PJJ GBKP Tgl. 08 - 14 Sept. 2019

PJJ GBKP TGL. 08 - 14 SEPTEMBER 2019

Nrs. Pdt. L. br. Sinuhadji (Bp. Rey Rapha Tarigan)

Tema : TUHAN KAP SI ERBAHAN KEPUTUSEN (Kuankuanen 16:1-2)

(Enterpreneurship: Pang Ngalaken Resiko)

Ogenta sendah e me bagin i bas pertenget Salomo nari benaken bindu 10. Adi sioge bindu 10 lit je piga-piga ayat si secara prinsip kiniteken berkaiten ras temata sendah. Umpamana, ay. 2 ikataken la ipelepas Tuhan kalak bujur kelihen, ay. 4 kebayaken jadi ulih kalak si mejingkat, rst. Ay. 22 akap kami arus jadi palas i bas enterpreneurship kalak si tek, nina “Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken”.

Masuk kita ku bas ogenta sendah, nina, “Manusia ersura-sura, tapi Dibata kap si erbahan keputusenna. Banci jadi payo iakapndu si idahikenndu, tapi TUHAN kap si nimbangsa kai si lit i bas ukurndu”. I bas terj. TB-LAI nina “Manusia dapat menimbang-nimbang dalam hati, tetapi jawaban lidah berasal dari pada TUHAN. Segala jalan orang adalah bersih menurut pandangannya sendiri, tetapi TUHANlah yang menguji hati”. Terj. BIS-BIMK, “Manusia boleh membuat rencana, tapi Allah yang memberi keputusan. Setiap perbuatan orang mungkin baik dalam pandangannya sendiri, tapi TUHANlah yang menilai maksud hatinya”.

Adi sioge bindu 10 nari seh ku bindu 16, teridah je lit dua jenis kalak, si pemena e me kalak si erkemalangen man Tuhan, si deban e me kalak si jahat, si la iikutkenna kepentaren Dibata, si mengandalken gegeh beluhna, si geluhna la sue ras peraten Dibata, rsd. Adi sisungkun kira-kira kalak si apai kita, tentu arapenta kita jadi kalak si tuhu-tuhu erkemalangen man Tuhan, i bas kai pe si ilakoken kita tuhu-tuhu mengandalken Tuhan, rsd. Adi bage ndai ateta tentuna tek kita maka sura-sura Dibata i bas kegeluhenta e me sura-sura si mehuli (bdk. Jer. 29:11). I bas palas kiniteken enda bage pe palas kiniteken si lit i bas bindu 10:22 ndai banci sipahami maksud si lit i bas ogenta sendah.

Ay. 1, bicara lit pe kebeluhenta i bas ber-enterpreneurship, entah pe melala perukurenta, rencananta, sura-suranta si mejile, si mehuli, si brilian, guna semakin memajuken usahanta entah pe pendahinta, arus lit kesadaren i bas dirinta maka kita manusia si terbatas, melala hal si la terantisipasi kita i bas rencanta si mejile ndai. E maka berelah ruang guna kuasa Dibata erdahin i bas rencananta ndai. Dibata si erbahan keputusen apakah rencananta ndai banci idalanken entah lit alternatif rencana si deban si lebih mehuli. Gelah alu bage Dibata si memandu kita i bas usahanta alu caraNa. Bicara melala pe resiko si arus sihadapi i bas usahanta, tek kita maka Dibata ngasup mengubah resiko-resiko ndai jadi peluang guna semakin memajuken usahanta.

Ay. 2, ukur si mehuli menentuken keberhasilenta i bas ber-enterpreneurship. Keberhasilen i jenda tentuna labo soal materi saja, tapi hal-hal si deban si non-material, umpamana lit kebujuren, lit kedamen, lit keriahen ukur, lit rasa cukup, ngasup kita ngataken bujur i bas keadaan si uga pe i bas kita ber-enterpreneurship, janah banci tuhu-tuhu ternikmati kita hasil usahanta. Hal-hal si non-material enda nge si situhuna paling penting i bas geluhta. E maka si inen Dibata i bas dirinta e me ukurta.

Tema i bas PJJ sendah e me “Tuhan si erbahan keputusen” masih i teruh tema kerna enterpreneurship e me pang ngalaken resiko. I bas kita erbahan usaha tentuna arus pang kita ngalaken resikona. E maka arus lit i bas kita kesadaren kerna resiko gelah banci siantisipasi kerina resiko si lit. Tapi i bas PJJta sendah mulihi kita isingetken guna selalu melibatken Dibata i bas kita erbahan usaha. Dibata si utamana i bas kita erbahan usaha. Pindolah gegeh i bas Dibata nari gelah ipengasupNa kita erkemalangen man baNa i bas kita erbahan usaha.