SUPLEMEN PJJ GBKP TGL. 16 - 22 APRIL 2023

Pdt. Larena br. Sinuhadji (Nd. ReyRapha Tarigan)

ARON SI ERDAHIN I BAS RUMAH PERTOTON

(1 Kronika 23:24-32) [GBP GBKP : Tim Ibadah]

Penaruh

Ibadah e me kata serapan i bas bahasa Arab nari si ertina perbuatan untuk menyatakan bakti kepada Allah, yang didasari ketaatan mengerjakan perintahNya dan menjauhi laranganNya. Erti ibadah enda hampir sedalanen ras erti ibadah i bas kinitekenta. Pengertin ibadah i bas kinitekenta ibuat i bas kata “abodah” (bhs. Heber) ras “latreia” (bhs. Junani), penjelasen kerna dua kata enda banci sioge i bas Buku Katekisasi GBKP hlm. 150. I bas Konfesi GBKP Bab X ijelasken maka ibadah e me panggilan untuk memuliakan Allah di dalam Yesus Kristus melalui segala sesuatu yang telah diberikan Allah, bage pe sebagai ungkapan rasa syukur yang dinampakkan melalui pikiran, ucapan dan tindakan dalam kehidupan. Ertina ibadah i bas kinitekenta labo terjeng seremonial saja tapi lit konsekuensi moral etisna, emaka seluruh hidup kita, termasuk kerina si idahiken kita, e me ibadahta.

Erkiteken ibadah e penting i bas kegeluhenta, emaka i bas PJJ-ta sendah erlajar kita arah ogenta maka kerina si berkaiten ras ibadah i bas Gerejanta harus isikapken alu mehuli sebab ibadah e me perjumpaanta ras Dibata. 
 
Mpebagesi Kata Dibata

Adi sioge benaken ay. 1-23 teridah maka Daud amin pe ia enggo metua kal janah enggo lanai jadi Raja Israel, tetap denga ia merasa bertanggung jawab guna mpesikap kerina si berkaiten ras ibadah entah pe penyembahen man Dibata alu ngaturken pendahin kalak Lewi i Rumah Pertoton Tuhan. Labo murah ngaturken 38 ribu kalak Lewi si erdahin i Rumah Pertoton. Tapi ngasup denga Daud ngaturkenca dahin e. Lit 24 ribu kalak si ibere tugas guna ngaturken Rumah Pertoton. 6 ribu kalak tugasna ncikep surat-surat penting ras nimbang perkara. 4 ribu kalak tugasna jadi pengawal. Janah 4 ribu kalak nari tugasna e me muji Tuhan alu make alat-alat musik si enggo isikapken. 

I bas ogenta sendah secara khusus ituriken maka kenca bangsa Israel menetap i bas sada ingan, e me Jerusalem, janah Dibata enggo mereken kedamen ras keamanen, emaka Daud tuhu-tuhu memanfaatken situasi e guna mpesikap dahin-dahin i bas Rumah Pertoton. Iaturken Daud Terpuk Lewi guna nampati kesusuren Harun erdahin i bas Rumah Pertoton. Tugas-tugas pelayanen si harus ilakoken e me, mpekena-kena kesain ras bilik-bilik Rumah Pertoton, njagai gelah badia tiap barang-barang si badia, nikapken persembahen pangan man Dibata, nikapken tepung guna persembahen-persembahen, nikapken cimpa si la tama ragi, persembahen si ipanggang, nikapken tepung si iaduk, minak saitun, sukat-sukat ras timbangen, ertoto ras muji Tuhan tiap erpagi-pagi ras karaben bagepe sanga persembahen man Tuhan itutung i bas Sabat, Wari Raya Bulan Baru ras wari-wari raya si deban.

Arah ogenta sendah erlajar kita arah Daud. Amin pe enggo metua kal, tapi semangat Daud guna beribadah sangat tinggi, emaka ipesikapna kerina hal si berkaiten ras peribadaten i Rumah Pertoton. I bas si e pe erlajar kita maka ibadah e me sada bagin si penting i bas kegeluhen kalak si erkiniteken, baik ibadah si ilakoken secara pribadi bage pe ibadah si ilakoken secara komunal. I bas hal si deban, erlajar kita arah Terpuk Lewi si alu tutus nggit idilo ras iaturken guna erdahin i Rumah Pertoton. Janah si terakhir kerina dahin pelayanen i bas Rumah Pertoton enda banci iaturken alu mehuli erkiteken kerina pihak nggit saling bekerja sama guna semakin meningkatken kualitas ibadah bage pe pelayanen i bas Rumah Pertoton.

Pengkenaina

Tema si seh man banta i bas PJJ sendah e me “Aron si erdahin i bas Rumah Pertoton” i bas rangka sosialisasi Tim Ibadah bagi si tertulis i bas Buku Garis Besar Pelayanan (GBP) GBKP. Aron i jenda akap kami ertina rekan kerja, entah pe rekan pelayanan. Bagi Terpuk Lewi, i bas Gerejanta memang lit kalak si ikhususken guna erdahin i bas Gereja, umpamana Serayan, Pdt., Pt., Dk., Em. Tapi sue ras tema pelayanen i bas Gerejanta tahun enda, iajuk kerina perpulungen guna menjadi pelaku aktif i bas pelayanan. Ertina kerina dahin pelayanen i bas Gerejanta labo terjeng tugas tanggung jawab Serayan entah pe Pelayan Khusus.

Versi Audio Klik https://www.youtube.com/watch?v=DZoHMqzTIaM

Adi sioge Buku GBP GBKP Tahun Pelayanan 2021 - 2025 hlm. 74-83, erpalasken Kata Dibata i bas 1 Petrus 2:9 maka situhuna kerina anggota perpulungen e me pelaku aktif i bas pelayanen. Emaka salah sada cara guna melibatken kerina perpulungen ku bas kerina aspek kegeluhen Gereja e me alu menyerap kerina perpulungen e ndai ku bas Tim-tim Pelayanen. Salah sada Tim Pelayanen e me Tim Ibadah. Tim Ibadah enda iarapken mencakup hal-hal i teruh enda: 

• Multidimensional (kolaborasi usia, minat, profesi, tematik, dll.)
• Multikreatif (inovasi generasi, unit-unit pelayanan, dll.)
• Selebratif (Perayaan sesuai tahun gerejawi)
• Keluarga (syukur HUT, kelulusan, dll.)
• Pengajaran (doktrin/dogma, topik aktual, dll.)
• Penyegaran (KPI, sidang, rapat, konven, konsultasi, seminar, workshop)

Tim Ibadah enda banci ka berkolaborasi ras Tim-tim Pelayanen si deban umpamana Tim Musik ras Tim Kesaksian Ekspresif guna semakin memaksimalken fungsi ibadah-ibadah i GBKP.  
 
Adi sinen cakupen Tim Ibadah i datas maka situhuna melala dimensi i bas ibadah si banci terus ikembangken guna semakin meningkatken kuantitas ras kualitas erkiniteken man Dibata. Kerina cakupen enda akap kami sue ras Konfesi GBKP Bab X kerna Ibadah, khususna poin 3 nina, “Ibadah dilakukan setiap saat dalam konteks ruang dan waktu dalam bentuk ibadah pribadi, ibadah rumah tangga, ibadah minggu maupun ibadah jemaat lainnya”.

Kai si ate ituju i bas Tim Ibadah alu erbage-bage cakupen ibadah enda ndai? Tujun akhirna tentuna untuk mencapai poin 1 ras 2 i bas Konfesi GBKP Bab X kerna Ibadah bagi si enggo isingetken i bas penaruh i datas e me, supaya jemaat dapat mengungkapkan rasa syukurnya sebagai orang yang telah diselamatkan oleh Allah yang dinampakkan melalui pikiran, ucapan, dan tindakan dalam kehidupannya. Juga supaya jemaat terpanggil untuk memuliakan Tuhan melalui segala sesuatu yang diberikan Allah dalam hidupnya, baik pengetahuan, bakat atau talenta dan harta yang dimilikinya. Emaka mari radu ras sidukung ras mari radu ras kita muat bagin i bas kerina bentuk ibadah si iaturken i bas GBKP, bage pe mari radu ras kita menjadi pelaku aktif pelayanan i bas kai pe si lit i bas kita si enggo ipercayaken Dibata man banta.