PJJ GBKP Tgl. 18 - 24 Agustus 2019

PJJ GBKP TGL. 18 - 24 AGUSTUS 2019

Pdt. Larena br. Sinuhadji (Nd. Rey Rapha Tarigan)

Tema : PERBULANGEN JADI USIHEN (Kejadin 18:1-10)

(HUT MAMRE GBKP)

I bas tgl. 26 Agustus tahun enda kita merayakan HUT Mamre si pe - 26 tahun - ken. Ras setiap kita merayakan HUT biasana lit usur arapenta ras totonta maka si sangana merayakan HUT reh panjang umurna ras tambah kedewasaanna.

Sekali enda erlajar kita, khususna Mamre, man sekalak tokoh PL si igelari “bapa kalak si erkiniteken” e me Abraham. Judul perikop ogenta “Sekalak anak dilaki ipadanken man Abraham” (terj. TB-LAI nina “Allah mengulangi menjanjikan seorang anak laki-laki kepada Abraham”). Adi rikutken TB-LAI maka situhuna enggo pernah lit ipadanken Dibata man Abraham kerna kesusurenna. Ras memang payo, adi siperdiateken i bas Kej. bindu 12 asum Dibata ndilo Abraham situhuna enggo ikataken Dibata maka enterem pagi ibahan Tuhan sinusurna, janah jadi bangsa si mbelin. Je nari i bas bindu 15 pe iulihi Dibata ka i bas sada pengenehenen maka tetap ate Dibata masu-masu Abraham e maka ula ia mbiar. Tapi ijabab Abraham, kai gunana upah si ibereken Tuhan man bana adi labo lit anakna. Si Elieser ngenca si erdahinna si ngaloken tading-tadingen i bas ia nari. Tapi nina Tuhan, labo Elieser tapi anak si nipupus i bas ia nari ras Sara ndeharana. I je me isuruh Tuhan maka idah Abraham bintang i langit ras ibeligaina, maka bage me pagi teremna kesusuren Abraham. Bage pe i bas bindu 17 :15 iulihi Dibata ka nehken padanNa man Abraham ras i je me gelar “Abram” berubah jadi “Abraham” ras “Sarai” jadi “Sara”. Nina Tuhan, “Kubereken ia mupus anak dilaki man bandu …” Ras i bas perikopta bindu 18 i je me sekali nari ipadanken Dibata anak dilaki man Abraham. Bahkan jelas perkataan malekat Tuhan ay. 10, “9 bulan nari, reh ka Aku ku jenda, i je pagi Sara enggo mupus sada anak dilaki.”

Ituriken maka i bas sada wari Tuhan encidahken baNa man Abraham deher sada batang-batang kayu si galang i Mamre. Sanga e wari seh kel lasna, janah Abraham kundul i lebe pintun kemahna. Kenca idahna telu kalak ndai minter erbage-bage hal ilakoken Abraham tanda kepedulianna ras kekelengenna, sikap si metemue :

- Kenca idahna, minter ia kiam ngalo-ngalosa.

- Nehken kehamaten alu erjimpuh ayona seh ku taneh, ras nina, “O Tuan mari ngadi lebe janah singgah ku rumahku. Berelah maka aku ngidangi kam”. Perbahanen si la lazim, soalna enggo ka ia si mereken pertolongen, ia ka si mindo alu meseksek.

- Ilegina lau man pemurihi nahe temuena, sabab radu ras sieteh kondisi gurun pasir si erdebu.

- Isikapkenna pangan man temuena gelah banci nambahi gegeh guna nerusken perdalanen.

Engkai makana nggit Abraham erlatih-latih menjamu temuena e, padahal situasi paksa si e seh kel lasna, biasana kalak kisat bergerak terlebih enda man kalak si deban. Madin enjoy santai istirahat. Palasna bagi si ikataken Abraham “Enggo reh temuena e ku rumahna e, sada kehamaten kel man bana, e maka ielaina atena temuena e asa bancina”. Bdk. Heber 13:2 “Ingetlah ngalo-ngalo kalak si reh kesilang ku rumahndu. Lit piga-piga, asum ialo-alona kalak kesilang ku rumahna, alu la ietehna enggo ialo-alona malekat”.

Ras kerina si ibahan Abaraham si terbaik, labo menggo, labo asal-asalen, labo mekarus. Suruhna minter Sara muat tepung si mejilena sada guni aduk, guna itasaken jadi roti asa biasana. Je nari ia sendiri kiam muat sada lembu si mburna tapi nguda denga, paksa ntabeh man pangan. Ras iberekenna man suruh-suruhenna guna igeleh ras itasakenna. Ibuatna Abraham ka susu si mejilena. Kenca enggo jadi Abraham sendiri si ngelai kalak enda man i teruh batang kayu e.

Kedungenna, pasu-pasu (berkat) Tuhan ibereken man Abraham arah padan si enggo ikataken Tuhan sebelumna e me kerna anak si bakal ipupusna. Sekalak i bas si telu kalak ndai ngerana man Abraham maka siwah bulan nari reh denga ka Ia ku inganna, i je pagi Sara enggo mupus sada anak dilaki. Ras Sara sendiri megi-megi i balik pintun kemahna. La lit si metahat i bas Tuhan, aminna paksa si e umur Abraham enggo 100 tahun, ras Sara 90 tahun (bindu 17:17).

Perikop enda jadi perenungen man banta khususna Mamre si merayakan HUTna ke-24 tahun. I bas hal kai nge Mamre enggo jadi usihen? Enggo pasti penungkunen enda menjadi evaluasi (introspeksi) mulihi man Mamre. Enggo melala si mehuli silakoken Mamre benaken i tengah jabu, Gereja, ingan pendahin, bas persadan merga si lima, lingkungen masyarakat rsd. Tapi ateta gelah semakin hari semakin lebih baik.

Tentuna si niarapken, arah motto Mamre, “Mamre Erpemere Mamre Erdiate”, Mamre melumbar mere, la pelit, bagi tokohta sekali enda Abraham. Mereken si terbaik, termasuk i bas pelayanenna, gegeh rikut talenta si lit si banci ipersembahken. Maun waktu si enggo ibereken Tuhan pe la ngasup kita mengelolasa. I ja kedungenna absen i bas kegiaten Gereja subuk Sermon man Serayan Tuhan si dilaki, Kebaktin Minggu, PJJ, PA Mamre rsd. Termasuk i tengah keluarga, alu alasen sibuk, maka kurang waktu Mamre guna keluarga. Terlebih alu teknologi infomasi si canggih, gadget. Kita, khususna Mamre, sibuk dengan dirina sendiri, lupa man Tuhan, lupa man keluarga, enggo lebih asyik dengan HPna sendiri ras kerina aplikasi si lit. Mamre erdiate. Lebe i tengah jabu. Puji Tuhan enggo melala genduari Mamre sangat peduli guna keluargana, la nari bagi si nai. Banci bekerja sama ras pasangenna guna ngkelengi anak-anak, guna rumah tangga rsd. Enggo urak Mamre si egois si hanya ngukurken dirina sendiri. Ras melala denga si banci igargari i ja Mamre sebage kepala keluarga, imam jabu tuhu-tuhu iarapken jadi usihen man keluarga rikut man sekelewetna.

I bas kata pendungi, melala Mamre kalak si jago, si beluh, berintelektual, tapi seberapa banyak si iteh kita, tapi sidalanken kai si mehuli si engo sieteh kita. Selamat HUT Mamre Dibata si masu-masu kam.