PJJ GBKP Tgl. 4 - 10 Agustus 2019

PJJ GBKP TGL. 4 - 10 AGUSTUS 2019

Pdt. Larena br. Sinuhadji (Nd. Rey Rapha Tarigan)

MINGGU PERAWATAN INVENTARIS

Tema : SEHKEN PENAMPATNDU MPEKENA-KENA RUMAH PERTOTON (Nehemia 7:70-73)

Rumah Pertoton (Bait Suci) si pemena ibangun i bas jaman raja Salomo, i ja ibangunna selama 46 tahun (bdk. Joh. 2:20). Tapi i bas perdalanenna bangsa Israel terpecah dua, e me Israel selatan ras utara erkiteken Salomo lebih condong ukurna nandangi dibata-dibata diberu ras gundikna si 1.000 kalak asangken man Dibata. Israel utara lit 10 suku alu tetap memakai gelar “Israel” ras ibu kotana Samaria, sedangken Israel selatan 2 suku ngenca igelari “Yehuda” alu ibu kota Yerusalem. Kedungenna Israel utara italuken Assur ras Israel selatan italuken bangsa Babel, i ja duana bangsa enda bangsa kafir. E maka asum Babel menguasai Yehuda, Rumah Pertoton iciluk, termasuk perkakas-perkakas Rumah Pertoton ijarah ras iangkut ku Babel. I je me kedungen Rumah Pertoton fase si pemena. Fase si peduaken, Bait Suci mulai ipajekken ka asum bangsa Yehuda enggo mulih i bas pembuangen nari i teruh kepemimpinen Zerubabel, Ezra ras Nehemia. Secara khusus, Rumah Pertoton ipajekken ka i bas jaman Esra ras ipebengket (Esra 3:7-; 6:13-18). Dingen Nehemia si ertugas sebage juru inemen raja Persia, raja Artaserses, terpanggil guna mejekken tembok kuta Yerusalem (Nehemia 3).

Perikop si jadi renungen i bas PJJ-ta sendah nuriken kerna proses i bas majekken Rumah Pertoton Tuhan si enggo ibenaken i bas jaman Esra, i ja ituriken nterem i bas kalak Yehuda si mereken penampatna guna nggalari ongkos i bas majekken ras mpekena Rumah Pertoton Tuhan, ibenaken i bas Gubernur nari : 8 kg emas, 50 mangkuk, 530 jubah imam. Kepala-kepala Terpuk : 168 kg emas, 1.250 kg pirak. Ras i bas umat nari : 168 kg emas, 140 kg pir ras 67 jubah imam. Banci siidah, ibenaken i bas pemimpin nari, i ja pemimpin jadi contoh guna nehken persembahen i bas pekena Rumah Pertoton. Janah adi terdauhen sisiksiki kerna kegeluhen bangsa e labo ka i bas siatuasi si mejile termasuk soal perekonomianna, sebab kalak enda baru denga mulih bas pembuangen Babel nari; rumah, juma, dingen kuta ingan tading terulang denga. Tetapi semangat guna majekken ras mpekena Rumah Pertoton mbelin i bas bangsa e. Sabab rikutken pemahamen ras penggejapen bangsa e, Rumah Pertoton e me ingan (lambang kehadiren) Tuhan (1 Raja-raja 8:12-13).

Janah bahanta sekali enda dalam rangka mpersingeti kita i bas Minggu Perawaten Inventaris Gereja. Tata Gerejanta ngatakenca maka harta milik GBKP adalah milik Allah yang dipercayakan kepada GBKP dalam melaksanakan misinya, si arus itata kelola alu mehuli ras terus irawat. Ertina, kai pe si lit bas gedung Gerejanta Dibata si empuna ras ipakeken guna kemulian Dibata, membangun kiniteken perpulungen. Janah kita selaku aron Dibata ertanggung jawab i bas pengelolaanna; efektif, efisien ras berdaya guna. Sabab gedung Gereja ras kerina perkakas enggo si terbaik rikutken gegeh perpulungen ilitken. Ula sempat terkuan, membangun kita banci tapi guna mpekena-kena la sikap siban bage pe i bas pemakenna kurang maksimal. Ratusen juta sibangun Gerejanta tapi seminggu sekali ngenca sipake, i ja kurang maksimal i bas pemakenna. Tentuna enda banci jadi evaluasi man banta, guna ku lebe enda i ja Gereja (Serayan, Pengurus PJJ, Pengurus Kategorial ras perpulungen) arus tuhu-tuhu bergandengan tangan subuk i bas ngelitkenca perkakas, makekenca alu mehuli ras i bas perawatenna. Si perlu man gantin, gantilah; umpamana laptop guna penunjang ibadah tiap minggu. Sabab adi la ipekena entah pe iganti enggo pasti erbahanca perdalanen ibadah la badia. Contoh enda berlaku ku bas inventaris si deban; mic, sound system, kipas angin, bangku, bunga, taplak si mengikuti warna liturgis. Adi lenga lit, ilitken ras kenca enggo lit terus irawat alu mehuli. Adi kin perlu gotong royong guna pekena Gerejanta rikut ras inventaris si lit, sebulan sekali ilaksanaken PJJ Sektor secara bergiliren. Sikap gedung Gerejanta rikut ras kerina inventaris, mendukung kita semangat ndalani ibadahta, dingen arah si e Dibata ipermuliaken.