PA Kategorial GBKP Tgl. 15 - 21 Sept. 2019

PA MORIA GBKP TGL. 15 - 21 SEPTEMBER 2019

Pdt. Larena br. Sinuhadji (Nd. Rey Rapha Tarigan)

Ogen : Masmur 104:13-18

Tema : USILAH DIBATA SI RATUR

Tujun : Gelah Moria :1) Ngidah maka Dibata njadiken sinasana alu ratur. 2) Nggit terus erlajar nggeluh bersih ras teratur.

Masmur 104 enda ibere Judul Pujin Man si mada Tinepa (TB- LAI Kebesaran Tuhan dalam Segala CiptaanNya). Maka Masmur enda merupaken kesaksin Pemasmur kerna kemahakuasan Dibata si teridah arah bekas tinepaNa. Ertina maka i bas Dibata nepa doni enda ras kerina isina, teratur, tertata alu mehuli dingen sistematis. Sabab labo langsung wari pemena itepa Dibata manusia, tapi i bas wari terakhir. Kenca enggo kuh kerina keperlun geluh manusia maka itepa Dibata manusia. Alu bage enggo sepatutnalah kita manusia muji-muji Dibata. Piga-piga hal sibanci siidah arah perikopta :

- Maka lau udan ilitken Dibata guna kebutuhen manusia ras kerina tinepa Dibata sideban. Dem doni enda alu pasu-pasu Tuhan arah rehna lau udan. Ertina, maka lau e keperlun sipaling utama i bas kerina mahluk hidup. Banci sibayangken genduari, enggo cukup ndekah lego, bahkan terjadi kebakaren hutan sierbahanca bencana asap i bas daerah pekanbaru bahkan Riau ras piga-piga daerah. Maka kita butuh kel lau udan gelah segar kerinana, labo hanya manusia tapi kerina mahluk hidup.

- Ipeturah dukut-dukut guna rubia-rubia

- Erbage sinuan pe lit guna manusia, maka lit pemeteh ras kebeluhen manusia guna nuan-nuan, alu bage tercukupi ka kebutuhen geluh manusia. Termasuk pe, anggur, batang saitun silabo saja ikonsumsi guna keperlun geluh manusia tapi pe termasuk guna kesehaten ras kecantikan manusia.

- Lit hubungen simehuli antara batang kayu ras perik-perik. Batang cemara turah mejile dingen ije me rasar perik-perik si gedang kerahungna.

- Deleng-deleng simeganjang jadi ingan nggagat kambing kerangen, dingen i bas liang-liang batu-batu cebuni me landak.

Bageme pengaturen, penataan Tuhan i bas Ia nepa doni enda kerina, tuhu mehuli ras saling erkawiten sada ras sideban. Janah manusia sebage mandaris Dibata ibereNa kuasa guna njagai ras ngusahai kerina sienggo itepa Dibata, secara khusus sinuan-sinuan ras rubia-rubia. Tapi erkitken dosa, simehuli ndai piah dungna enggo ceda. Kerangen mbue si enggo itabahai alu sembarangen piah dungna terjadi erosi, banjir, longsor. La lit nari ingan tading si sikap man rubia-rubia. Melala enggo kejadin, macan, gajah ular bengket ku pemukiman masyarakat erkiteken la lit nari inganna sikap i bas kerangen. Sampah iambeken alu sembarangen, bahkan Indonesia penghasil sampah plastik terbesar. La nari banci sitentuken musim perudan, musim perlego erkiteken cedana alam pengelako manusia.

Arah bahan PA nta sekali enda, mulihi kita ipindoken gelah jadi mandataris Dibata simehuli guna pekena-kena doni eda ras kerina isina. Tempas Dibata ibas dirita ula si siaken bahkan kita enggo itebus Dibata alu darehNa sibadia, ertina, biak silamehuli aturna la nari erkuasa i bas geluhta. Mari si usih Dibata si ratur, sibersih. Pola hidup sehat, bersih, teratur pe merupaken program pemerintah ija  aturna menjadi pola hidup kerina anggota jabu termasuk anak-anakta sikitik denga. Prinsip dasar PHBS emekap mencegah lebih baik dari pada mengobati. PHBS arus ilakoken i bas jabu, i sekolah, i tempat umum. Sebage contoh : Menggunakan air bersih, mencuci tangan dengan air bersih dan sabun, membersihkan jentik i rumah, makan buah dan sayur setiap hari, melakukan aktivitas fisik setiap hari, tidak merokok di dalam rumah. Sipenting, silakoken kai sienggo sieteh kita guna kiniulinta bage pe sekelewetta. Adi enggo kita sebage orang tua, khususna moria terbiasa hidup bersih, sehat ras teratur maka enggo pasti anak-anakta pe ngusih kai sinilakoken kita, bahkan e merupaken investasi terbesar dalam rangka kesehatenta. Mari tetap siusih Dibatanta si ratur.

PA MAMRE GBKP TGL. 15 - 21 SEPTEMBER 2019

Nrs. Pdt. L. br. Sinuhadji (Bp. Rey Rapha Tarigan)

Ogen : Perbahanen Rasul 9:1-9

Tema : ERBERITA ALU KEKELENGEN

Tujun : Gelah Mamre : 1) Meteh maka la ngena ate Dibata cara-cara kekerasan. 2) Erkiniteken alu payo si teridah arah sikap toleransi ras kekelengen labo kekerasan.

Ogenta sendah e me turi-turin kerna pertobaten Saulus entah pe Paulus. Paulus tubuh i tengah-tengah keluarga Yahudi i Tarsus Kilikia (Perb. Rasul 21:39; Fil. 3:5) e maka idatkenna warga negara Roma (Perb. Rasul 16:37; 22:25-29). Asal keluargana e me i bas suku Benyamin nari (Rom. 11:1). Paulus termasuk i bas golongen Farisi nari si terdidik alu mehuli (Perb. Rasul 22:3; 23:6; Gal. 1:13-14; Fil. 3:5; rsd.). Sope bertobat Paulus termasuk kalak si fanatik i bas agamana e me agama Yahudi (Fil. 3:6). Sanga kiniteken man Yesus Kristus erkembang i tengah-tengah bangsa Yahudi, merawa Paulus erkiteken melala kalak Yahudi si beralih keyakinan, si asalna agama Yahudi nari jadi erkiniteken man Yesus Kristus. Erkiteken si e dahin Paulus sope bertobat e me erbahan erbage-bage kiniseran man perpulungen kalak si tek, isiksana seh mate kalak si tek man Yesus janah itamakenna melala kalak si tek ku bas penjara (Perb. Rasul 22:4; rsd.), ersura-sura Paulus guna engkernepken perpulungen kalak si tek (Perb. Rasul 8:3; rsd.).

Sanga Paulus ergiah-giah guna niksai ras munuhi perpulungen kalak si tek, reh Tuhan Yesus i bas sada kejadin si erbahanca sengget Paulus ras kerina teman-temanna i bas perdalanen ku Damaskus. Rempet terang i langit nari ersinalsal engkeleweti Paulus si erbahanca ia ndabuh ku taneh. Ibegina sora erlebuh, “O Saul, Saul, engkai maka iayakindu Aku?” Ngaloi Saul, “Ise Kam Tuhan?” Erjabab Tuhan, “Aku kap Yesus si iayakindu.” Amin bage gia, la ibunuh Tuhan Paulus, ibereken denga man bana kegeluhen amin pe enggo lanai erpengidah. Isuruh Tuhan Paulus berkat ku Damaskus. Seh Damaskus telu wari dekahna Paulus la man ras minem. Kenca enggo jumpa ras sekalak aja-ajar Tuhan si tergelar Ananias e maka enggo banci Paulus erpengidah mulihi. Kenca pertobatenna, Paulus tuhu-tuhu ipake Tuhan jadi rasulNa, melala kalak jadi kalak si erkiniteken man Yesus erkiteken dahin pelayanenna. Cara-cara si ndekah entah pe cara-cara kekerasen i bas ia erkiniteken entah pe er-agama enggo lanai ipakena. Idahikenna dahin-dahin pelayanen alu kekelengen i bas Yesus Kristus.

Tema i bas PA-ta sendah e me “Erberita alu kekelengen” i teruh tema umum “Radikalisme Agama”, alu tujun gelah Mamre meteh maka la ngena ate Dibata cara-cara kekerasan janah erkiniteken alu payo si teridah arah sikap toleransi ras kekelengen labo kekerasan. Memang salah sada kelemahen i bas erkiniteken e me fanatisme. Fanatisme enda labo terjeng njemak alu paguh kebiasaan-kebiasaan agamana tapi pe cenderung menyerang agama entah pe keyakinen si deban si la seri ras kebiasaan-kebiasaan agamana. Kebiasaan-kebiasaan agama i jenda maksudna er-agama secara dangkal, ilakokenna tradisi agamana tapi la iangkaina kai maknana. Kalak si bagenda umumna la ia nggit erlajar secara mandiri kerna kitabna ras agamana, tek saja ia kai si ikataken guru-guru agamana, padahal lenga bo tentu kai si iajarken guru-guruna e ndai payo ras tuhu-tuhu erpalasken kitab sucina. E maka bicara isuruh munuhi kalak pe nggit ia, sebab ikataken guru-guruna ndai, adi nggit munuhi kalak si la sada kiniteken, upahna e me masuk surga.

Paulus entah pe Saulus e me sada contoh kalak si erkiniteken secara dangkal entah pe fanatik. Amin pe ia sekalak si terpelajar, melala gelar akademisna (S1, S2, S3, Post Doctor) tapi adi enggo kena virus fanatisme, banci robah ia jadi sekalak si motu ras kejam. Tapi i bas pengalamen geluh rasul Paulus erlajar kita arah pertobatenna. Nggit ia robah jadi kalak si mehuli rikutken kiniteken man Yesus (bdk. Perb. Rasul 9:19-31; rsd.), nggit ia erlajar terus-menerus secara mandiri kerna erkiniteken si payo i bas kata Dibata (Fil. 3:8; rsd.). Enda nge situhuna kunci i bas erkiniteken alu payo, nggit kita erlajar secara mandiri kerna kinitekenta. Dibata pe nggit gelah kita bersikap terbuka, nggit menerima perbedaan si lit i sekelewetta, janah Dibata pe nggit kita er-Berita Si Meriah alu cara-cara si sue ras peraten Dibata, labo alu cara-cara si memaksa apai ka alu cara-cara kekerasan.