PJJ GBKP Tgl. 15 - 21 Sept. 2019

PJJ GBKP TGL. 15 - 21 SEPTEMBER 2019

Pdt. Larena br. Sinuhadji (Nd. Rey Rapha Tarigan)

Tema : AKU ARUS ERDAHIN (Masmur 121:4-8, Johanes 5:17)

(Enterpreneurship : Erbintuas)

Dibata si isembah kita Dibata si erdahin. IA nepa doni enda ras kerina isina benaken wari pemena seh wari peenamken. I bas IA erdahin kerina idahikenNa alu mehuli maka mekatep lit kata, “idah Dibata maka terang ndai tuhu-tuhu mehuli”, idah Dibata maka si nijadikenNa ndai tuhu-tuhu mehuli. Artina i bas Dibata erdahin kerina idahikenNa alu mehuli, la meros dingen la menggo, maksimal kerina idahiken Dibata. Erdahin labo merupaken kutuk entah sumpah tapi tanggung jawab si ibereken Dibata, sabab selaku mandataris Dibata kita isuruhNa guna ngusahai ras njagai doni enda ras kerina isina. Sabab kita me manusia si itepa rikutken tempasNa dingen ibereken perukuren man banta, maka erdahin selain tanggung jawab juga merupaken anugerah Dibata man banta.

I bas kita Masmur si jadi perikopta merupaken Masmur Jiarah, perdalenen menuju Rumah Pertoton Tuhan guna ersembah, alu judul “Tuhan kap sekawalku”. Maka Pemasmur secara khusus i bas geluhna ngalami erbage-bage perbeben (anakna la ersada arih, Absalom ras Amnon sibunuhen, Amnon ncedai turangna si Tamar, anakna ersura-sura merebut tahtana alu cara si la mehuli, rsd.), ertina mbue tuhu perbebenna. E maka i jenda pengakun Pemasmur maka Dibata ngenca penampatna. I jenda i bas ay. 4-8, Pemasmur naksiken maka Dibata sekawalna ndai, penampatna ndai la pernah madat mataNa, la tertunduh pe (Dibata tetap terjaga 24 jam). Kai saja si ilakoken Dibata : arah kemehunta IA hadir guna ngampang-ngampangi kita, lA bangger aminna pe kita iparpari las matawari tupung suari entah pe erkiteken sinalsal bulan. Tuhan sekawal i bas kerina mara nari, Tuhan si njagai peberkat ras permulihta. Ertina, i bas awal seh pendungi geluhta tetap ijaga kawali Tuhan.

Bage pe i bas kita Johanes 5:17 “nina Yesus man kalak Yahudi,” Bapangku kap erdahin kap lalap, e maka Aku pe arus erdahin”. Konteks perikop enda e me i ja ipepalem Yesus kalak sakit si enggo 38 tahun mengalami sakit pinakit. I bas paksa e lit kolam Betesda si niteki maka asum lau e erburak ibahan malekat Tuhan nusur ku lau kolam e, erburak lau e, maka kalak si pemena bengket ku kolam e, kai pe pinakitna banci malem. Idah Yesus lit kalak si enggo 38 tahun sakit dingen la banci erkai pe, sabab enggo leben rusur kalak masuk ku kolam e. Maka reh Yesus, “atendu kin gelah malem pinakitndu?” Kekekenlah, angkat amakndu je nari dalankenlah”. Paksa si e minter malem penakitna, iangkatna amakna je nari erdalan ia. Biasana adi lit kade-kadenta si enggo ndekah sakit kedungenna malem, pasti meriah ukurta, bujur ninta man Tuhan. kepeken i jenda kalak Yahudi malah la senang, idaramina dalan guna pesega-sega Yesus, sabab ipepalemNa kalak si sakit ndai i bas wari Sabat. Bagem siidah guna leterlekna, uga kakuna, kalak Yahudi i bas makeken undang-undangna. Ngadi kita nehken kekelengen arah aturen-aturen si lit. Tapi ijabab Yesus i jenda maka BapaNa pe erdahin kap lalap, maka IA pe arus erdahin. Bahkan megi kata Yesus enda, ergegehna kalak Yahudi ndarami dalan guna munuh Yesus sabab iakap kalak Yahudi labo saja undang-undang wari Sabat ilanggar Yesus tapi pe ikatakenNa maka Dibata e BapaNa, alu bage iperseri Yesus bana ras Dibata.

Tema-ta ngatakenca “aku arus erdahin” (enterpreneurship : erbintuas). Kita erdahin selain tanggung jawab, anugerah tapi pe erkiteken ngusih Dibata. Dibatanta si isembah kita erdahin lalap, labo saja i bas IA nepa doni ras kerina isina, tapi seh ngayak gundari pe ikawali ras isampatiNa kita, bahkan perdalinen alam semesta tetap i teruh kuasa Dibata.

Erbintuas ertina erdahin alu semangat, alu tetap mperdiateken faktor istirahat. Istirahat perlu gelah lit gegeh si mbaru, semangat si mbaru guna banci kita erdahin ka. Erbintuas teridah arah pentar kita makeken kesempaten si ibereken Dibata man banta. Umumna kalak si sibuk nge si beluh ia makeken waktu alu mehuli, banci kerina dahin si enggo lit bas jadwalna idahikenna alu mehuli. Ras kebalikenna, kalak si malas, si mbue waktuna malah banci telat rusur bahkan ketadingen i bas kegiaten kai pe, sabab kurang pentar ia ngaturken waktuna.

Adi Dibatanta Dibata si erdahin, erbintuas maka kita pe sebage anak-anakNa siusih Dibata. Dibata katawari paksa pe erdahin guna kiniulin manusia. Termasuk i bas wari Sabat pe adi dalam rangka nehken kekelengen tetap IA erdahin. Ertina, la lit sada undang-udang pe si banci membatasi keleng ate Dibata. Johanes Calvin alu sloganna ngatakenca “ertoto ras erdahin”, ertina i bas kita erdahin palasna ertoto, gelah kai pe si idahiken kita tetap ijujuri Dibata. Maka umumna negara-negara si menganut teologi Calvin khususna Eropa ciri-cirina disiplin, pekerja keras ras kai pe sidahikenna guna kemulian Tuhan. Mari terus-menerus sipakenken waktu, kesempaten alu erdahin alu mehuli, mengembangken dirinta rikutken potensi, arah dahinta labo hanya keperlunta tercukupi tapi kita pe jadi pasu-pasu (berkat) man kalak si deban.