PA Kategorial GBKP Tgl. 18 - 24 Agusus 2019

PA MORIA GBKP TGL. 18 - 24 AGT. 2019

Pdt. Larena br. Sinuhadji (Nd. Rey Rapha Tarigan)

Ogen : Kuan-kuanen 12:1-4

Tema : KU TANDAI PERBULANGENKU

Tujun : Gelah Moria :

1) Meteh kuga ndehara si jadi kemulian ras keriahen man perbulangenna. 2) Lebih nandai perbulangenna alu bage banci ngkuhi keriahenna.

Metode PA : Nulisken biak perbulangen si mehuli

Perbulangen e me pemere Dibata man banta si arus terus-menerus la lit kata ngadi (ending) guna banci kita nandaisa entah pe si lebih tepat menjiwaisa (bage sebalikna, saling menjiwai i bas jabu maka e si erbahanca jabu e sempabu). Secara khusus i bas HUT Mamre si pe-24-ken i bas tgl. 26 Agustus enda ibabai man banta Moria, gelah kita nandai perbulangenta gelah ngasup kita ngkuhi keriahenna. I bas perikop si jadi ogenta sendah Salomo mereken piga-piga kata telah si jadi gelementa.

- Hal si pemena kel ipindoken Salomo asum ia jadi raja Israel gancih bapana Daud asum isuruh Tuhan kai si ate Tuhan iberekenNa man Salomo. Ipindoken Salomo kepentaren. Bena-benana kepentaren e me erkemalagen man Dibata. Kepentaren mabai kita ngasup mbedaken apa si mehuli apai si lang ras sipilih si mehuli si ngena ate Dibata. E maka i jenda ilumbaken Salomo maka kalak si pentar, erpemeteh senang adi lit kalak si mpersingetisa (ipandang). Kalak si erngena ate man pemeteh mesikel ia ituriken kesalahenna tapi kebalikenna kalak lenge la ngena atena ipandang. Ras memang arah kita nggit ievaluasi, ikritik, ipandang maka ambah wari sikap geluhta, karakter dirinta pasti reh ulina. Lit sikap terbuka untuk ikoreksi. Tapi selaku kita si mandang kalak si deban pe perlu kita berhikmat, i ja tetap alu cara si tenteng, si la mpermaluken kalak si nterem. Alu cara si mehuli. Tanpa isedari situhuna kegiaten PA Moria merupaken cara Dibata mengevaluasi kita adi lit hal-hal si sedekah enda si la mehuli silakoken. Arah teman si nuriken pendapatna, pengalamenna tuhu banci jadi pelajaren man banta.

- Ay. 2-3. Maka kalak si bujur tetap ipasu-pasu Tuhan kegeluhenna, walaupe banci jadi tangtangna ialamina perbeben, tangtangen (terj. TB-LAI “Orang baik dikenan Tuhan … akar orang benar tidak akan goncang. Orang tidak akan tetap tegak karena kefasikannya”). Sada paksa waktu ndabuh ka ia erkiteken perbahanen si jahat si nilakokenna. Kai si ikataken Salomo mabai kita gelah ula erleja-leja erbahan si mehuli si ngena ate Tuhan. Dingen la perlu morah ateta asum kalak jahat siidah seolah-olah secara materi bayak. Sabab sada paksa waktu lesap nge kerina, sabab nembeh ate Tuhan si jahat sura-surana.

- Ay. 4. Ndehara si mehuli, ia kap kemulian ras keriahen perbulangenna. Di balik kesuksesan seorang suami, ada istri yang yang hebat, e me ucapan mantan Presiden Amerika Serikat Barack Obama man ndeharana Michelle Obama di hari HUT Pernikahan ke-25. Ndehara si mehuli ietehna kai si menjadi kebutuhen perbulangena. Ras memang terus-menerus kita erlajar arah erbage-bage pengalamen i bas geluh jabunta rikut pemeteh secara umum kerna perbedaan dilaki ras diberu:

- Diberu lebih mbue ngerana ibandingken dilaki. E maka adi lit persoalenna diberu atena ibegiken, entah pe iluamkenna permasalahen si lit bas ia alu ia ngeranai entah pe jungut-jungut. Sedangken dilaki lebih senang ia sinik ras mutusken persoalenna sendiri.

- E maka i bas memecahken persoalen pe, diberu lebih senang curhat tapi dilaki lebih memilih ndungi persoalenna sendiri tanpa perlu ngerana ras ise pe, termasuk man ndeharana.

- Diberu lebih berpikir emosional sedangken dilaki lebih berpikir logis.

- Diberu lebih atena ikelengi, iperdiateken, sedangken dilaki ihamati. E maka kitik kel iakapna adi ibanding-bandingken ras perbulangen si deban si lebih sukses asangken ia.

- Dilaki lebih melihat warna dengan simple secara garis besarna saja, sedangken diberu jangkauan penglihatanna lebih luas, melihat warna lebih detail. E maka terkadang perbulangenna la idahna kacamatana si tading, tapi kita minter siidah i ja letakna.

Tapi situhuna kunci kebahagian i bas jabu e me kap saling, radu engkelengi, radu menjiwai, radu nampati, radu mperdiateken, rsd. Labo hanya sembelah saja, entah pe egois kita ateta lalap iperdiateken ras ilayani. Pasti akan terjadi ketimpangen. Tapi i bas HUT Mamre sekali enda, mulihi kita ipersingeti gelah tetap siinget tanggung jawabta guna nehken kekelengen man perbulangenta. Guna keharmonisen jabunta, keutuhan jabunta terus-menerus kita erbahan si mehuli guna perbulangen ras anak-anakta. Tetap sipebelin biak mengalah guna kiniulin jabu, rukur guna kiniulin jabu, ngasup memaafkan, tidak menutut pasangenta berubah tapi kita lebih berubah rikutken si niarapken. Memang enda labo gampang, tapi guna kiniulin jabu sipindo tetap gegeh man banta selaku ndehara.

PA MAMRE GBKP TGL. 18 - 24 AGT. 2019

Nrs. Pdt. L. Sinuhadji (Bp. Rey Rapha Tarigan)

(Usaha Pelestarian Secara Sosial - Manusia & Pinakit Sosial)

Ogen : 1 Korinti 5:1-13

Tema : SIRANGILAH PERBAHANEN SI MELKET

Tujun : Gelah Mamre :

1) Sedar maka perbahanen si melket nembeh ate Dibata

2) Nadingken perbahanen si melket

Metode : Sharing kerna nadingken salah sada perbahanen si melket

Judul perikop si jadi ogenta sendah “Lagu la mehuli si lit i bas perpulungen”, i bas terj. TB-LAI nina “Dosa dalam jemaat”, i bas terj. BIS-BIMK lebih spesifik isebutken lagu la mehuli entah pe dosa si ilakoken nina “Kecabulan dalam jemaat”. Kecabulan entah pe erlua-lua si ilakoken sekalak anggota perpulungen e me nggeluh erlua-lua ras ndehara bapana. I bas sada tafsiren ngatakenca maka anggota perpulungen si erlagu la mehuli e me sekalak pemimpin perpulungen. Pemimpin perpulungen i jenda banci sekalak serayan entah pe sekalak si ituaken si tuhu-tuhu ihamati i tengah-tengah perpulungen. Istilah “ragi” i bas ay. 6-8 banci jadi petunjuk maka si ngelakoken dosa e me sekalak si lit bas ia pengaruh si mbelin i tengah-tengah perpulungen.

Persoalen si lit i tengah-tengah perpulungen Korinti labo saja soal litna sekalak pemimpin si erlagu la mehuli, tapi melala ka pemimpin si deban si menutup-nutupi (melindungi, membiarkan, pura-pura tidak mengetahui) perbahanen si la mehuli si ilakoken temanna i bas perpulungen kalak si tek, amin pe mungkin enggo rusur itegur, isingetken, rsd. Istilah si igunaken Paulus guna nggambarkenca situasi ndai e me “meganjang ukurndu” (terj. bhs. Ind., nina : sombong, kemegahanmu, tinggi hati). Perbahanen si la mehuli e enggo mbar i tengah-tengah perpulungen janah enggo jadi cakap negatif i tengah-tengah masyarakat si lit i luar perpulungen. Situasi si bagenda rupana seh ku rasul Paulus, emaka itulisken Paulus surat enda alu tegas, mungkin alu nada si merawa menanggapi persoalen si terjadi i tengah-tengah perpulungen Korinti paksa si e.

Selain erlua-lua, lit piga-piga perbahanen si la mehuli si deban si isebutken rasul Paulus si mungkin lit denga i tengah-tengah perpulungen Korinti (ay. 11) : rangap, nembah berhala, pengisak-ngisak, pemabuk, tukang kompas. Ertina lagu si la mehuli e labo terjeng erlua-lua tapi lit si debanna (bdk. Gal. 5:19-21). Penungkunenna, kai si arus ilakoken perpulungen Korinti? Man kalak si ngaku ia Kristen tapi ia perlua-lua, rangap, nembah berhala, pengisak-ngisak, pemabuk, tukang kompas, tegas rasul Paulus ngatakenca : ay. 3, arus iukum. Ay. 5, iendesken man Iblis. Ay. 9, ula erteman ras ia. Ay. 12, arus iadili ras ipedarat i bas perpulungen nari. I bas kinatana si terjadi i tengah-tengah perpulungen Korinti apakah e kerina ilakoken? La lit laporen kerna si e. Tapi si pasti adi rasul Paulus si memimpin perpulungen e enggo pasti ibahanna tindakan si tegas man kalak si ngaku Kristen tapi erlagu la mehuli apai ka adi si bersangkuten sekalak pemimpin si berpotensi mempengaruhi perpulungen si deban guna erlagu la mehuli secara berjamaah.

Tema i bas PA-ta sendah e me “Sirangilah perbahan si melket” alu tujun gelah Mamre sedar maka perbahanen si melket nembeh ate Dibata ras nadingken perbahanen si melket. Selaku kalak si tek si enggo iselamatken i bas Yesus Kristus tentuna tugasta pribadi lepas pribadi guna nggeluh rikutken peraten Dibata sebage tanda pengataken bujurta i bas keselamaten si enggo ialoken kita arah kinitekenta man Yesus Kristus. Adi e merupaken tanggung jawab pribadi maka si tuhu-tuhu meteh apakah enggo tuhu-tuhu kita nggeluh i bas kegeluhen si mbaru e me Dibata, dirinta masing-masing, ras kalak si ndeher ras kita si lit i sekelewetta, misalna ndehara (Moria), anak-anak, seninanta, turangta, orang tuanta, rsd. I bas si e tentuna kerina kalak si ndeher ras kita ndai banci jadi indikator man banta alu secara periodik nungkun apakah geluhta enggo sue ras peraten Dibata i bas Yesus Kristus entah lenga? Adi melala denga si man pekenan maka ertoto kita mindo gegeh man Dibata gelah ipengasupNa kita robah jadi Mamre si tuhu-tuhu erkemalangen man Dibata.

Adi rikutken ogenta sendah maka situhuna si jadi titik fokus e me lit lembaga si ikut muat bagin i bas membangun sistem gelah anggota-anggotana tuhu-tuhu terkondisi guna nggeluh ratur rikutken aturen-aturen si lit. Lembaga e ndai gelarna “Gereja”. Si jadi penungkunen apakah Gereja (entah pe lembaga kategorial i bas Gerejanta masing-masing) enggo tuhu-tuhu berfungsi sebage lembaga si bertanggung jawab i bas membina iman bage pe mengkondisikan anggota-anggotana nggeluh sue ras peraten Dibata? Adi enggo tentuna lit ketegasen i bas mengelola secara pastoral kasus-kasus si terjadi i tengah-tengah perpulungen. Janah kasus-kasus si terjadi labo terjeng soal erlua-lua entah pe mehuli kulana sope erjabu, melala kasus-kasus si deban si situhuna arus mendapat teguran keras, umpamana : korupsi, rentenir, judi, ras pinakit-pinakit sosial si debanna. Ketegasen i bas mengelola secara pastoral kasus-kasus si terjadi enda tentuna erpalasken Kata Dibata ras aturen-aturen si lit i bas Gerejanta si enggo iputusken i bas persidangan-persidangan, janah lit tingkaten-tingkatenna labo langsung-langsung mpedarat sekalak si ngelakoken si jahat.

Mungkin lit denga Gereja si permisif i bas mengelola kasus-kasus pelanggaran etika Kristen alu melala pertimbangen. Permisif maksudna sinik saja, pura-pura tidak tahu, bahkan mungkin bagi membiarkan ras membenarkan kasus-kasus pelanggaran etika Kristen si terjadi i tengah-tengah Gerejana. Pertimbangenna mungkin saja si melanggar ndai kalak si berpengaruh, melala senna, lit jabatenna, kalimbubu, rsd. I bas si e mari radu ras kita ertoto gelah Dibata si mereken kinipangen man banta kerina guna secara tegas ngelakoken kebenaran erpalasken Kata Dibata. Ogenta sendah mereken teladan man banta uga kinipangen ras ketegasen rasul Paulus i bas ia mengkondisikan perpulungenna gelah nggeluh sue ras peraten Dibata alu la ia mbiar menanggung resikona. Dibata si mpegegehi kita.