SUPLEMEN PJJ GBKP TGL. 30 APRIL - 6 MEI 2023

Pdt. Larena br. Sinuhadji (Nd. ReyRapha Tarigan)

KATA DIBATA TETAP RASA LALAP (Matius 24:32-35)

(GBP GBKP : Tim Pembacaan Alkitab)

Penaruh

Misi GBKP poin a tertulis, “Menumbuhkembangkan spiritualitas jemaat berbasis Alkitab”. Ertina, alu misi enda, GBKP sungguh-sungguh menjadikan Alkitab sebage pedoman kegeluhen man perpulungenna (Sola Scriptura). Emaka i tengah-tengah Gerejanta enggo ilitken unit Kelas Baca Alkitab ras Unit Baca Gali Alkitab, ngidah pentingna setia membaca Alkitab enda. Alu bage kecintaan entah budaya membaca Alkitab enggo mendarah daging i bas perpulungen GBKP benaken anak-anak nari. 

Emaka i bas bahan PJJ-ta sekali enda ngerana kita kerna Kata Dibata, khususna si berkaiten ras Sasaran Pelayanen tahun 2023, “Jemaat menjadi subyek i bas pelayanen”, ilitken min Tim Pembacaan Alkitab bas Runggunta, si banci nampati perpulungen guna setia membaca Alkitab.

Mpebagesi Kata Dibata

Perumpamaan pohon ara e me perumpamaan singkat si iajarken Tuhan Yesus man ajar-ajarNa kerna pendungi jaman. Perumpamaan pohon ara pe banci sioge i bas kitab sejajarna Markus 13:28-31 bage pe Lukas 21:29-33. Si nikmaksud sebage pohon ara i bas teks enda e me pohon tin (Ficus Carica), sejenis ara si berasal i bas wilayah Laut Tengah ras buahna banci ipan.

Rikutken perikopta maka banci ikataken, Yesus pengamat alam si luar biasa. PengajarenNa menyentuh lingkungen sekitarna ras enggo pasti pendengarNa. Termasuk perumpamaan-perumpamaan si iberekenNa, piga-piga kali i bas perumpamaan-perumpamaan si ibahanNa menyentuh kegeluhen perjuma, nelayan ras permakan. Pendengar Yesus nggeluh dekat ras alam asangken kita i bas paksa enda, emaka iarapken pendengarNa mesukah memahami pesan si bakal ipeseh Yesus.

I bas jaman Injil, pohon ara e me pohon buah si enggo umum i Israel khususna ndeher Yerusalem i ja terletak Bethpage (rumah pohon ara). Pohon ara rikut daun-daunna si meratah ras mbelang mereken ingan cilinggem khususna i bas musim perlego. Mungkin Yesus ngajarken perumpamaan kerna pohon ara si bersemi i bas minggu pertama bulan April, “Adi idahndu, dahanna meratah janah erbulung nguda ia, ietehndu maka musim perlego enggo ndeher”. Pernyataan enda banci ipahami man si megikenca.

Tapi penungkunenna e me kap, apakah kalak enda banci menafsirken tanda enda secara teologis ras rohani. Kalak rusur reh man Yesus nungkuni sebuah tanda, tapi Yesus umumna la mereken tanda, kecuali tanda nabi Junus man kalak Farisi (bdk. Mat. 12:39). I bas kesempaten si deban, irawai Yesus kalak Farisi erkiteken itehna kerna musim arah rupa langit, tapi la iangkana kerna tanda-tanda jaman (bdk. Mat. 16:2,3). Bage pe i jenda, apakah ajar-ajarNa tehna membaca tanda-tanda jaman, “Bage me pe, adi idahndu pagi jadi kerina si Kukataken enda ndai, ietehndu me maka enggo ndeher kedungen doni enda”. Penungkunenna kai kin si idah ajar-ajar? E me kejadian-kejadian bagi si enggo ituriken Yesus si bersifat eskatalogis (bdk. Mat. 24:15; Mat. 24:3-) hal enda merujuk i bas prediksi si enggo iuraiken Yesus sebelumna i bas percakapenNa ras ajar-ajarNa. Nina ajar-ajarNa man baNa, “Kataken man kami: ndigan kin kerina enda jadi? Kai nge pagi tanda-tanda kerehenNdu dingen kai nge pagi tanda-tanda kedungen jaman enda? Kerina percakapen e me kerna pendungi jaman ras rehna nabi-nabi perguak. Emaka nina Yesus, “Ingetlah!” Si enda pagi kerina jadi ope dengan keri mate kalak si genduari enda” (bhs. Ind., “Sesungguhnya angkatan ini tidak berlalu, sebelum semuanya ini terjadi”). Kata “angkatan ini” menunjuk man kalak si tetap setia seh kedungenna. Kalak si termasuk i bassa e me ajar-ajarNa si megiken pengajaren Yesus, kalak si menyaksiken kejatuhen Jerusalem, ras kalak si tetap tek sepanjang abad si alu megenggeng nimai penggenapen nubuat kerna pendungi jaman. 

Versi Audio Klik https://www.youtube.com/watch?v=yDNFrFj_cZw

Perumpamaan enda iujungi alu kata, “langit ras doni masap kap pagi, tapi KatangKu tetap rasa lalap”. Ertina, Firman Tuhan tetap kekal seh rasa lalap, aminna pe doni enda masap kedungenna. Firman Tuhan ngenca si mpengasup kita tetap setiap ras megenggeng amin kai pe si terjadi. Emaka selaku kalak si tek, tetap kita metengget ras erjaga-jaga. Aminna pe sialami bagi si enggo inubuatken Tuhan Yesus, erbage-bage kiniseran ula e erbahanca aru ateta ras mbiar, tetap dalanken si ngena ate Dibata. Firman Tuhan ngenca ulu gegehta. Bagi nina Rasul Paulus, “Si enda arus idalankenndu, sabap ietehndu maka enda me paksa si menentuken man bandu. Enggo seh jamna maka kam medak. Sabap warina kita ikelini Dibata deheren genduari asangken asum tangtangna kita tek nai. Sabap berngi lawes ku siangna me, janah nandangi terang me wari. E maka sitangtangilah perbahanen si gelap, janah sipakelah senjata guna erperang i bas terang” (Roma 13:11-12).

Pengkenaina

Tema PJJ-ta, “Kata Dibata tetap rasa lalap” (GBP GBKP: Tim Pembacaan Alkitab). Rikutken Konfesi GBKP Bab 1 kerna “Alkitab”, lit piga-piga poin si sangat penting iakap kami rikutken pembahasenta:

• Alkitab merupakan satu kesatuan yang utuh dan yang harus dipahami secara benar dan bertanggung jawab (Mat. 5:17-20; Why. 22:18-19; 2 Tim. 3:16).
• Alkitab adalah dasar kehidupan orang Kristen (Mzm. 119:105) yang merupakan dasar pengajaran, nasehat dan penuntun tingkah laku (2 Tim. 3:16).
• Pemahaman dan penghayatan yang benar akan Alkitab hanya oleh pertolongan Roh Kudus.
• Penghayatan isi Alkitab menjadikah hidup berbuah dalam kehidupan sehari-hari (Gal. 5:22-23; Yak. 2:14-26; Yoh. 15:5).

Gelah tuhu-tuhu Pustaka Si Badia e ijadiken pedoman (dasar) kegeluhen kalak si tek, ras gelah payo i bas memahami ras menghayati Kata Dibata e, maka perlu tetap kita setia ngoge Pustaka ras erlajar guna banci ngantusisa. Emaka melala genduari cara si itempuh guna kita setia lebe membaca Firman Tuhan. Bas GBKP lebe enggo ilitken unit Kelas Baca Alkitab (KBA) bage pe unit Baca Gali Alkitab (BGA). Lit Group WA i bas perpulungen gerakan Ayo Baca Alkitab (ABA), isepakati ras-ras apakah tiap wari 2 pasal, 3 pasal entah 5 pasal. Intina, setia lebe membaca Alkitab. Bahkan secara online pe banci kita megiken Kata Dibata, i ja channel Youtube enggo melala menyediakan program Setia Membaca Alkitab kerja sama ras Lembaga Alktab Indonesia ras program-program si deban si sifatna seri. E maka la lit nari alasen, la lit waktu, sibuk aku, kerina mulihi ku bas komitmenta guna setia njadiken Kata Dibata sebage pedoman geluhta. Si penting kai pe si ibahan kita, ula gelah menggo, tapi tuhu-tuhu ngasup kita ngantusisa ras makeken Kata Dibata e. 

Termasuk KBA tujunna e me gelah ngawan ni perpulungen setia ngoge Alkitab mulai Kitab Kejadin seh Ketangkasen alu disiplin ras teratur, subuk anak-anak bage pe kalak dewasa. Sebage informasi saja, genduari enggo kurang lebih lit 229 Kelas Baca Alkitab Anak se-GBKP (Runggun/Perpulungen). Iarapken arah kesetianna membaca Alkitab, anak-anakta enda memiliki karakter si mehuli, si ngena ate Dibata.

Bage pe i bas BGA, lit piga-piga hal keunikan BGA enda :

• Memperhatikan jenis sastra (genre) masing-masing kitab (narasi, surat, perumpamaan, nubuat, masmur pujian/ratapan, bage pe sastra apokaliptik).
• Melibatken kerina peserta secara aktif.
• Menciptakan partisipasi aktif dan bersifat interaktif.

Janah i bas kita enggo lebih teliti ngoge Pustaka Si Badia, iarapken lit pesan  Dibata secara pribadi man banta si rusur igelari P3JT, subuk berupa Pelajaran, Perintah, Peringatan, Janji dan Teladan. Labo terjeng je saja, kita pe ibabai guna merespon Kata Dibata e (respon si konkrit, terukur dan dapat dirasakan), subuk arah pengataken bujurta, doa, pengakuan dosa entah pe tekadta (biasa isingkat SDDT).

Iarapken, arah kesetian membaca Kata Dibata dingen makekenca i bas kegeluhen si tep-tep wari maka ngasup geluhta “erbuah”, si erguna man keluarga ras kalak si deban i sekelewetta. Tuhan si mpengasup kita ras ngajari kita guna setia nggeluh i bas KataNa. Bagi ende-enden KEE 432 bagin refrein, “Ajarilah Tuhan kami ngergaken KataNdu, ajarilah Tuhan kami ngertikenca, ajarilah Tuhan kami ngalokenca, ajarilah Tuhan kami ndalankenca”.