PA Kategorial GBKP Tgl. 4 - 10 Agustus 2019

PA MAMRE GBKP TGL. 4 - 10 AGT. 2019 (HUT RI)

Nrs. Pdt. L. Sinuhadji (Nrs. Bp. Rey Rapha Tarigan)

Ogen : 1 Petrus 2:16

Tema : KITA IMERDEKAKEN KRISTUS GUNA MABA KEMERDEKAAN MAN BANGSA-NA

Tujun : Gelah Mamre :

1) Meteh maka Dibata nge si mereken kemerdekaan man bangsaNa

2) Ngisi kemerdekaan alu nggeluh i bas biak Kristus

Metode : Sharing

I bas perikop ogenta sendah rasul Petrus mereken persinget man perpulungen kalak si tek si merap i belang-belang propinsi Pontus, Galati, Kapadokia, Asia ras Bitinia, gelah tetap paguh erkiniteken man Dibata i bas Yesus Kristus. Secara konkrit rasul Petrus ngatakenca maka amin pe status perpulungen e ndai kesilang ras mengongsi (pendatang dan perantau) tapi lagu langkahna arus mehuli (ay. 12 & 15), patuh nandangi kerina pemerentah si lit, termasuk mehamat man raja (ay. 13,14,17), nggeluh bagi budak Dibata (ay. 16), mehamat man kerina manusia, engkelengi teman si sada kiniteken, erkemalangen man Dibata (ay. 17). Secara khusus si jadi ogenta sendah ay. 16 nina, “Nggeluhlah bagi kalak bebas; tapi ula bahan kebebasenndu nutupi si jahat, tapi nggeluhlah bagi budak Dibata”, i bas terj. TB-LAI nina, “Hiduplah sebagai orang merdeka dan bukan seperti mereka yang menyalahgunakan kemerdekaan itu untuk menyelubungi kejahatan-kejahatan mereka, tetapi hiduplah sebagai hamba Allah”.

Merdeka rikutken KBBI ertina : 1) bebas dari perhambaan (perbudakan), penjajahan, dsb., berdiri sendiri. 2) Tidak terkena atau lepas dari tuntutan. 3) Tidak terikat, tidak bergantung kepada orang atau pihak tertentu, leluasa. Rikutken ogenta sendah merdeka ertina bebas i bas perbudakan nari sebab paksa si e nterem denga kaum budak, tapi i bas perpulungen kalak si tek enggo lanai lit perbedan antara budak ras tuan. I bas erti si deban, merdeka lit kaitenna ras warga negara Roma. Bagi rasul Paulus, ia warga negara Roma si lit bas ia hak-hak tertentu sebage warga negara Roma (bdk. Perb. Rasul 21:39; 22:25-29). Merdeka i bas erti si tersirat e me ibebasken i bas kuasa dosa nari alu kekeken Yesus Kristus i bas kematen nari. Adi rikutken ogenta sendah nina merdeka (bebas) e me nggeluh bagi budak Dibata (hamba Allah). Ertina, ukuren kemerdekaan Kristen e me ngikutken entah pe ngelakoken kerina si jadi peraten Dibata i bas Yesus Kristus. Adi rikutken perikopta sendah, kalak Kristen si enggo imerdekaken e me si : mehuli lagu langkahna, patuh nandangi si erkuasa, mehamat man kerina manusia, engkelengi teman si sada kiniteken, erkemalangen man Dibata.

PA-ta sendah i bas rangka menyambut HUT RI pe-74-ken, alu tema : “Kita imerdekaken Kristus guna maba kemerdekaan man bangsaNa, ras tujun gelah Mamre meteh maka Dibata nge si mereken kemerdekaan man bangsaNa ras ngisi kemerdekaan alu nggeluh i bas biak Kristus. Kerna tema ras tujun si pemena akap kami kerina kita enggo ngangkai kai si jadi tujun imerdekaken i bas Kristus. Rasul Petrus ngatakenca, “ula bahan kebebasenndu nutupi si jahat”, rasul Paulus ngatakenca i bas Gal. 5:13 nina “jagailah maka ola kebebasenndu e jadi alasen si erbahanca kam ikuasai perukurenndu secara manusia”. Kita imerdekaken guna ngelakoken kerina si jadi peraten Dibata. Kerna tujun si peduaken enda nge si akap kami arus terus-menerus siperjuangken, nggeluh i bas biak Kristus. i bas si e mari radu ras kita ertoto, sipindo gelah ipegegehi Dibata kita i bas kita nggeluh i bas biak Kristus.