PJJ GBKP Tgl. 25 - 31 Agustus 2019

PJJ GBKP TGL. 25 - 31 AGUSTUS 2019

Pdt. Larena br. Sinuhadji (Nd. Rey Rapha Tarigan)

Tema : TUHAN MASU-MASU KAM (Ulangen 28:1-8)

(Enterpreneurship: Kesejahteran, Kesehaten, Lingkungen)

Kerina kita ersura-sura gelah tetap ipasu-pasu Tuhan geluhta. Ipasu-pasu Tuhan kesehatenta, keluarganta lit i bas dame, rejekinta maler rikutken pendahinta, anak-anakta sukses i bas pendidiken ras pendahinna rsd. Janah la sitik jelma termasuk kalak Kristen, ‘di kenca la alokenna pasu-pasu bagi si iarapkenna beralih ia, la nari ia ernalem man Tuhan tapi man kuasa si deban si banci iakapna cepat ras pasti mereken si ipindokenna e. Si jadi penungkunen apakah pasu-pasu Tuhan e hanya dalam bentuk materi?

Kitab Ulangen si jadi bahan PJJ-nta sendah ncidahken kerna hubungen sebab akibat si ialami kita, subuk i bas Ul. 28 ras 30 rumusna adi setia, patuh kita man Dibata maka ulihna ipasu-pasu Tuhan geluhta. Kebalikenna adi la kita setia, la erkemalangen baNa, la iikutken perentah-perentahNa maka ukumen ibereken Tuhan (lihat. Ul. 28:15-, Ul. 30:18 kernep kam). Tapi kedungenna rumus enda la nari tepat ialoken i bas peristiwa Job. I ja Job kalak si tutus er-Dibata tapi i bas perdalinen geluhna erbage-bage perbeben ialamina termasuk anak ras usahana kernep dalam sekejap mata. Ertina tantangen pe tetap ialami kalak si tutus er-Dibata dalam rangka ujian i bas kegeluhenna. Iarapken menang ia ngalaken ujian e gelah banci naik level kinitekenna. Sabab emas si banci ceda e pe isepuh gelah reh murnina, apai ka kinitekenta si ndauh ergan asangken emas.

Secara khusus i bas bindu 28 judulna “Pasu-pasu Tuhan man kalak si ngikutken Dibata” (terj. TB-LAI “Berkat”). Rikutken judul i bas Pustaka Si Badia, maka jelas, pasu-pasu man kalak si ngikutken Dibata, kebalikenna, si la ngikutken Dibata la ipasu-pasu tapi ipalu-palu. Pasu-pasu e terjadi adi siikutken Tuhan dingen alu tutus sipakeken kerina perentah-perentahNa. Kai saja bentuk pasu-pasu Dibata e?

- Bangsa Israel jadi bangsa si terbeliden asangken bangsa-bangsa si deban.

- Tuhan masu-masu kuta ras juma.

- Ertuah bayak, melala pupus, page, lembu ras biri-biri.

- Tuhan masu-masu sinuan-sinuanndu.

- Tuhan masu-masu kerina pendahin bangsa enda, dem lumbung-lumbungna alu gandum.

- Tuhan masu-masu ‘di kenca bangsa e erperang, maka talu ibahan Tuhan musuh-musuh bangsa e.

Secara konkrit, bentuk pasu-pasu Tuhan la nari langsung ibereken Tuhan arah surga berupa manna ras burung puyuh asum kalak enda erdalan i bas gurun pasir. Tapi kenca enggo bangsa e ngiani taneh Kanaan, bangsa Israel arus tetap setia man Tuhan dingen tugasna tep-tep wari pe arus ilakokenna, erbintuas ndahiken dahinna, maka arus idahiken. Sabab adi isinik-siniken saja labo nge kari lit page, biri-biri, lembu rsd. Ertina, surga enggo i doni, tapi manusia si enggo ibereken Dibata akal ras pikiren arus ngusahakenca alu mehuli dingen tetap erkemalangen man Tuhan.

Industri zaman genduari enggo 4.0 (four poin zero). Teknologi si canggih (serba digital) mengubah subuk i bas bidang ekonomi, ilmu ras tekologi, sosial budaya, bage pe politik. Teknologi canggih membuka peluang-peluang baru si memudahken kita guna berkomunikasi, membangun ekonomi asal nggit kita memanfaatkenca. Lapak on line : Lazada, Tokopedia, Blibli, OLX, Shopee, rsd. La perlu lit toko dingen pegawai si banci nampati kita (efektif, efisien, ras mengurangi biaya). Arah rumah entah i ja gia banci kita bertransaksi. Tapi adi la kita siap, kita hanya menjadi penonton ras konsumen saja. Kuncina lebe pindo gegeh ras kepentaren tole man Tuhan, ula alergi alu kemajuan jaman, kita arus berubah. Sabab adi la kita nggit berubah pasti kita akan tertinggal. Gereja ras kalak Kristen arus nggit terbuka terhadap perubahen si enggo lit i lebe-lebenta, belajar, cari peluang, pakeken peluang, membangun link ras si banci nampati kita (la banci kita main tunggal).

Sebage contoh, jambu batu (klutuk) enggo mbue isuan i daerah Minas ras Perawang ras piga-piga daerah si deban. Maun ‘di kenca melala produksi la tertampung distributor piah dungna kurang lako bahkan macik bage-bage saja. Mungkin adi Gereja banci membentuk wadah produsen jambu klutuk si erproduksi selain njadiken sirup, manisan jambu, sele jambu juga kripik jambu rsd. Cara mengemas arus lebih mejile, menarik ras hygenis. Cara mengelolasa adi kurang ka pemetehta kerja saja ras organisasi si deban si enggo leben ilakokenna. Ertina, pasu-pasu si enggo ibereken Dibata man banta la sisia-siaken tapi siberdayaken, jadi pasu-pasu (berkat) man banta jadi pasu-pasu ka man enterem kalak, Tuhan ipermuliaken.