk dengan diri sendiri si erbahanca kurang mediate nandangi kalak si deban, rsd. Sipindo gegeh i bas totonta gelah ipengasupna kita peduli nandangi si deban janah nggit nampati alu kai pe si lit i bas kita.

Khususna i bas rangka mendukung pembangunen Mamre Center, mari sipersada arihta guna mendukung pembangunen enda alu kai pe si banci silakoken kita, arah pertotonta, arah dukungen dana, gerakan 10 ribu, arah dukungen material bangunan, rsd. Adina rikutken pengalamen pembangunen-pembangunen i bas GBKP asa pengidah kami, adi sikelola alu mehuli, lenga lit proses pembangunen fisik si terbengkalai entah pe mangkrak. E maka mari radu ras sitotoken dahin Panita Pembangunen Mamre Center gelah banci erdalan alu mehuli, i bas paksana pagi enggo banci pajek Mamre Center GBKP i Desa Sibolangit Kecamatan Merek kawasen Danau Toba. Dibata si mpegegehi kita guna sisampat-sampaten. No. Rek. a/n. Mamre Center GBKP, Bank BNI 1346145049.