SUPLEMEN PA MAMRE GBKP TGL. 16 - 22 APRIL 2023

Pdt. Larena br. Sinuhadji (Nd. ReyRapha Tarigan)

Ogen : Ester 2:5-11

Tema : MEREKEN SI MEHULINA MAN ANAK

Tujun : Gelah Mamre :

- Ngidah perbahanen Mordekai ras Hagai i bas pekena-kena Ester

- Nehken kesetianna i bas jabu alu mpekena-kena anak guna ndatken masa depanna

Penaruh 

Anak e me pemere (anugerah) si rehna i bas Dibata nari i bas tep-tep jabu. Bahkan rusur sikataken anak e me erta si mehergana kel pemere Dibata man setiap jabu. Sebage tanda pengataken bujurta man Dibata maka arus sicidahken tanggung jawabta man anak, alu kita ngkelengi ras mperdiatekenca, subuk secara kiniteken, fisik, mental kejiwaanna, emosionalna ras pemetehna.

Tapi terkadang erkiteken kesibukenta ras enggo beda jamanna, maka melala orang tua, khususna bapa absent i bas mperdiateken anak secara utuh. La banci lang pasti berpengaruh ku bas kegeluhen anak-anakta, subuk karakterna bage pe masa depanna. Melala contoh siidah, anak-anak si kurang perhatian ras kasih sayang terlibat ku bas tawuran, pengaruh obat-obatan terlarang, seks bebas, bahkan erkiteken kurang sibabai ia nggeluh erkiniteken man Tuhan, maka erjabu anakta ndai ras si la sada kiniteken ras kita. Enggo pasti kita kecewa. Tapi nasi telah menjadi bubur. Rikutken nina pepatah, “Kai si itabur, e ka nge si iperani kita”.

Arah bahan PA Mamre sekali enda erlajar kita arah dua tokoh e me Mordekai ras Hagai si hadir i bas kegeluhen Ester ras kedungenna membentuk Ester menjadi sekalak diberu si mejile luar dalam.

Mpebagesi Kata Dibata

Kitab Ester e me nuriken kerna perdalanen bangsa Israel i bas jaman pemerintahen Persia, kenca enggo italukenna Babel. Rajana paksa si e Ahasweros i ja kerajaanna lit 127 propinsi, mulai India nari seh ku Etiopia. Ras ibu kota Persia e me Susan. Ilatarbelakangi ketidakpatuhen kembrahen Wasti man Raja, seh makana pangkatna selaku kembrahen ibereken man diberu si deban si ulin asangken ia (bdk. bindu 1:5-22). Kenca si e, iusulken penasehat raja, gelah ndarami piga-piga singuda-nguda guna ipekena-kena, janah apai pagi akap raja si mejilena e ipilihna jadi kembrahenna. Kenca dung masa seleksi, terpilih me Ester. Ise kin Ester enda, dingen ise si berjasa maka banci Ester terpilih menjadi kembrahen raja Persia?

Perikopta jelas ngatakenca maka lit dua kalak si sangat berjasa i bas terpilihna Ester menjadi kembrahen raja, e me Mordekai ras Hagai. Mordekai e me kalak Jahudi si ikut itaban Nebukadnesar Raja Babel rikut ras tabanen-tabanen si deban termasuk maba Joyakin Raja Juda. Gelar bapana Jair ras bas suku Benyamin nari. Turang Mordekhai sembuyak bapa lit sekalak, Ester gelarna, gelar Heberna e me Hadasa. Ia sekalak singuda-nguda si mejile rupana, janah potongenna pe sikap. Tupung mate orang tuana, ibuat Mordekai ia jadi anak angkatna, je nari ibelin-belinna bagi anakna kal (Bhs. Ind. nina, Mordekhai itu pengasuh Hadasa, yakni Ester, anak saudara ayahnya, sebab anak itu tidak beribu bapa lagi; gadis itu elok perawakannya dan cantik parasnya. Ketika ibu bapanya mati, ia diangkat sebagai anak oleh Mordekhai). Bahkan i bas ay. 15, ikataken maka Ester anak Abihail, turang Mordekai sembuyak bapa, si enggo ipebelin-belinna bagi anakna jine. I bas hal enda, jelas, Mordekai si posisina turang sembuyak bapa, tapi perban enggo yatim piatu Ester, tuhu-tuhu ifungsikenna dirina sebage orang tua, si seh kel kelengna man Ester, ipebelin-belinna bagi anakna jine. Janah Ester sendiri pe patuh nandangi Mordekai. Piga-piga kali ikataken, maka la lit man ise pe ituriken Ester maka ia kalak Jahudi, sabab bage nge ipadanken Mordekai man bana (ay. 10, 20). Bahkan labo terjeng je saja, i bas ay. 20 ikataken maka pedah Mordekai enda ipatuhi Ester kal, bali ras patuhna ia nai asum ia danak-danak denga ras Mordekai. Ulih perbahanen Mordekai erbahanca Ester bertumbuh menjadi sekalak diberu si labo cantik secara fisik, tapi kepribadianna pe cantik (inner beauty), bahkan sekalak diberu si tangguh, rela berkorban guna bangsana Jahudi (bdk. bindu 4:16).

Sedangken Hagai e me si bertugas ngawasai rumah gundik raja. Kenca perentah raja imomoken, nterem singuda-nguda ibaba ku Susan, janah Ester pe ikut i je. Ia pe ibaba Mordekai ku istana raja, je nari iendesken man Hagai. Tantangna jumpa pe, enggo ngena ate Hagai ngenen Ester, janah mehuli kel ia man bana (Bhs. Ind. nina, Maka gadis itu sangat baik pada pemandangannya dan menimbulkan kasih sayangnya, sehingga Hagai segera memberikan wangi-wangian dan pelabur kepadanya, dan juga tujuh orang dayang-dayang yang terpilih dari isi istana raja, kemudian memindahkan dia dengan dayang-dayangnya ke bagian yang terbaik di dalam balai perempuan).

Versi Audio Klik https://www.youtube.com/watch?v=RQQV9tX8feA

Kai si ibahan Mordekai ras Hagai erbahanca Ester terpilih jadi kembrahen raja Ahasweros. Seh i bas paksana Ester ngadap man raja, ipakena me pakenna sue ras si nikataken Hagai, pengawas gundik raja. Asum Ester ngadap raja, senang dingen malem kal ate raja ibahan Ester. Erkiteken si e ia ngenca ate raja si kelengna dingen si ngenana. Itamaken raja mahkota ku takal Ester janah iangkatna ia jadi kembrahen nggantiken Wasti. 

Pengkenaina

Tema PA-ta sekali enda, “Mereken si mehulina man anak”. Arah tujun pemena, akap kami enggo jelas, maka teks ras penjelasen suplemen bimbingen PA-ta teridah uga perbahanen  Mordekai ras Hagai mpekena-kena Ester. Tujun si peduaken, nehken kesetianna i bas jabu alu mpekena-kena anak guna ndatken masa depanna. Tujun si peduaken enda, tentu labo mudah, sabab labo hanya ituntut tanggung jawab Mamre terlibat i bas mpekena-kena anak-anak, tapi lit i je kata kesetian. Ertina, labo hanya sekali-sekali Mamre sebage bapa terlibat mpeke-kena anakna, tapi setiap saat bekerja sama ras nande i tengah jabu.

Mereken si mehulina, tentu labo hanya materi, tapi kasih sayang, perhatian, kebutuhenna sicukupi, sibabai kitik-kitik nari nggeluh erkemalangen man Tuhan. Tentu labo murah tanggung jawab enda silakoken, rikutken jaman si enggo canggih dingen kesibukenta sebage orang tua pe melala. Anak-anakta, termasuk si kitik denga enggo terbiasa ras TV kabel, game on line, internet, si banci mereken informasi ras mengakses ku kerina penjuru dunia (global). Erbage-bage jenis si jadi kebutuhen anak-anakta: hiburan, musik, mode, film dll., terpenuhi. Termasuk budaya kekerasen pe banci ialokenna i bas media elektronik nari. Tentu adi kurang pendampingenta, perhatianta, anak-anakta banci terjerumus ku bas hal si la mehuli. Emaka lit istilah, “absent parent, lost childeren, absent father, lost son”. Perlu kel itengeti.

Hal konkrit si arus iloken Mamre sebage bapa, sada lebe, lit tekad, niat guna menjadi bapa si hadir alu kekelengen ras perhatian man anak-anak. Labo cukup enggo sisekolahken, silesken ras sicukupi kerina kebutuhenna. Kekelengen, perhatian e me kap palas relasi orang tua ras anak. Kekurangan cinta erbahanca anak-anakta terjebak ras ndarami dingen ndatken cinta i bas ingan ras kalak si salah. Adi sedekah enda kurang perhatian, kekelengenta man anak-anakta, arus sipelimbarui. Si peduaken, bapa arus menjadi role model, usihen si mehuli man anak, bagi si ilakoken Mordekai man Ester. Ester menjadi seorang perempuan si berintegritas erkiteken idahna bas diri Mordekai. Mordekai biaren ia man Tuhan asangken manusia, khususna i jenda Haman (bdk. bindu 3:1-6). Mordekai tidak mau menjadi penjilat. Bapa arus jadi usihen si mehuli man anak-anakna. La nari berlaku istilah, “begiken kata ajarku nakku, adi perbahanku, la palah man usihen.” Satu perbuatan lebih berarti daripada seribu kata-kata tanpa perbuatan yang nyata. Sekalak perbapan usur buang sampah sembarangen, e ka nge siusih anakna si kitik denga. Sekalak perbapan ngatakenca man anakna si umur 5 tahun, “Papa mau tidur, kalau ada yang cari Papa, bilang Papa tidak di rumah ya Nakku. “ La ndekahsa reh tamu. “Ada Papa Nak ?” “Ada Om, jawabnya dengan polos, tapi kata Papa, kalau ada yang cari bilang Papa tidak ada di rumah”. La sisedari kita, bohong kecil-kecilan piah dungna enggo keterusen ngajari anak la jujur. Si peteluken, tetap sipantau keamanen anakta, apai genduari melala kel kasus penculikan terhadap anak. Adi siidah bas perikopta, Mordekai pe tetap memantau perkembangan Ester. Tep-tep wari Mordekai gawah-gawah  i bas kesain rumah gundik e guna meteh uga kecibal Ester, janah kai si nandangi jadi man bana. Memang labo banci 24 jam siawasi terus anakta, tapi paling tidak sibereken rusur kata persinget man anakta, “Kalau tidak kenal orangnya jangan mau pulang sama”. “Jangan mau menerima sesuatu apa pun dari orang yang tidak dikenal”. Si-WA atau telepon i ja keberadaan anakta adi enggo ia remaja, rsd. Ras terakhir, tetaplah babai anakta geluh erkemalangen man Tuhan. Bahan Kebaktian Keluarga. Labo perlu formal, tapi sifatna santai, ngoge Kata Dibata, rende ras ertoto. Pegancih anak-anak ras kita orang tua ertoto. Firman Tuhan menjadi pedoman i bas geluh jabunta. Adi sebage orang tua, khususna bapa tetap kita setia i bas jabu pekena-kena anakta maka sitotoken masa depan si terbaik ibereken Tuhan man bana. Tuhan tetap nampati Mamre GBKP sebage bapa si mesayang ras mehuli man anak-anakna.