PJJ GBKP Tgl. 22 - 28 September 2019

PJJ GBKP TGL. 22 - 28 SEPTEMBER 2019

Pdt. Larena br. Sinuhadji (Nd. Rey Rapha Tarigan)

Tema : PINDOLAH MAN TUHAN (Sakaria 10:1-3)

(Enterpreneurship : Okultisme)

Okultisme berasala i bas kata “occult” (Inggris) si ertina gelap, tersembunyi, gaib, misterius. Ras “isme” e me paham entah ajaren. Jadi okultisme e me paham entah pe ajaren kerna kepercayaan nandangi kuasa-kuasa kegelapen, kekuaten gaib, i luar kuasa Tuhan. Paham si mabai kalak tek nandangi roh-roh si lit bas doni enda banci nampati, masu-masu, mereken keberuntungen, bahkan nakiti, membunuh si erbahanca manusia mengalami kebiaren ras merasa perlu gelah isampati roh-roh si ndai, si erbahanca manusia terlibat ras terjun ku bas praktek okultisme.

Bahan ogenta ibere judul “Tuhan erpadan mereken kepulahen” (terj. TB-LAI nina “Hanya Tuhanlah pemberi hujan”). Judul i bas bhs. Indonesia langsung lebih terarah maka lit kebiasan paksa si e i bas kalak Israel ngelakoken praktek okult. Erkiteken merdang maka butuh kel lau udan bangsa e. Tapi kepeken bangsa enda nungkuni berhala-berhala, guru pertendung si kinatana meleset ka hasilna, sabab jabab si idatca e me kata guak dingen la tuhu. Deba iturikenna antusen nipi, tapi si e mabai bangsa e papak ngenca, dingen pengapul si ibereknna la lit gunana. Sabab antusen nipi banci erbahanca kalak senang, banci ka reh gulutna. Piah dungna suasana hatina tergantung i bas nipi, labo ku bas kerembakenna ras Tuhan.

Emaka nina Tuhan arah nabi Sakaria, pindolah udan man Tuhan tupung paksa merdang. Sabab  jelas Tuhan me si nepa doni ras kerina isina, termasuk IA ka si banci perehken lau udan ku doni. Perbahanen bangsa Israel enda enggo tuhu-tuhu ngeliami gelar Tuhan sabab jelas i bas 10 Perentah Tuhan nina “Ola sembahndu dibata-dibata si deban, tapi sembahlah AKU”.

Praktek-praktek okultisme seh ngayak gundari lit denga si ngelakokenca, enggo pe ia tek man Tuhan. Ertina percaya kepada Tuhan, percaya ka ia man kuasa-kuasa si deban. Kinitekenna la bulat man Tuhan alu alasen, adi mindo man Tuhan prosesna ndekah, la instan dingen lenga bo tentu bagi si niarapken kita. Ngalaken pinakit, ndatken jabaten entah pe kekuasaan (berita Kompas 05032009 mbue pejabat tinggi negara berhasil ndatken jabatenna erkiteken mindo man dukun), pengian daging kula - juma - rumah, ndarami jodoh, penglaris, make jimat-jimat, termasuk ndilo wari udan, semal denga ilakoken piga-piga daerah asum terjadi kelegon. Upacara ersimbu entah ndilo wari udan ilakoken alu cara saling menyiram antara satu kalak ku si deban. Ras upacara enda iteki banci nggerakken alam guna ndilo udan. Bahkan lit ka deba make Pustaka Si Badia, minyak urapan guna mpelawes begu. Ertina, enggo mengilahken Pustaka Si Badia entah minyak urapan seolah-olah i bas barang-barang si ndai me je kuasa Dibata. Padahal kuasa Dibata lit i bas Dibatata jine si kin arus man baNa kita tek ras ernalem. Melala denga praktek-praktek okult si nilakoken dalam rangka ndalanken usahanta.

Tema-ta ngatakenca “Pindolah man Tuhan”. Ertina Dibatanta ulu kerina sinasa lit, IA si nepa doni enda ras kerina isina termasuk kita, IA me alfa ras omega, maka enggo sepatutna kita mindo man baNa. Firman Tuhan sendiri ngatakenca, “pindolah, tentu ngalo me kam”. Enggo pasti jawaban Tuhan banci “ya”, banci “timai lebe”, banci “lang”. Tapi arus siteki kai pe jawabenNa pasti rikutken si ngena ateNa guna geluhta (bdk. Jer. 29:11). Banci jadi la iberekenNa rikutken sura-suranta erkiteken dosa-dosanta si jadi penghambat. Bagi si tertulis i bas Jes. 59:1-2, “Ola akapndu maka kurangsa gegeh TUHAN lako ngkelengi kam entah pe paseksa akapndu IA lako ndengkehken sorandu erlebuh. Erkiteken dosa-dosandu nge maka la idengkehkenNa kam. Dosa-dosandu nge si nirangken kam ras Dibata”. I bas si e tetap sievaluasi dirinta ras mindo pengalemi dosa i bas Dibata nari. Ernalemlah tetap kita man Tuhan amin kai pe si terjadi sabab beliden gegeh Tuhan nampati kita asangken kuasa-kuasa si deban.